“ප්‍රිය ආයුෂ්මත් සාරිපුත්තයෙනි, ලෝකයෙහි ධර්මවාදී අය කවුද? ලෝකයෙහි සුපටිපන්න අය කවුද? ලෝකයෙහි සුගත යන අය කවුද?” “ආයුෂ්මත, යම් කෙනෙක් රාගය ප්‍රහාණය වීම පිණිස ධර්මය දේශනා කරනවා නම්, ද්වේෂය ප්‍රහාණය වීම පිණිස ධර්මය දේශනා කරනවා නම්, මෝහය ප්‍රහාණය වීම පිණිස ධර්මය දේශනා කරනවා නම්, ඔවුන් තමයි ලෝකයෙහි ධර්මවාදීන් වන්නේ. ආයුෂ්මත, යම් කෙනෙක් රාගය ප්‍රහාණය වීම පිණිස ප්‍රතිපදාවෙහි හැසිරෙනවා නම්, ද්වේෂය ප්‍රහාණය වීම පිණිස ප්‍රතිපදාවෙහි හැසිරෙනවා නම්, මෝහය ප්‍රහාණය වීම පිණිස ප්‍රතිපදාවෙහි හැසිරෙනවා නම්, ඔවුන් තමයි සුපටිපන්න වන්නේ. ආයුෂ්මත, යම් කෙනෙකුගේ රාගය ප්‍රහාණය වුණා නම්, මුලින් ම ඉදිරිලා ගියා නම්, මුදුන් කරටිය සිඳුණු තල් ගසක් මෙන් වුණා නම්, අභාවයට පත් වුණා නම්, යළි කිසිදා නොහටගන්නා ස්වභාවයෙන් යුක්ත වුණා නම්, ද්වේෂය ප්‍රහාණය වුණා නම්, මුලින්ම ඉදිරිලා ගියා නම්, මුදුන් කරටිය සිඳුණු තල් ගසක් මෙන් වුණා නම්, අභාවයට පත් වුණා නම්, යළි කිසිදා නොහටගන්නා ස්වභාවයෙන් යුක්ත වුණා නම්, මෝහය ප්‍රහාණය වුණා නම්, මුලින් ම ඉදිරිලා ගියා නම්, මුදුන් කරටිය සිඳුණු තල් ගසක් මෙන් වුණා නම්, අභාවයට පත් වුණා නම්, යළි කිසිදා නොහටගන්නා ස්වභාවයෙන් යුක්ත වුණා නම්, ඔවුන් තමයි ලෝකයෙහි සුගත වන්නේ.”
“ප්‍රිය ආයුෂ්මතුනි, මේ රාගයේත්, ද්වේෂයේත්, මෝහයේත් ප්‍රහාණය පිණිස වැඩපිළිවෙළක් තියෙනවාද? මාර්ගයක් තියෙනවාද?” “ආයුෂ්මත, මේ රාගයේත්, ද්වේෂයේත්, මෝහයේත් ප්‍රහාණය පිණිස වැඩපිළිවෙළක් තියෙනවා. මාර්ගයකුත් තියෙනවා.” “ප්‍රිය ආයුෂ්මතුනි, මේ රාගයේත්, ද්වේෂයේත්, මෝහයේත් ප්‍රහාණය පිණිස තියෙන වැඩපිළිවෙළ කුමක්ද? මාර්ගය කුමක්ද?” “ආයුෂ්මත, මේ රාගයේත්, ද්වේෂයේත්, මෝහයේත් ප්‍රහාණය පිණිස තියෙන්නේ ඒ මේ ආර්ය ආෂ්ටාංගික මාර්ගය ම යි. ඒ කියන්නේ; සම්මා දිට්ඨි ….(පෙ)…. සම්මා සමාධි යන මෙයයි. ආයුෂ්මත, මේ රාග, ද්වේෂ, මෝහ ප්‍රහාණය පිණිස පවතින මාර්ගය ඕක තමයි. වැඩපිළිවෙලත් ඕක තමයි.” “ප්‍රිය ආයුෂ්මතුනි, මේ රාග, ද්වේෂ, මෝහ ප්‍රහාණය පිණිස පවතින්නා වූ මාර්ගය නම් ඉතා සුන්දරයි. ප්‍රතිපදාව නම් ඉතා සුන්දරයි. ප්‍රිය ආයුෂ්මත් සාරිපුත්තයෙනි, මේ ගැන අප්‍රමාදී වීම ම යි වටින්නේ.”
සාදු ! සාදු !! සාදු !!!
ධම්මවාදී සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn4_4-1-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M