2.1.5.1
සැවැත් නුවරදී …………..
42. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? මතුපිටින් පෙනෙන පිරිසත්, ගැඹුරු පිරිසත්ය.
පින්වත් මහණෙනි, මතුපිටින් පෙනෙන පිරිස කවුද? පින්වත් මහණෙනි, මෙහි යම් පිරිසක භික්ෂූන් ඉන්නවා. ඔවුන්ගේ සිත් විපිළිසරයි. මාන්නක්කාරයි. චපලයි. කට වාචාලයි. වැඩකට නැති වචන හසුරුවනවා. සිහිමුළා වෙලයි ඉන්නේ. අවබෝධයෙන් තොරයි. එකඟ සිත් නෑ. බිරාන්ත වෙච්ච සිතින් තමයි ඉන්නේ. අසංවර ඉඳුරන්ගෙන් යුක්තයි. පින්වත් මහණෙනි, මේ පිරිසට තමයි කියන්නේ මතුපිටින් පෙනෙන පිරිස කියලා.
පින්වත් මහණෙනි, ගැඹුරු පිරිස කවුද? පින්වත් මහණෙනි, මෙහි යම් පිරිසක භික්ෂූන් ඉන්නවා. ඔවුන්ගේ සිත් විපිළිසර නෑ. මාන්නක්කාර නෑ. චපල නෑ. කටවාචාල නෑ. වැඩකට නැති වචන හසුරුවන්නෙ නෑ. සිහිය පිහිටුවාගෙනයි ඉන්නේ. අවබෝධයෙන් යුක්තයි. එකඟ සිත් තියෙනවා. සංවර ඉඳුරන්ගෙන් යුක්තයි. පින්වත් මහණෙනි, මේ පිරිසට තමයි කියන්නේ ගැඹුරු පිරිස කියලා. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතුරින් මේ ගැඹුරු පිරිසම තමයි අග්‍ර වෙන්නෙ.
2.1.5.2
43. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක් ද යත්? අසමගි පිරිසත්, සමගි පිරිසත්ය.
පින්වත් මහණෙනි, අසමගි පිරිස කවරහුද? පින්වත් මහණෙනි, මෙහි යම් පිරිසක භික්ෂූන් ඉන්නවා. ඔවුන් රණ්ඩු හදා ගෙන ඉන්නවා. කලහ කරගන්නවා. වාද විවාද කරගන්නවා. එකිනෙකාට වචන නැමැති ආයුධවලින් විදගනිමින් වාසය කරනවා. පින්වත් මහණෙනි, මෙයට තමයි අසමගි පිරිස කියල කියන්නේ.
පින්වත් මහණෙනි, සමගි පිරිස කවරහුද? පින්වත් මහණෙනි, මෙහි යම් පිරිසක භික්ෂූන් ඉන්නවා. ඔවුන් සමගියි. සතුටින් ඉන්නවා. වාද විවාද නැතුව ඉන්නවා. කිරියි, වතුරයි වගේ එක්ව ඉන්නවා. එකිනෙකාට ප්‍රිය ඇසින් බලමින් වාසය කරනවා. පින්වත් මහණෙනි, මෙයට තමයි සමගි පිරිස කියල කියන්නේ. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතුරින් මේ සමගි පිරිසම තමයි අග්‍ර වෙන්නෙ.
2.1.5.3
44. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක් ද යත්? උතුම් පුද්ගලයන් නැති පිරිසත්, උතුම් පුද්ගලයින් සිටින පිරිසත් ය.
