133. සැවැත් නුවර ජේතවනාරාමයේදී ………………..
එදා පසේනදී කොසොල් රජතුමා මහ දවාලෙ භාග්‍යවතුන් වහන්සේව බැහැදකින්න ආවා. ඇවිදින් භාග්‍යවතුන් වහන්සේට වන්දනා කළා. පැත්තකින් වාඩිවුනා. පැත්තකින් වාඩිවුන පසේනදී කොසොල් රජතුමාගෙන් භාග්‍යවතුන් වහන්සේ මෙහෙම ඇහුවා.
“පින්වත් මහාරාජ, මේ මහා දවාලෙ ඔබ කොහේ ඉඳන් එන ගමන්ද?”
“ස්වාමීනී, මගේ ආච්චි අම්මා කළුරිය කළා. ඈ ගොඩක් වයසයි. මහළුයි. පිළිවෙලින් අන්තිම වයසටත් ආවා. උපතින් අවුරුදු එකසිය විස්සක් හිටියා. ස්වාමීනී, ඔය ආච්චි අම්මා මට හරිම ප්‍රියමනාපයි. ඉතින් ස්වාමීනී, මගේ ආච්චි අම්මා කළුරිය කරන්න එපා කියල වටිනා හස්තියෙකුට ගනුදෙනු කරන්න පුළුවන් නම්, මං වටිනා හස්තියෙක් වුනත් දෙන්න කැමතියි. ඒ වගේම ස්වාමීනී, ඔය මගේ ආච්චි අම්මා කළුරිය කරන්න එපා කියල වටිනා අශ්වයෙක් එක්ක ගනුදෙනු කරන්න පුළුවන් නම්, මං වටිනා අශ්වයෙක් වුනත් දෙන්න කැමතියි. ඒ වගේම ස්වාමීනී, ඔය මගේ ආච්චි අම්මා කළුරිය කරන්න එපා කියල වටිනා ගම්වරයක් එක්ක ගනුදෙනු කරන්න පුළුවන් නම්, මං වටිනා ගම්වරයක් වුනත් දෙන්න කැමතියි. ඒ වගේම ස්වාමීනී, ඔය මගේ ආච්චි අම්මා කළුරිය කරන්න එපා කියල වටිනා ජනපදයක් එක්ක ගනුදෙනු කරන්න පුළුවන් නම්, මං ජනපදයක් වුනත් දෙන්න කැමතියි.”
“පින්වත් මහාරාජ, හැම සත්වයෙක්ම මරණය උරුම කරගෙනයි ඉන්නෙ. මරණයෙන් අවසන් වෙනවා. මරණය ඉක්මවා ගිහිල්ලා නෑ.”
“ස්වාමීනී, ආශ්චර්යයයි! ස්වාමීනී, අද්භූතයි! ස්වාමීනී, ඒක කොයිතරම් ඇත්තක්ද. දැන් භාග්‍යවතුන් වහන්සේ වදාළේ ‘හැම සත්වයෙක්ම මරණය උරුම කරගෙනයි ඉන්නෙ. මරණයෙන් අවසන් වෙනවා. මරණය ඉක්මවා ගිහිල්ලා නෑ’ කියලා.”
“පින්වත් මහාරාජ, ඒක එහෙමම තමයි. පින්වත් මහාරාජ, ඒක එහෙමම තමයි. පින්වත් මහාරාජ, හැම සත්වයෙක්ම මරණය උරුම කරගෙනයි ඉන්නෙ. මරණයෙන් අවසන් වෙනවා. මරණය ඉක්මවා ගිහිල්ලා නෑ. පින්වත් මහාරාජ, ඒක මේ වගේ දෙයක්. පුච්චපු මැටි භාජනත් තියෙනවා. අමු මැටි භාජනත් තියෙනවා. ඒ හැම මැටි භාජනයක්ම බිඳීම උරුම කරගෙන තියෙන්නෙ. බිඳීමෙන් අවසන් වෙන, බිඳෙන ස්වභාවය ඉක්මවා ගිහිල්ලා නෑ. පින්වත් මහාරාජ, ඒ විදිහම තමයි. හැම සත්වයෙක්ම මරණය උරුම කරගෙනයි ඉන්නෙ. මරණයෙන් අවසන් වෙනවා. මරණය ඉක්මවා ගිහිල්ලා නෑ.
හැම සත්වයෙක්ම මැරිල යනවා. ජීවිතේ කෙළවර මරණයයි. පින් පව්වල විපාක අරගෙන, කර්මානුරූපව ගමනෙ යනවා. පව් කළ උදවිය නිරයේ යනවා. පින් කළ උදවිය සුගතියේ යනවා.
ඒ නිසා පරලොව යහපත ලැබෙනතුරු හොඳ දේවල්මයි කරන්න ඕන. පරලොව යන සත්වයන්ට පිහිට වෙන්නෙ පින විතරයි.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_3-3-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M