50. මා හට අසන්නට ලැබුණේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ රජගහ නුවර ලෙහෙනුන්ගේ අභය භූමිය නම් වූ වේළුවනාරාමයේ. එදා සෝණ නම් වූ ගෘහපති පුත්‍රයා භාග්‍යවතුන් වහන්සේ වැඩසිටි තැනට පැමිණුනා. පැමිණිලා භාග්‍යවතුන් වහන්සේට ආදරයෙන් වන්දනා කොට එතත්පස්ව වාඩිවුණා. එකත්පස්ව වාඩිවුණ සෝණ ගෘහපති පුත්‍රයා හට භාග්‍යවතුන් වහන්සේ මෙකරුණ වදාළා.
පින්වත් සෝණ, යම්කිසි ශ්‍රමණයෙක් වේවා. බමුණන් වේවා ඔවුන් රූපය අවබෝධ කරන්නේ නැත්නම්, රූපයෙහි හටගැනීම අවබෝධ කරන්නේ නැත්නම්, රූප නිරෝධය අවබෝධ කරන්නේ නැත්නම්, රූපය නිරුද්ධ වීම පිණිස පවතින ප්‍රතිපදාව අවබෝධ කරන්නේ නැත්නම්, විඳීම ….(පෙ)…. සඤ්ඤාව ….(පෙ)…. සංස්කාර ….(පෙ)…. විඤ්ඤාණය අවබෝධ කරන්නේ නැත්නම්, විඤ්ඤාණයෙහි හටගැනීම අවබෝධ කරන්නේ නැත්නම්, විඤ්ඤාණ නිරෝධය අවබෝධ කරන්නේ නැත්නම්, විඤ්ඤාණය නිරුද්ධ වීම පිණිස පවතින ප්‍රතිපදාව අවබෝධ කරන්නේ නැත්නම්, පින්වත් සෝණ, ඒ ශ්‍රමණයන් වේවා, බමුණන් වේවා ශ්‍රමණයන් අතර සැබෑ ශ්‍රමණයන් බවට සම්මත වෙන්නේ නෑ. බ්‍රාහ්මණයන් අතර සැබෑ බ්‍රාහ්මණයන් බවට සම්මත වෙන්නේ නෑ. ඒ ආයුෂ්මත්වරුන් මේ ජීවිතයේදී ම ශ්‍රමණ ඵලයක් හෝ බ්‍රාහ්මණඵලයක් හෝ ස්වකීය ප්‍රඥාවෙන් අවබෝධ කරගෙන එයට පැමිණ වාසය කරන්නේ නෑ.
පින්වත් සෝණ, යම්කිසි ශ්‍රමණයන් වේවා, බමුණන් වේවා ඔවුන් රූපය අවබෝධ කරනවා නම්, රූපයෙහි හටගැනීම අවබෝධ කරනවා නම්, රූප නිරෝධය අවබෝධ කරනවා නම්, රූපය නිරුද්ධ වීම පිණිස පවතින ප්‍රතිපදාව අවබෝධ කරනවා නම්, විඳීම ….(පෙ)…. සඤ්ඤාව ….(පෙ)…. සංස්කාර ….(පෙ)…. විඤ්ඤාණය අවබෝධ කරනවා නම්, විඤ්ඤාණයෙහි හටගැනීම අවබෝධ කරනවා නම්, විඤ්ඤාණ නිරෝධය අවබෝධ කරනවා නම්, විඤ්ඤාණය නිරුද්ධ වීම පිණිස පවතින ප්‍රතිපදාව අවබෝධ කරනවා නම්, පින්වත් සෝණ, ඒ ශ්‍රමණ බමුණන් තමයි ශ්‍රමණයන් අතර සැබෑ ශ්‍රමණයන් බවට සම්මත වෙන්නේ. බ්‍රාහ්මණයන් අතර සැබෑ බ්‍රාහ්මණයන් බවට සම්මත වෙන්නේ. ඒ අයුෂ්මත්වරුන් නම් මේ ජීවිතයේදී ම ශ්‍රමණ ඵලයක් හෝ බ්‍රාහ්මණ ඵලයක් හෝ ස්වකීය ප්‍රඥාවෙන් අවබෝධ කරගෙන එයට පැමිණ වාසය කරනවා.
සාදු! සාදු!! සාදු!!!
දුතිය සෝණ සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_1-1-5-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M