396. සැවැත් නුවරදී ……………
එදා ආයුෂ්මත් සාරිපුත්ත තෙරුන් “ප්‍රිය ආයුෂ්මත් මහණෙනි” කියා භික්ෂූන් ඇමතුවා. ඒ භික්ෂූන් ද “ප්‍රිය ආයුෂ්මතුන් වහන්ස” කියල ආයුෂ්මත් සාරිපුත්තයන් වහන්සේට පිළිතුරු දුන්නා. ආයුෂ්මත් සාරිපුත්ත තෙරුන් මේ දෙසුම වදාළා.
ප්‍රිය ආයුෂ්මත්වරුනි, මෙහි හුදෙකලාවේ භාවනානුයෝගීව සිටිද්දී මට මෙ වැනි අදහසක් ඇති වුණා. මේ ලෝකයෙහි යම් කිසි දෙයක් වෙනස් වෙලා වෙනස් ස්වභාවයකට පත්වෙනවා නම් ඒ දෙය හේතු කොට ගෙන මා තුළ සෝක වැළපීම් දුක් දොම්නස් සුසුම් හෙළීම් හට ගන්නවා නම් එබඳු දෙයක් ලෝකයේ තියෙනවාද? කියල.
එතකොට ප්‍රිය ආයුෂ්මතුනි, මට මෙහෙම හිතුණා. මේ ලෝකයෙහි යම් කිසි දෙයක් වෙනස් වෙලා වෙනස් ස්වභාවයකට පත්වෙනවා නම් ඒ දෙය හේතු කොට ගෙන මා තුළ සෝක වැළපීම් දුක් දොම්නස් සුසුම් හෙළීම් හට ගන්නවා නම් එබඳු දෙයක් ලෝකයේ නෑ කියල.
මෙසේ පැවසූ විට ආයුෂ්මත් ආනන්ද තෙරුන්, ආයුෂ්මත් සාරිපුත්ත තෙරුන් ගෙන් මෙහෙම ඇහුවා. “ප්‍රිය ආයුෂ්මත් සාරිපුත්තයන් වහන්ස, ශාස්තෘන් වහන්සේ වුණත් වෙනස් වෙලා වෙනස් ස්වභාවයකට පත්වෙනවා නම් ඒ දෙය හේතු කොට ගෙන ඔබ තුළ සෝක වැළපීම් දුක් දොම්නස් සුසුම් හෙළීම් හට ගන්නේ නැද්ද?”
“ප්‍රිය ආයුෂ්මත, ශාස්තෘන් වහන්සේ වුණත් වෙනස් වෙලා වෙනස් ස්වභාවයකට පත්වෙනවා නම් ඒ දෙය හේතු කොට ගෙන මා තුළ සෝක වැළපීම් දුක් දොම්නස් සුසුම් හෙළීම් හට ගන්නේ නෑ. නමුත් මට මෙහෙම හිතේවි. අහෝ! ඒකාන්තයෙන් ම මහේශාක්‍ය වූ මහා ඉර්ධිමත් වූ මහා ආනුභාව සම්පන්න වූ කෙනෙක් අතුරුදහන් වෙලා ගියා නේද! යම් හෙයකින් භාග්‍යවතුන් වහන්සේ චිරාත් කාලයක් වැඩසිටිනා සේක් නම් එය බොහෝ ජනයාට හිත සුව පිණිස ලෝකයාට අනුකම්පා පිණිස දෙවි මිනිසුන්ට යහපත පිණිස හිත-සුව පිණිස හේතු වෙනවා ම යි කියල.”
“ඒක නම් ඇත්ත. ප්‍රිය ආයුෂ්මත් සාරිපුත්තයන් වහන්සේ බොහෝ කලක් මුළුල්ලේ මම ය මාගේ ය යනාදී සියලු මානයන් ම සහමුලින් ම ප්‍රහාණය කරල නේ ඉන්නේ. එම නිසා ප්‍රිය ආයුෂ්මත් සාරිපුත්තයන් වහන්සේට ශාස්තෘන් වහන්සේ වුණත් වෙනස් වෙලා වෙනස් ස්වභාවයකට පත්වෙනවා නම් ඒ දෙය හේතු කොට ගෙන සෝක වැළපීම් දුක් දොම්නස් සුසුම් හෙළීම් හට ගන්නේ නෑ.”
සාදු! සාදු!! සාදු!!!
සාරිපුත්ත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_9-1-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M