“මහණෙනි, යම් තැනක මේ සා මහා ඉර්ධිමත් වූ, මේ සා මහානුභාව ඇති මේ සඳ හිරු දෙදෙනාගේ ආලෝකය නොවැටෙයි නම්, එබඳු හිස් වූ, නොවැසී ඇති, දැඩි අඳුර ඇති, ඝනාන්ධකාරය ඇති, ලෝකාන්තරිකයක් ඇත්තේය.”
මෙසේ වදාළ කල්හී එක්තරා භික්ෂුවක් භාග්‍යවතුන් වහන්සේට මෙය පැවසුවේ ය.
“ස්වාමීනී, එය ඒකාන්තයෙන් ම මහා අඳුරකි. ස්වාමීනි, එය ඒකාන්තයෙන් ම ඉතා මහත් අඳුරකි. ස්වාමීනී, මේ අන්ධකාරයට ත් වඩා ඉතා මහත් වූ ත්, ඉතාමත් භයානක වූ ත් අන්‍ය වූ අන්ධකාරයක් ඇත්තේ ද?”
“භික්ෂුව, මේ අන්ධකාරයට ත් වඩා ඉතා මහත් වූ ත්, ඉතාමත් භයානක වූ ත් අන්‍ය වූ අන්ධකාරයක් ඇත්තේ ය.”
“ස්වාමීනී, මේ අන්ධකාරයට ත් වඩා ඉතා මහත් වූ ත්, ඉතාමත් භයානක වූ ත් අන්‍ය වූ අන්ධකාරය කුමක් ද?”
“භික්ෂුව, යම්කිසි ශ්‍රමණයෝ වෙත්වා, බ්‍රාහ්මණයෝ වෙත්වා, ‘මෙය දුක යැ’ යි ඒ වූ සැටියෙන් ම අවබෝධ නොකරත් ද, ‘මෙය දුක හටගැනීම යැ’ යි ඒ වූ සැටියෙන් ම අවබෝධ නොකරත් ද, ‘මෙය දුක නිරුද්ධ වීම යැ’ යි ඒ වූ සැටියෙන් ම අවබෝධ නොකරත් ද, ‘මෙය දුක නිරුද්ධ වීම පිණිස ඇති ප්‍රතිපදාව යැ’ යි ඒ වූ සැටියෙන් ම අවබෝධ නොකරත් ද, ඔවුහු ඉපදීම පිණිස පවතින්නා වූ සංස්කාරයන් කෙරෙහි සතුටින් ඇලෙති. ජරාව පිණිස පවතින්නා වූ සංස්කාරයන් කෙරෙහි සතුටින් ඇලෙති. මරණය පිණිස පවතින්නා වූ සංස්කාරයන් කෙරෙහි සතුටින් ඇලෙති. ශෝක වැළපීම් දුක් දොම්නස් සුසුම් හෙලීම පිණිස පවතින්නා වූ සංස්කාරයන් කෙරෙහි සතුටින් ඇලෙති.
ඔවුහු ඉපදීම පිණිස පවතින්නා වූ සංස්කාරයන් කෙරෙහි සතුටින් ඇලුණාහු, ජරාව පිණිස පවතින්නා වූ සංස්කාරයන් කෙරෙහි සතුටින් ඇලුණාහු, මරණය පිණිස පවතින්නා වූ සංස්කාරයන් කෙරෙහි සතුටින් ඇලුණාහු, ශෝක වැළපීම් දුක් දොම්නස් සුසුම් හෙලීම පිණිස පවතින්නා වූ සංස්කාරයන් කෙරෙහි සතුටින් ඇලුණාහු, ඉපදීම පිණිස පවතින්නා වූ ත් සංස්කාරයන් රැස් කරති. ජරාව පිණිස පවතින්නා වූ ත් සංස්කාරයන් රැස් කරති. මරණය පිණිස පවතින්නා වූ ත් සංස්කාරයන් රැස් කරති. සෝක වැළපීම් දුක් දොම්නස් සුසුම් හෙලීම් පිණිස පවතින්නා වූ ත් සංස්කාරයන් රැස් කරති.
ඔවුහු ඉපදීම පිණිස පවතින්නා වූ ත් සංස්කාරයන් රැස් කොට, ජරාව පිණිස පවතින්නා වූ ත් සංස්කාරයන් රැස් කොට, මරණය පිණිස පවතින්නා වූ ත් සංස්කාරයන් රැස් කොට, සෝක වැළපීම් දුක් දොම්නස් සුසුම් හෙලීම් පිණිස පවතින්නා වූ ත් සංස්කාරයන් රැස් කොට, ඉපදීම නැමැති අන්ධකාරයට ත් වැටෙති. ජරාව නැමැති අන්ධකාරයට ත් වැටෙති. මරණය නැමැති අන්ධකාරයට ත් වැටෙති. සෝක වැළපීම් දුක් දොම්නස් සුසුම් හෙළීම් නම් අන්ධකාරයට ත් වැටෙති. ඔවුහු ඉපදීමෙන්, ජරාවෙන්, මරණයෙන්, ශෝකවලින්, වැළපීම්වලින්, දුක්වලින්, දොම්නස්වලින්, සුසුම් හෙළීම්වලින් නිදහස් නොවෙති. දුකින් නිදහස් නොවෙති යැයි කියමි.