පින්වත් මහණෙනි, උතුම් පුද්ගලයන් නැති පිරිස කවරහුද? පින්වත් මහණෙනි, මෙහි යම් පිරිසක ස්ථවිර භික්ෂූන් ඉන්නවා. ඔවුන් බහුභාණ්ඩිකයි. ශාසනික වැඩපිළිවෙල ගණන් නොගත් ලිහිල්ව ගත් ප්‍රතිපදාවෙන් යුක්තයි. පිරිහීමට හේතු වන දේවල් තමයි පෙරටු කරගෙන ඉන්නෙ. විවේකයෙන් ලබා ගත යුතු ගුණ දහම් පිණිස වුවමනා වීරිය අත්හැරලයි ඉන්නෙ. ලබා නොගත් ගුණ දහම් ලබාගන්නට වත්, අවබෝධ නොකළ ආර්ය සත්‍යය අවබෝධ කරන්නට වත්, සාක්ෂාත් නොකළ මගඵල සාක්ෂාත් කරන්නට වත් වීරිය කරන්නෙ නෑ. ඉතින් ඔවුන් පසුපසින් එන පිරිසත් ඒ ආකාරයටම පත් වෙනවා. එතකොට ඔවුනුත් බහුභාණ්ඩික වෙනවා. ශාසනික වැඩපිළිවෙල ගණන් නොගත් ලිහිල්ව ගත් ප්‍රතිපදාවෙන් යුක්ත වෙනවා. පිරිහීමට හේතු වන දේවල් පෙරටු කර ගෙන ඉන්නවා. විවේකයෙන් ලබා ගත යුතු ගුණ දහම්වලට වුවමනා වීරිය අත්හැර දමනවා. නොලැබූ ගුණදහම් ලබා ගැනීම පිණිස වත්, අවබෝධ නොකළ ආර්ය සත්‍යය අවබෝධ කිරීම පිණිස වත්, සාක්ෂාත් නොකළ මග-ඵල සාක්ෂාත් කිරීම පිණිස වත් වීරිය නොකර ඉන්නවා. පින්වත් මහණෙනි, මෙයට තමයි කියන්නෙ උතුම් පුද්ගලයන් නැති පිරිස කියලා.
පින්වත් මහණෙනි, උතුම් පුද්ගලයන් සිටින පිරිස කවරහුද? පින්වත් මහණෙනි, මෙහි යම් පිරිසක ස්ථවිර භික්ෂූන් ඉන්නවා. ඔවුන් බහුභාණ්ඩික නෑ. ශාසනික වැඩපිළිවෙල ගණන් නොගත් ලිහිල්ව ගත් ප්‍රතිපදාවෙන් යුක්ත නෑ. පිරිහීමට හේතු වන දේවල් පෙරටු කර ගෙන ඉන්නෙ නෑ. විවේකයෙන් ලබා ගත යුතු ගුණ දහම් පිණිස වුවමනා වීරිය පටන් ගෙනයි ඉන්නෙ. ලබා නොගත් ගුණ දහම් ලබාගන්නටත්, අවබෝධ නොකළ ආර්ය සත්‍යය අවබෝධ කරන්නත්, සාක්ෂාත් නොකළ මග-ඵල සාක්ෂාත් කරන්නත් වීරිය කරනවා. ඉතින් ඔවුන් පසුපසින් එන පිරිසත් ඒ ආකාරයටම පත් වෙනවා. එතකොට ඔවුනුත් බහුභාණ්ඩික වෙන්නෙ නෑ. ශාසනික වැඩපිළිවෙල ගණන් නොගත් ලිහිල්ව ගත් ප්‍රතිපදාවෙන් යුක්ත වෙන්නෙ නෑ. පිරිහීමට හේතු වන දේවල් පෙරටු කරගෙන ඉන්නෙ නෑ. විවේකයෙන් ලබා ගත යුතු ගුණදහම්වලට වුවමනා වීරිය පටන් ගෙනයි තියෙන්නේ. නොලැබූ ගුණදහම් ලබා ගැනීම පිණිසත්, අවබෝධ නොකළ ආර්ය සත්‍යය අවබෝධ කිරීම පිණිසත්, සාක්ෂාත් නොකළ මග-ඵල සාක්ෂාත් කිරීම පිණිසත් වීරිය කරනවා. පින්වත් මහණෙනි, මෙයට තමයි කියන්නෙ උතුම් පුද්ගලයන් ඇති පිරිස කියලා. පින්වත් මහණෙනි, මේ තමයි පිරිස් දෙක. මේ පිරිස් දෙක අතුරින් මේ උතුම් පුද්ගලයන් ඉන්න පිරිසම තමයි අග්‍ර වෙන්නෙ.
