මා විසින් මෙසේ අසන ලදී.
එක් සමයෙක්හි භාග්‍යවතුන් වහන්සේ ශාක්‍යයන්ගේ ජනපදයෙහි කපිලවස්තුවෙහි මහා වනයෙහි සියළු දෙනා වහන්සේ ම රහත් වූ පන්සියයක් පමණ මහත් වූ භික්ෂු සංඝයා සමඟ වැඩවසන සේක. එකල්හී දස දහස් ලෝක ධාතුවෙනුත් බොහෝ දේවතාවෝ භාග්‍යවතුන් වහන්සේ වත්, භික්ෂු සංඝයා ත් දකිනු පිණිස රැස්වූවාහු වෙති. ඉක්බිති සුද්ධාවාස බඹලොවෙහි දෙවිවරුන් සතර දෙනෙකුට මේ අදහස ඇතිවූයේ ය.
‘මේ භාග්‍යවතුන් වහන්සේ වනාහී ශාක්‍යයන්ගේ ජනපදයෙහි කපිලවස්තුවෙහි මහා වනයෙහි සියළු දෙනා වහන්සේ ම රහත් වූ පන්සියයක් පමණ මහත් වූ භික්ෂු සංඝයා සමඟ වැඩවසන සේක. දස දහස් ලෝක ධාතුවෙනුත් බොහෝ දේවතාවෝ භාග්‍යවතුන් වහන්සේ වත්, භික්ෂු සංඝයා ත් දකිනු පිණිස රැස්වූවාහු වෙති. එහෙයින් අපි ත් භාග්‍යවතුන් වහන්සේ යම් තැනක වැඩසිටිත් ද, එතැනට එළැඹෙන්නෙමු නම්, එළැඹ භාග්‍යවතුන් වහන්සේගේ සමීපයෙහි වෙන් වෙන් වශයෙන් ගාථාව බැගින් පවසන්නෙමු නම් ඉතා මැනැවි’ යි.
ඉක්බිති ඒ දෙවිවරු බලවත් පුරුෂයෙක් හැකිලූ අතක් දිග හරින්නේ යම් සේ ද, දික් කළ අතක් හකුලන්නේ යම් සේ ද, එසෙයින් ම සුද්ධාවාස බඹලොවෙන් නොපෙනී ගොස් භාග්‍යවතුන් වහන්සේ ඉදිරියෙහි පෙනී සිටියාහු ය. ඉක්බිති ඒ දෙවිවරු භාග්‍යවතුන් වහන්සේට සකසා වන්දනා කොට එකත්පස් ව සිටියාහු ය. එකත්පස් ව සිටි එක් දෙවියෙක් භාග්‍යවතුන් වහන්සේ සමීපයෙහි සිට මේ ගාථාව පැවසුවේ ය.
‘මහා වනයෙහි රැස්වූ මහා පිරිසකි. දෙව් පිරිස් රැස්වූවාහු ය. අපි මේ ධර්ම සභාවෙහි වැඩසිටින අපරාජිත සංඝයා දකින්නට පැමිණියෙමු.’
ඉක්බිති තව බ්‍රහ්මකායික දේවතාවෙක් භාග්‍යවතුන් වහන්සේ සමීපයෙහි මේ ගාථාව පැවසුවේ ය.
‘එහි සිටින භික්ෂූහු තම සිත එකඟ කරගත්තාහු ය. ඍජු කරගත්තාහු ය. ඒ නුවණැත්තෝ රැහැන් පට අතින් ගත් රියැදුරන් අසුන් හසුරුවන සෙයින් තම ඉඳුරන් රැක ගනිත්.’
ඉක්බිති තව බ්‍රහ්මකායික දේවතාවෙක් භාග්‍යවතුන් වහන්සේ සමීපයෙහි මේ ගාථාව පැවසුවේ ය.
‘ඒ යොවුන් වියේ සිටින උතුම් රහත්හු සදහම් ඇස් ඇති බුදුරජාණන් වහන්සේ විසින් මැනවින් දමනය කරන ලද්දාහු, කෙලෙස් හුල් සිඳ, කෙලෙස් පලිඝය සිඳ, කෙලෙස් ඉන්ද්‍රඛීලය උදුරා දමා, තෘෂ්ණා රහිත ව, පිරිසිදු සිතින්, නිර්මල ව හැසිරෙත්.’
