සැවැත් නුවර ජේතවනාරාමයේදී …………………….
එදා භාග්‍යවතුන් වහන්සේ පෙරවරුවේ සිවුරු පොරවාගෙන, පාත්‍ර සිවුරු අරගෙන, උදය බ්‍රාහ්මණයාගේ නිවසට පිණ්ඩපාතෙ වැඩියා. එදා උදය බ්‍රාහ්මණයා භාග්‍යවතුන් වහන්සේගේ පාත්‍රයට දානෙ බෙදුවා. භාග්‍යවතුන් වහන්සේ දෙවෙනි දවසෙත් උදේ වරුවෙ සිවුරු පොරවාගෙන, පාත්‍ර සිවුරු අරගෙන උදය බ්‍රාහ්මණයාගේ නිවසට පිණ්ඩපාතෙ වැඩියා. දෙවෙනි දවසෙත් උදය බ්‍රාහ්මණයා භාග්‍යවතුන් වහන්සේගේ පාත්‍රයට දානෙ බෙදුවා. භාග්‍යවතුන් වහන්සේ තුන්වෙනි දවසෙත් උදේ වරුවේ සිවුරු පොරවාගෙන, පාත්‍ර සිවුරු අරගෙන උදය බ්‍රාහ්මණයාගේ නිවසට පිණ්ඩපාතෙ වැඩියා. තුන්වෙනි දවසෙත් උදය බ්‍රාහ්මණයා භාග්‍යවතුන් වහන්සේගේ පාත්‍රයට දානෙ පුරවලා භාග්‍යවතුන් වහන්සේට මෙහෙම කිව්වා. “රසයට ගිජු වෙච්ච මේ ශ්‍රමණ ගෞතමයන් වහන්සේ ආයෙ, ආයෙමත් වඩිනවා නෙව” කියලා.
(භාග්‍යවතුන් වහන්සේ) :
“ආයෙ ආයෙමත් බිත්තර වී වපුරනවා. ආයෙ ආයෙමත් වැස්ස වහිනවා. ගොවියෝ එතකොට ආයෙ ආයෙමත් කුඹුරු හානවා. ආයෙ ආයෙමත් රටට අස්වැන්න ලැබෙනවා.
ආයෙ ආයෙමත් යාචකයො ඉල්ලගෙන යනවා. දානපතිවරු ආයෙ ආයෙමත් දන් දෙනවා. දානපතිවරු ආයෙ ආයෙමත් දන් දීලා, ආයෙ ආයෙමත් සුගතියෙ උපදිනවා.
කිරි දොවන උදවිය ආයෙ ආයෙමත් කිරි දොවනවා. වහු පැටියා ආයෙ ආයෙමත් වැස්සි ළඟට එනවා. සත්වයාට ආයෙ ආයෙමත් කලන්තෙ හැදෙනවා. ආයෙ ආයෙමත් සැලෙනවා. අඥාන පුද්ගලයා ආයෙ ආයෙමත් ගර්භාෂයකට එනවා.
එතකොට ආයෙ ආයෙමත් උපදිනවා. ආයෙ ආයෙමත් මැරෙනවා. එතකොට ආයෙ ආයෙමත් අමු සොහොනට ගෙනියනවා. තියුණු ප්‍රඥා ඇති කෙනාට ආර්ය අෂ්ටාංගික මාර්ගය ලැබුන විට, පුනර්භවය නැතුව යනවා. එතකොට ආයෙ ආයෙමත් උපදින්නෙ නැහැ.”
මෙහෙම වදාළ විට උදය බ්‍රාහ්මණයා භාග්‍යවතුන් වහන්සේට මෙහෙම කිව්වා. “භවත් ගෞතමයන් වහන්ස, ඉතා මනහරයි! …. (පෙ) …. භවත් ගෞතමයන් වහන්සේ අද පටන් දිවි හිමියෙන් සරණ ගිය උපාසකයෙකු වශයෙන් මාව පිළිගන්නා සේක්වා!”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_7-2-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M