ඒ දිනවල භාග්‍යවතුන් වහන්සේ වැඩසිටියේ රජගහ නුවර ගිජුකුළු කඳු මුදුනේය. එදා ආයුෂ්මත් සාරිපුත්තයන් වහන්සේ බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. ආයුෂ්මත් මහා මොග්ගල්ලානයන් වහන්සේත් බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. ආයුෂ්මත් මහා කස්සපයන් වහන්සේත් බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. ආයුෂ්මත් අනුරුද්ධයන් වහන්සේත් බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. ආයුෂ්මත් මන්තාණි පුත්ත පුණ්ණයන් වහන්සේත් බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. ආයුෂ්මත් උපාලි තෙරුන් වහන්සේත් බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. ආයුෂ්මත් ආනන්දයන් වහන්සේත් බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා. දේවදත්තයන් ද බොහෝ භික්ෂූන් සමඟ භාග්‍යවතුන් වහන්සේට නුදුරින් සක්මන් කරමින් හිටියා.
ඉතින් එදා භාග්‍යවතුන් වහන්සේ භික්ෂු සංඝයා අමතා වදාළා. “පින්වත් මහණෙනි, ඔය පින්වත් සාරිපුත්තයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම මහා ප්‍රඥාවන්තයි.
පින්වත් මහණෙනි, ඔය පින්වත් මොග්ගල්ලානයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම මහා ඉර්ධිබලයෙන් යුක්තයි.
පින්වත් මහණෙනි, ඔය පින්වත් කස්සපයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම ධූතාංගයන්ගෙන් යුක්තයි.
පින්වත් මහණෙනි, ඔය පින්වත් අනුරුද්ධයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම දිවැස් නුවණින් යුක්තයි.
පින්වත් මහණෙනි, ඔය පින්වත් මන්තානිපුත්ත පුණ්ණයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම ධර්ම කථිකයි.
පින්වත් මහණෙනි, ඔය පින්වත් උපාලි බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම මහා විනයධරයි.
පින්වත් මහණෙනි, ඔය පින්වත් ආනන්දයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද? ” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම බහුශ්‍රැතයි.
පින්වත් මහණෙනි, ඔය දේවදත්තයන් බොහෝ භික්ෂූන් සමඟ සක්මන් කරන අයුරු ඔබ දකිනවා නේද?” “එසේය, ස්වාමීනී.” “පින්වත් මහණෙනි, ඔය භික්ෂූන් සියලු දෙනාම පාපී ආශාවන්ගෙන් යුක්තයි.
පින්වත් මහණෙනි, මේ සත්වයන් සැසඳිලා යන්නේ, එකතු වෙන්නේ, ධාතු ස්වභාවයකින්. ලාමක අදහස් ඇති සත්වයන් ලාමක අදහස් ඇති සත්වයන් සමඟ අගේට පෑහිලා යනවා. එකතු වෙලා යනවා. යහපත් අදහස් ඇති සත්වයන් යහපත් අදහස් ඇති සත්වයන් සමඟ අගේට පෑහිලා යනවා. එකතු වෙලා යනවා.
පින්වත් මහණෙනි, අතීතයේදී පවා මේ සත්වයන් සැසඳිලා ගියේ, එකතු වෙලා ගියේ, ධාතු ස්වභාවයකින්. ලාමක අදහස් ඇති සත්වයන් ලාමක අදහස් ඇති සත්වයන් සමඟ අගේට පෑහිලා ගියා. එකතු වෙලා ගියා. යහපත් අදහස් ඇති සත්වයන් යහපත් අදහස් ඇති සත්වයන් සමඟ අගේට පෑහිලා ගියා. එකතු වෙලා ගියා.
පින්වත් මහණෙනි, අනාගත කාලයේදී පවා මේ සත්වයන් සැසඳිලා යන්නේ, එකතු වෙන්නේ, ධාතු ස්වභාවයකින්. ලාමක අදහස් ඇති සත්වයන් ලාමක අදහස් ඇති සත්වයන් සමඟ අගේට පෑහිලා යාවි. එකතු වෙලා යාවි. යහපත් අදහස් ඇති සත්වයන් යහපත් අදහස් ඇති සත්වයන් සමඟ අගේට පෑහිලා යාවි. එකතු වෙලා යාවි.
පින්වත් මහණෙනි, වර්තමාන කාලයේදී පවා මේ සත්වයන් සැසඳිලා යන්නේ, එකතු වෙන්නේ, ධාතු ස්වභාවයකින්. ලාමක අදහස් ඇති සත්වයන් ලාමක අදහස් ඇති සත්වයන් සමඟ අගේට පෑහිලා යනවා. එකතු වෙලා යනවා. යහපත් අදහස් ඇති සත්වයන් යහපත් අදහස් ඇති සත්වයන් සමඟ අගේට පෑහිලා යනවා. එකතු වෙලා යනවා.
සාදු! සාදු!! සාදු!!!
චංකම සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_2-2-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M