ඉක්බිති තව බ්‍රහ්මකායික දේවතාවෙක් භාග්‍යවතුන් වහන්සේ සමීපයෙහි මේ ගාථාව පැවසුවේ ය.
‘යම් කෙනෙක් බුදුරජාණන් වහන්සේ සරණ ගියාහු ද, ඔවුහු අපායට නොයන්නාහු ය. මිනිස් සිරුර අත්හැර දෙව්ලොව පිරී යන්නාහු ය.’
එකල්හී භාග්‍යවතුන් වහන්සේ භික්ෂූන් ඇමතූ සේක.
“මහණෙනි, දස දහස් ලෝකධාතුවෙන් බොහෝ දේවතාවෝ රැස්වූවාහු වෙති. ඒ තථාගතයන් දකිනු පිණිස ත්, භික්ෂු සංඝයා දකිනු පිණිස ත් ය. මහණෙනි, අතීතයෙහි යම් ඒ අරහත් සම්මා සම්බුදුවරු වැඩසිටියාහු ද, ඒ භාග්‍යවත්වරුන්ට ද, මෙපමණ ම වූ දේවතාවෝ රැස් වූවාහු ය. මෙකල්හී මා හට පරිද්දෙනි. මහණෙනි, අනාගතයෙහි යම් ඒ අරහත් සම්මා සම්බුදුවරු පහළ වන්නාහු ද, ඒ භාග්‍යවත්වරුන්ට ද, මෙපමණ ම වූ දේවතාවෝ රැස් වෙන්නාහු ය. මෙකල්හී මා හට පරිද්දෙනි.
මහණෙනි, දෙව් පිරිසගේ නම් පවසන්නෙමි. මහණෙනි, දෙව් පිරිසගේ නම් වර්ණනා කරන්නෙමි. මහණෙනි, දෙව් පිරිසගේ නම් දෙසන්නෙමි. එය අසව්. මනාකොට මෙනෙහි කරව්. පවසන්නෙමි.”
“එසේ ය, ස්වාමීනී” යි ඒ භික්ෂූහු භාග්‍යවතුන් වහන්සේට පිළිවදන් දුන්හ. භාග්‍යවතුන් වහන්සේ මෙය වදාළ සේක.
4.
සිලෝවක් කියන්නෙමි. හෙවත් කීර්තනය කොට පවසන්නෙමි. යම් තැනක භූමාටු දේවතාවෝ සිටිත් ද, තමා අත්හැර නිවනට මෙහෙය වූ සිත් ඇති, සමාහිත සිත් ඇති යම් ඒ රහත්හු ඒ ගිරිගුහා ඇසුරු කොට වසත්.
ලොමු දහගැනුම් මැඩපැවැත්වූ, කුසලයෙන් සුදු පැහැ ගැන් වූ සිත් ඇති, පිරිසිදු සිත් ඇති, විශේෂයෙන් පහන් වූ, නොකැළඹුණු සිත් ඇති, බොහෝ රහත්හු සිංහයන් සෙයින් ජනයාට නොපෙනී සිටිති.
කපිලවස්තු මහා වනයෙහි බුදු සසුනෙහි ඇලී සිටින පන්සියයකට වැඩි ශ්‍රාවකයන් වහන්සේලා දැන ශාස්තෘන් වහන්සේ ඔවුන් ඇමතූ සේක.
‘මහණෙනි, දෙව් පිරිස පැමිණියාහුය. ඔවුන් ආ බව දිවැසින් දනිව්’ යි. ඒ භික්ෂූහු ද භාග්‍යවතුන් වහන්සේගේ අනුශාසනාව අසා දිවැස පිණිස වීර්ය වැඩූහ.
ඒ භික්ෂූන් වහන්සේලා තුළ මිනිස් නොවන්නවුන් දැකීම පිණිස දිවැස් නුවණ පහළ වූයේ ය. ඇතැම් භික්ෂූහු සිය දෙනෙකු ද, දහස් දෙනෙකු ද, සැත්තෑ දහසක් දෙනෙකු ද දැක්කාහු ය.
ඇතැම් භික්ෂු කෙනෙක් ලක්ෂයක් දෙවිවරුන් දැක්කාහු ය. ඇතැම් භික්ෂු කෙනෙක් අනන්ත දෙව් පිරිස් දැක්කාහු ය. දෙව් බඹුන්ගෙන් සියළු දිශා පිරී ගියේ ය.
