36. සැවැත් නුවර දී ……………………..
එතකොට එක්තරා භික්ෂුවක් භාග්‍යවතුන් වහන්සේ වැඩසිටිය තැනට පැමිණුනා ….(පෙ)…. එකත්පස්ව වාඩිවුණ ඒ භික්ෂුව භාග්‍යනතුන් වහන්සේට මෙකරුණ පැවසුවා.
“ස්වාමීනී, භාග්‍යවතුන් වහන්ස, මා හට සංක්ෂේපයෙන් ශ්‍රී සද්ධර්මය වදාරණ සේක් නම් මැනැවි. එතකොට මට භාග්‍යවතුන් වහන්සේගෙන් යම් ධර්මයක් අසා දැනගෙන හුදෙකලා වෙලා, පිරිසෙන් වෙන් වෙලා, අප්‍රමාදීව, කෙලෙස් තවන වීරිය ඇතිව, දහමට දිවි පුදා වාසය කරන්නට පුළුවනි.”
“පින්වත් භික්ෂුව, අභ්‍යන්තරික වශයෙන් යම් ක්ලේශයක් තියෙනවා නම්, එයට අනුව තමයි මැනීමක් ඇතිවන්නේ. යමකට අනුව මැනීමක් ඇතිවෙනවා නම්, එයින් තමයි ‘මම ය, මගේ ය’ යන ආදී ගණන් ගැනීම් ඇතිවන්නේ. ඉදින් අභ්‍යන්තරික වශයෙන් යම් ක්ලේශයක් පවතින්නේ නැතිනම් එය මැනීමක් බවට පත්වන්නේ නෑ. යමක් මැනීමක් බවට පත්වෙන්නේ නැතිනම්, එයින් ‘මම ය, මගේ ය’ යන ආදී ගණන් ගැනීම් ඇතිවන්නේ නෑ.”
“භ්‍යග්‍යවතුන් වහන්ස, මට අවබෝධ වුණා. සුගතයන් වහන්ස, මට අවබෝධ වුණා.”
“පින්වත් භික්ෂුව, මා විසින් අරුත් හකුළුවා පවසන ලද ධර්මයෙහි අර්ථය ඔබ විස්තර වශයෙන් තේරුම් ගතතේ කොයි ආකාරයෙන්ද?”
“ස්වාමීනී, ඉදින් රූපය අභ්‍යන්තරික ක්ලේශයක් වශයෙන් පවතිනවා නම් එයට අනුව තමයි මැනීමක් ඇතිවන්නේ. යමකට අනුව මැනීමක් ඇති වෙනවා නම්, එයින් තමයි ‘මම ය, මගේ ය’ යන ආදී ගණන් ගැනීම් ඇතිවන්නේ. ඉදින් විඳීම අභ්‍යන්තරික ක්ලේශයක් වශයෙන් පවතිනවා නම් ….(පෙ)…. ඉදින් සඤ්ඤාව අභ්‍යන්තරික ක්ලේශයක් වශයෙන් පවතිනවා නම් ….(පෙ)…. ඉදින් සංස්කාර අභ්‍යන්තරික ක්ලේශයක් වශයෙන් පවතිනවා නම් ….(පෙ)…. ඉදින් විඤ්ඤාණය අභ්‍යන්තරික ක්ලේශයක් වශයෙන් පවතිනවා නම් එයට අනුව තමයි මැනීමක් ඇති වන්නේ. යමකට අනුව මැනීමක් ඇතිවෙනවා නම්, එයින් තමයි ‘මම ය, මගේ ය’ යන ආදී ගණන් ගැනීම් ඇතිවන්නේ.
ස්වාමීනී, ඉදින් රූපය අභ්‍යන්තරික ක්ලේශයක් වශයෙන් පවතින්නේ නැත්නම් එයට අනුව මැනීමක් ඇතිවන්නේ නෑ. යමකට අනුව මැනීමක් ඇති වෙන්නේ නැත්නම්, එයින් ‘මම ය, මගේ ය’ යන ආදී ගණන් ගැනීම් ඇතිවන්නේ නෑ. ඉදින් විඳීම අභ්‍යන්තරික ක්ලේශයක් වශයෙන් පවතින්නේ නැත්නම් ….(පෙ)…. ඉදින් සඤ්ඤාව අභ්‍යන්තරික ක්ලේශයක් වශයෙන් පවතින්නේ නැත්නම් ….(පෙ)…. ඉදින් සංස්කාර අභ්‍යන්තරික ක්ලේශයක් වශයෙන් පවතින්නේ නැත්නම් ….(පෙ)…. ඉදින් විඤ්ඤාණය අභ්‍යන්තරික ක්ලේශයක් වශයෙන් පවතින්නේ නැත්නම් එයට අනුව මැනීමක් ඇතිවන්නේ නෑ. යමකට අනුව මැනීමක් ඇතිවන්නේ නැත්නම්, එයින් ‘මම ය, මාගේ ය’ යන ආදී ගණන් ගැනීම් ඇතිවන්නේ නෑ. ස්වාමීනී, භාග්‍යවතුන් වහන්සේ විසින් අරුත් හකුළුවා වදාරණ ලද ධර්මයෙහි අර්ථ මා ඔන්න ඔය ආකාරයටයි තේරුම් ගත්තේ.”
