ඛුද්දක නිකාය

ථේරී ගාථා

4. චතුක්ක නිපාතය

4. හතරවැනි නිපාත​ය

4.1. භද්දකාපිලානි ථේරීගාථා

4.1. භද්දකාපිලානි තෙරණියගේ ගාථා

63. පුත්තෝ බුද්ධස්ස දායාදෝ කස්සපෝ සුසමාහිතෝ,
පුබ්බේනිවාසං යෝ වේදි සග්ගාපායඤ්ච පස්සති.

63. මහා කාශ්‍යප ශ්‍රාවකයන් වහන්සේ බුදු සමිඳුන්ගේ දායාදයක්. බුදු සමිඳුන්ගේ පුත්‍රරත්නයක්. සමාහිත සිත් ඇති උන්වහන්සේ පෙර ගත කළ ජීවිත ගැනත්, ස්වර්ගය ගැනත්, අපාය ගැනත් දිවැසින් දකිනවා.

64. අථෝ ජාතික්ඛයං පත්තෝ අභිඤ්ඤාවෝසිතෝ මුනි,
ඒතාහි තීහි විජ්ජාහි තේවිජ්ජෝ හෝති බ්‍රාහ්මණෝ.

64. උන්වහන්සේ ඉපදීම ක්ෂය වෙලා අරහත්වයට පත්වෙලා ඉන්නෙ. ත්‍රිවිද්‍යාව ලබාගෙන ඉන්නෙ. උන්වහන්සේ සැබෑවට බ්‍රාහ්මණයෙක්.

65. තථේව භද්දාකාපිලානී තේවිජ්ජා මච්චුහායිනී,
ධාරේති අන්තිමං දේහං ජෙත්වා මාරං සවාහිනිං.

65. භද්දාකාපිලානිත් ඒ වගේමයි. ත්‍රිවිද්‍යාව ලබාගෙන ඉන්නෙ. සේනා සහිත මාරයාව පරදවල ඉන්නෙ. දැන් ඈ දරාගෙන ඉන්නෙ අන්තිම සිරුරයි.

66. දිස්වා ආදීනවං ලෝකේ උභෝ පබ්බජිතා මයං
ත්‍යම්හා ඛීණාසවා දන්තා සීතිභූතාම්හ නිබ්බුතාති.

66. අපි දෙන්නම මහණ වුණේ සංසාරෙ ආදීනව දැකලයි. අපි දෙන්නම දමනයට පත්වුණා. අරහත්වයට පත්වුණා. සිසිල් වුණා. නිවුණා.

ඉත්ථං සුදං භද්දාකාපිලානී ථේරී ගාථායෝ අභාසිත්ථා’ති.

මේ වනාහී භද්දාකාපිලානි නම් රහත් තෙරණිය වදාළ ගාථාවන්ය.

චතුක්කනිපාතෝ නිට්ඨිතෝ.

හතරවෙනි නිපාතය නිමා විය.

(ගාථා හතර බැගින් වදාළ කොටස නිමා විය)