5.
සදහම් ඇස් ඇති ශාස්තෘන් වහන්සේ ඒ සියල්ල විශිෂ්ට ඥානයෙන් වෙන් වෙන් වශයෙන් හඳුනාගෙන බුදු සසුනෙහි ඇලී සිටි ශ්‍රාවකයන් වහන්සේලා ඇමතූ සේක.
“මහණෙනි, දෙව් පිරිස් පැමිණියාහු ය. මම ඔබට ඔවුන් පිළිබඳ ව අනුපිළිවෙලින් වචනයෙන් කීර්තනය කරන්නෙම් ද, එවිට ඔවුන් ගැන දිවැසින් දැනගනිව්.
කපිලවස්තුවාසී සත් දහසක් වූ ඒ භූමාටු දේවතාවෝ ඉර්ධිමත් ව, බබලමින් වර්ණවත් ව, යසස් ඇති ව සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහු ය.
හිමාල පර්වතවාසී හය දහසක් වූ දේවතාවෝ නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ව සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහු ය.
6.
සාතාගිරි පර්වතවාසී තුන්දහසක් වූ දේවතාවෝ නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ව සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහු ය.
මෙසේ මේ දහසය දහසක් වූ දේවතාවෝ නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ව සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහු ය.
වෙස්සමිත්ත පර්වතවාසී පන්සියයක් වූ දේවතාවෝ නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ව සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහු ය.
රජගහ නුවර වේපුල්ල පර්වතයෙහි වසන කුම්භීර යනු යක්ෂ සේනාධිපතියෙකි. ඔහු ලක්ෂයකට වැඩි යකුන් ඇසුරු කරයි. රජගහ නුවරවැසි කුම්භීර යක්ෂ තෙමේ ද භික්ෂූන්ගේ රැස්වීම දකින්නට මහා වනයට පැමිණියේ ය.
7.
ධතරාෂ්ට නම් දෙව්මහරජු නැගෙනහිර පෙදෙස පාලනය කරයි. ඔහු ගාන්ධර්වයන්ට අධිපති, යස පිරිවර ඇති මහරජු ය.
ඔහුට ඉන්ද යන නමින් මහත් බල ඇති බොහෝ පුත්‍රයෝ සිටිති. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහුය.
විරූළ්හ නම් දෙව්මහරජු දකුණු පෙදෙස පාලනය කරයි. ඔහු කුම්භාණ්ඩයන්ට අධිපති, යස පිරිවර ඇති මහරජු ය.
ඔහුට ඉන්ද යන නමින් මහත් බල ඇති බොහෝ පුත්‍රයෝ සිටිති. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහුය.
විරූපක්ඛ නම් දෙව්මහරජු බටහිර පෙදෙස පාලනය කරයි. ඔහු නාගයින්ට අධිපති, යස පිරිවර ඇති මහරජු ය.
ඔහුට ඉන්ද යන නමින් මහත් බල ඇති බොහෝ පුත්‍රයෝ සිටිති. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහුය.
කුවේර නම් දෙව්මහරජු උතුරු පෙදෙස පාලනය කරයි. ඔහු යක්ෂයන්ට අධිපති, යස පිරිවර ඇති මහරජු ය.
ඔහුට ඉන්ද යන නමින් මහත් බල ඇති බොහෝ පුත්‍රයෝ සිටිති. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට මහා වනයට පැමිණියාහුය.
8.
නැගෙනහිර දිශාවෙන් ධතරට්ඨ දෙව්මහරජු ය. දකුණු දිශාවෙන් විරූළ්හක දෙව්මහරජු ය. බස්නාහිර දිශාවෙන් විරූපක්ෂ දෙව්මහරජු ය. උතුරු දිශාවෙන් කුවේර දෙව්මහරජු ය.
9.
ඒ දෙව්මහරජවරු සිව් දෙනා හාත්පස සිව් දිශාව අතිශයින් බබුළුවමින් කපිලවස්තු මහවනයෙහි සිටියාහු ය.
ඒ දෙව්මහරජවරුන් හට කුටෙණ්ඩු, වේටෙණ්ඩු, විටුච්ච සහ විටුඩ වශයෙන් වංචනික, ශඨකපට, මායාකාරී දාසයෝ සිටිති.
