2.1.2.1.
සැවැත් නුවරදී …………..
11. පින්වත් මහණෙනි, මේ බල දෙකක් තියෙනවා. ඒ දෙක මොනවා ද? නුවණින් කල්පනා කර බැලීමේ බලයත්, භාවනා බලයත්ය. පින්වත් මහණෙනි, නුවණින් කල්පනා කර බැලීමේ බලය කුමක් ද? පින්වත් මහණෙනි, මෙහි ඇතැම් කෙනෙක් මේ විදිහට නුවණින් කල්පනා කරලා බලනවා. ‘කයෙන් කරන දුසිරිත්වල පවිටු විපාක මෙලොව ජීවිතයේදී වගේම පරලොව ජීවිතයේ දීත් ලැබෙනවා. වචනයෙන් කරන දුසිරිත්වල පවිටු විපාකත් මෙලොව ජීවිතයේදී වගේම පරලොව ජීවිතයේදීත් ලැබෙනවා. සිතින් කරන දුසිරිත්වල පවිටු විපාකත් මෙලොව ජීවිතයේදී වගේම පරලොව ජීවිතයේදීත් ලැබෙනවා. ඉතින් ඔහු ඔය විදිහට නුවණින් කල්පනා කරල බලලා, කාය දුසිරිත අත්හරිනවා. කයෙන් සුචරිතය වඩනවා. වචී දුසිරිත අත්හරිනවා. වචනයෙන් සුචරිතය වඩනවා. මනෝ දුසිරිත් අත්හරිනවා. මනසින් සුචරිතය වඩනවා. තමන්ගේ ජීවිතය පිරිසිදුව ගත කරනවා. පින්වත් මහණෙනි, මේකට තමයි නුවණින් සිහි කර බැලීමේ බලය කියන්නේ.
පින්වත් මහණෙනි, භාවනා බලය කියන්නේ මොකක්ද? පින්වත් මහණෙනි, මෙහි යම් භාවනා බලයක් ඇති නම්, ඒ මේ (සෝතාපන්න මාර්ගය සිට අරහත් මාර්ගය තෙක් නිවන් මඟ වැඩීම) සේඛ බලයයි. පින්වත් මහණෙනි, ඔහු ඒ සේඛ බලයට පැමිණිලා රාගය අත්හැරලා දානවා. ද්වේෂය අත්හැරලා දානවා. මෝහය අත්හැරලා දානවා. රාගය අත්හැරලා, ද්වේෂය අත්හැරලා, මෝහය අත්හැරලා, යම් දෙයක් අකුසල් නම්, ඒවා කරන්නේ නෑ. යම් දෙයක් පව් නම් ඒවා සේවනය කරන්නේ නෑ. පින්වත් මහණෙනි, මේකට තමයි භාවනා බලය කියලා කියන්නෙ. පින්වත් මහණෙනි, මේ තමයි ඒ බලයන් දෙක.
2.1.2.2.
12. පින්වත් මහණෙනි, මේ බල දෙකක් තියෙනවා. ඒ දෙක මොනවාද? නුවණින් කල්පනා කර බැලීමේ බලයත්, භාවනා බලයත් ය. පින්වත් මහණෙනි, නුවණින් කල්පනා කර බැලීමේ බලය කුමක්ද? පින්වත් මහණෙනි, මෙහි ඇතැම් කෙනෙක් මේ විදිහට නුවණින් කල්පනා කරලා බලනවා. ‘කයෙන් කරන දුසිරිත්වල පවිටු විපාක මෙලොව ජීවිතයේදී වගේම පරලොව ජීවිතයේදීත් ලැබෙනවා. වචනයෙන් කරන දුසිරිත්වල පවිටු විපාකත් මෙලොව ජීවිතයේදී වගේම පරලොව ජීවිතයේදීත් ලැබෙනවා. සිතින් කරන දුසිරිත්වල පවිටු විපාකත් මෙලොව ජීවිතයේදී වගේම පරලොව ජීවිතයේදීත් ලැබෙනවා. ඉතින් ඔහු ඔය විදිහට නුවණින් කල්පනා කරල බලලා, කාය දුසිරිත අත්හරිනවා. කයෙන් සුචරිතය වඩනවා. වචී දුසිරිත අත්හරිනවා. වචනයෙන් සුචරිතය වඩනවා. මනෝ දුසිරිත් අත්හරිනවා. මනසින් සුචරිතය වඩනවා. තමන්ගේ ජීවිතය පිරිසිදුව ගත කරනවා. පින්වත් මහණෙනි, මේකට තමයි නුවණින් සිහි කර බැලීමේ බලය කියන්නේ.
