පින්වත් මහණෙනි, ඒක මේ වගේ දෙයක්. මාළු බිලී බාන කෙනෙක්, ගොදුර අමුණපු බිලී කොක්ක ගැඹුරු වතුර වළකට දානවා. එතකොට ගොදුරකට ඇස් යොමාගෙන ඉන්න මාළුවෙක් ඒක ගිලිනවා. පින්වත් මහණෙනි, ඔය විදිහට මාළු බිලී බාන්නාගේ බිලී කොක්ක ගිලපු මාළුවා දුකට වැටිලා, විපතට වැටිලා, මාළු බිලී බාන්නාට කැමති දෙයක් කළ හැකි වෙනවා. පින්වත් මහණෙනි, ඔන්න ඔය විදිහටම ලෝකයෙහි සත්වයන් හට දුක් පිණිස, ප්‍රාණීන් හට පීඩා පිණිස, බිලී කොකු හයක් තියෙනවා. ඒ හය මොනවාද?
පින්වත් මහණෙනි, ඇසෙන් දැනගත යුතු වූ සිත් ඇදගන්නා, ලස්සන, මනාප, ප්‍රිය ස්වරූප ඇති, කැමැත්ත ඇති කරවන, බැඳීම් හටගන්නා, රූප තියෙනවා. භික්ෂුව එය සතුටින් පිළිගන්නවා නම්, එහි ගුණ කියනවා නම්, එහි බැසගෙන සිටිනවා නම් පින්වත් මහණෙනි, මේකට තමයි කියන්නේ මාරයාගේ බිලී කොක්ක ගිලපු භික්ෂුව දුකට වැටිලා, විපතට වැටිලා, පවිටු මාරයාට කැමති දෙයක් කළ හැකි වෙනවා කියලා. පින්වත් මහණෙනි, කනෙන් දැනගත යුතු වූ ශබ්ද ….(පෙ)…. පින්වත් මහණෙනි, නාසයෙන් දැනගත යුතු වූ ගන්ධ ….(පෙ)…. පින්වත් මහණෙනි, දිවෙන් දැනගත යුතු වූ රස ….(පෙ)…. පින්වත් මහණෙනි, කයෙන් දැනගත යුතු වූ පහස ….(පෙ)…. පින්වත් මහණෙනි, මනසින් දැනගත යුතු වූ සිත් ඇදගන්නා, ලස්සන, මනාප, ප්‍රිය ස්වරූප ඇති, කැමැත්ත ඇති කරවන, බැඳීම් හටගන්නා, අරමුණු තියෙනවා. භික්ෂුව එය සතුටින් පිළිගන්නවා නම්, එහි ගුණ කියනවා නම්, එහි බැසගෙන සිටිනවා නම් පින්වත් මහණෙනි, මේකට තමයි කියන්නේ මාරයාගේ බිලී කොක්ක ගිලපු භික්ෂුව දුකට වැටිලා ඉන්නවා කියලා. විපතට වැටිලා, පවිටු මාරයාට කැමති දෙයක් කළ හැකි වෙනවා.
පින්වත් මහණෙනි, ඇසෙන් දැනගත යුතු වූ සිත් ඇදගන්නා, ලස්සන, මනාප, ප්‍රිය ස්වරූප ඇති, කැමැත්ත ඇති කරවන, බැඳීම් හටගන්නා, රූප තියෙනවා. භික්ෂුව එය සතුටින් පිළිගන්නේ නෑ, එහි ගුණ කියන්නේ නෑ, එහි බැසගෙන ඉන්නේ නෑ, පින්වත් මහණෙනි, මේකට තමයි කියන්නේ මාරයාගේ බිලී කොක්ක නොගිලපු භික්ෂුව ඒ බිලී කොක්ක කඩා බිඳ දැම්මා කියලා. දුකට වැටුනේ නෑ කියලා. විපතට වැටුනේ නෑ කියලා, පවිටු මාරයාට කැමති දෙයක් කරන්ට බෑ කියලා. පින්වත් මහණෙනි, කනෙන් දැනගත යුතු වූ ශබ්ද ….(පෙ)…. පින්වත් මහණෙනි, නාසයෙන් දැනගත යුතු වූ ගන්ධ ….(පෙ)…. පින්වත් මහණෙනි, දිවෙන් දැනගත යුතු වූ රස ….(පෙ)…. පින්වත් මහණෙනි, කයෙන් දැනගත යුතු වූ පහස ….(පෙ)…. පින්වත් මහණෙනි, මනසින් දැනගත යුතු වූ සිත් ඇදගන්නා, ලස්සන, මනාප, ප්‍රිය ස්වරූප ඇති, කැමැත්ත ඇති කරවන, බැඳීම් හටගන්නා, අරමුණු තියෙනවා. භික්ෂුව එය සතුටින් පිළිගන්නේ නෑ, එහි ගුණ කියන්නේ නෑ, එහි බැසගෙන ඉන්නේ නෑ, පින්වත් මහණෙනි, මේකට තමයි කියන්නේ මාරයාගේ බිලී කොක්ක නොගිලපු භික්ෂුව ඒ බිලී කොක්ක කඩා බිඳ දැම්මා කියලා. දුකට වැටුනේ නෑ කියලා. විපතට වැටුනේ නෑ කියලා, පවිටු මාරයාට කැමති දෙයක් කරන්ට බෑ කියලා.
සාදු! සාදු!! සාදු!!!
බාළිසිකෝපම සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn4_1-18-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M