129. සැවැත් නුවර ජේතවනාරාමයේදී ………………..
එකත්පසක හිටි පසේනදී කොසොල් රජතුමා භාග්‍යවතුන් වහන්සේට මෙහෙම කිව්වා.
ස්වාමීනී, මං හුදෙකලාවෙ තනියම ඉන්න කොට මෙන්න මේ විදිහේ කල්පනාවක් සිතේ ඇතිවුනා. “භාග්‍යවතුන් වහන්සේත් ඉතා යහපත් ලෙස ශ්‍රී සද්ධර්මය දේශනා කරලයි තියෙන්නෙ. ඒ ශ්‍රී සද්ධර්මය තියෙන්නෙ කල්‍යාණ මිත්‍රයන් ඇති කෙනාටයි. කල්‍යාණ යහළුවන් ඇති කෙනාටයි. කල්‍යාණ මිත්‍ර ආශ්‍රයට වැටුණු කෙනාටයි. පාප මිත්‍රයන් ඇති කෙනාට නොවෙයි. පාපී යහළුවන් ඇති කෙනාට නොවෙයි. පවිටු මිතුරන්ගේ ඇසුරට වැටුනු කෙනාට නොවෙයි.”
“පින්වත් මහාරාජ, ඒක එහෙමම තමයි. පින්වත් මහාරාජ, ඒක එහෙමම තමයි. පින්වත් මහාරාජ, මා විසින් ඉතා යහපත් ලෙස ශ්‍රී සද්ධර්මය දේශනා කරලයි තියෙන්නෙ. ඒ ශ්‍රී සද්ධර්මය තියෙන්නෙ කල්‍යාණ මිත්‍රයන් ඇති කෙනාටයි. කල්‍යාණ යහළුවන් ඇති කෙනාටයි. කල්‍යාණ මිත්‍ර ආශ්‍රයට වැටුණු කෙනාටයි. පාප මිත්‍රයන් ඇති කෙනාට නොවෙයි. පාපී යහළුවන් ඇති කෙනාට නොවෙයි. පවිටු මිතුරන්ගේ ඇසුරට වැටුනු කෙනාට නොවෙයි.
පින්වත් මහාරාජ, මං එක් කාලෙක ශාක්‍ය ජනපදයේ ශාක්‍යයන්ගේ ‘නගරක’ කියන කුඩා නගරයේ වාසය කළේ. පින්වත් මහාරාජ, එදා පින්වත් ආනන්ද භික්ෂුව මං හමුවට ආවා. ඇවිදින් මට වන්දනා කරලා පැත්තකින් වාඩිවුනා. පින්වත් මහාරාජ, පැත්තකින් වාඩිවුන පින්වත් ආනන්ද භික්ෂුව මට මෙහෙම කිව්වා. ‘ස්වාමීනී, මේ නිවන් මාර්ගයේ හරියටම භාගයක් පවතින්නෙ කල්‍යාණ මිත්‍රත්වය මතයි. කල්‍යාණ යහළුවන් මතයි. කලණ මිතුරන්ගේ ඇසුර මතයි’ කියලා. එතකොට පින්වත් මහාරාජ, මං පින්වත් ආනන්ද භික්ෂුවට මෙහෙම කිව්වා. ‘පින්වත් ආනන්ද, එහෙම කියන්න එපා! පින්වත් ආනන්ද, එහෙම කියන්න එපා! පින්වත් ආනන්ද, මේ නිවන් මඟ සම්පූර්ණයෙන්ම පවතින්නෙ කල්‍යාණ මිත්‍රත්වය මතයි. කල්‍යාණ යහළුවන් මතයි. කලණ මිතුරන්ගේ ඇසුර මතයි. පින්වත් ආනන්ද, කල්‍යාණ මිත්‍රත්වය ඇති, කල්‍යාණ යහළුවන් ඉන්න, කලණ මිතුරන්ගේ ඇසුරට යොමු වුණ භික්ෂුව තුළ ‘ආර්ය අෂ්ටාංගික මාර්ගය වඩනවා. ආර්ය අෂ්ටාංගික මාර්ගය බහුල වශයෙන් දියුණු කරනවා’ යන කරුණ කැමති වෙන්න ඕන.
පින්වත් ආනන්ද, කල්‍යාණ මිත්‍රයන් ඉන්න, කල්‍යාණ යහළුවන් ඉන්න, කලණ මිතුරන්ගේ ඇසුරට යොමු වූ භික්ෂුව ආර්ය අෂ්ටාංගික මාර්ගය වඩන්නෙ කොහොමද? ආර්ය අෂ්ටාංගික මාර්ගය බහුල වශයෙන් දියුණු කරන්නෙ කොහොමද? පින්වත් ආනන්ද, මෙහි භික්ෂුව චිත්ත විවේකයෙන් යුතු, විරාගයෙන් යුතු, තණ්හා නිරෝධයට යොමු වූ, නිවනට නැඹුරු වූ සම්මා දිට්ඨිය වඩනවා …. (පෙ) …. සම්මා සංකල්පය වඩනවා …. (පෙ) …. සම්මා වාචා වඩනවා …. (පෙ) …. සම්මා කම්මන්තය වඩනවා …. (පෙ) …. සම්මා ආජීවය වඩනවා …. (පෙ) …. සම්මා වායාමය වඩනවා …. (පෙ) …. සම්මා සතිය වඩනවා …. (පෙ) …. චිත්ත විවේකයෙන් යුතු, විරාගයෙන් යුතු, තණ්හා නිරෝධයට යොමු වූ, නිවනට නැඹුරු වූ සම්මා සමාධිය වඩනවා. පින්වත් ආනන්ද, කල්‍යාණ මිත්‍රයන් ඇති, කල්‍යාණ යහළුවන් ඇති, කලණ මිතුරන්ගේ ඇසුරට නැඹුරු වූ භික්ෂුව ඔය විදිහටයි ආර්ය අෂ්ටාංගික මාර්ගය වඩන්නෙ. ඔය විදිහටයි ආර්ය අෂ්ටාංගික මාර්ගය බහුල වශයෙන් දියුණු කරන්නෙ.
