සැවැත් නුවරදී ………..
එදා බොහෝ භික්ෂූන් වහන්සේලා භාග්‍යවතුන් වහන්සේව බැහැදකින්නට ආවා. ඇවිදින් භාග්‍යවතුන් වහන්සේට වන්දනා කළා. එකත්පස්ව වාඩිවුණා. එකත්පස්ව වාඩිවුණ ඒ භික්ෂූන්ට භාග්‍යවතුන් වහන්සේ මෙය වදාළා.
පින්වත් මහණෙනි, යම් දවසක ආර්ය ශ්‍රාවකයා හට පස් ආකාර බිය හා වෛරයන් සංසිඳී ගියොත්, සෝතාපත්ති අංග හතරෙන් යුක්ත වුණොත්, ඒ වගේම ආර්ය න්‍යාය ප්‍රඥාවෙන් අවබෝධ වෙලා, ඉතා හොඳින් අවබෝධ වෙලා තිබුණොත්, ඔහුට කැමති නම් තමන් විසින්ම තමන් ගැන ප්‍රකාශ කරන්න පුළුවනි, ‘මම නම් නිරය ක්ෂය වෙලා ගිය කෙනෙක්. තිරිසන් යෝනිය ක්ෂය වෙලා ගිය කෙනෙක්. ප්‍රේත ලෝකය ක්ෂය වෙලා ගිය කෙනෙක්. අපාය නම් වූ දුගතියට වැටෙන ස්වභාවය ක්ෂය වෙලා ගිය කෙනෙක්. මම සෝතාපන්න කෙනෙක්. අපායට නොයන ස්වභාවයෙන් යුක්ත කෙනෙක්. නියත වශයෙන්ම ආර්ය සත්‍යාවබෝධයට පිහිටක් ඇති කර ගත් කෙනෙක්’ය කියලා.
සංසිඳී යන පස් ආකාර වූ භය වෛරයන් මොනවාද? පින්වත් මහණෙනි, සතුන් මරණ කෙනා ….(පෙ)…. මෙලොවදීම යම් භයක්, වෛරයක් රැස් කරගන්නවා නම්, සොරකම් කරන කෙනා ….(පෙ)…. යම් භයක්, වෛරයක් රැස් කරගන්නවා නම්, වැරදි කාම සේවනයේ යෙදෙන කෙනා ….(පෙ)…. යම් භයක්, වෛරයක් රැස් කරගන්නවා නම්, බොරු කියන කෙනා ….(පෙ)…. යම් භයක්, වෛරයක් රැස් කරගන්නවා නම්, පින්වත් මහණෙනි, මත් වීමටත්, ප්‍රමාද වීමටත් හේතුවන සුරාව හා මත් ද්‍රව්‍ය පානය කරන කෙනා මත් වීමටත්, ප්‍රමාද වීමටත් හේතුවන සුරාව හා මත් ද්‍රව්‍ය පානය කිරීම හේතු කරගෙන මෙලොවදීම යම් භයක්, වෛරයක් රැස් කරගන්නවා නම්, පරලොවදිත් යම් භයක්, වෛරයක් රැස් කරගන්නවා නම්, මානසිකවත් යම් දුකක්, දොම්නසක් විඳිනවා නම් මෙබඳු වූ ඒ භයත්, වෛරයත් මත් වීමටත්, ප්‍රමාද වීමටත් හේතුවන සුරාව හා මත්ද්‍රව්‍ය පානය කිරීමෙන් වෙන් වුණ කෙනෙකුට සංසිඳී යනවා. මෙන්න මේ භය, වෛරයන් පහ තමයි සංසිඳී යන්නේ.
කොයි ආකාර වූ සෝතාපත්ති අංග හතරකින්ද යුක්ත වුණේ?
පින්වත් මහණෙනි, මේ ශාසනයෙහි ආර්ය ශ්‍රාවකයා ‘ඒ භාග්‍යවතුන් වහ්නසේ මේ මේ කරුණු නිසා අරහං වන සේක! ….(පෙ)…. කියල බුදු සමිඳාණන් ගැන අවබෝධාත්මක පැහැදීමකිනුයි යුක්තව සිටින්නේ. මේ ධර්මය නම් භාග්‍යවතුන් වහන්සේ විසින් මනාකොට වදාළ දෙයක්! ….(පෙ)…. කියල ශ්‍රී සද්ධර්මය ගැනත් අවබෝධාත්මක පැහැදීමකිනුයි යුක්තව සිටින්නේ. භාග්‍යවතුන් වහන්සේගේ ශ්‍රාවක සඟරුවන රාග, ද්වේෂ, මෝහ නසාලන පිළිවෙතට බැසගත් සේක! ….(පෙ)…. කියල ශ්‍රාවක සඟරුවන ගැනත් අවබෝධාත්මක පැහැදීමකිනුයි යුක්තව සිටින්නේ. ඒ වගේම කැඩිලා නැති, ….(පෙ)…. ආර්යකාන්ත සීලයෙනුත් යුක්ත වෙලයි ඉන්නේ. ඔන්න ඔය සෝතාපත්ති අංග හතරෙන් තමයි යුක්ත වෙලා ඉන්නේ.
ඔහු තුළ කොයි ආකාරයේ ආර්ය න්‍යායක්ද අවබෝධ වෙලා තියෙන්නේ. විශේෂයෙන් අවබෝධ වෙලා තියෙන්නේ?
පින්වත් මහණෙනි, මේ ශාසනයෙහි ආර්ය ශ්‍රාවකයා පටිච්චසමුප්පාදය ම යි ඉතා හොඳින් නුවණින් මෙනෙහි කරන්නේ. ….(පෙ)…. මෙන්න මේ ආර්ය න්‍යාය ඔහු තුළ අවබෝධ වෙලා තියෙන්නේ. විශේෂයෙන් අවබෝධ වෙලා තියෙන්නේ.
පින්වත් මහණෙනි, යම් දවසක ආර්ය ශ්‍රාවකයා හට මෙන්න මේ පස් ආකාර බිය හා වෛරයන් සංසිඳී ගියොත්, මේ සෝතාපත්ති අංග හතරෙන් යුක්ත වුණොත්, ඒ වගේම මේ ආර්ය න්‍යායත් ප්‍රඥාවෙන් අවබෝධ වෙලා, ඉතා හොඳින් අවබෝධ වෙලා තිබුණොත්, ඔහුට කැමති නම් තමන් විසින්ම තමන් ගැන ප්‍රකාශ කරන්න පුළුවනි, ‘මම නම් නිරය ක්ෂය වෙලා ගිය කෙනෙක්. තිරිසන් යෝනිය ක්ෂය වෙලා ගිය කෙනෙක්. ප්‍රේත ලෝකය ක්ෂය වෙලා ගිය කෙනෙක්. අපාය නම් වූ දුගතියට වැටෙන ස්වභාවය ක්ෂය වෙලා ගිය කෙනෙක්. මම සෝතාපන්න කෙනෙක්. අපායට නොයන ස්වභාවයෙන් යුක්ත කෙනෙක්. නියත වශයෙන්ම ආර්ය සත්‍යාවබෝධයට පිහිටක් ඇති කර ගත් කෙනෙක්’ය කියලා.
සාදු! සාදු!! සාදු!!!
දුතිය පඤ්ච භයවේර සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_1-5-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M