103. සැවැත් නුවර දී ………………………….
පින්වත් මහණෙනි, මේ අන්ත සතරක් තියෙනවා. කවර සතරක්ද යත්, සක්කාය කියල අන්තයක් තියෙනවා. සක්කාය සකස්වීම කියල අන්තයක් තියෙනවා. සක්කාය නිරුද්ධ වීම කියල අන්තයක් තියෙනවා. සක්කාය නිරුද්ධ වීම පිණිස පවතින ප්‍රතිපදාව කියල අන්තයක් තියෙනවා.
පින්වත් මහණෙනි, සක්කාය අන්තය කියන්නේ මොකක්ද? එයට කිව යුත්තේ පංච උපාදානස්කන්ධය කියලයි.
කවර පහක්ද යත්; ඒ කියන්නේ, රූප උපාදානස්කන්ධයයි. වේදනා උපාදානස්කන්ධයයි. සඤ්ඤා උපාදානස්කන්ධයයි. සංස්කාර උපාදානස්කන්ධයයි. විඤ්ඤාණ උපාදානස්කන්ධයයි. පින්වත් මහණෙනි, මෙයට තමයි සක්කාය අන්තය කියන්නේ.
පින්වත් මහණෙනි, සක්කාය සකස්වීමේ අන්තය කියන්නේ මොකක්ද?
පින්වත් මහණෙනි, පුනර්භවය ඇති කර දෙන, ආශ්වාදයෙන් ඇලෙන්නා වූ, ඒ ඒ තැනදී සතුටින් පිළිගන්නා වූ යම් මේ තණ්හාවක් ඇද්ද එයයි. ඒ කියන්නේ කාම තණ්හාව, භව තණ්හාව හා විභව තණ්හාවයි. පින්වත් මහණෙනි, මෙයට තමයි සක්කාය සකස්වීමේ අන්තය කියන්නේ.
පින්වත් මහණෙනි, සක්කාය නිරුද්ධ වීමේ අන්තය කියන්නේ මොකක්ද?
පින්වත් මහණෙනි, ඒ ත්‍රිවිධ තණ්හාවේ ම යම් ඉතිරි නැතිව නිරුද්ධ වීමක් ඇද්ද, අත්හැරීමක් ඇද්ද, බැහැර කිරීමක් ඇද්ද, එයින් නිදහස් වීමක් ඇද්ද, ආල රහිත වීමක් ඇද්ද පින්වත් මහණෙනි, මෙයට තමයි සක්කාය නිරුද්ධ වීමේ අන්තය කියල කියන්නේ.
පින්වත් මහණෙනි, සක්කාය නිරුද්ධ වීම පිණිස පවතින ප්‍රතිපදා අන්තය මොකක්ද?
ඒ මේ ආර්ය අෂ්ටාංගික මාර්ගයයි. ඒ කියන්නේ, සම්මා දිට්ඨි, සම්මා සංකප්ප, සම්මා වාචා, සම්මා කම්මන්ත, සම්මා ආජීව, සම්මා වායාම, සම්මා සති, සම්මා සමාධි යන මෙයයි. පින්වත් මහණෙනි, මෙයට තමයි සක්කාය නිරුද්ධ වීම පිණිස පවතින ප්‍රතිපදා අන්තය කියන්නේ. පින්වත් මහණෙනි, මෙයට තමයි අන්ත සතර කියන්නේ.
සාදු! සාදු!! සාදු!!!
අන්ත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_1-3-1-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M