135. සැවැත් නුවර ජේතවනාරාමයේදී ………………..
එකත්පසක සිටි පසේනදී කොසොල් රජතුමා භාග්‍යවතුන් වහන්සේ ගෙන් මෙහෙම ඇහුවා. “ස්වාමීනී, දන් දිය යුත්තෙ කාටද?”
“පින්වත් මහාරාජ, යමෙකු කෙරෙහි හිත පහදිනවා නම්, දන් දිය යුත්තේ ඔහුටයි.”
“ස්වාමීනී, කාට දුන්නු දානෙන්ද මහත්ඵල ලැබෙන්නෙ?”
“පින්වත් මහාරාජ, ‘දානෙ දෙන්නෙ කාටද’ කියන එක, එක ප්‍රශ්නයක්. ‘කාට දුන්නාමද මහත්ඵල ලැබෙන්නෙ’ කියන එක, තව ප්‍රශ්නයක්. පින්වත් මහාරාජ, සීලවන්තයෙකුට දෙන දානයයි මහත්ඵල වෙන්නෙ. දුස්සීලයාට දෙන දානය නම් නෙවෙයි. පින්වත් මහාරාජ, ඔය කාරණය මං ඔබෙන්ම විමසන්නම්. ඔබට වැටහෙන විදිහට උත්තර දෙන්න.
පින්වත් මහාරාජ, මේ ගැන ඔබ මොකක්ද හිතන්නෙ? ඔන්න ඔබට යුද්ධයක් කරන්න සිද්ධ වෙනවා. ඔන්න යුද සෙනඟ රැස් වෙනවා. එතකොට දුනු ශිල්පය පුහුණු නැති, අත්දැකීම් නැති, නුපුරුදු, ශිල්ප දක්වා නැති, බියගුළු වේව්ලන, තැති අරගෙන පලා යන රාජවංශික කුමාරයෙක් ආවොත්, එබඳු පුරුෂයාව ඔබ පෝෂණය කරනවාද? එබඳු කෙනෙකුගෙන් ඔබට ප්‍රයෝජනයක් තියෙනවාද?”
“නෑ. ස්වාමීනී, මං ඒ පුද්ගලයාව පෝෂණය කරන්නෙ නෑ. එබඳු පුද්ගලයෙකුගෙන් මට කිසි ප්‍රයෝජනයක් නෑ.”
“එතකොට දුනු ශිල්පය පුරුදු නැති බ්‍රාහ්මණ වංශික කුමාරයෙක් එනවා …. (පෙ) …. ඒ වගේම දුනු ශිල්පය පුරුදු නැති වෙළඳ කුලේ වංශික කුමාරයෙක් එනවා …. (පෙ) …. දුනු ශිල්පය පුරුදු නැති හීන කුලේ කුමාරයෙක් එනවා …. (පෙ) …. එතකොට ඔබ ඒ පුරුෂයාව ඔබ පෝෂණය කරනවාද? එබඳු කෙනෙකුගෙන් ඔබට ප්‍රයෝජනයක් තියෙනවාද?”
“නෑ. ස්වාමීනී, මං ඒ පුද්ගලයාව පෝෂණය කරන්නෙ නෑ. එබඳු පුද්ගලයෙකුගෙන් මට කිසි ප්‍රයෝජනයක් නෑ.”
පින්වත් මහාරාජ, මේ ගැන ඔබ මොකක්ද හිතන්නෙ? ඔන්න ඔබට යුද්ධයක් කරන්න සිද්ධ වෙනවා. ඔන්න යුද සෙනඟ රැස් වෙනවා. එතකොට දුනු ශිල්පය පුහුණු වුන රාජවංශික කුමාරයෙක් එනවා. ඔහුට අත්දැකීම් තියෙනවා. හොඳ පුරුද්දක් තියෙනවා. ශිල්ප දක්වල තියෙනවා. බියගුළු නෑ. වේව්ලන්නෙ නෑ. තැති අරගෙන්නෙ නෑ. පලා යන්නෙ නෑ. ඔබ ඒ පුරුෂයාව ඔබ පෝෂණය කරනවා ද? එබඳු කෙනෙකුගෙන් ඔබට ප්‍රයෝජනයක් තියෙනවාද?”
“ස්වාමීනී, මං ඒ පුද්ගලයාව පෝෂණය කරනවා. ඒ වගේ පුද්ගලයන් ගෙන් තමයි මට ප්‍රයෝජන වෙන්නෙ.”
“ඒ වගේම දුනු ශිල්පයේ හොඳට පුහුණු වුන බ්‍රාහ්මණ වංශික කුමාරයෙක් ආවොත් …. (පෙ) …. දුනු ශිල්පයේ හොඳට පුහුණු වුන වෙළඳ කුලේ කුමාරයෙක් ආවොත් …. (පෙ) …. දුනු ශිල්පයේ හොඳට පුහුණු වුන හීන කුලේ කුමාරයෙක් ආවොත් …. (පෙ) …. ඔබ ඒ පුද්ගලයාව පෝෂණය කරනවාද? එබඳු කෙනෙකුගෙන් ඔබට ප්‍රයෝජනයක් තියෙනවාද?”
