2.2.6.1.
සැවැත් නුවරදී …………
1. පින්වත් මහණෙනි, බොහෝ දෙනාගේ යහපත පිණිස, බොහෝ දෙනාගේ සැපය පිණිස, බොහෝ ජනයාගේත්, දෙව් මිනිසුන්ගේත්, අර්ථය පිණිස, යහපත පිණිස, සැපය පිණිස මේ ලෝකයෙහි උපදින පුද්ගලයෝ දෙන්නෙක් ඉන්නවා.
ඒ දෙදෙනා කවරහුද ? අරහත් සම්මා සම්බුද්ධ වූ තථාගතයන් වහන්සේත්, සක්විති රජුත්ය. පින්වත් මහණෙනි, මේ තමයි බොහෝ දෙනාගේ යහපත පිණිස, බොහෝ දෙනාගේ සැපය පිණිස, බොහෝ ජනයාගේත්, දෙව් මිනිසුන්ගේත් අර්ථය පිණිස, යහපත පිණිස, සැපය පිණිස මේ ලෝකයෙහි උපදින පුද්ගලයෝ දෙදෙනා.
2.2.6.2.
2. පින්වත් මහණෙනි, මේ ලෝකයෙහි ආශ්චර්යවත් මනුෂ්‍යයන් ලෙස උපදින පුද්ගලයෝ දෙන්නෙක් ඉන්නවා. ඒ දෙදෙනා කවරහුද? අරහත් සම්මා සම්බුද්ධ වූ තථාගතයන් වහන්සේත්, සක්විති රජුත්ය. පින්වත් මහණෙනි, මේ තමයි ආශ්චර්යවත් මනුෂ්‍යයන් හැටියට ලෝකයෙහි උපදින පුද්ගලයින් දෙදෙනා.
2.2.6.3.
3. පින්වත් මහණෙනි, මේ පුද්ගලයන් දෙදෙනෙකුගේ කළුරිය කිරීම බොහෝ ජනයාගේ පසුතැවිල්ලට හේතු වෙනවා. ඒ කවර පුද්ගලයන් දෙදෙනෙකුගේද යත්? අරහත් සම්මා සම්බුද්ධ වූ තථාගතයන් වහන්සේගේත්, සක්විති රජුගේත්ය. පින්වත් මහණෙනි, මේ පුද්ගලයන් දෙදෙනාගේ කළුරිය කිරීම බොහෝ ජනයාගේ පසුතැවිල්ලට හේතු වෙනවා.
2.2.6.4.
4. පින්වත් මහණෙනි, ස්ථූප කරවා වැඳුම් පිදුම් කිරීමට සුදුසු මේ දෙදෙනෙක් ලෝකයෙහි ඉන්නවා. ඒ කවර දෙදෙනෙක්ද යත්? අරහත් සම්මා සම්බුද්ධ වූ තථාගතයන් වහන්සේත්, සක්විති රජුත්ය. පින්වත් මහණෙනි, මේ තමයි ස්ථූප කරවා වැඳුම් පිදුම් කිරීම සුදුසු දෙන්නා.
2.2.6.5.
5. පින්වත් මහණෙනි, මේ බුදුවරු දෙදෙනෙකි. ඒ කවර දෙදෙනෙක්ද යත්? අරහත් සම්මා සම්බුද්ධ වූ තථාගතයන් වහන්සේත්, පසේ බුදුරජාණන් වහන්සේත්ය. පින්වත් මහණෙනි, මේ තමයි බුදුවරු දෙන්නා.
2.2.6.6.
6. පින්වත් මහණෙනි, හෙණ හඬ පුපුරන විට තැති ගැනීම ඇති නොවන දෙදෙනෙක් ඉන්නවා. ඒ කවර දෙදෙනෙක්ද යත්? ආශ්‍රවයන් ක්ෂය කරන ලද අරහත් භික්ෂුවත්, ආජානීය හස්ථියාත්ය. පින්වත් මහණෙනි, මේ තමයි හෙණ හඬ පුපුරන විට තැති ගැනීම ඇති නොවන දෙදෙනා.
2.2.6.7.
