සැවැත් නුවර දී ය …….
මහණෙනි, වචී දුෂ්චරිත සතරකි. ඒ කවර සතරක් ද යත්;
බොරු කීම ය. කේලාම් කීම ය. දරුණු වචන කීම ය. නිසරු බස් කීම ය.
මහණෙනි, මේ වනාහී වචී දුෂ්චරිත සතර යි.
මහණෙනි, වචී සුචරිත සතරකි. ඒ කවර සතරක් ද යත්;
සත්‍ය වචන කීම ය. කේලාම් නොකීම ය. මොළොක් වචන කීම ය. නුවණින් පිරිසිඳ ගත් වචන කීම ය.
මහණෙනි, මේ වනාහී වචී සුචරිත සතර යි.
සාදු! සාදු!! සාදු!!!
වචීසුචරිත සූත්‍රය නිමා විය.
මහණෙනි, සතර කරුණකින් යුක්ත වූ බාල වූ අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ජීවිතයක් පරිහරණය කරයි. දොස් සහිත ද වෙයි. නුවණැත්තන්ගෙන් උපවාද ලැබිය යුතු කෙනෙක් වෙයි. බොහෝ පව් ද රැස් කරයි. ඒ කවර සතර කරුණකින් ද යත්;
කාය දුෂ්චරිතයෙන් ය. වචී දුෂ්චරිතයෙන් ය. මනෝ දුෂ්චරිතයෙන් ය. මිථ්‍යා දෘෂ්ටියෙන් ය.
මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ජීවිතයක් පරිහරණය කරයි. දොස් සහිත ද වෙයි. නුවණැත්තන්ගෙන් උපවාද ලැබිය යුතු කෙනෙක් වෙයි. බොහෝ පව් ද රැස් කරයි.
මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ජීවිතයක් පරිහරණය කරයි. දොස් රහිත ද වෙයි. නුවණැත්තන්ගෙන් උපවාද නොලැබිය යුතු කෙනෙක් වෙයි. බොහෝ පින් ද රැස් කරයි. ඒ කවර සතර කරුණකින් ද යත්;
කාය සුචරිතයෙන් ය. වචී සුචරිතයෙන් ය. මනෝ සුචරිතයෙන් ය. සම්‍යක් දෘෂ්ටියෙන් ය.
මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ජීවිතයක් පරිහරණය කරයි. දොස් රහිත ද වෙයි. නුවණැත්තන්ගෙන් උපවාද නොලැබිය යුතු කෙනෙක් වෙයි. බොහෝ පින් ද රැස් කරයි.
සාදු! සාදු!! සාදු!!!
පඨම බාල – පණ්ඩිත සූත්‍රය නිමා විය.
මහණෙනි, සතර කරුණකින් යුක්ත වූ බාල වූ අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ජීවිතයක් පරිහරණය කරයි. දොස් සහිත ද වෙයි. නුවණැත්තන්ගෙන් උපවාද ලැබිය යුතු කෙනෙක් වෙයි. බොහෝ පව් ද රැස් කරයි. ඒ කවර සතර කරුණකින් ද යත්;
කාය දුෂ්චරිතයෙන් ය. වචී දුෂ්චරිතයෙන් ය. මනෝ දුෂ්චරිතයෙන් ය. කෙළෙහි ගුණ නොදැනීමෙන් හා කෙළෙහි ගුණ සිහි නොකිරීමෙන් ය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)….)
කාය සුචරිතයෙන් ය. වචී සුචරිතයෙන් ය. මනෝ සුචරිතයෙන් ය. කෙළෙහි ගුණ දැනීමෙන් හා කෙළෙහි ගුණ සිහි කිරීමෙන් ය.
(මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
දුතිය බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
සතුන් මරන්නේ වෙයි. සොරකම් කරන්නේ වෙයි. වැරදි කාම සේවනයෙහි යෙදෙන්නේ වෙයි. බොරු කියන්නේ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
සතුන් මැරීමෙන් වැළකුණේ වෙයි. සොරකම් කිරීමෙන් වැළකුණේ වෙයි. වැරදි කාම සේවනයෙහි යෙදීමෙන් වැළකුණේ වෙයි. බොරු කීමෙන් වැළකුණේ වෙයි.
(මහණෙනි, සෙතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
තතිය බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
වැරදි දෘෂ්ටිය ඇත්තේ වෙයි. වැරදි සංකල්ප ඇත්තේ වෙයි. වැරදි වචන භාවිතය ඇත්තේ වෙයි. වැරදි කායික ක්‍රියා ඇත්තේ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
නිවැරදි දෘෂ්ටිය ඇත්තේ වෙයි. නිවැරදි සංකල්ප ඇත්තේ වෙයි. නිවැරදි වචන භාවිතය ඇත්තේ වෙයි. නිවැරදි කායික ක්‍රියා ඇත්තේ වෙයි.
(මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
චතුත්ථ බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
වැරදි ජීවිකාව ඇත්තේ වෙයි. වැරදි වීරිය ඇත්තේ වෙයි. වැරදි සිහිය ඇත්තේ වෙයි. වැරදි සමාධිය ඇත්තේ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
නිවැරදි ජීවිකාව ඇත්තේ වෙයි. නිවැරදි වීරිය ඇත්තේ වෙයි. නිවැරදි සිහිය ඇත්තේ වෙයි. නිවැරදි සමාධිය ඇත්තේ වෙයි.
(මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
පඤ්චම බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
නුදුටු දේ දුටු බව කියන්නේ වෙයි. නොඇසූ දේ ඇසූ බව කියන්නේ වෙයි. ආඝ්‍රාණය නොකළ දේ ආඝ්‍රාණය කළ බව කියන්නේ වෙයි, අනුභව නොකළ දේ අනුභව කළ බව කියන්නේ වෙයි, ස්පර්ශය නොලැබූ දේ ස්පර්ශය ලැබූ බව කියන්නේ වෙයි. සිතෙන් නොදැන ගත් දේ සිතෙන් දැනගත් බව කියන්නේ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
නුදුටු දේ නුදුටු බව කියන්නේ වෙයි. නොඇසූ දේ නොඇසූ බව කියන්නේ වෙයි. ආඝ්‍රාණය නොකළ දේ ආඝ්‍රාණය නොකළ බව කියන්නේ වෙයි, අනුභව නොකළ දේ අනුභව නොකළ බව කියන්නේ වෙයි, ස්පර්ශය නොලැබූ දේ ස්පර්ශය නොලැබූ බව කියන්නේ වෙයි. සිතෙන් නොදැන ගත් දේ සිතෙන් නොදැනගත් බව කියන්නේ වෙයි.
(මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
ඡට්ඨම බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
දුටු දේ නුදුටු බව කියන්නේ වෙයි. ඇසූ දේ නොඇසූ බව කියන්නේ වෙයි. ආඝ්‍රාණය කළ දේ ආඝ්‍රාණය නොකළ බව කියන්නේ වෙයි, අනුභව කළ දේ අනුභව නොකළ බව කියන්නේ වෙයි, ස්පර්ශය ලැබූ දේ ස්පර්ශය නොලැබූ බව කියන්නේ වෙයි. සිතෙන් දැන ගත් දේ සිතෙන් නොදැනගත් බව කියන්නේ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
දුටු දේ දුටු බව කියන්නේ වෙයි. ඇසූ දේ ඇසූ බව කියන්නේ වෙයි. ආඝ්‍රාණය කළ දේ ආඝ්‍රාණය කළ බව කියන්නේ වෙයි, අනුභව කළ දේ අනුභව කළ බව කියන්නේ වෙයි, ස්පර්ශයලැබූ දේ ස්පර්ශය ලැබූ බව කියන්නේ වෙයි. සිතෙන් දැන ගත් දේ සිතෙන් දැනගත් බව කියන්නේ වෙයි.
(මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
සත්තම බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
සැදැහැ නැත්තේ වෙයි. දුස්සීල වෙයි. පවට ලැජ්ජා නැත්තේ වෙයි. පවට භය නැත්තේ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
සැදැහැ ඇත්තේ වෙයි. සිල්වත් වෙයි. පවට ලැජ්ජා ඇත්තේ වෙයි. පවට භය ඇත්තේ වෙයි.
(මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. බොහෝ පින් ද රැස් කරයි.)
සාදු! සාදු!! සාදු!!!
අට්ඨම බාල – පණ්ඩිත සූත්‍රය නිමා විය.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. )
සැදැහැ නැත්තේ වෙයි. දුස්සීල වෙයි. කුසීත වෙයි. දුෂ්ප්‍රාඥ වෙයි.
(මහණෙනි, මේ සතර කරුණෙන් යුක්ත වූ බාල වූ අව්‍යක්ත වූ අසත්පුරුෂයා ….(පෙ)…. බොහෝ පව් ද රැස් කරයි.)
(මහණෙනි, සතර කරුණකින් යුක්ත වූ පණ්ඩිත වූ ව්‍යක්ත වූ සත්පුරුෂයා ….(පෙ)…. )
සැදැහැවත් වෙයි. සිල්වත් වෙයි. පටන් ගත් වීරිය ඇත්තේ වෙයි. ප්‍රඥාවන්ත වෙයි.
මහණෙනි, මේ සතර කරුණෙන් යුක්ත වූ පණ්ඩිත වූ ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ජීවිතයක් පරිහරණය කරයි. දොස් රහිත ද වෙයි. නුවණැත්තන්ගෙන් උපවාද නොලැබිය යුතු කෙනෙක් වෙයි. බොහෝ පින් ද රැස් කරයි.
සාදු! සාදු!! සාදු!!!
නවම බාල – පණ්ඩිත සූත්‍රය නිමා විය.
මහණෙනි, මේ කවි කියන්නෝ සතර දෙනෙකි. ඒ කවර සතර දෙනෙක් ද යත්; සිත සිතා කවි කියන කවියා ය. අසන ලද කවි කියන කවියා ය. අර්ථවත් කවි කියන කවියා ය. ප්‍රතිභානයෙන් කවි කියන කවියා ය. මහණෙනි, මේ වනාහී කවි කියන්නෝ සතර දෙනා ය.
සාදු! සාදු!! සාදු!!!
කවි සූත්‍රය නිමා විය.
තුන්වෙනි සුචරිත වර්ගය අවසන් විය.
එහි පිළිවෙල උද්දානයයි :
වචීසුචරිත සූත්‍රය, බාල-පණ්ඩිත සූත්‍ර නවයක් සහ කවි සූත්‍රය වශයෙන් මෙහි සූත්‍ර එකොළොසකි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-5-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M