2.1.5.4
45. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක් ද යත්? අනාර්ය පිරිසත්, ආර්ය පිරිසත් ය.
පින්වත් මහණෙනි, අනාර්ය පිරිස කවරහුද? පින්වත් මහණෙනි, මෙහි යම් පිරිසක භික්ෂූන් ‘මේ තමයි දුක’ කියා ඇති සැටියෙන්ම දන්නෙ නෑ. ‘මේ තමයි දුක හටගැනීම’ කියා ඇති සැටියෙන්ම දන්නෙ නෑ. ‘මේ තමයි දුක නැතිවීම’ කියා ඇති සැටියෙන්ම දන්නෙ නෑ. ‘මේ තමයි දුක නැතිවීමට තියෙන මාර්ගය’ කියා ඇති සැටියෙන්ම දන්නෙ නෑ. පින්වත් මහණෙනි, මෙයට තමයි අනාර්ය පිරිස කියලා කියන්නෙ.
පින්වත් මහණෙනි, ආර්ය පිරිස කවරහුද? පින්වත් මහණෙනි, මෙහි යම් පිරිසක භික්ෂූන් ‘මේ තමයි දුක’ කියා ඇති හැටියෙන්ම දන්නවා. ‘මේ තමයි දුක් හටගැනීම’ කියා ඇති හැටියෙන්ම දන්නවා. ‘මේ තමයි දුක් නැති වීම’ කියා ඇති හැටියෙන්ම දන්නවා. ‘මේ තමයි දුක් නැතිවීමට තියෙන මාර්ගය’ කියා ඇති හැටියෙන්ම දන්නවා. පින්වත් මහණෙනි, මෙයට තමයි කියන්නෙ ආර්ය පිරිස කියලා. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ ආර්ය පිරිසම තමයි අග්‍ර වෙන්නෙ.
2.1.5.5
46. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? කසළ පිරිසත්, නිකසළ (පිරිසිදු) පිරිසත්ය.
පින්වත් මහණෙනි, කසළ පිරිස කවරහුද? පින්වත් මහණෙනි, මෙහි යම් පිරිසක භික්ෂූන් කැමැත්ත නිසා අගතියට යනවා. තරහා නිසා අගතියට යනවා. මුළාව නිසා අගතියට යනවා. භය නිසා අගතියට යනවා. පින්වත් මහණෙනි, මෙයට තමයි කසළ පිරිස කියල කියන්නෙ.
පින්වත් මහණෙනි, නිකසළ පිරිස කවරහුද? පින්වත් මහණෙනි, මෙහි යම් පිරිසක භික්ෂූන් කැමැත්ත නිසා අගතියට යන්නෙ නෑ. තරහා නිසා අගතියට යන්නෙ නෑ. මුළාව නිසා අගතියට යන්නෙ නෑ. භය නිසා අගතියට යන්නෙ නෑ. පින්වත් මහණෙනි, මෙයට තමයි නිකසළ පිරිස කියල කියන්නෙ. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ නිකසළ පිරිසම තමයි අග්‍ර වෙන්නෙ.
2.1.5.6
47. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? අදාල නැති දෙය ගෙන නො විමසා හික්මෙන, අදාළ දහම් කරුණු විමසා නොහික්මෙන පිරිස හා අදාළ දහම් කරුණු විමසා හික්මෙන අදාල නැති දෙය ගෙන නොවිමසා නොහික්මෙන පිරිසත්ය.
