ඒ දිනවල භාග්‍යවතුන් වහන්සේ වැඩසිටියේ ඤාතික ගමේ ගඩොලින් කළ ප්‍රාසාදයකයි. එදා භාග්‍යවතුන් වහන්සේ “පින්වත් මහණෙනි” කියා භික්ෂු සංඝයා අමතා වදාළා. “පින්වතුන් වහන්ස” කියලා ඒ භික්ෂූන් වහන්සේලා භාග්‍යවතුන් වහන්සේට පිළිතුරු දී වදාළා. ඒ මොහොතේදී තමයි භාග්‍යවතුන් වහන්සේ මේ දේශනාව වදාළේ.
පින්වත් මහණෙනි, ධාතු ස්වභාවය නිසයි සඤ්ඤාව උපදින්නේ. දෘෂ්ටිය උපදින්නේ. විතර්ක උපදින්නේ.
ඔය අයුරින් වදාළ විට, ආයුෂ්මත් කච්චාන තෙරුන් භාග්‍යවතුන් වහන්සේගෙන් මෙය විමසුවා. “ස්වාමීනී, සම්මාසම්බුද්ධ නොවූ උදවිය තමා සම්මා සම්බුදුන් කියා යම් දෘෂ්ටියක් ඇති කරගන්නවා නම්, ඒ දෘෂ්ටිය හටගන්නේ කුමක් හේතු කොටගෙනද?”
“පින්වත් කච්චාන, මේ අවිද්‍යා ධාතුව කියන්නේ අතිවිශාල ධාතු ස්වභාවයක්. පින්වත් කච්චාන, ලාමක ධාතුව නිසා ලාමක සඤ්ඤාව උපදිනවා. ලාමක දෘෂ්ටිය උපදිනවා. ලාමක විතර්ක උපදිනවා. ලාමක චේතනා උපදිනවා. ලාමක පැතුම උපදිනවා. ලාමක පුද්ගලයා උපදිනවා. ලාමක වචන උපදිනවා. ඊට පස්සේ ඔහු ලාමක දේ කියනවා, දේශනා කරනවා, පණවනවා, පිහිටුවනවා, හෙළි කරනවා, බෙදනවා, මතු කොට දක්වනවා. ඔහුගේ ඉපදීම ලාමක දෙයක් කියලයි මං කියන්නේ.
පින්වත් කච්චාන, මධ්‍යම ධාතුව නිසා මධ්‍යම සඤ්ඤාව උපදිනවා. මධ්‍යම දෘෂ්ටිය උපදිනවා. මධ්‍යම විතර්ක උපදිනවා. මධ්‍යම චේතනා උපදිනවා. මධ්‍යම පැතුම උපදිනවා. මධ්‍යම පුද්ගලයා උපදිනවා. මධ්‍යම වචන උපදිනවා. ඊට පස්සේ ඔහු මධ්‍යම දේ කියනවා, දේශනා කරනවා, පණවනවා, පිහිටුවනවා, හෙළි කරනවා, බෙදනවා, මතු කොට දක්වනවා. ඔහුගේ ඉපදීම මධ්‍යම දෙයක් කියලයි මං කියන්නේ.
පින්වත් කච්චාන, උසස් ධාතුව නිසා උසස් සඤ්ඤාව උපදිනවා. උසස් දෘෂ්ටිය උපදිනවා. උසස් විතර්ක උපදිනවා. උසස් චේතනා උපදිනවා. උසස් පැතුම උපදිනවා. උසස් පුද්ගලයා උපදිනවා. උසස් වචන උපදිනවා. ඊට පස්සේ ඔහු උසස් දේ කියනවා, දේශනා කරනවා, පණවනවා, පිහිටුවනවා, හෙළි කරනවා, බෙදනවා, මතු කොට දක්වනවා. ඔහුගේ ඉපදීම උසස් දෙයක් කියලයි මං කියන්නේ.”
සාදු! සාදු!! සාදු!!!
ගිඤ්ජකාවසථ සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_2-2-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M