ඛුද්දක නිකාය

ථේරී ගාථා

12. සෝළස නිපාතෝ

12. දහසයවැනි නිපාතය

16.1. පුණ්ණා ථේරීගාථා

16.1. පුණ්ණා තෙරණියගේ ගාථා

236. උදකමාහරිං සීතේ සදා උදකමෝතරිං,
අය්‍යානං දණ්ඩභයභීතා වාචාදෝසභයට්ටිතා.

236. මං සීතලේ ම වතුර ඇද්දා. හැම තිස්සේ ම වතුරට බැස්සා. එහෙම කළේ ස්වාමි දරුවන් ගෙ දඬුවම්වලට බයෙන්. බැණුම් අහන්ට බයෙන්. මගෙන් වරදක් වෙයි කියන බයෙන්.

237. කස්ස බ්‍රාහ්මණ ත්වං භීතෝ සදා උදකමෝතරි,
වේධමානේහි ගත්තේහි සීතං වේදයසේ භුසං.

237. ඒත් බ්‍රාහ්මණය, ඔබ කාට බය වෙලා ද හැමදා ම ඔය වතුරට බහින්නෙ? අතපය වෙව්ල වෙව්ල අධික සීතලෙන් දුක් විඳින්නෙ කාට බයෙන් ද?

238. ජානන්තී වත මං භෝති පුණ්ණිකේ පරිපුච්ඡසි,
කරොන්තං කුසලං කම්මං රුන්ධන්තං කත පාපකං.

238. පුණ්ණා, මගෙන් ඕක අහන්ට ඕන දැනගෙන ම නේද? මං මේ කරන්නෙ පව් සෝද සෝද කුසල් රැස්කරන එක නේ.

239. යෝ ච වුද්ධෝ දහරෝ වා පාපකම්මං පකුබ්බති,
දකාභිසේචනා සෝපි පාපකම්මා පමුච්චති.

239. මහල්ලෙක් හරි, තරුණයෙක් හරි, එයා පව් මොනව හරි කරල තියෙනවා නම්, ඒ පව්වලින් නිදහස් වෙන්නෙ මේ විදිහට ජලස්නානය කිරීමෙනුයි.

240. කෝ නු තේ ඉදමක්ඛාසි අජානන්තස්ස අජානකෝ,
දකාභිසේචනා නාම පාපකම්මා පමුච්චති.

240. බ්‍රාහ්මණය, කර්මයන්ගේ විපාක දෙන ස්වභාවය නොදන්නා ඔබට, ඔය විදිහට ජලස්නානයෙන් පාප කර්මවලින් නිදහස් වෙන්ට පුළුවන් කියල ඔබට කියපු, කර්මයන්ගේ විපාක දෙන ස්වභාවය දන්නෙ නැති කෙනා කවුද?

241. සග්ගං නූන ගමිස්සන්ති සබ්බේ මණ්ඩුකකච්ඡපා,
නක්කා ච සුංසුමාරා ච යේ චඤ්ඤේ උදකේ චරා.

241. ඕක ඇත්ත නම්, මේ ඔක්කොම ගෙම්බො, කැස්බෑවො, කිඹුල්ලු, වතුරේ ඉන්න අනෙක් සත්තු ඔක්කොම ඒකාන්තයෙන් ම ස්වර්ගයට යනවා.

242. ඕරබ්භිකා සූකරිකා මච්ඡකා මිගබන්ධකා,
චෝරා ච වජ්ඣඝාතා ච යේ චඤ්ඤේ පාපකම්මිනෝ,
දකාභිසේචනා තේපි පාපකම්මා පමුච්චරේ.

242. ඕක ඇත්ත නම්, එළුවන් මරණ අය, ඌරන් මරණ අය, මාළුන් මරණ අය, මෘගයන් මරණ අය, සොරු, අළුගෝසුවෝ, තවත් පව් කරපු අය ඔක්කොටම කරන්න තියෙන්නෙ ජල ස්නානයෙන් පව් හෝදල දාන එක නෙ.

243. සචේ ඉමා නදියෝ තේ පාපං පුබ්බේ කතං වහුං,
පුඤ්ඤානිමානි වහෙය්‍යුං තේන ත්වං පරිබාහිරෝ.

243. ඔබ කරපු පව් හෝදන්ට මේ ගංගාවලට පුළුවන් නම්, ඔබ කරපු පිනුත් මේ ගංගාවල් විසින් හෝදල දමාවි. එතකොට ඔබ දැන් පින්වලින් ද බැහැර වුණ කෙනෙක්.

