සැවැත් නුවරදී ……………
පින්වත් මහණෙනි, ධාතු වෙනස්කම් හේතු කොට ගෙනයි ස්පර්ශවල වෙනස්කම් ඇතිවෙන්නේ. ස්පර්ශවල වෙනස්කම් හේතු කොට ගෙන වේදනාවල වෙනස්කම් ඇතිවෙනවා. වේදනාවල වෙනස්කම් හේතු කොට ගෙන ස්පර්ශවල වෙනස්කම් නම් හටගන්නේ නෑ. ඒ වගේම ස්පර්ශවල වෙනස්කම් හේතු කොට ගෙන ධාතුවල වෙනස්කම් නම් හටගන්නේ නෑ.
පින්වත් මහණෙනි, ධාතුවල වෙනස්කම් කියන්නේ මොකක්ද? ඇස ධාතු ස්වභාවයක්. ….(පෙ)…. මනස ධාතු ස්වභාවයක්. පින්වත් මහණෙනි, ධාතුවල වෙනස්කම් කියන්නේ මේකටයි.
පින්වත් මහණෙනි, ධාතුවල වෙනස්කම් හේතු කොට ගෙන ස්පර්ශවල වෙනස්කම් ඇතිවන්නේත්, ස්පර්ශවල වෙනස්කම් හේතු කොට ගෙන වේදනාවල වෙනස්කම් ඇතිවන්නේත්, වේදනාවල වෙනස්කම් හේතු කොට ගෙන ස්පර්ශවල වෙනස්කම් ඇති නොවන්නේත් ස්පර්ශවල වෙනස්කම් හේතු කොටගෙන ධාතුවල වෙනස්කම් ඇති නොවන්නේත් කොහොමද?
පින්වත් මහණෙනි, ඇස නම් වූ ධාතු ස්වභාවය හේතු කොට ගෙන ඇසේ ස්පර්ශය හටගන්නවා. ඇසේ ස්පර්ශය හේතු කොට ගෙන ඇසේ ස්පර්ශයෙන් හටගන්නා විඳීම් ඇතිවෙනවා. නමුත් ඇසේ ස්පර්ශයෙන් හටගන්නා විඳීම හේතු කොටගෙන ඇසේ ස්පර්ශය නම් හටගන්නේ නෑ. ඇසේ ස්පර්ශය හේතු කොට ගෙන ඇස නම් වූ ධාතු ස්වභාවය හටගන්නේ නෑ. ….(පෙ)…. මනස නම් වූ ධාතු ස්වභාවය හේතු කොට ගෙන මනසේ ස්පර්ශය හටගන්නවා. මනසේ ස්පර්ශය හේතු කොට ගෙන මනසේ ස්පර්ශයෙන් හටගන්නා විඳීම් ඇතිවෙනවා. නමුත් මනසේ ස්පර්ශයෙන් හටගන්නා විඳීම හේතු කොටගෙන මනසේ ස්පර්ශය නම් හටගන්නේ නෑ. මනසේ ස්පර්ශය හේතු කොට ගෙන මනස නම් වූ ධාතු ස්වභාවය හටගන්නේ නෑ.
පින්වත් මහණෙනි, ඔන්න ඔය ආකාරයට ධාතුවල වෙනස්කම් හේතු කොටගෙන ස්පර්ශවල වෙනස්කම් හටගන්නවා. ස්පර්ශවල වෙනස්කම් නිසා වේදනාවල වෙනස්කම් හටගන්නවා. නමුත් වේදනාවල වෙනස්කම් හේතු කොට ගෙන ස්පර්ශවල වෙනස්කම් හටගන්නෙත් නෑ. ඒ වගේම ස්පර්ශවල වෙනස්කම් හේතු කොට ගෙන ධාතුවල වෙනස්කම් හටගන්නෙත් නෑ.
සාදු! සාදු!! සාදු!!!
නෝ වේදනා නානත්ත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_2-1-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M