“ස්වාමීනී, මං ඒ පුද්ගලයාව පෝෂණය කරනවා. ඒ වගේ පුද්ගලයන් ගෙන් තමයි මට ප්‍රයෝජන වෙන්නෙ.”
“පින්වත් මහාරාජ, ඔන්න ඔය විදිහමයි, කොයියම්ම කුලේකින් හරි, පින්වත් කෙනෙක් ගිහි ගෙදරින් නික්මිලා මේ ශාසනයේ මහණ වුනොත්, ඒ භික්ෂුව අංග පහකින් තොරව ඉන්නෙ, අංග පහකින් යුතුව නම් ඉන්නෙ, ඒ භික්ෂුවට දෙන දානෙ මහත්ඵල ලබා දෙනවා.
ඒ ප්‍රහාණය වෙලා ගිය අංග පහ මොනවාද? ප්‍රහීණ වුනේ කාමච්ඡන්දයයි. ප්‍රහීණ වුනේ ව්‍යාපාදයයි. ප්‍රහීණ වුනේ ථීනමිද්ධයයි. ප්‍රහීණ වුනේ උද්ධච්ච කුක්කුච්චයයි. ප්‍රහීණ වුනේ විචිකිච්ඡාවයි. මේ අංග පහ තමයි ප්‍රහීණ වෙලා ගියේ.
මොන අංග පහකින්ද සමන්විත වෙලා ඉන්නෙ? අසේඛ (එනම්, රහතන් වහන්සේට කියන නමකි) වූ සීල ස්කන්ධයෙන් සමන්විත වෙයි. අසේඛ වූ සමාධි ස්කන්ධයෙන් සමන්විත වෙයි. අසේඛ වූ ප්‍රඥා ස්කන්ධයෙන් සමන්විත වෙයි. අසේඛ වූ විමුක්ති ස්කන්ධයෙන් සමන්විත වෙයි. අසේඛ වූ විමුක්ති ඤාණදර්ශන ස්කන්ධයෙන් සමන්විත වෙයි. මේ අංග පහෙනුයි සමන්විත වෙන්නෙ. ඔය විදිහට අංග පහක් නැතිවෙලා, අංග පහකින් යුක්ත වෙලා සිටින කෙනෙකුට දෙන දානය මහත්ඵල වෙනවා.”
භාග්‍යවතුන් වහන්සේ මෙය වදාළා. මෙය වදාළ සුගත වූ ශාස්තෘන් වහන්සේ යළිත් මේ ගාථාවන්ද වදාළා.
“යම් තරුණයෙක් තුළ දුනු ශිල්පයේ කුසලතාවත්, කායික මානසික බල වීරියත් දකින්න ලැබෙනවා නම්, යුද්ධයේදී පිහිට පිණිස එබඳු අයවයි රජතුමා පෝෂණය කරන්නෙ. අදක්ෂ කෙනාව උපන් වංශය හේතු කරගෙන පෝෂණය කරන්නෙ නෑ.
ඒ වගේම යම් කෙනෙකු තුළ ඉවසීමත්, කීකරුකමත්, උතුම් නිවනත්, පිහිටලා තියෙනවා නම්, ආර්ය තත්වයට පත් වූ ඒ ප්‍රඥාවන්ත කෙනා හීන කුලයක ඉපදුනත් ගෞරව ලබනවා.
ඔහු උදෙසා සිත්කළු අසපු කරනවා. බහුශ්‍රැතයන් හට නවාතැන් දෙනවා. වතුර නැති වන සෙනසුන්වල පැන් පොකුණු කරවනවා. කඳු ගැටි සමතලා කරල සක්මන් මළු කරනවා.
දන් පැන්ද, කැවිලිද, සිවුරු පිරිකරද, ඉඳුම් හිටුම්ද, ඒ රහතුන් කෙරෙහි චිත්ත ප්‍රසාදයෙන් පූජා කරනවා.
විදුලි එළි විහිදෙන සිය ගණන් වළාකුළු ඇති වැස්ස ගුගුරා ඇද හැලෙන්නෙ පොළොව තෙමාගෙන. වළ ගොඩැලි පුරවනවා වගෙයි.
ඒ වගේමයි ශ්‍රද්ධාවන්ත, ශ්‍රැතවත් ආර්ය ශ්‍රාවකයා ඤාණවන්තයි. ඔහු භෝජන පිළියෙල කරල ඒ ආහාරපානවලින් ඉල්ලාගෙන එන අය සතුටු කරවනවා. සතුටු වෙවී දානෙ දෙන්නෙ විසුරෝනවා වගෙයි. හැමෝටම ‘දන් දෙන්න, දන් දෙන්න’ කියල කියනවා.
වැස්ස වහිනකොට අහස ගුගුරනවා වගෙයි දානය සඳහා ඔහුගේ හඬ නැගීම. ඒ පුණ්‍ය ධාරාව දන් දෙන කෙනාව හොඳ හැටියට තෙමාගෙන යනවා.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_3-3-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M