161. සැවැත් නුවර දී ………………………
එකත්පස්ව වාඩිවුණ ආයුෂ්මත් රාධයන් භාග්‍යවතුන් වහන්සේගෙන් මෙකරුණ විමසුවා. “ස්වාමීනි, ‘සත්වයා, සත්වයා’ යැයි කියනවා. ස්වාමීනි, කුමන කරුණු මතද සත්වයායි කියන්නේ?”
“පින්වත් රාධ, රූපය පිළිබඳව යම් කැමැත්තක් තියෙනවා නම්, යම් රාගයක් තියෙනවා නම්, යම් සතුටින් පිළිගැනීමක් තියෙනවා නම්, යම් තණ්හාවක් තියෙනවා නම් ඒ රූපයෙහි ඇලී සිටිනවා නම්, ඒ රූපයෙහි දැඩි ලෙස ඇලී සිටිනවා නම් අන්න ඒ නිසා තමයි ‘සත්වයා’ කියන්නේ. විඳීම පිළිබඳව යම් කැමැත්තක් තියෙනවා නම්, යම් රාගයක් තියෙනවා නම් …. (පෙ) …. සඤ්ඤාව පිළිබඳව …. (පෙ) …. සංස්කාර පිළිබඳව …. (පෙ) …. විඤ්ඤාණය පිළිබඳව යම් කැමැත්තක් තියෙනවා නම්, යම් රාගයක් තියෙනවා නම්, යම් සතුටින් පිළිගැනීමක් තියෙනවා නම්, යම් තණ්හාවක් තියෙනවා නම් ඒ විඤ්ඤාණයෙහි ඇලී සිටිනවා නම්, ඒ විඤ්ඤාණයෙහි දැඩි ලෙස ඇලී සිටිනවා නම් අන්න ඒ නිසා තමයි ‘සත්වයා’ කියන්නේ.
පින්වත් රාධ, එය මෙවැනි දෙයක්. කුඩා දරුවන් හෝ කුඩා දැරියන් ඉන්නවා. ඔවුන් වැලිගෙවල්වලින් සෙල්ලම් කරනවා. යම්තාක්කල් වැලි ගෙවල් කෙරෙහි ඇති ඔවුන්ගේ රාගය දුරුවෙලා නැත්නම්, ඔවුන්ගේ කැමැත්ත දුරුවෙලා නැත්නම්, ඔවුන්ගේ ප්‍රේමය දුරුවෙලා නැත්නම්, ඔවුන්ගේ පිපාසය දුරුවෙලා නැත්නම්, ඔවුන්ගේ දැවිල්ල දුරුවෙලා නැත්නම්, ඔවුන්ගේ තණ්හාව දුරුවෙලා නැත්නම්, ඒතාක්කල් ම ඔවුන් ඒ වැලිගෙවල්වලට ආශා කරනවා. ලොල් වෙනවා. තමන්ගේ වස්තුවක් හැටියට සළකනවා. මගේ ය කියලා අයිතිය කියනවා.
නමුත් පින්වත් රාධයෙනි, යම් කලෙක ඒ කුඩා දරුවන් වේවා, ඒ කුඩා දියණිවරුන් වේවා ඒ වැලිගෙවල් කෙරෙහි ඔවුන් තුළ තිබුණ රාගය දුරුවුණා නම්, කැමැත්ත දුරුවුණා නම්, ප්‍රේමය දුරුවුණා නම්, පිපාසය දුරුවුණා නම්, දැවිල්ල දුරුවුණා නම්, තණ්හාව දුරුවුණා නම් එතකොට ඔවුන් අත්වලිනුත්, පාවලිනුත් ඒ වැලි ගෙවල් විසුරුවලා දානවා. බිඳලා දානවා. සුනුවිසුණු කරනවා. ආයෙමත් සෙල්ලම් කරන්න බැරි විදිහට පත්කරනවා.
පින්වත් රාධයෙනි, ඔන්න ඔය විදිහට ම ඔබත් රූපය විසුරුවලා දාන්න. බිඳලා දාන්න. සුනුවිසුණු කරන්න. ආයෙමත් සෙල්ලම් කරන්න බැරි විදිහට පත්කරන්න. තණ්හාව ක්ෂය වීම පිණිස පිළිපදින්න. විඳීම විසුරුවලා දාන්න …. (පෙ) …. සඤ්ඤාව විසුරුවලා දාන්න …. (පෙ) …. සංස්කාර විසුරුවලා දාන්න …. (පෙ) …. විඤ්ඤාණය විසුරුවලා දාන්න. බිඳලා දාන්න. සුනුවිසුණු කරන්න. ආයෙමත් සෙල්ලම් කරන්න බැරි විදිහට පත්කරන්න. තණ්හාව ක්ෂය වීම පිණිස පිළිපදින්න. පින්වත් රාධ, තණ්හාය ක්ෂය වීම ම යි ඒ අමා නිවන් කියන්නේ.”
සාදු! සාදු!! සාදු!!!
සත්ත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_2-1-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M