පින්වත් මහණෙනි, අදාල නැති දෙය ගෙන නොවිමසා හික්මෙන, අදාල දහම් කරුණු විමසා නොහික්මෙන පිරිස කවරහුද? පින්වත් මහණෙනි, මෙකරුණෙහිලා යම් පිරිසක භික්ෂූන් ඉන්නවා. ඔවුන් යම් ඒ තථාගත භාෂිත වූ ගම්භීර වූ ගම්භීර අර්ථ ඇත්තා වූ ලෝකෝත්තර වූ (අනාත්ම දර්ශනයෙන් යුතු) ශූන්‍යතාව විග්‍රහ කරන්නා වූ සූත්‍ර දේශනා ඇද්ද, ඒ සූත්‍ර ධර්මයන් දේශනා කරන විට ඇසීමට කැමැති වන්නේ නෑ. මනාකොට සවන් යොමන්නේ නෑ. අවබෝධ කරගැනීම පිණිස සිත පිහිටුවා ගන්නෙ නෑ. ඔවුන් ඒ ධර්මයන් ඉගෙන ගත යුතුයි කියා හෝ පාඩම් කළ යුතුයි කියා හෝ හඟින්නේ නෑ. නමුත් යම් ඒ නිර්මාණශීලී උගතුන් විසින් කරන ලද දෙසුම් ඇද්ද, මිහිරි ලෙස ගලපන ලද පදබැඳුම් ඇද්ද, විචිත්‍ර අක්ෂරවලින් විචිත්‍ර පද ගැලපීම්වලින් යුතුව බුදු සසුනට පරිබාහිර වූ ශ්‍රාවකයින් කියන ලද දේ ඇද්ද, ඒවා කතා කරන විට ඇසීමට සිත පිහිටුවනවා. ඒ දේවල් ඉතා ඉහළින් පිළිගත යුතු බවටත්, පාඩම් කළ යුතු බවටත් හඟිනවා. ඒ භික්ෂූන් ඒ බාහිර දෙය පුරුදු පුහුණු කොට ‘මෙය කෙසේද? මෙහි අරුත කුමක්ද?’ කියා එකිනෙකාගෙන් විමසා බලන්නෙත් නෑ. නැවත නැවත සොයන්නෙත් නෑ. එනිසා ඔවුන් විවෘත නොවූ දෙය විවෘත කරන්නෙ නෑ. අප්‍රකට නොවූ අරුත් ප්‍රකට කරගන්නෙ නෑ. සැකසංකා ඇති වෙන අනේකවිධ කරුණු පිළිබඳව සැකය දුරු කරන්නෙත් නෑ. පින්වත් මහණෙනි, මෙයට තමයි කියන්නෙ අදාළ නැති දෙය ගෙන නොවිමසා හික්මෙන, අදාළ දහම් කරුණු විමසා නොහික්මෙන පිරිස කියා.
පින්වත් මහණෙනි, අදාළ දහම් කරුණු පමණක් විමසා හික්මෙන, අදාළ නැති දෙය ගෙන නොවිමසා නොහික්මෙන පිරිස කවරහුද? පින්වත් මහණෙනි, මෙකරුණෙහිලා යම් පිරිසක භික්ෂූන් ඉන්නවා. යම් ඒ නිර්මාණශීලී උගතුන් විසින් කරන ලද දෙසුම් ඇද්ද, මිහිරි ලෙස ගලපන ලද පදබැඳුම් ඇද්ද, විචිත්‍ර අක්ෂරවලින් විචිත්‍ර පද ගැලපීම්වලින් යුතුව බුදු සසුනට පරිබාහිර වූ ශ්‍රාවකයින් කියන ලද දේ ඇද්ද, ඒවා කතා කරන විට ඇසීමට කැමැති වෙන්නෙ නෑ. සවන් යොමන්නෙ නෑ. අවබෝධ කරගැනීමට සිත පිහිටුවන්නෙ නෑ. ඒ දේවල් ඉතා ඉහළින් පිළිගත යුතු බවටත්, පාඩම් කළ යුතු බවටත් හඟින්නෙ නෑ. නමුත් ඔවුන් යම් ඒ තථාගත