චන්දන ය, කාමසෙට්ඨ ය, කින්නිඝණ්ඩු ය, නිඝන්ඩු ය, පනාද ය, ඕපමඤ්ඤ ය, දෙව්රියැදුරු මාතලී ද, චිත්ත ය, සේන ය, චිත්තසේන ය යන ගාන්ධර්වයන් තිදෙනා ද, නළ දෙව්රජ ද, ජනවසභ දෙව්පුතු ද,
පඤ්චසිඛ දෙව්පුත් මෙන් ම, තිම්බරූ ගාන්ධර්ව රජු ත්, සුරියවච්චසා දෙව්දුව ත් යන මේ අය ය. අන්‍ය වූ ගාන්ධර්ව දෙව් රජවරු ය. තවත් දෙව්රජවරුන් සමඟ සතුටු වෙමින්, භික්ෂූන්ගේ රැස්වීම දකින්නට මහා වනයට පැමිණියාහු ය.
තව ද නාභස විලෙහි වසන නාගයෝ ද, විසල්පුරවැසි නාගයෝ ද, තච්ඡක විලෙහි නාගයෝ ද, කම්බල – අස්සතර නාගයෝ ද, ප්‍රයාග තීර්ථයෙහි නාගයෝ ද, සිය නෑයින් සමඟ ආවාහු ය.
යමුනා නදීවැසි නාගයෝ ද, යස පිරිවර ඇති ධතරට්ඨ නාගයෝ ද, ඒරාවණ මහා නාගරාජයා ද, භික්ෂූන්ගේ රැස්වීම දකින්නට මහා වනයට පැමිණියාහු ය.
10.
පිරිසිදු පෙනීම ඇති, යම් දිව්‍ය වූ ගුරුළු පක්ෂීහු ත් බලහත්කාරයෙන් නා රජවරුන් රැගෙන යත් ද, ඔවුහු අහසින් වන මැදට පැමිණියාහු ය. චිත්ත, සුපර්ණ යනු ඔවුන්ගේ නම් ය.
එදා නා රජුන්ට බිය නැති බව ලැබුණේ ය. බුදුරජාණන් වහන්සේ ඒ නා රජවරුන් ගුරුලන්ගෙන් මුදවා බිය රහිත රැකවරණයට පත්කළ සේක. මොළොක් වචනයෙන් ඔවුනොවුන් අමතමින් නාගයෝ ත්, ගුරුළො ත් බුදුරජාණන් වහන්සේ ව සරණ ගියහ.
11.
දියමන්ති අත්ඇති තැනැත්තා (සක්දෙවිඳු) විසින් පරදවන ලද, මුහුද ඇසුරු කොට සිටින, සක්දෙවිඳුගේ සහෝදරත්වයට පත් ඉර්ධිමත් යස පිරිවර ඇති අසුරයෝ ද,
කාලකඤ්ජ, දානවේඝස යන මහා බිහිසුණු අසුරයෝ ද, වේපචිත්ති, සුචිත්ති, පහාරාද සහ නමුචි යන අසුරයෝ ද පැමිණියාහු ය.
සියළු දෙනා ම, වෛරෝචන යන නම් ඇති බලි අසුරයාගේ පුත්‍රයෝ සිය දෙනා ද, බල සේනා සන්නද්ධ කොට රාහු අසුරේන්ද්‍රයා වෙත පැමිණියාහු ය. ‘ඔබට යහපතක් වේවා! දැන් භික්ෂූන්ගේ රැස්වීම දකින්නට වනයට යෑමට කල් ය’ යි කීවාහුය.
12.
ආපෝ දේවතාවෝ ත්, පඨවි දේවතාවෝ ත්, තේජෝ දේවතාවෝ ත්, වායු දේවතාවෝ ත් එදා පැමිණියාහු ය. වරුණ, වාරුණ දෙවියෝ ද, සෝම දෙවි ද, යසස දෙවි ද, යස පිරිවර ඇති මෛත්‍රී කායික දෙවිවරු, කරුණා කායික දෙවිවරු ද පැමිණියාහුය.
මේ දස කොටසක් වූ දෙව් පිරිස් සියළු දෙනා ම නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට දස අයුරකින් මහා වනයට පැමිණියාහු ය.
13.
