සැවැත් නුවරදී …………..
එදා ආයුෂ්මත් කච්චානගොත්ත තෙරුන් භාග්‍යවතුන් වහන්සේ ළඟට පැමිණියා. පැමිණිලා භාග්‍යවතුන් වහන්සේට වන්දනා කරලා එකත්පස්ව වාඩිවුණා. එකත්පස්ව වාඩිවුණු ආයුෂ්මත් කච්චානගොත්ත තෙරුන් භාග්‍යවතුන් වහන්සේගෙන් මෙකරුණ විමසුවා. “ස්වාමීනී, ‘සම්මා දිට්ඨිය, සම්මා දිට්ඨිය’ කියල කියනවා. ස්වාමීනී, සම්මා දිට්ඨිය ඇතිවන්නේ කොපමණකින්ද?”
“පින්වත් කච්චාන, මේ ලෝක සත්වයා බොහෝ සෙයින්ම (මරණින් මතු ස්ථිර වූ පැවැත්මක්) තිබෙන බවක්ද, (මරණින් මතු සත්වයා නැති වී උච්ඡේදයට පත් වී) නැති වී යන බවක්ද, කියන මත දෙක ඇසුරු කරගෙනයි ඉන්නේ. එනමුත් පින්වත් කච්චාන, (ජීවිතය නම් වූ මේ) ලෝකයේ හටගැනීම ඒ ආකාරයෙන්ම දියුණු කරපු ප්‍රඥාවකින් දකිද්දී ලෝකය පිළිබඳව යම් නැතිවී යාමක් ගැන මතයක් තිබේ නම් ඒ මතය නැතිවෙලා යනවා. එමෙන්ම පින්වත් කච්චාන, (ජීවිතය නම් වූ මේ) ලෝකයේ නිරුද්ධ වීම ඒ ආකාරයෙන්ම දියුණු කරපු ප්‍රඥාවකින් දකිද්දී ලෝකය තිබෙන බවක් පිළිබඳව යම් මතයක් තිබේ නම් ඒ මතය නැතිවෙලා යනවා.
පින්වත් කච්චාන, මේ ලෝක සත්වයා බොහෝ සෙයින්ම ලෝකය තුළ බැසගෙන, එයටම බැඳී, එහිම ගැලී, එයින් ම බැඳී ගිහිල්ලයි සිටින්නේ. ඉතින් ඒ ආකාරයන් ලෝකය තුළ බැසගෙන, එයට බැඳී සිතින් අදිටන් කරගෙන, එහිම ගැලී, ඒ තුළම සිටින්නේ නැත්නම්, බැඳී යන්නේ නැත්නම්, ‘මගේ ආත්මය’ කියල අදිටන් කරගන්නේ නැත්නම්, උපදින විට උපදින්නේ දුකක්ම බවත්, නිරුද්ධ වන විට නිරුද්ධ වන්නෙත් දුක බවත් යන මේ කරුණ සැක කරන්නේ නැත්නම්, විචිකිච්ඡා කරන්නේ නැත්නම්, ඒ ගැන ඔහුට බාහිර උපකාරයකින් තොර වූ අවබෝධයක් තියෙනවා. පින්වත් කච්චාන, මෙපමණකින්ම සම්මා දිට්ඨිය ඇතිවෙනවා.
පින්වත් කච්චාන ‘සියල්ල තිබෙනවා’ යන මේ මතය එක අන්තයක්. ‘සියල්ල නැත’ යන මේ මතය දෙවන අන්තයයි. පින්වත් කච්චාන මේ අන්ත දෙකට නොපැමිණ මධ්‍යම ප්‍රතිපදාවෙනුයි තථාගතයන් වහන්සේ දහම් දෙසන්නේ. අවිද්‍යාව හේතු කරගෙන සංස්කාර ඇතිවෙනවා. සංස්කාර හේතු කරගෙන විඤ්ඤාණය ඇතිවෙනවා. …. (පෙ) …. ඔන්න ඔය විදිහට තමයි මේ මුළු මහත් දුක් රැසම හටගන්නේ.
අවිද්‍යාව සහමුළින්ම නැතිවෙලා නිරුද්ධ වීමෙන් සංස්කාර නිරුද්ධ වෙලා යනවා. සංස්කාර නිරුද්ධ වීමෙන් විඤ්ඤාණය නිරුද්ධ වෙලා යනවා. …. (පෙ) …. ඔය විදිහට තමයි මේ මුළු මහත් දුක් රැසම නිරුද්ධ වෙලා යන්නේ.”
සාදු! සාදු!! සාදු!!!
කච්චානගොත්ත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_1-2-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M