මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ කොසොල් ජනපදයේ, එක්තරා වන ලැහැබකය. එදා භාරද්වාජ ගෝත්‍රයට අයත් එක්තරා බ්‍රාහ්මණයෙකුගේ, ගවයන් දාහතර දෙනෙක් නැතිවෙලා හිටියා. ඉතින්, ඒ භාරද්වාජ ගෝත්‍ර බ්‍රාහ්මණයා ඒ ගවයන්ව සොයාගන්න හිතලා, අර වන ලැහැබට ඇතුළු වුනා. වන ලැහැබට ඇතුළු වුන ඔහුට ඒ වනයේ කය සෘජු කොට පළඟක් බැඳගෙන වාඩි වෙලා, භාවනාවෙන් වැඩ සිටින භාග්‍යවතුන් වහන්සේව දැකගන්න ලැබුනා. දැකල, භාග්‍යවතුන් වහන්සේ ළඟට ගියා. ගිහින් භාග්‍යවතුන් වහන්සේ සමීපයේ මේ ගාථාවන් පැවසුවා.
“මගේ ගවයන් දාහතර දෙනා සොයාගන්න බැරුව අදට දවස් හයක් වෙනවා. අනේ මේ ශ්‍රමණයන් වහන්සේට එබඳු ප්‍රශ්නයක් නැහැ නෙව. ඒ නිසාමයි මේ ශ්‍රමණයන් වහන්සේ මේ සනීපෙට ඉන්නෙ.
කොළ එක දෙක තියෙන තල ගස් ඇති පව්කාර හේන මේ ශ්‍රමණයන් වහන්සේට නැහැ නෙව. ඒ නිසාමයි මේ ශ්‍රමණයන් වහන්සේ මේ සනීපෙට ඉන්නෙ.
මගේ හිස් වී අටුවෙ මීයො නටන්නෙ හිතට අරගෙන. මේ ශ්‍රමණයන් වහන්සේට ඒ කරදර නැහැ නෙව. ඒ නිසාමයි මේ ශ්‍රමණයන් වහන්සේ ඔය සනීපෙට ඉන්නෙ.
හත් මාසයක් පරණ මගේ පැදුරෙ මකුණො පිරිල ඉන්නවා. මේ ශ්‍රමණයන් වහන්සේට ඒ කරදරේ නැහැ නෙව. ඒ නිසාමයි මේ ශ්‍රමණයන් වහන්සේ ඔය සනීපෙට ඉන්නෙ.
ළමයි එකා දෙකා ඉන්න, පවුල් කැඩිච්ච, කණවැන්දුම් වෙච්ච ගෑණු දරුවො හත් දෙනෙක්ම මට ඉන්නවා. අනේ මේ ශ්‍රමණයන් වහන්සේට ඒ කරදරේ නැහැ නෙව. ඒ නිසාමයි මේ ශ්‍රමණයන් වහන්සේ ඔය සනීපෙට ඉන්නෙ.
දුඹුරු පාට ලප හැදිච්ච ඇඟක් තියෙන අපේ ගෙදර උන්දැ, මං නිදාගෙන ඉන්න කොට, නැගිට්ටවන්නෙ පයින් ගහලා. මේ ශ්‍රමණයන් වහන්සේට ඒ කරදරේ නැහැ නෙව. ඒ නිසාමයි මේ ශ්‍රමණයන් වහන්සේ ඔය සනීපෙට ඉන්නෙ.
පාන්දර ජාමෙ නැගිටින කොටම ණයකාරයො එනවා. ‘ගත්තු ණය දීපං, දීපං’ කියල මට බැණවදිනවා. මේ ශ්‍රමණයන් වහන්සේට ඒ කරදරේ නැහැ නෙව. ඒ නිසාමයි මේ ශ්‍රමණයන් වහන්සේ ඔය සනීපෙට ඉන්නෙ.
(භාග්‍යවතුන් වහන්සේ) :
“පින්වත් බ්‍රාහ්මණය, දැන් හය දවසක් තිස්සෙ ඔබේ ගවයන් දාහතර දෙනා ආගිය අතක් නෑ. ඇත්තෙන්ම මට ඒ ප්‍රශ්නෙ නෑ. පින්වත් බ්‍රාහ්මණය, මං ඒ නිසා සුවපත් වුන කෙනෙක්.
පින්වත් බ්‍රාහ්මණය, කොළ එක දෙක තියෙන තල ගස් ඇති පව්කාර හේනක් මට නැහැ. පින්වත් බ්‍රාහ්මණය, ඒ නිසාම මං සුවපත් වූ කෙනෙක්.
පින්වත් බ්‍රාහ්මණය, හිස් වෙච්ච අටුවෙ හිතට ගත්තු මීයො ටිකක් නටනවා කිව්ව නේද? මට නම් ඒ ප්‍රශ්නෙ නෑ. පින්වත් බ්‍රාහ්මණය, ඒ නිසාම මං සුවපත් වෙච්ච කෙනෙක්.