භාෂිත වූ ගම්භීර වූ ගම්භීර අර්ථ ඇත්තා වූ ලෝකෝත්තර වූ (අනාත්ම දර්ශනයෙන් යුතු) ශූන්‍යතාව විග්‍රහ කරන්නා වූ සූත්‍ර දේශනා ඇද්ද, ඒ සූත්‍ර ධර්මයන් දේශනා කරන විට ඇසීමට කැමැති වෙනවා. මනා කොට සවන් යොමනවා. අවබෝධ කරගැනීම පිණිස සිත පිහිටුවනවා. ඔවුන් ඒ ධර්මයන් ඉගෙන ගත යුතුයි කියා හෝ පාඩම් කළ යුතුයි කියා හෝ හඟිනවා. ඒ භික්ෂූන් ඒ ධර්මය පුරුදු පුහුණු කොට ‘මෙය කෙසේ ද? මෙහි අරුත කුමක්ද?’ කියා එකිනෙකාගෙන් විමසා බලනවා. නැවත නැවත සොයනවා. එනිසා ඔවුන් විවෘත නොවූ දෙය විවෘත කරනවා. අප්‍රකට නොවූ අරුත් ප්‍රකට කරනවා. සැකසංකා ඇති වෙන අනේකවිධ කරුණු පිළිබඳව සැකය දුරු කර ගන්නවා. පින්වත් මහණෙනි, මෙයට තමයි කියන්නෙ අදාළ දහම් කරුණු පමණක් විමසා හික්මෙන, අදාළ නැති දෙය ගෙන නොවිමසා නොහික්මෙන පිරිස කියා. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ අදාළ දහම් කරුණු පමණක් විමසා හික්මෙන, අදාළ නැති දෙය නොවිමසා නොහික්මෙන පිරිසම තමයි අග්‍ර වෙන්නෙ.
2.1.5.7
48. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? ආමිසයට ගරු කරන, සද්ධර්මයට ගරු නොකරන පිරිසත්, සද්ධර්මයට ගරු කරන ආමිසයට ගරු නොකරන පිරිසත්ය.
පින්වත් මහණෙනි, ආමිසයට ගරු කරන, සද්ධර්මයට ගරු නොකරන පිරිස කවරහුද? පින්වත් මහණෙනි, මෙහි යම් පිරිසක භික්ෂූන් සුදු වස්ත්‍ර අඳින ගිහියන් ඉදිරියේ මේ අයුරින් එකිනෙකාගේ ගුණ කියා ගන්නවා. “අසවල් භික්ෂුව උභතෝභාගවිමුක්ත නෙව. අසවල් භික්ෂුව ප්‍රඥාවිමුක්ත නෙව. අසවල් භික්ෂුව කායසක්ඛී නෙව. අසවල් භික්ෂුව දිට්ඨප්පත්ත නෙව. අසවල් භික්ෂුව ශ්‍රද්ධාවිමුක්ත නෙව. අසවල් භික්ෂුව ධම්මානුසාරී නෙව. අසවල් භික්ෂුව ශ්‍රද්ධානුසාරී නෙව. අසවල් භික්ෂුව යහපත් ගුණ ධර්මයන්ගෙන් යුතු සිල්වතෙක් නෙව. අසවල් භික්ෂුව පාපී ගති තියෙන දුස්සීලයෙක් නෙව” කියල. එයින් ඔවුන් ලාභ ලබනවා. ඔවුන් ඒ ලාභයන් ලබා, ඒවායේ ඇලෙනවා. මුසපත් වෙනවා. ආදීනව නොදැක, ඒවායෙහි ඇල්ම දුරු කිරීමේ ප්‍රඥාවෙන් තොරව පාවිච්චි කරනවා. පින්වත් මහණෙනි, මෙයට තමයි කියන්නේ ආමිසයට ගරු කරන, සද්ධර්මයට ගරු නොකරන පිරිස කියලා.