පින්වත් මහණෙනි, භාවනා බලය කියන්නේ මොකක්ද? පින්වත් මහණෙනි, මෙහි භික්ෂුව විවේකය සහිත, නොඇලීම සහිත, කෙලෙස් නැති කිරීමෙන් යුතුව, නිවනට යොමු වුන සතිය නැමැති සම්බොජ්ඣංගය (නිවනට අංගය) වඩනවා. ….(පෙ)…. ධර්මය නුවණින් සිහි කිරීම නැමැති සම්බොජ්ඣංගය වඩනවා. ….(පෙ)…. වීරිය නැමැති සම්බොජ්ඣංගය වඩනවා. ….(පෙ)…. ප්‍රීතිය නැමැති සම්බොජ්ඣංගය වඩනවා. ….(පෙ)…. පස්සද්ධි (සිත කය සංසිඳීම) සම්බොජ්ඣංගය වඩනවා. ….(පෙ)…. සමාධි සම්බොජ්ඣංගය වඩනවා. ….(පෙ)…. විවේකය සහිත, නොඇලීම සහිත, කෙලෙස් නැති කිරීමෙන් යුතුව, නිවනට යොමු වුන උපේක්ෂා සම්බොජ්ඣංගය වඩනවා. පින්වත් මහණෙනි, මේකට තමයි භාවනා බලය කියලා කියන්නෙ. පින්වත් මහණෙනි, මේ තමයි බලයන් දෙක.
2.1.2.3.
13. පින්වත් මහණෙනි, මේ බල දෙකක් තියෙනවා. ඒ දෙක මොනවාද? නුවණින් කල්පනා කර බැලීමේ බලයත්, භාවනා බලයත්ය. පින්වත් මහණෙනි, නුවණින් කල්පනා කර බැලීමේ බලය කුමක්ද? පින්වත් මහණෙනි, මෙහි ඇතැම් කෙනෙක් මේ විදිහට නුවණින් කල්පනා කරලා බලනවා. ‘කයෙන් කරන දුසිරිත්වල පවිටු විපාක මෙලොව ජීවිතයේදී වගේම පරලොව ජීවිතයේදීත් ලැබෙනවා. වචනයෙන් කරන දුසිරිත්වල පවිටු විපාකත් මෙලොව ජීවිතයේදී වගේම පරලොව ජීවිතයේදීත් ලැබෙනවා. සිතින් කරන දුසිරිත්වල පවිටු විපාකත් මෙලොව ජීවිතයේදී වගේම පරලොව ජීවිතයේදීත් ලැබෙනවා. ඉතින් ඔහු ඔය විදිහට නුවණින් කල්පනා කරල බලලා, කාය දුසිරිත අත්හරිනවා. කයෙන් සුචරිතය වඩනවා. වචී දුසිරිත අත්හරිනවා. වචනයෙන් සුචරිතය වඩනවා. මනෝ දුසිරිත් අත්හරිනවා. මනසින් සුචරිතය වඩනවා. තමන්ගේ ජීවිතය පිරිසිදුව ගත කරනවා. පින්වත් මහණෙනි, මේකට තමයි නුවණින් සිහි කර බැලීමේ බලය කියන්නේ.
පින්වත් මහණෙනි, භාවනා බලය කියන්නේ මොකක්ද? පින්වත් මහණෙනි, මෙහිලා භික්ෂුව කාමයන්ගෙන් වෙන්ව, අකුසලයන්ගෙන් වෙන්ව, විතර්ක සහිත වූ, විචාර සහිත වූ, විවේකයෙන් හට ගත් ප්‍රීති සුඛය ඇති පළමු වෙනි ධ්‍යානය උපදවාගෙන වාසය කරනවා. ඒ වගේම විතක්ක විචාරයන්ගේ සංසිඳීමෙන් ආධ්‍යාත්මිකව පැහැදීම ඇතිව සිතෙහි මනා එකඟ බවෙන් යුතුව විතර්ක රහිත, විචාර රහිත, සමාධියෙන් හටගත්, ප්‍රීති සුඛය ඇති දෙවෙනි ධ්‍යානය උපදවාගෙන වාසය කරනවා. ඒ වගේම ප්‍රීතියටද නොඇලීමෙන් උපේක්ෂාවෙන් යුතුව වාසය කරනවා. සිහියෙන් නුවණින් යුතුව කයෙන් සැපයක්ද විඳිනවා. ආර්යයන් වහන්සේලා යම් ධ්‍යානයකට උපේක්ෂා සහගත සිහිය ඇති සැප විහරණය යැයි පවසනවාද, ඒ තුන්වන ධ්‍යානයත් උපදවා ගෙන වාසය කරනවා. ඒ වගේම සැපයද ප්‍රහාණය කිරීමෙන්, දුකද ප්‍රහාණය කිරීමෙන් කලින්ම සොම්නස් දොම්නස් දෙක ඉක්ම යෑමෙන් දුක් සැප රහිත වූ පාරිශුද්ධ උපේක්ෂා සහගත සතිය ඇති සතර වෙනි ධ්‍යානය උපදවා ගෙන වාසය කරනවා. පින්වත් මහණෙනි, මේකට තමයි කියන්නේ භාවනා බලය කියලා. මේ තමයි පින්වත් මහණෙනි, බල දෙක.