පින්වත් බ්‍රාහ්මණය, ඔබේ පැදුර මාස හතක් පරණ වෙලා, මකුණන් ගෙන් පිරිලා තියෙනවා. නමුත් මට ඒ ප්‍රශ්නෙ නෑ. පින්වත් බ්‍රාහ්මණය, එනිසාම මම සුවපත් වූ කෙනෙක්.
පින්වත් බ්‍රාහ්මණය, ළමයි එකා දෙන්නා ඉන්න පවුල් කැඩිච්ච, කණවැන්දුම් දූලා හත් දෙනෙක් ඔබට ඉන්නවා. මට ඒ ප්‍රශ්නෙ නෑ. පින්වත් බ්‍රාහ්මණය, ඒ නිසාම මම සුවපත් වූ කෙනෙක්.
පින්වත් බ්‍රාහ්මණය, දුඹුරු පාට ලප හැදිච්ච ඇඟක් තියෙන ගෙදර උන්දැ, නිදිගත් ඔබව නැගිට්ටවන්නෙ පයින් ගහලා. මට ඒ ප්‍රශ්නෙ නෑ. පින්වත් බ්‍රාහ්මණය, ඒ නිසාම මම සුවපත් වූ කෙනෙක්.
පින්වත් බ්‍රාහ්මණය, පාන්දර ජාමෙ නැගිටින කොට ණයකාරයො ඇවිදින්, ‘ගත්තු ණය දීපං, දීපං’ කියල ඔබට බැණ වදිනවා. මට ඒ ප්‍රශ්නෙ නෑ. පින්වත් බ්‍රාහ්මණය, ඒ නිසාම මට සුවපත් වූ කෙනෙක්.”
මෙසේ වදාළ විට භාරද්වාජ ගෝත්‍ර බ්‍රාහ්මණයා භාග්‍යවතුන් වහන්සේට මෙහෙම කිව්වා. “භවත් ගෞතමයන් වහන්ස, ඉතා මනහරයි! භවත් ගෞතමයන් වහන්ස, ඉතා මනහරයි! භවත් ගෞතමයන් වහන්ස, යටිකුරුව තිබිච්ච දෙයක් උඩට හරවනවා වගෙයි. වහල තිබිච්ච දෙයක් ඇරල පෙන්නනවා වගේ. මංමුළා වුන කෙනෙකුට හරි මඟ පෙන්වනවා වගෙයි. ඇස් ඇති උදවියට රූප දකින්න අඳුරේ තෙල් පහන් දරනවා වගෙයි. ඔය විදිහට භවත් ගෞතමයන් වහන්සේ විසින් නොයෙක් ආකාරයෙන් ශ්‍රී සද්ධර්මය වදාළා. ඒ මම භවත් ගෞතමයන් වහන්සේව සරණ යනවා. ශ්‍රී සද්ධර්මයත්, භික්‍ෂුසංඝයාත් සරණ යනවා. භවත් ගෞතමයන් වහන්සේ ළඟ මටත් පැවිදි බව ලැබෙනවා නම්, උපසම්පදාව ලැබෙනවා නම් කොයිතරම් දෙයක්ද.”
ඉතින් භාරද්වාජ ගෝත්‍ර බ්‍රාහ්මණය භාග්‍යවතුන් වහන්සේ ළඟ පැවිදි වුනා. උපසම්පදා වුනා. ඒ ආයුෂ්මත් භාරද්වාජයන් වහන්සේ උපසම්දාවෙන් ටික කලකට පස්සෙ තනි වුනා. හුදෙකලා වුනා. අප්‍රමාදීව කෙලෙස් තවන වීරිය ඇති කරගත්තා. දහමට දිවි පුදා වාසය කළා. සැදැහැවතුන් ගිහි ගෙය අත්හැර බුදු සසුනේ යහපත් පැවිද්ද ලබන්නේ යම් උතුම් අර්ථයක් පිණිස නම්, අන්න ඒ උතුම් අර්ථය සුළු කලකදීම ලබාගත්තා. බඹසර ජීවිතයේ කෙළවර වූ උතුම් අරහත්වයට මේ ජීවිතේදීම පැමිණුනා. ඉපදීම නැති වුනා. බඹසර වාසය සම්පූර්ණ කළා. නිවන් මඟ සම්පූර්ණ කළා. ආයෙමත් සසර දුකක් නැතැයි අවබෝධ කරගත්තා. ඉතින් ඒ ආයුෂ්මත් භාරද්වාජයන් වහන්සේ රහතන් වහන්සේලා අතර කෙනෙක් බවට පත් වුනා.
සාදු! සාදු!! සාදු!!!
පළමු අරහන්ත වර්ගය අවසන් විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_7-1-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M