විෂ්ණු දෙවිවරු ද, සහලී දෙවිවරු ද, අසම දෙවිවරු ද, යම දෙවිවරු ද, සඳ ඇසුරු කොට සිටින දෙවිවරු ද, සඳ දෙව් පුතු පෙරටු කොට පැමිණියාහු ය.
හිරු ඇසුරු කොට සිටින දෙවිවරු ද, හිරු දෙව් පුතු පෙරටු කොට පැමිණියාහු ය. නැකැත් තරු ඇසුරු කොට වසන දෙවිවරු ද, නැකැත් තරු අධිපති දෙවියන් පෙරටු කොට පැමිණියාහු ය. මන්දවලාහක දෙවිවරු ද පැමිණියාහු ය. වසු දේවතාවන්ට නායක වූ පුරින්දද නම් වූ වාසව නම් වූ සක් දෙවිඳු ද පැමිණියේ ය.
මේ දස කොටසක් වූ දෙව් පිරිස් සියළු දෙනා ම නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට දස අයුරකින් මහා වනයට පැමිණියාහු ය.
14.
ඉක්බිති සහභූ නම් දෙවිවරු ගිනිසිළු මෙන් බැබලෙමින් වනයට ආවාහු ය. දිය බෙරලිය මල් පැහැ ගත් අරිට්ඨක දෙවිවරු ද, රෝජ දෙවිවරු ද, වරුණ, ධම්ම, අච්චුත, අනේජක දෙවිවරු ද, සූලෙය්‍ය, රුචිර දෙවිවරු ද, ආවාහු ය. වාසවනේසි නම් දෙවිවරු ද ආවාහු ය.
මේ දස කොටසක් වූ දෙව් පිරිස් සියළු දෙනා ම නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට දස අයුරකින් මහා වනයට පැමිණියාහු ය.
15.
සමාන, මහාසමාන, මානුස, මානුසුත්තම, ඛිඩ්ඩාපදෝසික දෙවිවරු ද ආවාහු ය. මනෝපදෝසික දෙවිවරු ද ආවාහු ය.
එමෙන් ම හරි නම් දෙවිවරු ද ආවාහු ය. රත්පැහැ වත් හඳින දෙවිවරු ද, පාරග, මහා පාරග නම් යස පිරිවර ඇති දෙවිවරු ද ආවාහු ය.
මේ දස කොටසක් වූ දෙව් පිරිස් සියළු දෙනා ම නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට දස අයුරකින් මහා වනයට පැමිණියාහු ය.
16.
සුක්ක, කරුම්හ, අරුණ, වේඛනස්ස දෙවිවරු ද ආවාහු ය. ඕදාතගය්හ, පාමොක්ඛ, විචක්ඛණ දෙවිවරු ද ආවාහු ය. යස පිරිවර ඇති සදාමත්ත, හාරගජ, මිස්සක දෙවිවරු ද ආවාහු ය. යමෙක් දිශාවන් වැස්සෙන් තෙමයි ද, ඒ පර්ජන්‍ය දෙවි ද අහස ගුගුරුවමින් ආවේ ය.
මේ දස කොටසක් වූ දෙව් පිරිස් සියළු දෙනා ම නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට දස අයුරකින් මහා වනයට පැමිණියාහු ය.
17.
ඛේමිය, තුසිත, යාම, කට්ඨක, ලම්බීතක, ලාමසෙට්ඨ, ජෝති, ආසව නම් යස පිරිවර ඇති දෙවිවරු ද, නිම්මාණරතී දෙවිවරු ද ආවාහු ය. එමෙන් ම පරනිම්මිත දෙවිවරු ද ආවාහු ය.
මේ දස කොටසක් වූ දෙව් පිරිස් සියළු දෙනා ම නා නා වර්ණ ඇත්තාහු ය. ඉර්ධිමත් ව, බබලමින් වර්ණවත් ව, යසස් ඇති ඔවුහු සතුටු වෙමින් භික්ෂූන්ගේ රැස්වීම දකින්නට දස අයුරකින් මහා වනයට පැමිණියාහු ය.
18.
මේ සැටක් වූ සියළු දෙව් නිකායයෝ නා නා වර්ණ ඇත්තාහු ය. ඔවුහු යම් අන්‍ය වූ දෙවි කෙනෙක් තමන් හා සමාන වූවාහු ද, ඔවුනුත් සමඟ නම් පිළිවෙලින් ආවාහු ය.