2.1.2.4
14. පින්වත් මහණෙනි, තථාගතයන් වහන්සේගේ මේ ධර්ම දේශනා ක්‍රම දෙකක් තියෙනවා. කවර දේශනා ක්‍රම දෙකක්ද? අරුත් කැටි කොට කෙටියෙන් දේශනා කිරීමත්, විස්තර වශයෙන් දේශනා කිරීමත්ය. පින්වත් මහණෙනි, මේ තමයි තථාගතයන් වහන්සේගේ ඒ ධර්ම දේශනා ක්‍රම දෙක.
2.1.2.5.
15. පින්වත් මහණෙනි, යම්කිසි ආරවුලකට (ඇවැත්වලින් හටගත් ප්‍රශ්නයකට) පත් වූ භික්ෂුවත්, ඒ සඳහා ඇවැතින් චෝදනා කරන භික්ෂුවත්, තම තමන් ගැනම නුවණින් කල්පනා කරලා බලන්නේ නැත්නම්, පින්වත් මහණෙනි, මේ ආරවුල සම්බන්ධයෙන් කැමැති විය යුත්තේ මෙයයි. මේ ආරවුල විසඳීම බොහෝ කල් ගත වීමත්, නොයෙක් රළුපරළු බස් පැවතීමත්, අඬදබර සහිත වීමත් පවතින්නේය, භික්ෂූහුද සුවසේ නොවසන්නාහුය යන කරුණයි.
පින්වත් මහණෙනි, යම්කිසි ආරවුලකට (ඇවැත්වලින් හටගත් ප්‍රශ්නයකට) පත් වූ භික්ෂුවත්, ඒ සඳහා ඇවැතින් චෝදනා කරන භික්ෂුවත්, තම තමන් ගැනම නුවණින් කල්පනා කරලා බලනවා නම්, පින්වත් මහණෙනි, මේ ආරවුල සම්බන්ධයෙන් කැමැති විය යුත්තේ මෙයයි. මේ ආරවුල විසඳීම බොහෝ කල් ගත නොවීමත්, නොයෙක් රළුපරළු බස් නොපැවතීමත්, අඬදබර සහිත නොවීමත් පවතින්නේය, භික්ෂූහුද සුවසේ වසන්නාහුය යන කරුණයි.
පින්වත් මහණෙනි, ඇවැතට පත් වූ භික්ෂුවක් තමා විසින් තමා ගැනම මනා කොට නුවණින් විමසා බලන්නේ කොයි ආකාරයෙන්ද? පින්වත් මහණෙනි, මෙකරුණෙහිලා ඇවැතට පත් වූ භික්ෂුව මේ ආකාරයෙන් නුවණින් විමසයි. ‘මා වනාහී මේ කයෙන් සිදුවන්නා වූ යම්කිසි අකුසල ආපත්තියකට පත් වෙලා ඉන්නෙ. ඉතින් අර භික්ෂුව කයෙන් සිදු වන්නා වූ යම්කිසි අකුසල ආපත්තියකට පත් වෙන්නා වූ මාව දැක්කා. ඉදින් මා වනාහී මේ කයෙන් සිදුවන්නා වූ යම්කිසි අකුසල ආපත්තියකට පත් නොවුනා නම්, අර භික්ෂුව කයෙන් සිදුවන්නා වූ යම් කිසි අකුසල ආපත්තියකට පත් වෙන්නා වූ මාව දකින්නේ නෑ. යම් කරුණක් නිසා මා වනාහී මේ කයෙන් සිදුවන්නා වූ යම් කිසි අකුසල ආපත්තියකට පත් වෙලා ඉන්නවා නම්, එකරුණ නිසාමයි අර භික්ෂුව කයෙන් සිදුවන්නා වූ යම්කිසි අකුසල ආපත්තියකට පත් වෙන්නා වූ මාව දැක්කෙ. ඒ භික්ෂුව කයෙන් සිදුවන්නා වූ යම්කිසි අකුසල ආපත්තියකට මා පත් වෙනවා දැක්ක නිසා සතුටට පත් වුනේ නෑ. නොසතුටු සිතින් යුතුවමයි ඒ භික්ෂුව මා හට නොසතුටු බස් දෙඩුවේ. ඉතින් ඒ භික්ෂුව විසින් නොසතුටු බස් කියද්දී මා තුළ සතුටක් ඇති වුනේ නෑ. මා මෙය අනුන්ට කිව්වෙත් නොසතුටු සිතින්මයි. මේ විදිහට භාණ්ඩයකට බදු ගෙවන කෙනෙක් වගේ මටත් මේ ආරවුලේදී මගේ වරදමයි දිගින් දිගට ගියේ’ කියලා. පින්වත් මහණෙනි, ඔය ආකාරයෙන් ඇවැතට පත් වුන භික්ෂුව තමා විසින් මනාකොට නුවණින් විමස විමසා බැලිය යුත්තේ තමන් ගැනමයි.