පින්වත් මහණෙනි, ආමිසයට ගරු නොකරන, සද්ධර්මයට ගරු කරන පිරිස කවරහුද? පින්වත් මහණෙනි, මෙහි යම් පිරිසක භික්ෂූන් සුදු වස්ත්‍ර අඳින ගිහියන් ඉදිරියේ “අසවල් භික්ෂුව උභතෝභාගවිමුක්ත නෙව. අසවල් භික්ෂුව ප්‍රඥාවිමුක්ත නෙව. අසවල් භික්ෂුව කායසක්ඛී නෙව. අසවල් භික්ෂුව දිට්ඨප්පත්ත නෙව. අසවල් භික්ෂුව ශ්‍රද්ධාවිමුක්ත නෙව. අසවල් භික්ෂුව ධම්මානුසාරී නෙව. අසවල් භික්ෂුව ශ්‍රද්ධානුසාරී නෙව. අසවල් භික්ෂුව යහපත් ගුණ ධර්මයන්ගෙන් යුතු සිල්වතෙක් නෙව. අසවල් භික්ෂුව පාපී ගති තියෙන දුස්සීලයෙක් නෙව” කියල එකිනෙකාගේ ගුණ කියා ගන්නෙ නෑ. එයින් ඔවුන් ලාභ ලබනවා. ඔවුන් ඒ ලාභයන් ලබා, ඒවායේ ඇලෙන්නෙත් නෑ. මුසපත් වෙන්නෙ නෑ. ආදීනව දැක, ඒවායෙහි ඇල්ම දුරු කිරීමේ ප්‍රඥාවෙන් යුතුව පාවිච්චි කරනවා. පින්වත් මහණෙනි, මෙයට තමයි කියන්නේ සද්ධර්මයට ගරු කරන, ආමිසයට ගරු නොකරන පිරිස කියලා. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ සද්ධර්මයට ගරු කරන, ආමිසයට ගරු නොකරන පිරිස ම තමයි අග්‍ර වෙන්නෙ.
2.1.5.8
49. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? විසම පිරිසත්, සම පිරිසත්ය.
පින්වත් මහණෙනි, විසම (අයහපත්) පිරිස කවරහුද? පින්වත් මහණෙනි, මෙහි යම් පිරිසක අධාර්මික ක්‍රියාවන් පවතිනවා. ධාර්මික ක්‍රියාවන් පවතින්නේ නෑ. අවිනය ක්‍රියාවන් පවතිනවා. විනයානුකූල ක්‍රියාවන් පවතින්නේ නෑ. අධාර්මික දේවල් බබලවනවා. ධාර්මික දේවල් බබලවන්නේ නෑ. අවිනයානුකූල දේවල් බබලනවා. විනයානුකූල දේවල් බබලවන්නේ නෑ. මෙයට තමයි පින්වත් මහණෙනි, විසම පිරිස කියල කියන්නෙ. පින්වත් මහණෙනි, පිරිස විසම වෙච්ච නිසා තමයි අධාර්මික ක්‍රියාවන් පවතින්නේ. ධාර්මික ක්‍රියාවන් නොපවතින්නේ. අවිනය ක්‍රියාවන් පවතින්නේ. විනයානුකූල ක්‍රියාවන් නොපවතින්නේ. අධාර්මික දේවල් බබලවන්නේ. ධාර්මික දේවල් නොබබලවන්නේ. අවිනයානුකූල දේවල් බබලවන්නේ. විනයානුකූල දේවල් නොබබලවන්නේ.
පින්වත් මහණෙනි, සම (යහපත්) පිරිස කවරහුද? පින්වත් මහණෙනි, මෙහි යම් පිරිසක ධාර්මික ක්‍රියාවන් පවතිනවා. අධාර්මික ක්‍රියාවන් පවතින්නේ නෑ. විනය ක්‍රියාවන් පවතිනවා. අවිනයානුකූල ක්‍රියාවන් පවතින්නේ නෑ. ධාර්මික දේවල් බබලවනවා. අධාර්මික දේවල් බබලවන්නේ නෑ. විනයානුකූල දේවල් බබලනවා. අවිනයානුකූල දේවල් බබලවන්නේ නෑ. මෙයට තමයි පින්වත් මහණෙනි, සම පිරිස කියල කියන්නෙ. පින්වත් මහණෙනි, පිරිස සම වෙච්ච නිසා තමයි ධාර්මික ක්‍රියාවන් පවතින්නේ. අධාර්මික ක්‍රියාවන් නොපවතින්නේ. විනය ක්‍රියාවන් පවතින්නේ. අවිනයානුකූල ක්‍රියාවන් නොපවතින්නේ. ධාර්මික දේවල් බබලවන්නේ. අධාර්මික දේවල් නොබබලවන්නේ. විනයානුකූල දේවල් බබලවන්නේ. අවිනයානුකූල දේවල් නොබබලවන්නේ. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ සම පිරිසම තමයි අග්‍ර වෙන්නෙ.
