පින්වත් මහණෙනි, අශ්‍රැතවත් පෘතග්ජනයා මේ විදියේ වචනයක් කියනවා. මහා සමුද්‍රයේ පාතාලයක් තියෙනවා කියලා. නමුත් පින්වත් මහණෙනි, අශ්‍රැතවත් පෘතග්ජනයා සැබවින් ම නැත්තා වූත්, අවිද්‍යමාන වූත්, තැනක් ගැනයි මහා සමුද්‍රයේ පාතාලයක් ඇත කියලා කියන්නේ. පින්වත් මහණෙනි, පාතාලය කියලා කියන්නේ ශාරීරික දුක් වේදනාවන්ට කියන නමක්. පින්වත් මහණෙනි, අශ්‍රැතවත් පෘතග්ජනයා ශාරීරික දුක් වේදනාවන්ගෙන් පහස ලැබූ විට සෝක කරනවා. ක්ලාන්ත වෙනවා. වැලපෙනවා. පපුවෙහි අත් ගසා ගන්නවා. සිහි කල්පනා නැති කර ගන්නවා. පින්වත් මහණෙනි, මේකට තමයි කියන්නේ අශ්‍රැතවත් පෘතග්ජනයා මේ පාතාලයේ පිහිටන්නේ නෑ. පිහිටා සිටීමට ඇති පිළිවෙළ අවබෝධ කරන්නෙත් නෑ. නමුත් පින්වත් මහණෙනි, ශ්‍රැතවත් ආර්ය ශ්‍රාවකයා ශාරීරික දුක් වේදනාවන්ගෙන් පහස ලැබූ විට සෝක කරන්නේ නෑ. ක්ලාන්ත වෙන්නේ නෑ. වැළපෙන්නේ නෑ. පපුවෙහි අත් ගසා හඬන්නේ නෑ. සිහි කල්පනාව නැති වෙන්නේ නෑ. පින්වත් මහණෙනි, මේ ශ්‍රැතවත් ආර්ය ශ්‍රාවකයාට කියන්නේ පාතාලයෙහි පිහිටියා කියලයි. ඒ පිහිටීම අවබෝධ කළා කියලයි. (අශ්‍රැතවත් පෘතග්ජනයා ශාරීරික දුක් වේදනා නැමැති පාතාලයෙහි නොපිහිටා සිටිනවා යන්නෙහි අර්ථය මෙයයි. ඔහුට එය දරා සිටීමේ හැකියාවක් නෑ. ඒ වේදනාව ඉවසන්ට දැනුමක් නෑ. ඒ වේදනාව අභියස ඔහු සැලෙනවා. කම්පා වෙනවා. පාතාලයෙහි පිහිටා සිටිනවා යනු සිහි නුවණින් යුතුව එයට මුහුණ දීමයි. කම්පා නොවීමයි. එය අනිත්‍ය බව අවබෝධ කිරීමයි.)
(ගාථාවන් ය)
1. යමෙක් යම් වේදනාවකින් පහස ලද විට ඒ උපන් දුක් වේදනා නොඉවසයි නම්, මාරාන්තික වූ ශාරීරික වේදනා අභියස කම්පා වෙයි නම්,
2. ඔහු දුර්වලයි. ආත්ම ශක්තිය හීනයි. ඔහු හඬනවා. වැලපෙනවා. ඔහු පාතාලයේ පිහිටා ඉන්නේ නෑ. ඒ වගේ ම පාතාලයෙහි නොපිහිටා සිටීම ගැන අවබෝධයක් නෑ.
3. යමෙක් යම් වේදනාවකින් පහස ලද විට ඒ උපන් දුක් වේදනා ඉවසයි නම්, මාරාන්තික වූ ශාරීරික වේදනා අභියස කම්පා නොවෙයි නම්, ඒකාන්තයෙන් ම ඔහු පාතාලයේ පිහිටා සිටින කෙනෙක්. ඒ වගේම අවබෝධයෙන් යුක්තව එහි පිහිටා සිටින කෙනෙක්.
සාදු! සාදු!! සාදු!!!
පාතාල සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn4_2-1-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M