පින්වත් මහණෙනි, (අනුන්ගේ ඇවැතකට) චෝදනා කරන්නා වූ භික්ෂුවක් තමා විසින් තමා ගැනම මනා කොට නුවණින් විමසා බලන්නේ කොයි ආකාරයෙන්ද? පින්වත් මහණෙනි, මෙකරුණෙහිලා චෝදනා කරන්නා වූ භික්ෂුව මේ ආකාරයෙන් නුවණින් විමසයි. ‘මේ භික්ෂුව වනාහී මේ කයෙන් සිදුවන්නා වූ යම්කිසි අකුසල ආපත්තියකට පත් වෙලා ඉන්නෙ. ඉතින් මේ භික්ෂුව කයෙන් සිදු වන්නා වූ යම්කිසි අකුසල ආපත්තියකට පත් වෙන අයුරු මා දැක්කා. ඉදින් මේ භික්ෂුව වනාහී මේ කයෙන් සිදුවන්නා වූ යම්කිසි අකුසල ආපත්තියකට පත් නොවුනා නම්, කයෙන් සිදුවන්නා වූ යම්කිසි අකුසල ආපත්තියකට පත් වෙන්නා වූ මේ භික්ෂුව මා දකින්නේ නෑ. යම් කරුණක් නිසා මේ භික්ෂුව වනාහී මේ කයෙන් සිදුවන්නා වූ යම්කිසි අකුසල ආපත්තියකට පත් වෙලා ඉන්නවා නම්, එකරුණ නිසාමයි කයෙන් සිදුවන්නා වූ යම්කිසි අකුසල ආපත්තියකට පත් වෙන්නා වූ මේ භික්ෂුව මා හට දැක ගන්න ලැබුනේ. ඒ භික්ෂුව කයෙන් සිදුවන්නා වූ යම්කිසි අකුසල ආපත්තියකට පත් වෙනවා මා විසින් දැක්ක නිසා ඒ ගැන මා සතුටට පත් වුනේ නෑ. මා නොසතුටු සිතින් යුතුවමයි ඒ භික්ෂුවට නොසතුටු බස් දෙඩුවේ. ඉතින් මා විසින් නොසතුටු බස් කියද්දී ඒ භික්ෂුව තුළ සතුටක් ඇති වුනේ නෑ. මා මෙය අනුන්ට කිව්වෙත් නොසතුටු සිතින්මයි. මේ විදිහට භාණ්ඩයකට බදු ගෙවන කෙනෙක් වගේ මටත් මේ ආරවුලේදී මගේ වරදමයි දිගින් දිගට ගියේ’ කියලා. පින්වත් මහණෙනි, ඔය ආකාරයෙන් චෝදනා කරන භික්ෂුව තමා විසින් නුවණින් විමස විමසා බැලිය යුත්තේ තමන් ගැනමයි.
පින්වත් මහණෙනි, යම්කිසි ආරවුලකට (ඇවැත්වලින් හටගත් ප්‍රශ්නයකට) පත් වූ භික්ෂුවත්, ඒ සඳහා ඇවැතින් චෝදනා කරන භික්ෂුවත්, තම තමන් ගැනම නුවණින් කල්පනා කරලා බලන්නේ නැත්නම්, පින්වත් මහණෙනි, මේ ආරවුල සම්බන්ධයෙන් කැමැති විය යුත්තේ මෙයයි. මේ ආරවුල විසඳීම බොහෝ කල් ගත වීමත්, නොයෙක් රළුපරළු බස් පැවතීමත්, අඬදබර සහිත වීමත් පවතින්නේය, භික්ෂූහුද සුවසේ නොවසන්නාහුය යන කරුණයි.
