395. මා හට අසන්නට ලැබුණේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ සැවැත් නුවර ජේතවනය නම් වූ අනේපිඬු සිටුතුමාගේ ආරාමයේ. එහි දී ආයුෂ්මත් මහා මොග්ගල්ලාන තෙරුන් “ප්‍රිය ආයුෂ්මත් මහණෙනි” කියා භික්ෂූන් ඇමතුවා. ඒ භික්ෂූන් ද “ප්‍රිය ආයුෂ්මතුන් වහන්ස” කියල ආයුෂ්මත් මහා මොග්ගල්ලානයන් වහන්සේට පිළිතුරු දුන්නා. ආයුෂ්මත් මහා මොග්ගල්ලාන තෙරුන් මේ දෙසුම වදාළා.
ප්‍රිය ආයුෂ්මත්වරුනි, මෙහි හුදෙකලාවේ භාවනානුයෝගීව සිටිද්දී මට මෙවැනි අදහසක් ඇති වුණා. ‘ආර්ය වූ නිශ්ශබ්දතාවය, ආර්ය වූ නිශ්ශබ්දතාවය’ කියල කියනවා. ආර්ය වූ නිශ්ශබ්දතාවය ඇතිවන්නේ කුමන කරුණු මතද?
එතකොට ප්‍රිය ආයුෂ්මත්වරුනි, මට මෙහෙම හිතුණා. මේ සාසනයෙහි භික්ෂුව විතක්ක විචාරයන් සංසිඳුවා ගෙන චිත්තාභ්‍යන්තරයේ බලවත් පැහැදීමක් ඇතිව සිතේ එකඟභාවය ඇතිව විතර්ක රහිත විචාර රහිත සමාධියෙන් හට ගත් ප්‍රීති සුඛය ඇති දෙවෙනි ධ්‍යානයට පැමිණ වාසය කිරීමක් ඇද්ද මේක තමයි ආර්ය වූ නිශ්ශබ්දතාවය කියල කියන්නේ.
ඉතින් ප්‍රිය ආයුෂ්මතුනි, මම විතක්ක විචාරයන් සංසිඳුවා ගෙන චිත්තාභ්‍යන්තරයේ බලවත් පැහැදීමක් ඇතිව සිතේ එකඟභාවය ඇතිව විතර්ක රහිත විචාර රහිත සමාධියෙන් හට ගත් ප්‍රීති සුඛය ඇති දෙවෙනි ධ්‍යානයට පැමිණ වාසය කළා.
ඉතින් ප්‍රිය ආයුෂ්මත්වරුනි, මං එහෙම ධ්‍යානයෙන් වාසය කරන කොට විතර්ක සහගත සඤ්ඤා මනසිකාර ඇතිවෙන අවස්ථාවල් තිබුණා. එතකොට ප්‍රිය ආයුෂ්මත්වරුනි, භාග්‍යවතුන් වහන්සේ ඉර්ධි බලයෙන් මං ලඟට වැඩල මෙහෙමයි වදාළේ. ‘පින්වත මොග්ගල්ලාන, පින්වත මොග්ගල්ලාන, පින්වත් බ්‍රාහ්මණය, ආර්ය නිශ්ශබ්දතාවය ගැන ප්‍රමාද වෙන්නට එපා. ආර්ය නිශ්ශබ්දතාවයේ සිත පිහිටුවන්නට ඕන. ආර්ය නිශ්ශබ්දතාවයේ සිත එකග කරන්නට ඕන. ආර්ය නිශ්ශබ්දතාවයේ සිත සමාහිත කරන්නට ඕන.’
ඉතින් ප්‍රිය ආයුෂ්මත්වරුනි, පස්සෙ කාලෙක මං විතක්ක විචාරයන් සංසිඳුවාගෙන චිත්තාභ්‍යන්තරයේ බලවත් පැහැදීමක් ඇතිව සිතේ එකඟභාවය ඇතිව විතර්ක රහිත විචාර රහිත සමාධියෙන් හට ගත් ප්‍රීති සුඛය ඇති දෙවෙනි ධ්‍යානයට පැමිණ වාසය කළා. ප්‍රිය ආයුෂ්මත්වරුනි, යම් කෙනෙක් ගැන ශාස්තෘන් වහන්සේ විසින් අනුග්‍රහ කළ මහා අභිඥාවන්ට පත් වූ කෙනා කියල මනා කොට කිව යුතු නම් ශාස්තෘන් වහන්සේ විසින් අනුග්‍රහ කරල මහා අභිඥාවන්ට පත් වූ කෙනා කියල කිවයුත්තේ මං ගැන තමයි.
සාදු! සාදු!! සාදු!!!
මොග්ගල්ලාන සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_9-1-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M