49. මා හට අසන්නට ලැබුණේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ රජගහ නුවර ලෙහෙනුන්ගේ අභය භූමිය නම් වූ වේළුවනාරාමයේ. එදා සෝණ නම් වූ ගෘහපති පුත්‍රයා භාග්‍යවතුන් වහන්සේ වැඩසිටි තැනට පැමිණුනා. පැමිණිලා භාග්‍යවතුන් වහන්සේට ආදරයෙන් වන්දනා කොට එකත්පස්ව වාඩිවුණා. එකත්පස්ව වාඩිවුණ සෝණ ගෘහපති පුත්‍රයා හට භාග්‍යවතුන් වහන්සේ මෙකරුණ වදාළා.
පින්වත් සෝණ, යම්කිසි ශ්‍රමණයන් වේවා, බමුණන් වේවා අනිත්‍ය වූ දුක් වූ වෙනස්වන ධර්මතාවයෙන් යුතු වූ රූපය කරණ කොට ගෙනයි ‘මම උසස් කෙනෙක් ය’ කියලා කියන්නේ. ‘මම සමාන කෙනෙක් ය’ කියලා දකින්නේ. ‘මම පහත් කෙනෙක් ය’ කියලා දකින්නේ. මෙය වනාහී යථාර්ථය නොදැනීම විනා වෙන කුමක්ද? අනිත්‍ය වූ දුක් වූ වෙනස්වන ධර්මතාවයෙන් යුතු වූ විඳීම කරණ කොට ගෙනයි ‘මම උසස් කෙනෙක් ය’ කියලා දකින්නේ. ‘මම සමාන කෙනෙක් ය’ කියලා දකින්නේ. ‘මම පහත් කෙනෙක් ය’ කියල දකින්නේ. මෙය වනාහී යථාර්ථය නොදැනීම විනා වෙන කුමක්ද? අනිත්‍ය වූ දුක් වූ වෙනස්වන ධර්මතාවයෙන් යුතු වූ සඤ්ඤාව කරණ කොටයි ….(පෙ)…. අනිත්‍ය වූ දුක් වූ වෙනස්වන ධර්මතාවයෙන් යුතු වූ සංස්කාර කරණ කොට ගෙනයි ….(පෙ)…. අනිත්‍ය වූ දුක් වූ වෙනස්වන ධර්මතාවයෙන් යුතු වූ විඤ්ඤාණය කරණ කොට ගෙනයි ‘මම උසස් කෙනෙක් ය’ කියල දකින්නේ. ‘මම සමාන කෙනෙක් ය’ කියලා දකිනේනේ. ‘මම පහත් කෙනෙක් ය’ කියලා දකින්නේ. මෙය වනාහී යථාර්ථය නොදැනීම විනා වෙන කුමක්ද?
පින්වත් සෝණ, යම්කිසි ශ්‍රමණයන් වේවා, බමුණන් වේවා අනිත්‍ය වූ දුක් වූ වෙනස්වන ධර්මතාවයෙන් යුතු වූ රූපය කරණ කොට ගෙන ‘මම උසස් කෙනෙක් ය’ කියලා දකින්නේ නැත්නම්, ‘මම සමාන කෙනෙක් ය’ කියලා දකින්නේ නැත්නම්, ‘මම පහත් කෙනෙක් ය’ කියලා දකින්නේ නැත්නම්, මෙය වනාහී යථාර්ථය දැනීම විනා වෙන කුමක්ද? අනිත්‍ය වූ දුක් වූ වෙනස්වන ධර්මතාවයෙන් යුතු වූ විඳීම කරණ කොට ගෙන ….(පෙ)…. අනිත්‍ය වූ දුක් වූ වෙනස්වන ධර්මතාවයෙන් යුතු වූ සඤ්ඤාව කරණ කොට ගෙන ….(පෙ)…. අනිත්‍ය වූ දුක් වූ වෙනස්වන ධර්මතාවයෙන් යුතු වූ සංස්කාර කරණ කොට ගෙන ….(පෙ)…. අනිත්‍ය වූ දුක් වූ වෙනස්වන ධර්මතාවයෙන් යුතු වූ විඤ්ඤාණය කරණ කොට ගෙන ‘මම උසස් කෙනෙක් ය’ කියල දකින්නේ නැත්නම්, ‘මම සමාන කෙනෙක් ය’ කියලා දකින්නේ නැත්නම්, ‘මම පහත් කෙනෙක් ය’ කියලා දකින්නේ නැත්නම්, මෙය වනාහී යථාර්ථය දැනීම විනා වෙන කුමක්ද?
පින්වත් සෝණ, මේ ගැන ඔබ කුමක්ද හිතන්නේ? රූපය යනු නිත්‍ය දෙයක්ද? අනිත්‍ය දෙයක්ද?” “ස්වාමීනී, අනිත්‍යයි.”
“යමක් වනාහී අනිත්‍ය නම් එය දුකක්ද? සැපක්ද?” “ස්වාමීනී, දුකකි.”