2.1.5.9
50. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? අධාර්මික පිරිසත්, ධාර්මික පිරිසත්ය. ….(පෙ)…. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ ධාර්මික පිරිසම තමයි අග්‍ර වෙන්නෙ.
2.1.5.10
51. පින්වත් මහණෙනි, මේ පිරිස් දෙකක් ඉන්නවා. ඒ කවර දෙපිරිසක්ද යත්? අධාර්මවාදී පිරිසත්, ධාර්මවාදී පිරිසත්ය.
පින්වත් මහණෙනි, අධර්මවාදී පිරිස කවරහුද? පින්වත් මහණෙනි, මෙහි යම් පිරිසක භික්ෂූන් ධාර්මික වේවා, අධාර්මික වේවා ආරවුලක් පටන් ගන්නවා. ඔවුන් ඒ අධිකරණය (ආරවුල) ඉදිරියට ගෙන එකිනෙකාට දන්වන්නෙ නෑ. කරුණු පහදාදීමට ඉදිරිපත් වෙන්නෙ නෑ. කරුණු දක්වන්නෙ නෑ. කරුණු දැක්වීමට ඉදිරිපත් වෙන්නෙත් නෑ. ඔවුන් නොදැන්වීම බලය කොට ගෙන, කරුණු නොදැක්වීම බලය කොට ගෙන, අයුක්තිය බැහැර කිරීමට කතාබස් නොකොට, එම ආරවුලම දැඩි ලෙස ග්‍රහණය කර ගෙන, එහිම බැසගෙන ‘මේක විතරමයි ඇත්ත. අනිත් ඒවා බොරු’ කියා පවසනවා. පින්වත් මහණෙනි, අධර්මවාදී පිරිස කියන්නේ මෙයටයි.
පින්වත් මහණෙනි, ධර්මවාදී පිරිස කවරහුද? පින්වත් මහණෙනි, මෙහි යම් පිරිසක භික්ෂූන් ධාර්මික වේවා, අධාර්මික වේවා ආරවුලක් පටන් ගන්නවා. ඔවුන් ඒ අධිකරණය (ආරවුල) ඉදිරියට ගෙන එකිනෙකාට දන්වනවා. කරුණු පහදාදීමට ඉදිරිපත් වෙනවා. කරුණු දක්වනවා. කරුණු දැක්වීමට ඉදිරිපත් වෙනවා. ඔවුන් දැන්වීම බලය කොට ගෙන, කරුණු දැක්වීම බලය කොට ගෙන, අයුක්තිය බැහැර කිරීමට කතාබස් කොට, කටයුතු කරන අතර, එම ආරවුල ම දැඩි ලෙස ග්‍රහණය නොකරගෙන, එහි ම නොබැසගෙන, ‘මේක විතරමයි ඇත්ත. අනිත් ඒවා බොරු’ කියා පවසන්නෙ නෑ. පින්වත් මහණෙනි, ධර්මවාදී පිරිස කියන්නේ මෙයටයි. පින්වත් මහණෙනි, මේ තමයි පිරිස් දෙක. පින්වත් මහණෙනි, මේ පිරිස් දෙක අතරින් මේ ධර්මවාදී පිරිසම තමයි අග්‍ර වෙන්නෙ.
පස්වෙනි පරිස වර්ගය යි.
එහි උද්දානය :
උත්තාන සූත්‍රය, අග්ගවතී සූත්‍රය, ආර්ය සූත්‍රය, පස්වෙනි කසට සූත්‍රය, ඔක්කාචිත සූත්‍රය, ආමිස සූත්‍රය, විසම සූත්‍රය, අධම්ම සූත්‍රය, ධම්මීය සූත්‍රය වශයෙන් මේ වර්ගය සමන්විතය.
පළමු දෙසුම් පණහ සමාප්තයි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_2-1-5-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M