මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ බරණැස් නුවර ඉසිපතන නම් වූ මිගදායේ. එදා භාග්‍යවතුන් වහන්සේ “පින්වත් මහණෙනි” කියල භික්‍ෂුසංඝයා ඇමතුවා. ඒ භික්‍ෂුන් වහන්සේලාද “පින්වතුන් වහන්ස” කියල භාග්‍යවතුන් වහන්සේට පිළිතුරු දුන්නා. භාග්‍යවතුන් වහන්සේ මෙය වදාළා.
“පින්වත් මහණෙනි, යම් දිව්‍ය බන්ධනත් තියෙනවා. මිනිස් ලොවත් යම් බන්ධන තියෙනවා. මං ඒ සියලු උගුල්වලින් නිදහස් වුනා. පින්වත් මහණෙනි, ඔබත් දෙව්ලොව තියෙන, මිනිස් ලොව තියෙන සෑම උගුලකින්ම නිදහස් වුනා. පින්වත් මහණෙනි, බොහෝ ජනතාවට හිත පිණිස, බොහෝ ජනයාට සැප පිණිස, ලෝකානුකම්පාවෙන්, දෙවිමිනිසුන්ට යහපත පිණිස, හිතසුව පිණිස චාරිකාවේ හැසිරෙන්න. එක මගකින් දෙන්නෙක් වඩින්න එපා. පින්වත් මහණෙනි, ආරම්භයත් සුන්දර වූ, මැදත් සුන්දර වූ, අවසානයත් සුන්දර වූ, අර්ථ සහිත වූ, පැහැදිලි ප්‍රකාශනවලින් යුතු වූ ධර්මය දේශනා කරන්න. මුළුමනින්ම පරිපූර්ණ වූ, පිරිසිදු වූ, නිවන් මඟ කියා දෙන්න. කෙලෙස් අඩු උදවිය ඉන්නවා. ඒ අයට ධර්මය අසන්න නොලැබුනොත්, පිරිහිලා යාවි. ධර්මය අසන්න ලැබුනොත් අවබෝධ කරගනීවි. පින්වත් මහණෙනි, මාත් දහම් දෙසන්න උරුවෙල් ජනපදයේ සේනානි ගමට යනවා.”
එතකොට පවිටු මාරයා භාග්‍යවතුන් වහන්සේ වෙත ආවා. ඇවිදින්, භාග්‍යවතුන් වහන්සේට ගාථාවකින් කිව්වා.
“සෑම උගුලකටම අහු වුනා නේද? දෙව්ලොවත් උගුල් තියෙනවා. මනු ලොවත් උගුල් තියෙනවා. ඒ මහා බන්ධනයට බැඳිල ගියා නේද? ඒයි ශ්‍රමණය, ඔබට මගෙන් නම් නිදහස් වෙන්න බෑ.”
(භාග්‍යවතුන් වහන්සේ) :
“සෑම උගුලකින්ම මං නිදහස් වුනා. දෙව්ලොවත් බන්ධන තියෙනවා. මනුලොවත් බන්ධන තියෙනවා. ඒ මහා බන්ධනවලින් මං නිදහස් වුනා. ඒයි මාරය, මේ කාරණේදී නුඹ පැරදුනා.”
එතකොට පවිටු මාරයා ‘භාග්‍යවතුන් වහන්සේ මාව දැනගත්තා නෙව. සුගතයන් වහන්ස මාව දැනගත්තා නෙව’ කියල දුක් වුනා. නොසතුටු වුනා. එතනම නොපෙනී ගියා.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_4-1-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M