7. පින්වත් මහණෙනි, හෙණ හඬ පුපුරන විට තැති ගැනීම ඇති නොවන දෙදෙනෙක් ඉන්නවා. ඒ කවර දෙදෙනෙක්ද යත්? ආශ්‍රවයන් ක්ෂය කරන ලද අරහත් භික්ෂුවත්, ආජානීය අශ්වයාත් ය. පින්වත් මහණෙනි, මේ තමයි හෙණ හඬ පුපුරන විට තැති ගැනීම ඇති නොවන දෙදෙනා.
2.2.6.8.
8. පින්වත් මහණෙනි, හෙණ හඬ පුපුරන විට තැති ගැනීම ඇති නොවන දෙදෙනෙක් ඉන්නවා. ඒ කවර දෙදෙනෙක්ද යත්? ආශ්‍රවයන් ක්ෂය කරන ලද අරහත් භික්ෂුවත්, සතුන් ගේ රජු වන සිංහයාත්ය. පින්වත් මහණෙනි, මේ තමයි හෙණ හඬ පුපුරන විට තැති ගැනීම ඇති නොවන දෙදෙනා.
2.2.6.9.
9. පින්වත් මහණෙනි, මේ අර්ථ දෙකක් සැළකිල්ලට ගෙනයි කිඳුරු පුරුෂයින් මිනිස් වචන නොපවසන්නේ. ඒ කවර අර්ථ දෙකක්ද යත්? අපෙන් බොරු කියවෙන්නට එපා! අනුන් හට හේතු යුක්ති රහිතව චෝදනා කෙරෙන්නට එපා! යන කරුණු ය. පින්වත් මහණෙනි. මේ අර්ථ දෙක සැළකිල්ලට ගෙනයි කිඳුරු පුරුෂයින් මිනිස් වචන නො පවසන්නේ.
2.2.6.10
10. පින්වත් මහණෙනි, කරුණු දෙකකින් තෘප්තිමත් නොවී, එපා නොවී තමයි ස්ත්‍රිය කළුරිය කරන්නේ. ඒ කවර කරුණු දෙකක්ද යත්? මෛථූන සේවනයේ යෙදීමත්, දරුවන් වැදීමත් ය. පින්වත් මහණෙනි, මේ කරුණු දෙකෙන් තෘප්තිමත් නොවී, එපා නොවී තමයි ස්ත්‍රිය කළුරිය කරන්නේ.
2.2.6.11.
11. පින්වත් මහණෙනි, ඔබට අශාන්ත පුද්ගලයින් හා එකට ජීවත් වීමත්, ශාන්ත පුද්ගලයින් හා එකට ජීවත් වීමත් ගැන මා දේශනා කරන්නම්. එය සවන් යොමා අසන්න. හොඳින් නුවණින් මෙනෙහි කරන්න. කියා දෙන්නම්. “එසේය, ස්වාමීනී” කියා ඒ භික්ෂූන් වහන්සේලා භාග්‍යවතුන් වහන්සේට පිළිතුරු දුන්නා. භාග්‍යවතුන් වහන්සේ මෙය වදාළා.
පින්වත් මහණෙනි, කොයි විදිහටද අශාන්ත පුද්ගලයින් හා එකට ජීවත් වීම සිද්ධ වෙන්නේ? කොයි විදිහටද අශාන්ත පුද්ගලයින් අන් පිරිස හා එක්ව වසන්නේ?
පින්වත් මහණෙනි, මෙහිලා ස්ථවිර භික්ෂුවක් හට මෙසේ සිතෙනවා. ‘ස්ථවිර භික්ෂුවක් මා හට අවවාද නොකෙරේවා! මධ්‍යම ථේර භික්ෂුවක්ද මා හට අවවාද නොකෙරේවා! නවක භික්ෂුවක්ද මා හට අවවාද නොකෙරේවා! මංද ස්ථවිර භික්ෂුවකට අවවාද නොකරම්වා! මාද මධ්‍යම ථේර භික්ෂුවකට අවවාද නොකරම්වා! මාද නවක භික්ෂුවකට අවවාද නොකරම්වා! ස්ථවිර භික්ෂුව මට අවවාද කරන්නේ නම් හිතානුකම්පාවෙන් තොරවමයි මට අවවාද කරන්නේ. හිතානුකම්පීව නම් නොවේ. මං ඔහුට එය අවශ්‍ය නැත කියායි කියන්නේ. මං ඔහුට වෙහෙසක්ද කරමි. ඇවැත් දකින නමුත් මං පිළියම් නොකරමි. මධ්‍යම ථේර භික්ෂුව මට අවවාද කරන්නේ නම්, ….(පෙ)…. නවක භික්ෂුවද මට අවවාද කරන්නේ නම් හිතානුකම්පාවෙන් තොරවමයි මට අවවාද කරන්නේ. හිතානුකම්පීව නම් නොවේ. මං ඔහුට එය අවශ්‍ය නැත කියායි කියන්නේ. මං ඔහුට වෙහෙසක්ද කරමි. ඇවැත් දකින නමුත් මං පිළියම් නොකරමි.