පින්වත් මහණෙනි, යම්කිසි ආරවුලකට (ඇවැත්වලින් හටගත් ප්‍රශ්නයකට) පත් වූ භික්ෂුවත්, ඒ සඳහා ඇවැතින් චෝදනා කරන භික්ෂුවත්, තම තමන් ගැනම නුවණින් කල්පනා කරලා බලනවා නම්, පින්වත් මහණෙනි, මේ ආරවුල සම්බන්ධයෙන් කැමැති විය යුත්තේ මෙයයි. මේ ආරවුල විසඳීම බොහෝ කල් ගත නොවීමත්, නොයෙක් රළුපරළු බස් නොපැවතීමත්, අඬදබර සහිත නොවීමත් පවතින්නේය, භික්ෂූහුද සුවසේ වසන්නාහුය යන කරුණයි.
2.1.2.6.
16. එකල්හි එක්තරා බ්‍රාහ්මණයෙක් භාග්‍යවතුන් වහන්සේ බැහැදකින්න පැමිණියා. පැමිණ භාග්‍යවතුන් වහන්සේ සමඟ සතුටු වුනා. සතුටු විය යුතු සතුටින් සිහි කළ යුතු ඒ පිළිසඳර කතා බහ අවසන් කරලා එකත්පස්ව වාඩි වුනා. එකත්පස්ව වාඩි වුන ඒ බ්‍රාහ්මණයා භාග්‍යවතුන් වහන්සේට මෙහෙම කිව්වා. “භවත් ගෞතමයන් වහන්ස, යම් දෙයක් නිසා මෙහි මේ සමහර සත්වයින්, කය බිඳිලා මැරුණට පස්සේ අපාය නම් වූ, දුගතිය නම් වූ, විනිපාත නම් වූ, නිරයේ උපදිනවා නම්, ඒකට හේතුව කුමක්ද? කාරණය කුමක්ද?”
(භාග්‍යවතුන් වහන්සේ) :
“පින්වත් බ්‍රාහ්මණය, අධාර්මිකව ජීවත් වීම, විෂමව ජීවත් වීම යන කරුණු නිසා තමයි මේ සමහර සත්වයින් කය බිඳිලා මැරුණට පස්සේ අපාය නම් වූ, දුගතිය නම් වූ, විනිපාත නම් වූ නිරයේ උපදින්නේ.”
(බ්‍රාහ්මණයා) :
“පින්වත් ගෞතමයන් වහන්ස, යම් දෙයක් නිසා මෙහි මේ සමහර සත්වයින් කය බිඳිලා මැරුණට පස්සේ සුගතිය නම් වූ දෙව් ලොව උපදිනවා නම් ඒකට හේතුව මොකක්ද? කාරණය මොකක්ද?”
(භාග්‍යවතුන් වහන්සේ) :
“පින්වත් බ්‍රාහ්මණය, ධාර්මිකව ජීවත් වීම, යහපත්ව ජීවත් වීම යන කරුණු නිසා තමයි මේ සමහර සත්වයින් කය බිඳිලා මැරුණට පස්සේ සුගතිය නම් වූ දෙව් ලොව උපදින්නේ.”
(බ්‍රාහ්මණයා) :
“භවත් ගෞතමයන් වහන්ස, ඉතා සුන්දරයි! භවත් ගෞතමයන් වහන්ස, ඉතා සුන්දරයි! යටට හරවා තිබූ දෙයක් උඩු අතට හැරෙව්වා වගෙයි. වහලා තිබුණු දෙයක් ඇරලා පෙන්නුවා වගෙයි. මං මුලා වූවන්ට නියම මග පෙන්වා දෙනවා වගෙයි. ඇස් ඇති උදවියට රූප දකින්න අඳුරෙහි තෙල් පහනක් දල්වා ගෙන දරා සිටිනවා වගෙයි. ඔය විදිහට භවත් ගෞතමයන් වහන්සේ විසින් නොයෙක් අයුරින් ශ්‍රී සද්ධර්මය වදාළා. ස්වාමීනී, මේ මමත් භවත් ගෞතමයන් වහන්සේව සරණ යනවා. ශ්‍රී සද්ධර්මයත්, ආර්ය මහා සංඝරත්නයත් සරණ යනවා. ස්වාමීනී, මං ගැන අද පටන් දිවි තිබෙන තුරාවටම තෙරුවන් සරණ ගිය උපාසකයෙක් ලෙස සළකන සේක්වා!”
2.1.2.7.
17. එදා ජානුස්සෝණි බ්‍රාහ්මණයා භාග්‍යවතුන් වහන්සේ බැහැදකින්න පැමිණියා. පැමිණ භාග්‍යවතුන් වහන්සේ සමඟ සතුටු වුනා. ….(පෙ)…. එකත්පස් ව වාඩි වුන ඒ ජානුස්සෝණි බ්‍රාහ්මණයා භාග්‍යවතුන් වහන්සේට මේ විදිහට කිව්වා. “භවත් ගෞතමයන් වහන්ස, යම් දෙයක් නිසා මෙහි මේ සමහර සත්වයින්, කය බිඳිලා මැරුණට පස්සේ අපාය නම් වූ, දුගතිය නම් වූ, විනිපාත නම් වූ, නිරයේ උපදිනවා නම්, ඒකට හේතුව කුමක්ද? කාරණය කුමක්ද?”
