299. සැවැත් නුවරදී ……………
පින්වත් මහණෙනි, ලාභ සත්කාර කීර්ති ප්‍රශංසා කියන්නේ දරුණු දේවල්. …. (පෙ) ….
පින්වත් මහණෙනි, මේක ඉස්සර සිදුවෙච්ච දෙයක්. එක්තරා ජලාශයක විශාල කැස්බෑ රංචුවක් බොහෝ කලක් තිස්සේ වාසය කළා. පින්වත් මහණෙනි, ඉතින් එක්තරා කැස්බෑවෙක් තව කැස්බෑවෙකුට මෙහෙම කිව්වා. “පුතේ, කැස්බෑ පැටියෝ, උඹ අර පැත්තට නම් යන්ට එපා!” කියල. නමුත් පින්වත් මහණෙනි, ඒ කැස්බෑවා ඒ පැත්තේ ගියා. එතකොට කැස්බෑවො මරන්නෙක් අර කැස්බෑවාට කෑම ඇමිණු යකඩ කටුවකින් විද්දා. ඉතින් පින්වත් මහණෙනි, ඒ කැස්බෑවා ආපහු අනිත් කැස්බෑවා ළඟට ගියා. දුරින් ම පැමිණෙන මේ කැස්බෑවා දැකපු අර කැස්බෑව මෙහෙම අහනවා. “පුතේ, කැස්බෑ පැටියෝ, උඹ අර පැත්තට හෙම ගියේ නෑ නේද?” “කැස්බෑ තාත්තේ, මං ඒ පැත්තට ගියා.” “පුතේ, කැස්බෑ පැටියෝ, ඉතින් උඹේ ඇඟට තුවාලයක් වුණේ නැද්ද? කරදරයක් වුණේ නැද්ද?” “අනේ කැස්බෑ තාත්තේ, මට තුවාලයක් නම් වුණේ නෑ. කරදරයක් නම් වුණේ නෑ. නමුත් මං පස්සෙන් ලුහුබැඳ ගෙන නූලක් නම් එනවා.”
“අයියෝ! පුතේ, කැස්බෑ පැටියෝ, උඹට තුවාල වුනා. උඹ වැනසුණා. පුතේ, කැස්බෑ පැටියෝ, උඹේ තාත්තලත්, සීයලත් දුකට පත් වුණේ වැනැසුණේ ඔය නූලෙන් තමයි. පුතේ, කැස්බෑ පැටියෝ, දැන් උඹව අපට අයිති නෑ. දැන් උඹ ඒ පැත්තට ම පලයන්.”
පින්වත් මහණෙනි, කැස්බෑ වැද්දා කියන්නේ පාපී වූ මාරයාට කියන නමක්. කෑම ඇමිණු යකඩ කටුව කියන්නේ ලාභ සත්කාර කීර්ති ප්‍රශංසාවලට කියන නමක්. නූල කියල කියන්නේ ආශාවෙන් ඇලෙනවාට (නන්දි රාගයට) කියන නමක්. පින්වත් මහණෙනි, යම්කිසි භික්ෂුවක් තමාට ලැබෙන ලාභ සත්කාර කීර්ති ප්‍රශංසා ගැන ආශ්වාදයක් ලබන්නට ගියොත්, කැමති වෙන්නට ගියොත්, පින්වත් මහණෙනි, ඒ භික්ෂුවත් ඇම ගිලපු කෙනෙක්. දුකට පැමිණුන කෙනෙක්. විනාශයට පත්වුණ කෙනෙක්. මාරයා විසින් කැමති දෙයක් කළ හැකි කෙනෙක්.
ඔය විදිහට පින්වත් මහණෙනි, ලාභ සත්කාර කීර්ති ප්‍රශංසා කියන්නේ දරුණු දේවල්. නපුරු දේවල්. කොටින් ම ඵරුෂ දේවල්. කොටින් ම අනුත්තර වූ අරහත්වය අවබෝධ කිරීමටත් අනතුරුදායකයි. ඒ නිසා පින්වත් මහණෙනි, හික්මෙන්නට ඕන මේ විදිහට යි. අපි නම් ලාභ සත්කාර කීර්ති ප්‍රශංසා බැහැර කරනවා. අපට ලැබිල තියෙන ලාභ සත්කාර කීර්ති ප්‍රශංසාවලට අපගේ හිත යටවෙන්නට දෙන්නේ නෑ. පින්වත් මහණෙනි, ඔන්න ඔය විදිහටයි ඔබ හික්මෙන්නට ඕන.
සාදු! සාදු!! සාදු!!!
කුම්ම සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_5-1-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M