මධ්‍යම භික්ෂුවකටත් මෙහෙම සිතෙනවා. ….(පෙ)…. නවක භික්ෂුවකටත් මෙහෙම සිතෙනවා. ‘ස්ථවිර භික්ෂුවක් මා හට අවවාද නොකෙරේවා! මධ්‍යම ථේර කෙනෙක්ද මා හට අවවාද නොකෙරේවා! නවක භික්ෂුවක්ද මා හට අවවාද නොකෙරේවා! මාද ස්ථවිර භික්ෂුවකට අවවාද නොකරම්වා! මාද මධ්‍යම ථේර භික්ෂුවකට අවවාද නොකරම්වා! මාද නවක භික්ෂුවකට අවවාද නොකරම්වා! ස්ථවිර භික්ෂුව මට අවවාද කරන්නේ නම් හිතානුකම්පාවෙන් තොරවමයි මට අවවාද කරන්නේ. හිතානුකම්පීව නම් නොවේ. මං ඔහුට එය අවශ්‍ය නැත කියායි කියන්නේ. මම ඔහුට වෙහෙසක්ද කරමි. ඇවැත් දකින නමුත් මම පිළියම් නො කරමි. මධ්‍යම ස්ථවිර භික්ෂුව මට අවවාද කරන්නේ නම්, ….(පෙ)…. නවක භික්ෂුවද මට අවවාද කරන්නේ නම් හිතානුකම්පාවෙන් තොරවමයි මට අවවාද කරන්නේ. හිතානුකම්පීව නම් නොවේ. මං ඔහුට එය අවශ්‍ය නැත කියායි කියන්නේ. මම ඔහුට වෙහෙසක්ද කරමි. ඇවැත් දකින නමුත් මම පිළියම් නොකරමි. පින්වත් මහණෙනි, අශාන්ත පුද්ගලයන් හා වාසය කරන්නේ ඔය විදිහටයි. එමෙන්ම අශාන්ත පුද්ගලයන් අනුන් හා වාසය කරන්නේද ඔය විදිහටයි.
පින්වත් මහණෙනි, කොයි විදිහටද ශාන්ත පුද්ගලයින් හා එකට ජීවත් වීම සිද්ධ වෙන්නේ? කොයි විදිහටද ශාන්ත පුද්ගලයින් අන් පිරිස හා එක්ව වසන්නේ?
පින්වත් මහණෙනි, මෙහිලා ස්ථවිර භික්ෂුවක් හට මෙසේ සිතෙනවා. ‘ස්ථවිර භික්ෂුවක් මා හට අවවාද කෙරේවා! මධ්‍යම ථේර භික්ෂුවක් ද මා හට අවවාද කෙරේවා! නවක භික්ෂුවක්ද මා හට අවවාද කෙරේවා! මාද ස්ථවිර භික්ෂුවකට අවවාද කරම්වා! මාද මධ්‍යම ථේර භික්ෂුවකට අවවාද කරම්වා! මාද නවක භික්ෂුවකට අවවාද කරම්වා! ස්ථවිර භික්ෂුව මට අවවාද කරන්නේ නම් හිතානුකම්පාවෙන් යුතුවමයි මට අවවාද කරන්නේ. අහිතානුකම්පීව නම් නොවේ. මං ඔහුට එය යහපත් ය කියායි කියන්නේ. මම ඔහුට වෙහෙසක්ද නොකරමි. ඇවැත් දකින විට මම පිළියම් කරමි. මධ්‍යම ස්ථවිර භික්ෂුව මට අවවාද කරන්නේ නම්, ….(පෙ)…. නවක භික්ෂුවද මට අවවාද කරන්නේ නම් හිතානුකම්පාවෙන් යුතුවමයි මට අවවාද කරන්නේ. අහිතානුකම්පීව නම් නොවේ. මං ඔහුට එය යහපත් ය කියායි කියන්නේ. මම ඔහුට වෙහෙසක්ද නොකරමි. ඇවැත් දකින විට මම පිළියම් කරමි.