244. යස්ස බ්‍රාහ්මණ ත්වං භීතෝ සදා උදකමෝතරි,
තමේව බ්‍රහ්මේ මාකාසි මා තේ සීතං ඡවිං හනී.

244. බ්‍රාහ්මණය, ඔබ පව්වලට ඇති බිය නිසා නෙ මේ හැම දා ම මේ වතුරට බහින්නෙ. බ්‍රාහ්මණය, ඔබ පව් නොකර ඉන්න. මේ සීතල වතුර ඔබේ සමට පීඩා දෙන්න එපා!

245. කුම්මග්ගං පටිපන්නං මං අරියමග්ගං සමානයි,
උදකාභිසේචනා භෝති ඉමං සාටං දදාමි තේ.

245. පින්වතී, ඇත්තෙන් ම මං හිටියෙ නොමගට වැටිලා. මේ වතුර නෑමෙන් මාව නිදහස් කරගෙන ආර්ය මාර්ගයට පැමිණෙව්වෙ ඔබ යි. මං ඔබට මේ සළුපට දෙනවා.

246. තුය්හේව සාටකෝ හෝතු නාහං ඉච්ඡාමි සාටකං,
සචේ භායසි දුක්ඛස්ස සචේ තේ දුක්ඛමප්පියං.

246. බ්‍රාහ්මණය, සළුපට ඔබ තියාගන්න. මං සළුපටක් ගන්ට කැමැති නෑ. ඉදින් ඔබ දුකට බිය නම්, දුකට අකමැති නම්,

247. මාකාසි පාපකං කම්මං ආවි වා යදි වා රහෝ,
සචේ ච පාපකං කම්මං කරිස්සසි කරෝසි වා.

247. රහසේ හෝ එළිපිට හෝ පව් කරන්ට එපා! ඉදින් ඔබ අනාගතේ පව් කරනවා නම්, දැන් පව් කරනවා නම්,

248. න තේ දුක්ඛා පමුත්ත්‍යත්ථි උපෙච්චාපි පලායතෝ,
සචේ භායසි දුක්ඛස්ස සචේ තේ දුක්ඛමප්පියං.

248. කොයිතරම් දැන ගෙන පැනල යන්ට හැදුවත් ඒ දුක් විපාක වලින් නිදහස් වෙන්ට බෑ. ඉදින් ඔබ දුකට බය නම්, දුකට අකැමැති නම්,

249. උපේහි සරණං බුද්ධං ධම්මං සංඝඤ්ච තාදිනං,
සමාදියාහි සීලානි තං තේ අත්ථාය හේහිති.

249. අකම්පිත සිත් ඇති බුදු සමිඳුන්වත්, සද්ධර්මයත්, ආර්ය සංඝරත්නයත් සරණ යන්න. සිල් සමාදන් වෙන්න. ඔබට ඒක ගොඩාක් යහපත පිණිස පවතීවි.

250. උපේමි සරණං බුද්ධං ධම්මං සංඝඤ්ච තාදිනං,
සමාදියාමි සීලානි තම්මේ අත්ථාය හේහිති.

250. පින්වතී, ඔව්, අකම්පිත සිත් ඇති බුදු සමිඳුන්වත්, සද්ධර්මයත්, ආර්ය සංඝරත්නයත් මං සරණ යනවා. සිල් සමාදන් වෙනවා. මට ඒක ගොඩාක් යහපත පිණිස පවතීවි.

251. බ්‍රහ්මබන්ධු පුරේ ආසිං අජ්ජම්හි සච්ච බ්‍රාහ්මණෝ,
තේවිජ්ජෝ වේදසම්පන්නෝ සොත්ථියෝ චම්හි නහාතකෝති.

251. මං බ්‍රාහ්මණ කුලේ ඉපදුණු නිසා බ්‍රහ්මබන්ධු කියල මට කිව්වා. නමුත් මං ඇත්තට ම බ්‍රාහ්මණයෙක් වුණේ දැනුයි. මාත් ත්‍රිවිද්‍යාව ලබාගත්තා. නිවනට පත්වුණා. යහපතට පත්වුණා. කෙලෙස් සෝදල දැම්මා.

ඉත්ථං සුදං පුණ්ණා ථේරී ගාථායෝ අභාසීති.

මේ වනාහී පුණ්ණා නම් රහත් තෙරණිය වදාළ ගාථාවන් ය.

සෝළසනිපාතෝ නිට්ඨිතෝ.

දහසයවෙනි නිපාතය නිමා විය.

(ගාථා දහසය බැගින් වදාළ කොටස නිමා විය)