(භාග්‍යවතුන් වහන්සේ) :
“පින්වත් බ්‍රාහ්මණය, කළ නිසාත්, නොකළ නිසාත් තමයි මෙහි මේ සමහර සත්වයින් කය බිඳිලා මැරුණට පස්සේ අපාය නම් වූ, දුගතිය නම් වූ, විනිපාත නම් වූ නිරයේ උපදින්නේ.”
(බ්‍රාහ්මණයා) :
“භවත් ගෞතමයන් වහන්ස, යම් දෙයක් නිසා මේ සමහර සත්වයින් කය බිඳිලා මැරුණට පස්සේ සුගතිය නම් වූ දෙව් ලොව උපදිනවා නම් ඒකට හේතුව කුමක්ද? කාරණය කුමක්ද?”
(භාග්‍යවතුන් වහන්සේ) :
“පින්වත් බ්‍රාහ්මණය, කළ නිසාත්, නොකළ නිසාත් තමයි මෙහි මේ සමහර සත්වයින් කය බිඳිලා මැරුණට පස්සේ සුගතිය නම් වූ දෙව් ලොව උපදින්නේ.”
(බ්‍රාහ්මණයා) :
“අනේ! මට නම් භවත් ගෞතමයන් වහන්සේ විස්තරාත්මකව බෙදා නොවදාළ, මේ කෙටියෙන්ම වදාළ කාරණයේ අර්ථය විස්තරාත්මකව වැටහෙන්නේ නෑ. භවත් ගෞතමයන් වහන්ස, භවත් ගෞතමයන් වහන්සේ දැන් විස්තරාත්මකව බෙදා නොවදාළ, කෙටියෙන්ම වදාළ මේ කාරණයේ අර්ථය වැටහෙන විදිහට ධර්මය දේශනා කරන සේක් නම්, කොයිතරම් හොඳද?”
“එහෙනම් පින්වත් බ්‍රාහ්මණය අහන්න. හොඳින් සිහි කරන්න. මම කියා දෙන්නම්.” “එසේය, පින්වතුන් වහන්ස” කියලා ජානුස්සෝණි බ්‍රාහ්මණයා භාග්‍යවතුන් වහන්සේට උත්තර දුන්නා. භාග්‍යවතුන් වහන්සේ මේ විදිහට වදාළා.
“පින්වත් බ්‍රාහ්මණය, මෙහි මේ සමහර කෙනෙක් කයෙන් දුසිරිත් කරලා තියෙනවා. කයෙන් සුසිරිත් කරලා නෑ. වචනයෙන් දුසිරිත් කරලා තියෙනවා. වචනයෙන් සුසිරිත් කරලා නෑ. සිතින් දුසිරිත් කරලා තියෙනවා. සිතින් සුසිරිත් කරලා නෑ. මෙන්න මේ විදිහටයි පින්වත් බ්‍රාහ්මණය, (දුසිරිත්) කළ නිසාත්, (සුසිරිත්) නොකළ නිසාත්, තමයි මෙහි සමහර සත්වයින් කය බිඳිලා මැරුණට පස්සේ අපාය නම් වූ දුගතිය නම් වූ විනිපාත නම් වූ නිරයේ උපදින්නේ.
පින්වත් බ්‍රාහ්මණය, මෙහි මේ සමහර කෙනෙක් කයෙන් සුසිරිත් කරලා තියෙනවා. කයෙන් දුසිරිත් කරලා නෑ. වචනයෙන් සුසිරිත් කරලා තියෙනවා. වචනයෙන් දුසිරිත් කරලා නෑ. සිතින් සුසිරිත් කරලා තියෙනවා. සිතින් දුසිරිත් කරලා නෑ. පින්වත් බ්‍රාහ්මණය, මෙන්න මේ විදිහට (සුසිරිත්) කළ නිසාත්, (දුසිරිත්) නොකළ නිසාත්, තමයි මෙහි මේ සමහර සත්වයින් කය බිඳිලා මැරුණට පස්සේ සුගතිය නම් වූ දෙව් ලොව උපදින්නේ.”
(බ්‍රාහ්මණයා) :
“භවත් ගෞතමයන් වහන්ස, ඉතා මනහරයි! ….(පෙ)…. භවත් ගෞතමයන් වහන්සේ අද පටන් දිවි තිබෙන තුරාවටම තෙරුවන් සරණ ගිය උපාසකයෙක් හැටියට මාව පිළිගන්නා සේක්වා!”