භික්ෂුව, යම්කිසි ශ්‍රමණයෝ වෙත්වා, බ්‍රාහ්මණයෝ වෙත්වා, ‘මෙය දුක යැ’ යි ඒ වූ සැටියෙන් ම අවබෝධ කරත් ද, ‘මෙය දුක හටගැනීම යැ’ යි ඒ වූ සැටියෙන් ම අවබෝධ කරත් ද, ‘මෙය දුක නිරුද්ධ වීම යැ’ යි ඒ වූ සැටියෙන් ම අවබෝධ කරත් ද, ‘මෙය දුක නිරුද්ධ වීම පිණිස ඇති ප්‍රතිපදාව යැ’ යි ඒ වූ සැටියෙන් ම අවබෝධ කරත් ද, ඔවුහු ඉපදීම පිණිස පවතින්නා වූ සංස්කාරයන් කෙරෙහි නොඇලෙති. ජරාව පිණිස පවතින්නා වූ සංස්කාරයන් කෙරෙහි නොඇලෙති. මරණය පිණිස පවතින්නා වූ සංස්කාරයන් කෙරෙහි නොඇලෙති. ශෝක වැළපීම් දුක් දොම්නස් සුසුම් හෙලීම පිණිස පවතින්නා වූ සංස්කාරයන් කෙරෙහි නොඇලෙති.
ඔවුහු ඉපදීම පිණිස පවතින්නා වූ සංස්කාරයන් කෙරෙහි නොඇලුණාහු, ජරාව පිණිස පවතින්නා වූ සංස්කාරයන් කෙරෙහි නොඇලුණාහු, මරණය පිණිස පවතින්නා වූ සංස්කාරයන් කෙරෙහි නොඇලුණාහු, ශෝක වැළපීම් දුක් දොම්නස් සුසුම් හෙලීම පිණිස පවතින්නා වූ සංස්කාරයන් කෙරෙහි නොඇලුණාහු, ඉපදීම පිණිස පවතින්නා වූ ත් සංස්කාරයන් රැස් නොකරති. ජරාව පිණිස පවතින්නා වූ ත් සංස්කාරයන් රැස් නොකරති. මරණය පිණිස පවතින්නා වූ ත් සංස්කාරයන් රැස් නොකරති. සෝක වැළපීම් දුක් දොම්නස් සුසුම් හෙලීම් පිණිස පවතින්නා වූ ත් සංස්කාරයන් රැස් නොකරති.
ඔවුහු ඉපදීම පිණිස පවතින්නා වූ ත් සංස්කාරයන් රැස් නොකොට, ජරාව පිණිස පවතින්නා වූ ත් සංස්කාරයන් රැස් නොකොට, මරණය පිණිස පවතින්නා වූ ත් සංස්කාරයන් රැස් නොකොට, සෝක වැළපීම් දුක් දොම්නස් සුසුම් හෙලීම් පිණිස පවතින්නා වූ ත් සංස්කාරයන් රැස් නොකොට, ඉපදීම නැමැති අන්ධකාරයට ත් නොවැටෙති. ජරාව නැමැති අන්ධකාරයට ත් නොවැටෙති. මරණය නැමැති අන්ධකාරයට ත් නොවැටෙති. ශෝක, වැළපීම්, දුක්, දොම්නස්, සුසුම් හෙළීම් නැමැති අන්ධකාරයට ත් නොවැටෙති. ඔවුහු ඉපදීමෙන්, ජරාවෙන්, මරණයෙන්, ශෝකවලින්, වැළපීම්වලින්, දුක්වලින්, දොම්නස්වලින්, සුසුම් හෙළීම්වලින් නිදහස් වෙති. දුකින් නිදහස් වෙති යැයි කියමි.
එහෙයින් භික්ෂුව, මෙය දුක යැයි අවබෝධ කරනු පිණිස වීර්යය කළ යුත්තේ ය. මෙය දුකෙහි හටගැනීම යැයි අවබෝධ කරනු පිණිස වීර්යය කළ යුත්තේ ය. මෙය දුක් නිරුද්ධ වීම යැයි අවබෝධ කරනු පිණිස වීර්යය කළ යුත්තේ ය. මෙය දුක් නිරුද්ධවන්නා වූ මාර්ගය යැයි අවබෝධ කරනු පිණිස වීර්යය කළ යුත්තේ ය.
සාදු! සාදු!! සාදු!!!
අන්ධකාර සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn5_12-5-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M