ඒ දිනවල භාග්‍යවතුන් වහන්සේ වැඩසිටියේ විශාලා මහනුවර සමීපයේ මහාවනයේ කූටාගාර ශාලාවේ. එදා භාග්‍යවතුන් වහන්සේ මේ ස්පර්ශ ආයතන හය ගැන භික්‍ෂුන්ට ධර්ම කථාවක් කරමින් හිටියා. නිදර්ශන දක්වමින්, කරුණු සමාදන් කරවමින් හිටියේ. ඒ භික්‍ෂුන් වහන්සේලාත් අවබෝධ කරගන්න ඕන. කියන අදහසින්ම, මුළු හිතම යොමු කරගෙන, සවන් යුග යොමු කරගෙන දහම් අසමින් හිටියා.
එතකොට පවිටු මාරයාට මේ අදහස ඇතිවුනා. ‘මේ ගෞතම ශ්‍රමණයන් වහන්සේ නිදර්ශන ඇතිව, කරුණු සමාදන් කරවමින්, උත්සාහවත් කරවමින්, හිතට ඇතුළු කරවමින් ස්පර්ශ ආයතන හය ගැන කියා දෙනවා නෙව. ඒ භික්‍ෂුනුත් ‘අවබෝධ කරගන්න ඕන’ කියන අදහසින්ම, මුළු හිතම යොමු කරගෙන, සවන් යුග යොමු කරගෙන, දහම් අසමින් ඉන්නවා. මං යන්න ඕන ශ්‍රමණ ගෞතමයන් ළඟට. මේ භික්‍ෂූන්ගේ නුවණැස වනසල දාන්න ඕන කියලා.
ඉතින් පවිටු මාරයා භාග්‍යවතුන් වහන්සේ ළඟට ගියා. ගිහින්, භාග්‍යවතුන් වහන්සේට නුදුරින් මහා භයානක ශබ්දයක් කළා. ඒක නිකන් මහ පොළොව පෙරලීගෙන යනවා වගෙයි.
එතකොට එක්තරා භික්‍ෂුවක් තවත් භික්‍ෂුවකට මෙහෙම කිව්වා. “භික්‍ෂුව, භික්‍ෂුව, මෙන්න! මහ පොළොව පෙරලීගෙන එනවා වගේ.”
එතකොට භාග්‍යවතුන් වහන්සේ ඒ භික්‍ෂුවට මෙහෙම වදාළා. “නෑ, පින්වත් භික්‍ෂුව, ඔය මහ පොළව පෙරලෙනවා නෙවෙයි. ඔය පවිටු මාරයායි. ඔබේ නුවණැස වනසන්නයි ඇවිල්ල තියෙන්නෙ.”
ඉතින් භාග්‍යවතුන් වහන්සේ, ‘මේ ඉන්නෙ පවිටු මාරයා’ කියල හඳුනාගෙන, පවිටු මාරයාට මේ ගාථාවන් වදාළා.
“රූප, ශබ්ද, රස, පහස, අරමුණු, කියන මේවා ඔක්කොම, මේ ලෝකෙ තියෙන දරුණු ආමිසයන්. මුළු ලෝකයාම ඒවාට සම්පූර්ණයෙන්ම අහුවෙලයි ඉන්නෙ.
නමුත් බුදුරජාණන් වහන්සේගේ ශ්‍රාවකයා හොඳ සිහියෙන් ඉඳගෙන, මේ මාර විජිතය ඉක්මවා යනවා. හිරු මඬලක් වගේ බබලනවා.”
එතකොට පවිටු මාරයා …. (පෙ) …. එතනම නොපෙනී ගියා.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_4-2-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M