“සාදු! සාදු! පින්වත් භික්ෂුව, පින්වත් භික්ෂුව මා විසින් සංක්ෂේපයෙන් පවසන ලද ධර්මයෙහි අර්ථය ඔබ විස්තර වශයෙන් තේරුම් ගත් අයුරු ඉතා කදිමයි. පින්වත් භික්ෂුව, ඉදින් රූපය අභ්‍යන්තරික ක්ලේශයක් වශයෙන් පවතිනවා නම් එයට අනුව තමයි මැනීමක් ඇති වන්නේ. යමකට අනුව මැනීමක් ඇති වෙනවා නම්, එයින් තමයි ‘මම ය, මගේ ය’ යන ආදී ගණන් ගැනීම් ඇතිවන්නේ. ඉදින් විඳීම අභ්‍යන්තරික ක්ලේශයක් වශයෙන් පවතිනවා නම් ….(පෙ)…. ඉදින් සඤ්ඤාව අභ්‍යන්තරික ක්ලේශයක් වශයෙන් පවතිනවා නම් ….(පෙ)…. ඉදින් සංස්කාර අභ්‍යන්තරික ක්ලේශයක් වශයෙන් පවතිනවා නම් ….(පෙ)…. ඉදින් විඤ්ඤාණය අභ්‍යන්තරික ක්ලේශයක් වශයෙන් පවතිනවා නම් එයට අනුව තමයි මැනීමක් ඇතිවන්නේ. යමකට අනුව මැනීමක් ඇති වෙනවා නම්, එයින් තමයි ‘මම ය, මගේ ය’ යන ආදී ගණන් ගැනීම ඇතිවන්නේ.
පින්වත් භික්ෂුව, ඉදින් රූපය අභ්‍යන්තරික ක්ලේශයක් වශයෙන් පවතින්නේ නැතිනම් එයට අනුව මැනීමක් ඇතිවන්නේ නෑ. යමකට අනුව මැනීමක් ඇතිවෙන්නේ නැත්නම්, එයින් ‘මම ය, මගේ ය’ යන ආදී ගණන් ගැනීම් ඇතිවන්නේ නෑ. ඉදින් විඳීම අභ්‍යන්තරික ක්ලේශයක් වශයෙන් පවතින්නේ නැත්නම් ….(පෙ)…. ඉදින් සඤ්ඤාව අභ්‍යන්තරික ක්ලේශයක් වශයෙන් පවතින්නේ නැත්නම් ….(පෙ)…. ඉදින් සංස්කාර අභ්‍යන්තරික ක්ලේශයක් වශයෙන් පවතින්නේ නැත්නම් ….(පෙ)…. ඉදින් විඤ්ඤාණය අභ්‍යන්තරික ක්ලේශයක් වශයෙන් පවතින්නේ නැත්නම් එයට අනුව මැනීමක් ඇති වන්නේ නෑ. යමකට අනුව මැනීමක් ඇතිවන්නේ නැතිනම්, එයින් ‘මම ය, මගේ ය’ වන ආදී ගණන් ගැනීම් ඇතිවන්නේ නෑ. පින්වත් භික්ෂුව, මා විසින් සංක්ෂේපයෙන් පවසන ලද ධර්මයෙහි අර්ථය විස්තර වශයෙන් තේරුම් ගත යුත්තේ ඔය විදිහට තමයි.”
එතකොට ඒ භික්ෂුව භාග්‍යවතුන් වහන්සේ විසින් වදාරණ ලද ධර්මාවවාදය සතුටින් පිළිඅරගත්තා. සතුටින් අනුමෝදන් වුණා. ආසනයෙන් නැඟිටලා භාග්‍යවතුන් වහන්සේට ආදරයෙන් වන්දනා කළා. පැදකුණු කරලා පිටත් වෙලා ගියා. ඉතින් ඒ භික්ෂුව හුදෙකලා වුණා. පිරිසෙන් වෙන් වුණා. අප්‍රමාදී වුණා. කෙලෙස් තවන වීරියෙන් යුතු වුණා. දහමට දිවි පුදා ධර්මයේ හැසිරෙන කොට ….(පෙ)…. ඒ භික්ෂුව එක්තරා රහතන් වහන්සේ නමක් බවට පත්වුණා.
සාදු! සාදු!! සාදු!!!
දුතිය භික්ඛු සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_1-1-4-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M