326. සැවැත් නුවරදී ……………
පින්වත් මහණෙනි, අරහත් වූ ආශ්‍රවයන් ක්ෂය කළා වූ යම් භික්ෂුවක් ඉන්නවා නම්, ඒ භික්ෂුවට පවා ඔය ලාභ සත්කාර කීර්ති ප්‍රශංසා අනතුරුදායකයි කියලයි මම කියන්නේ.
එසේ වදාළ විට ආයුෂ්මත් ආනන්ද තෙරුන් භාග්‍යවතුන් වහන්සේ ගෙන් මෙහෙම ඇහුවා. “ස්වාමීනි, ආශ්‍රවයන් ක්ෂය කළ භික්ෂුවට ලාභ සත්කාර කීර්ති ප්‍රශංසා අනතුරුදායක වන්නේ කොයි ආකාරයටද?”
පින්වත් ආනන්දයෙනි, යම් අරහත් ඵල චිත්ත විමුක්තියක් වේ නම් ඒකට ඔය ලාභ සත්කාර කීර්ති ප්‍රශංසා අනතුරුදායක වෙනවා කියල මම කියන්නේ නෑ. නමුත් පින්වත් ආනන්දයෙනි, අප්‍රමාදීව කෙලෙස් තවන වීර්යයෙන් යුතුව දහමට දිවි පුදා වාසය කරද්දී මෙලොවදී සුව සේ වාසය කළ හැකි යම් ධ්‍යාන සමාපත්ති ආදිය ඇති වෙනවා නේ. අන්න ඒ මෙලොවදී ලැබෙන සැප විඳගන්නට ලාභ සත්කාර කීර්ති ප්‍රශංසා අනතුරුදායක වෙනවා කියලයි මම කියන්නේ.
පින්වත් ආනන්දයෙනි, ලාභ සත්කාර කීර්ති ප්‍රශංසා කියන්නේ දරුණු දේවල්. නපුරු දේවල්. කොටින් ම ඵරුෂ දේවල්. කොටින් ම අනුත්තර වූ අරහත්වය අවබෝධ කිරීමටත් අනතුරුදායකයි. ඒ නිසා පින්වත් ආනන්ද, හික්මෙන්නට ඕන මේ විදිහට යි. අපි නම් ලාභ සත්කාර කීර්ති ප්‍රශංසා බැහැර කරනවා. අපට ලැබිල තියෙන ලාභ සත්කාර කීර්ති ප්‍රශංසාවලට අපගේ හිත යටවෙන්නට දෙන්නේ නෑ. පින්වත් ආනන්ද, ඔන්න ඔය විදිහටයි ඔබ හික්මෙන්න ඕන.
සාදු! සාදු!! සාදු!!!
ඛීණාසව භික්ඛු සූත්‍රය නිමා විය.
තුන්වෙනි මාතුගාම වර්ගය අවසන් විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_5-3-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M