“යමක් වනාහි අනිත්‍ය නම්, දුක නම්, වෙනස්වන ධර්මතාවයට අයත් දෙයක් නම් එය ‘මගේ’ කියා හෝ එය ‘මම වෙමි’ කියා හෝ එය ‘මගේ ආත්මය’ කියා හෝ මුලාවෙන් දකින එක සුදුසුද?” “ස්වාමීනී, එය සුදුසු නෑ ම යි.”
“විඳීම යනු නිත්‍ය දෙයක්ද? අනිත්‍ය දෙයක්ද?” “ස්වාමීනී, අනිත්‍යයි.”
“යමක් වනාහී අනිත්‍ය නම් එය දුකක්ද? සැපක්ද?” “ස්වාමීනී, දුකකි.”
“යමක් වනාහි අනිත්‍ය නම්, දුක නම්, වෙනස්වන ධර්මතාවයට අයත් දෙයක් නම් එය ‘මගේ’ කියා හෝ එය ‘මම වෙමි’ කියා හෝ එය ‘මගේ ආත්මය’ කියා හෝ මුලාවෙන් දකින එක සුදුසුද?” “ස්වාමීනී, එය සුදුසු නෑ ම යි.”
“සඤ්ඤාව ….(පෙ)…. සංස්කාර ….(පෙ)…. විඤ්ඤාණය යනු නිත්‍ය දෙයක්ද? අනිත්‍ය දෙයක්ද?” “ස්වාමීනී, අනිත්‍යයි.”
“යමක් වනාහී අනිත්‍ය නම් එය දුකක්ද? සැපක්ද?” “ස්වාමීනී, දුකකි.”
“යමක් වනාහී අනිත්‍ය නම්, දුක නම්, වෙනස්වන ධර්මතාවයට අයත් දෙයක් නම් එය ‘මගේ’ කියා හෝ එය ‘මම වෙමි’ කියා හෝ එය ‘මගේ ආත්මය’ කියා හෝ මුලාවෙන් දකින එක සුදුසුද?” “ස්වාමීනී, එය සුදුසු නෑ ම යි.”
“එනිසා පින්වත් සෝණ, අතීතයට ගිය හෝ හට නොගත් අනාගතයට අයත් වූ හෝ වර්තමානයේ හෝ අධ්‍යාත්මික හෝ බාහිර හෝ ගොරෝසු හෝ සියුම් හෝ හීන හෝ උසස් හෝ යම්කිසි රූපයක් ඇද්ද, දුර හෝ ළඟ හෝ යම් රූපයක් ඇද්ද, ඒ සෑම රූපයක් පිළිබඳව ම දියුණු කළ ප්‍රඥාවෙන් යුතුව දැකිය යුත්තේ ‘මේක මගේ නොවේ, මේක මම නොවෙමි, මේක මගේ අත්මය නොවෙයි’ කියල ඔය ආකාරයටයි.
යම්කිසි විඳීමක් ….(පෙ)…. යම්කිසි සඤ්ඤාවක් ….(පෙ)…. යම්කිසි සංස්කාරයක් ….(පෙ)…. අතීතයට ගිය හෝ හට නොගත් අනාගතයට අයත් වූ හෝ වර්තමානයේ හෝ ආධ්‍යාත්මික හෝ බාහිර හෝ ගොරෝසු හෝ සියුම් හෝ හීන හෝ උසස් හෝ යම්කිසි විඤ්ඤාණයක් ඇද්ද, දුර හෝ ළඟ හෝ යම් විඤ්ඤාණයක් ඇද්ද, ඒ සෑම විඤ්ඤාණයක් පිළිබඳව ම දියුණු කළ ප්‍රඥාවෙන් යුතුව දැකිය යුත්තේ ‘මේක මගේ නොවේ, මේක මම නොවෙමි, මේක මගේ ආත්මය නොවෙයි’ කියල ඔය ආකාරයටයි.
පින්වත් සොණ, ශ්‍රැතවත් ආර්ය ශ්‍රාවකයා ඔය විදිහට දියුණු කරපු ප්‍රඥාවෙන් දකින කොට රූපය ගැනත් අවබෝධයෙන් ම කළකිරෙනවා. වේදනාව ගැනත් අවබෝධයෙන් ම කළකිරෙනවා. සඤ්ඤාව ගැනත් අවබෝධයෙන් ම කළකිරෙනවා. සංස්කාර ගැනත් අවබෝධයෙන් ම කළකිරෙනවා. විඤ්ඤාණය ගැනත් අවබෝධයෙන් ම කළකිරෙනවා. අවබෝධයෙන් ම කළකිරුණු විට සිත ඇලෙන්නේ නැතුව යනවා. සිත නොඇලෙන කොට එයින් සිත නිදහස් වෙනවා. සිත නිදහස් වෙන කොට ම ‘නිදහස් වුණා’ කියලා අවබෝධ ඥානය ඇතිවෙනවා. ‘ඉපදීම ක්ෂය වෙලා ගියා. බඹසර වාසය සම්පූර්ණ කරගත්තා. නිවන පිණිස කළ යුතු දේ කර ගත්තා. ආයෙත් නම් සංසාරයේ වෙන උපතක් නැතැ’යි අවබෝධය ඇති වෙනවා.”
සාදු! සාදු!! සාදු!!!
පඨම සෝණ සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_1-1-5-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M