මධ්‍යම භික්ෂුවකටත් මෙහෙම සිතෙනවා. ….(පෙ)…. නවක භික්ෂුවකටත් මෙහෙම සිතෙනවා. ‘ස්ථවිර භික්ෂුවක් මා හට අවවාද කෙරේවා! මධ්‍යම ථේර කෙනෙක්ද මා හට අවවාද කෙරේවා! නවක භික්ෂුවක්ද මා හට අවවාද කෙරේවා! මාද ස්ථවිර භික්ෂුවකට අවවාද කරම්වා! මාද මධ්‍යම ථේර භික්ෂුවකට අවවාද කරම්වා! මාද නවක භික්ෂුවකට අවවාද කරම්වා! ස්ථවිර භික්ෂුව මට අවවාද කරන්නේ නම් හිතානුකම්පාවෙන් යුතුවමයි මට අවවාද කරන්නේ. අහිතානුකම්පීව නම් නොවේ. මං ඔහුට එය යහපත් ය කියායි කියන්නේ. මම ඔහුට වෙහෙසක්ද නොකරමි. ඇවැත් දකින විට මම පිළියම් කරමි. මධ්‍යම ස්ථවිර භික්ෂුව මට අවවාද කරන්නේ නම්, ….(පෙ)…. නවක භික්ෂුවද මට අවවාද කරන්නේ නම් හිතානුකම්පාවෙන් යුතුවමයි මට අවවාද කරන්නේ. අහිතානුකම්පීව නම් නොවේ. මං ඔහුට එය යහපත් ය කියායි කියන්නේ. මම ඔහුට වෙහෙසක්ද නොකරමි. ඇවැත් දකින විට මම පිළියම් කරමි. පින්වත් මහණෙනි, ශාන්ත පුද්ගලයන් හා වාසය කරන්නේ ඔය විදිහටයි. එමෙන්ම ශාන්ත පුද්ගලයන් අනුන් හා වාසය කරන්නේද ඔය විදිහටයි.
2.2.6.12.
12. පින්වත් මහණෙනි, යම්කිසි ආරවුලක දී දෙපැත්තෙන්ම වචන හුවමාරු කරගැනීම් වෙනවා නම්, තම තමන්ගේ දෘෂ්ටි නිසා එකට එක කර ගැනීම් වෙනවා නම්, සිතේ කෝපයත්, නොසතුටත්, සෑහීමකට පත් නොවීමත් කියන මේවා තමා තුළත් සංසිඳිලා නැත්නම්, අන්න ඒ වගේ ආරවුලකදී මෙකරුණ කැමැති විය යුතුයි. එනම් ඒ ආරවුල දිගින් දිගටම පැවැතීමටත්, රළු බවටත්, චණ්ඩ බවටත් පත් වීමට හේතු වෙනවා යන කරුණයි. එතකොට භික්ෂූන්ද පහසුවෙන් වාසය කරන්නේ නෑ.
2.2.6.13.
13. පින්වත් මහණෙනි, යම් කිසි ආරවුලකදී දෙපැත්තෙන්ම වචන හුවමාරු කරගැනීම්, තම තමන්ගේ දෘෂ්ටි නිසා එකට එක කර ගැනීම්, සිතේ කෝපයත්, නොසතුටත්, සෑහීමකට පත් නොවීමත් කියන මේවා තමා තුළත් සංසිඳිලා තියෙනවා නම්, අන්න ඒ වගේ ආරවුලකදී මෙකරුණ කැමැති විය යුතුයි. එනම් ඒ ආරවුල දිගින් දිගටම පැවැතීමක්, රළු බවක්, චණ්ඩ බවක් සිදුවන්නේ නෑ යන කරුණයි. එතකොට භික්ෂූන්ද පහසුවෙන් වාසය කරනවා.
පළමුවෙනි පුග්ගල වර්ගයයි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_2-2-6-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M