වාසය කොට අවසන් කළ උපත ඇති, උදුරා හළ කෙලෙස් හුල් ඇති, එතෙර වූ සසර සැඩ පහර ඇති, ආශ්‍රව රහිත, ඕඝ තරණය කළ, අගතිය ඉක්ම වූ, පුන් සඳක් සේ උතුම් අප බුදුරජුන් දකිමු.
ඉර්ධිමත් බුදුරජුන්ගේ ශ්‍රාවක පුතුන් වූ සුබ්‍රහ්ම, පරමාත්ම යන බ්‍රහ්මකායික දෙවිවරු ද, සනංකුමාර බ්‍රහ්මරාජයා ද පැමිණියාහු ය. තිස්ස නම් බ්‍රහ්මරාජයා ද භික්ෂූන්ගේ රැස්වීමට වනයට පැමිණියාහු ය.
මහා බ්‍රහ්මරාජයා දහසක් බ්‍රහ්මලෝකයන් මැඩ පවත්වා සිටියි. බඹලොව උපන්, බබලන්නා වූ, බිහිසුණු මහා සිරුරකින් හෙබි යස පිරිවර ඇති ඔහු ද පැමිණියේ ය.
වෙන් වෙන් ව සිය පිරිස් තම වසඟයෙහි පවත්වන ඊශ්වර නම් දෙවිවරු දස දෙනෙක් මෙහි පැමිණියාහු ය. ඔවුන්ගේ මැදින් පිරිවර සහිත ව හාරිත නම් බ්‍රහ්මරාජයා පැමිණියේ ය.
19.
සක් දෙවිඳුන් සහිත වූ, මහා බ්‍රහ්මයා සහිත වූ, ඒ සියළු දෙවිවරුන් පැමිණි කල්හී මාර සේනාවෝ පැමිණියාහු ය. පවිටු මාරයාගේ නුවණ මඳ බව බලව.
‘එව්, මාර සේනාවෙනි, මේ දෙවිවරුන් අල්ලා ගනිව්. රාග සිතිවිල්ලෙන් සිර කරව්. මොවුහු රාග උගුලේ සිරකරුවෝ වෙත්වා! හාත්පසින් වට කරව්. ඔවුන් කිසිවෙකුට කෙලෙසුන්ගෙන් නිදහස් වන්නට ඉඩ නොදෙව්.’
මෙසේ එහි මහාසේනා ඇති මාරයා අතින් පොළොවට පහර දෙමින් බිහිසුණු හඬ නංවා කළු පැහැ ගත් සේනාව පිටත් කරවීය.
20.
මහාවැසි ඇදහැලෙන කල්හී අහස ගුගුරුවමින් විදුලි කොටන්නේ යම් සේ ද, එසෙයින් ම එදා ඔහු දෙව් පිරිස තමාගේ වසඟයට ගත නොහැකි ව කෝපයෙන් යළි හැරී ගියේ ය.
සදහම් ඇස් ඇති ශාස්තෘන් වහන්සේ ඒ සියල්ල විශිෂ්ට ඥානයෙන් වෙන් වෙන් වශයෙන් හඳුනාගෙන බුදු සසුනෙහි ඇලී සිටි ශ්‍රාවකයන් වහන්සේලා ඇමතූ සේක. “මහණෙනි, මාර සේනාවෝ පැමිණියාහු ය. එය දිවැසින් දනිව්.”
බුදුරජාණන් වහන්සේගේ අනුශාසනාව ඇසූ ඒ භික්ෂූහු ඔවුන් දකින්නට වීරිය වැඩූහ. ඒ වීතරාගීන් වහන්සේලා වෙතින් ඔවුහු ඉවත් ව ගියාහු ය. ඒ රහතුන්ගේ එක් ලෝමයකුදු සොලවන්නට නොහැකි වූවාහු ය.
ජයගත් මාර යුද්ධ ඇති, ඉක්මවා ගිය භය ඇති, යස පිරිවර ඇති, ජනයා අතර ප්‍රසිද්ධ වූ ඒ සියළු දෙනා වහන්සේ බුදුරජාණන් වහන්සේගේ ශ්‍රාවකයෝ ය. ඔවුහු ආර්ය ශ්‍රාවකයන් හා සතුටු වෙති.
සාදු! සාදු!! සාදු!!!
මහා සමය සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/dn2_7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M