2.1.2.8.
18. එදා ආයුෂ්මත් ආනන්ද තෙරුන් භාග්‍යවතුන් වහන්සේ වෙත පැමිණුනා. පැමිණ භාග්‍යවතුන් වහන්සේට ආදරයෙන් වන්දනා කොට එකත්පස්ව වාඩි වුනා. එකත්පස්ව වාඩි වුන ආයුෂ්මත් ආනන්ද තෙරුන්ට භාග්‍යවතුන් වහන්සේ මේ විදිහට වදාළා.
“පින්වත් ආනන්ද, ඒකාන්තයෙන්ම කාය දුසිරිත, වචී දුසිරිත, මනෝ දුසිරිත නොකළ යුතුයි කියලයි මා කියන්නේ.”
(ආනන්ද තෙරුන්) :
“ඉතින් ස්වාමීනී, භාග්‍යවතුන් වහන්සේ ඒකාන්තයෙන්ම යම් කාය දුසිරිතක්, වචී දුසිරිතක්, මනෝ දුසිරිතක් නොකළ යුතුමයි කියලා වදාළා නෙව. ඒ නොකළ යුතු දේ කරන කොට මොන වගේ ආදීනවද කැමති වෙන්න තියෙන්නේ?”
(භාග්‍යවතුන් වහන්සේ) :
“පින්වත් ආනන්ද, මා විසින් ඒකාන්තයෙන්ම නොකළ යුතුයි කියලා වදාළ යම් කාය දුසිරිතක්, වචී දුසිරිතක්, මනෝ දුසිරිතක් ඇත්නම්, ඒ නොකළ යුතු දේවල් කරන කොට මෙන්න මේ ආදීනව තමයි කැමැති වෙන්න තියෙන්නේ.
තමන්ම තමන්ට චෝදනා කරනවා. ඤාණවන්ත උදවියත් ඒවා දැන ගෙන ගරහනවා. පවිටු වූ අපකීර්ති රාවයකුත් පැතිරෙනවා. සිහි මුලා වෙලා මිය පරලොව යනවා. කය බිඳී මැරුණට පස්සේ අපාය නම් වූ, දුගතිය නම් වූ, විනිපාත නම් වූ, නිරයේ උපදිනවා.
පින්වත් ආනන්ද, මා විසින් ඒකාන්තයෙන්ම යම් කාය දුසිරිතක්, වචී දුසිරිතක්, මනෝ දුසිරිතක් නොකළ යුතුයි කියල වදාළාද, ඉතින් ඒ නොකළ යුතු දේ කරන කොට ඔය ආදීනව තමයි කැමැති වෙන්න තියෙන්නේ.
පින්වත් ආනන්ද, ඒකාන්තයෙන්ම මේ කාය සුචරිතය, වචී සුචරිතය, මනෝ සුචරිතය, කළ යුතුයි කියලයි මා කියන්නේ.”
(ආනන්ද තෙරුන්) :
“ඉතින් ස්වාමීනී, භාග්‍යවතුන් වහන්සේ ඒකාන්තයෙන්ම යම් කාය සුචරිතයක්, වචී සුචරිතයක්, මනෝ සුචරිතයක් කළ යුතුමයි කියලා වදාළා නෙව. ඒ කළ යුතු දේ කරන කොට මොන වගේ ආනිශංසද කැමති වෙන්න තියෙන්නේ?”
(භාග්‍යවතුන් වහන්සේ) :
“පින්වත් ආනන්ද, මා විසින් ඒකාන්තයෙන්ම යම් කාය සුචරිතයක්, වචී සුචරිතයක්, මනෝ සුචරිතයක් කළ යුතුමයි කියලා වදාළාද, ඒ කළ යුතු දේ කරන කොට මෙන්න මේ ආනිශංස තමයි කැමැති වෙන්න තියෙන්නේ.
තමනුත් තමන්ට දොස් කියන්නේ නෑ. ඤාණවන්ත උදවියත් දැනගෙන ප්‍රශංසා කරනවා. යහපත් වූ කීර්ති රාවයකුත් පැතිරෙනවා. සිහි මුලා වෙන්නෙ නැතුව මිය පරලොව යනවා. කය බිඳිල මිය පරලොව ගියාට පස්සේ සුගතිය නම් වූ දෙව් ලොව උපදිනවා.
පින්වත් ආනන්ද, මා විසින් ඒකාන්තයෙන්ම යම් කාය සුචරිතයක්, වචී සුචරිතයක්, මනෝ සුචරිතයක් කළ යුතුමයි කියලා වදාළාද, ඒ කළ යුතු දේ කරන කොට මෙන්න මේ ආනිශංස තමයි කැමැති වෙන්න තියෙන්නේ.”
2.1.2.9.
