8. සැවැත් නුවර දී …………….
පින්වත් මහණෙනි, මා ඔබට බැඳීයාමෙන් දුක් තැතිගැනීම් ඇතිවීමත් නොබැඳීමෙන් දුක් තැති ගැනීම් නොමැතිවීමත් පවසන්නම්. එය හොඳින් අසා ගන්න. මනාකොට නුවණින් විමසන්න. මා කියා දෙන්නම්. “එසේය ස්වාමීනී” කියලා ඒ භික්ෂූන් වහන්සේලා භාග්‍යවතුන් වහන්සේට පිළිතුරු දුන්නා. ඒ මොහොතේදී භාග්‍යවතුන් වහන්සේ මේ දෙසුම වදාළා.
පින්වත් මහණෙනි, බැඳීයාමෙන් දුක් තැතිගැනීම් ඇතිවන්නේ කොහොමද?
පින්වත් මහණෙනි, මෙහි අශ්‍රැතවත් පෘථග්ජනයා රූපය ගැන මුලාවෙන් දකින්නේ ‘මෙය මගේ ය, මෙය මම වෙමි, මෙය මාගේ වසඟයෙහි පවත්වාගත හැකි දෙයක් (මෙය මගේ ආත්මය)’ වශයෙනුයි. එනමුදු ඔහුගේ ඒ රූපය විවිධ වෙනස්වීම්වලට බඳුන් වෙනවා. වෙනත් ස්වභාවයන්ට පත්වෙනවා. ඔහුගේ ඒ රූපය විවිධ වෙනස්වීම්වලට බඳුන් වීම නිසා වෙනත් ස්වභාවයකට පත්වීම නිසා ඔහු තුළ සෝක වැළපීම් දුක් දොම්නස් උපායාස ඇති වෙනවා. වේදනා පිළිබඳව ….(පෙ)…. සඤ්ඤාව පිළිබඳව ….(පෙ)…. සංස්කාර පිළිබඳව ….(පෙ)…. විඤ්ඤාණය ගැන මුලාවෙන් දකින්නේ ‘මෙය මාගේ ය. මෙය මම වෙමි, මෙය මාගේ වසඟයෙහි පවත්වාගත හැකි දෙයක් (මෙය මාගේ ආත්මය)’ වශයෙනුයි. එනමුදු ඔහුගේ ඒ විඤ්ඤාණය විවිධ වෙනස්වීම්වලට බඳුන් වෙනවා. වෙනත් ස්වභාවයකට පත්වෙනවා. එවිට ඔහුගේ ඒ විඤ්ඤාණය විවිධ වෙනස්වීම්වලට බඳුන් වීම නිසා වෙනත් ස්වභාවයකට පත්වීම නිසා ඔහු තුළ සෝක වැළපීම් දුක් දොම්නස් උපායාස ඇති වෙනවා. පින්වත් මහණෙනි, ඔය ආකාරයටයි බැඳීයාමෙන් දුක් තැති ගැනීම් ඇතිවන්නේ.
පින්වත් මහණෙනි, නොබැඳීමෙන් දුක් තැතිගැනීම් ඇති නොවන්නේ කොහොමද? පින්වත් මහණෙනි, මෙහි ශ්‍රැතවත් ආර්යශ්‍රාවකයා රූපය ගැන නුවණින් දකින්නේ ‘මෙය මගේ නොවේ. මෙය මම නොවෙමි, මෙය මගේ වසඟයෙහි පවත්වාගත හැකි දෙයක් නොවේ (මෙය මාගේ ආත්මය නොවේ)’ වශයෙනුයි. ඉතින් ඔහුගේ ඒ රූපයත් විවිධ වෙනස්වීම්වලට බඳුන් වෙනවා. වෙනත් ස්වභාවයකට පත්වෙනවා. නමුත් ඔහුගේ ඒ රූපය විවිධ වෙනස්වීම්වලට බඳුන්වීම හේතුවෙන් වෙනත් ස්වභාවයන්ට පත්වීම හේතුවෙන් ඔහු තුළ සෝක වැළපීම් දුක් දොම්නස් උපායාස හටගන්නෙ නෑ. වේදනාව ගැන ….(පෙ)…. සඤ්ඤාව ගැන ….(පෙ)…. සංස්කාර ගැන ….(පෙ)…. විඤ්ඤාණය ගැන නුවණින් දකින්නේ ‘මෙය මගේ නොවේ, මෙය මම නොවෙමි, මෙය මගේ වසඟයෙහි පවත්වාගත හැකි දෙයක් නොවේ (මෙය මාගේ ආත්මය නොවේ)’ වශයෙනුයි. ඔහුගේ ඒ විඤ්ඤාණයත් විවිධ වෙනස්වීම්වලට බඳුන් වෙනවා. වෙනත් ස්වභාවයන්ට පත්වෙනවා. නමුත් ඔහුගේ ඒ විඤ්ඤාණය විවිධ වෙනස්වීම්වලට බඳුන් වීම හේතුවෙන් වෙනත් ස්වභාවයන්ට පත්වීම හේතුවෙන් ඔහු තුළ සෝක වැළපීම් දුක් දොම්නස් උපායාස හටගන්නේ නෑ. පින්වත් මහණෙනි, ඔය ආකාරයටයි නොබැඳීමෙන් දුක් තැති ගැනීම් ඇති නොවන්නේ.
සාදු! සාදු!! සාදු!!!
දුතිය උපාදාපරිතස්සනා සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_1-1-1-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M