මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ සැවැත් නුවර ජේතවනය නම් වූ අනේපිඬු සිටුතුමාගේ ආරාමයේ. එදා එක්තරා දෙවියෙක් රැය පහන් වන වේලෙහි, සුන්දර ශරීර සෝභාවකින් යුක්තව, මුළු මහත් ජේතවනයම බබුලුවා ගෙන භාග්‍යවතුන් වහන්සේ ළඟට ආවා. ඇවිදින් භාග්‍යවතුන් වහන්සේට වන්දනා කරලා, පැත්තකින් හිටගත්තා. පැත්තකින් හිටගත් ඒ දෙවියා භාග්‍යවතුන් වහන්සේට ගාථාවක් පැවසුවා.
01. (භාග්‍යවතුන් වහන්ස,) යහපත සලසාගන්න කැමැති බොහෝ දෙවියොත්, මිනිස්සුත් මංගල සම්මත දේවල් ගැන හිතුවා. යහපත සළසන ඒ උතුම් මංගල කරුණු ගැන වදාරණ සේක්වා!
(භාග්‍යවතුන් වහන්සේ) :
02. අසත්පුරුෂ, අඥාන පුද්ගලයන් ඇසුරු නොකිරීමත්, නුවණැති සත්පුරුෂයින් ඇසුරු කිරීමත්, පූජනීය උතුමන් පිදීමත් යන මේවා උතුම් මංගල කාරණා ය.
03. ධර්මයේ හැසිරෙන්නට පුළුවන් යහපත් ප්‍රදේශයක වාසය කිරීමත්, කලින් පින් කරපු ජීවිතයක් තිබීමත්, ධර්මය තුළ සිත පිහිටුවා ගැනීමත් උතුම් මංගල කාරණා ය.
04. හොඳින් දැන උගත්කම් ඇති කරගැනීමත්, ශිල්ප ශාස්ත්‍ර ගැන අවබෝධයත්, විනය ගරුකභාවය තුළ හොඳින් හික්මීමත්, දෙලොව වැඩ සලසන වචන කතා කිරීමත් යන මේවා උතුම් මංගල කාරණා ය.
05. මව්පියන්ට උපස්ථාන කිරීමත්, අඹුදරුවන්ට සැලකීමත්, ධාර්මික රැකී රක්ෂා කිරීමත් යන මේවා උතුම් මංගල කාරණා ය.
06. දන් දීමත්, ධර්මානුකූලව ජීවත් වීමත්, ඤාතීන්ට සැලකීමත්, නිවැරදි දේවල් කිරීමත් යන මේවා උතුම් මංගල කාරණා ය.
07. පාපී කටයුතුවලින් වැළකී සිටීමත්, මත්පැන් පානයෙන් වැළකී සිටීමත්, අප්‍රමාදීව ගුණධර්ම දියුණු කරගැනීමත් යන මේවා උතුම් මංගල කාරණා ය.
08. ගරු කළ යුත්තන්ට ගරු කිරීමත්, නිහතමානී වීමත්, ලද දෙයින් සතුටු වීමත්, අනුන් කළ උදව් උපකාර මතක තිබීමත්, ධර්මාවවාද අවශ්‍ය මොහොතේ ධර්ම ශ්‍රවණය කිරීමත් යන මේවා උතුම් මංගල කාරණා ය.
09. ඉවසීමත්, කීකරුකමත්, ගුණදහම් සුරකින ශ්‍රමණයන් වහන්සේලා දැකීමත්, ධර්මය පැහැදිලි කරගත යුතු මොහොතේ ධර්ම සාකච්ඡා කිරීමත් යන මේවා උතුම් මංගල කාරණා ය.
10. වීරියෙන් ඉන්ද්‍රියයන් දමනය කර ගැනීමත්, බඹසර ජීවිතයක් ගත කිරීමත්, චතුරාර්ය සත්‍ය ධර්මය අවබෝධ කිරීමත්, ඒ අමා නිවන් සුව සාක්ෂාත් කර ගැනීමත් යන මේවා උතුම් මංගල කාරණා ය.
11. (ලාභ, අලාභ, යස, අයස, නින්දා, ප්‍රශංසා, සැප, දුක යන) අෂ්ට ලෝක ධර්මයෙන් පහර වදින විට යම් කෙනෙකුගේ සිත කම්පාවන්නේ නැත්නම්, ශෝකයක් නැති, ක්ලේශයක් නැති, බිය සැක රහිත නිදහස් සිත් ඇති බව ද උතුම් මංගල කාරණා ය.
12. ඔය විදිහට මංගල කාරණා ඇති කරගෙන, සෑම තැනම අපරාජිතව සිටියොත් සෑම තැනකදීම යහපත කරා යනවා. ඒක තමයි ඔවුන්ට තිබෙන උතුම් මංගල කාරණා.
මේ අවසන් වූයේ මංගල සූත්‍රයයි.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M