පින්වත් මහණෙනි, අකුසලය අත්හරින්න. පින්වත් මහණෙනි, ඔය අකුසලය අත්හරින්න පුළුවනි. පින්වත් මහණෙනි, ඔය අකුසල් අත්හරින්න බැරි නම් මා මේ විදිහට ‘පින්වත් මහණෙනි, අකුසලය අත්හරින්න’ කියලා කියන්නේ නෑ. පින්වත් මහණෙනි, යම් හෙයකින් මේ අකුසලය අත්හරින්න පුළුවන් නිසා තමයි මා මේ විදිහට කියන්නේ. ‘පින්වත් මහණෙනි, අකුසලය අත්හරින්න’ කියලා. පින්වත් මහණෙනි, මේ අකුසලය ප්‍රහාණය වූ විට එය අයහපත පිණිස, දුක පිණිස හේතු වෙනවා නම්, මා මේ විදිහට ‘පින්වත් මහණෙනි, අකුසලය අත්හරින්න’ කියලා කියන්නේ නෑ. පින්වත් මහණෙනි, යම් විදිහකින් මේ අකුසලය ප්‍රහාණය වූ විට එය යහපත පිණිසම, සැපය පිණිසම හේතු වෙනවා. අන්න ඒ නිසා තමයි මා කියන්නේ, ‘පින්වත් මහණෙනි, අකුසලය අත්හරින්න’ කියලා.
පින්වත් මහණෙනි, කුසලය වඩන්න. කුසලය වඩන්නට පුළුවනි. පින්වත් මහණෙනි, කුසලය කියන්නෙ වඩන්න බැරි දෙයක් නම් මා මේ විදිහට ‘පින්වත් මහණෙනි, කුසලය වඩන්න’ කියලා කියන්නේ නෑ. පින්වත් මහණෙනි, යම් විදිහකින් මේ කුසලය වඩන්න පුළුවන් නිසාම තමයි මා මේ විදිහට කියන්නේ. ‘පින්වත් මහණෙනි, කුසලය වඩන්න’ කියලා. පින්වත් මහණෙනි, මේ කුසලය වැඩුවහම එය අයහපත පිණිස, දුක පිණිස හේතු වෙනවා නම්, මා මේ විදිහට ‘පින්වත් මහණෙනි, කුසලය වඩන්න’ කියලා කියන්නේ නෑ. පින්වත් මහණෙනි, යම් විදිහකින් මේ කුසලය වැඩුවහම ඒක යහපත පිණිසම, සැපය පිණිසම හේතු වෙනවා. අන්න ඒ නිසා තමයි මා කියන්නේ, ‘පින්වත් මහණෙනි, කුසලය වඩන්න’ කියලා.
2.1.2.10.
20. පින්වත් මහණෙනි, සද්ධර්මයේ (ශාසනයේ) විනාශය පිණිස, අතුරුදහන් වීම පිණිස හේතු වන මේ කාරණා දෙකක් තියෙනවා. ඒ දෙක මොනවාද? වැරදි විදිහට ගලපාගන්නා ලද වචන ප්‍රකාශ කිරීමත්, වැරදි විදිහට කරන්නා වූ අර්ථ විග්‍රහයත්ය. පින්වත් මහණෙනි, වැරදි විදිහට ගලපාගන්නා ලද වචන ප්‍රකාශ කරන විට වැරදි අර්ථ මතු වෙනවාමයි. පින්වත් මහණෙනි, මෙය වනාහී සද්ධර්මයේ විනාශය පිණිස, අතුරුදහන් වීම පිණිස හේතු වන්නා වූ කරුණු දෙකයි.
පින්වත් මහණෙනි, සද්ධර්මයේ (ශාසනයේ) පැවැත්ම පිණිස, විනාශ නො වීම පිණිස, අතුරුදහන් නොවීම පිණිස හේතු වන මේ කාරණා දෙකක් තියෙනවා. ඒ දෙක මොනවාද? ඉතා යහපත් ලෙස ගලපාගන්නා ලද වචන ප්‍රකාශ කිරීමත්, ඉතා යහපත් ලෙස කරන්නා වූ අර්ථ විග්‍රහයත්ය. පින්වත් මහණෙනි, යහපත් ලෙස ගලපාගන්නා ලද වචන ප්‍රකාශ කරන විට යහපත් අර්ථ මතු වෙනවාමයි. පින්වත් මහණෙනි, මෙය වනාහී සද්ධර්මයේ පැවැත්ම පිණිස, විනාශ නොවීම පිණිස, අතුරුදහන් නොවීම පිණිස හේතු වන්නා වූ කරුණු දෙකයි.
දෙවෙනි අධිකරණ වර්ගයයි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_2-1-2-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M