පින්වත් ආනන්ද, මේ කල්‍යාණ මිත්‍රයන් ඇති බව, කල්‍යාණ යහළුවන් ඇති බව, කලණ මිතුරන්ගේ ඇසුරට නැඹුරු වූ බව මුළු මහත් නිවන් මගටම උපකාර වන බව මේ ක්‍රමයෙනුත් දැනගන්න.
පින්වත් ආනන්ද, කල්‍යාණ මිත්‍ර වූ මා ළඟට පැමිණෙන ඉපදීම ස්වභාව කොට ඇති සත්වයෝ ඉපදීමෙන් නිදහස් වෙනවා. ජරාව ස්වභාව කොට ඇති සත්වයෝ ජරාවෙන් නිදහස් වෙනවා. ලෙඩ වීම ස්වභාව කොට ඇති සත්වයෝ ලෙඩ වීමෙන් නිදහස් වෙනවා. මරණය ස්වභාව කොට ඇති සත්වයෝ මරණයෙන් නිදහස් වෙනවා. ශෝක, වැළපීම්, දුක් දොම්නස්, සුසුම් හෙලීම් ස්වභාව කොට ඇති සත්වයෝ ශෝක, වැළපීම්, දුක් දොම්නස්, සුසුම් හෙලීම්වලින් නිදහස් වෙනවා.
පින්වත් ආනන්ද, ඔන්න ඔය විදිහටමයි තේරුම් ගන්න තියෙන්නේ. මේ සම්පූර්ණ නිවන් මඟ පවතින්නේ කල්‍යාණ මිත්‍රයන් මත බව. කල්‍යාණ යහළුවන් මත බව. කල්‍යාණ යහළුවන්ගේ ඇසුර මත බව.
අන්න ඒ නිසා පින්වත් මහාරාජ, හික්මෙන්නට තියෙන්නෙ මේ විදිහටයි. ‘මං කල්‍යාණ මිත්‍රයන් ඇති කෙනෙක් වෙනවා. කල්‍යාණ යහළුවන් ඇති කෙනෙක් වෙනවා. කලණ මිතුරන් ඇසුරට නැඹුරු වුන කෙනෙක් වෙනවා’ කියලයි. පින්වත් මහාරාජ, ඔබ විසින් හික්මෙන්නට ඕනෙත් මේ විදිහටමයි. පින්වත් මහාරාජ, කල්‍යාණ මිත්‍රයන් ඇතුව, කල්‍යාණ යහළුවන් ඇතුව, කලණ මිතුරන් ඇසුරට නැඹුරු වෙලා ඉන්න කොට ඔබත් මේ එකම එක ධර්මය ඇසුරු කරගෙන ඉන්න ඕන. ඒක තමයි කුසල් දහම්වල අප්‍රමාදී වීම.
පින්වත් මහාරාජ, අප්‍රමාදී වෙලා, අප්‍රමාදී බවම ඇසුරු කරගෙන ඉන්න කොට ඔබේ අන්තඃපුර ස්ත්‍රීන්ටත් මෙහෙම හිතේවි. ‘දැන් රජ්ජුරුවො ඉන්නෙත් අප්‍රමාදීව, අප්‍රමාදය ඇසුරු කරගෙනයි. ඉතින් අපිත් අප්‍රමාදීව අප්‍රමාදය ඇසුරු කරගෙන ඉමු’ කියලා.
පින්වත් මහාරාජ, අප්‍රමාදී වෙලා, අප්‍රමාදී බවම ඇසුරු කරගෙන ඉන්න කොට ඔබට උදව් කරන රාජකීය පිරිසටත් මෙහෙම හිතේවි. ‘දැන් රජ්ජුරුවො ඉන්නෙත් අප්‍රමාදීව, අප්‍රමාදය ඇසුරු කරගෙනයි. ඉතින් අපිත් අප්‍රමාදීව අප්‍රමාදය ඇසුරු කරගෙන ඉමු’ කියලා.
පින්වත් මහාරාජ, අප්‍රමාදී වෙලා, අප්‍රමාදී බවම ඇසුරු කරගෙන ඉන්න කොට ඔබේ හමුදාවටත් මෙහෙම හිතේවි. ‘දැන් රජ්ජුරුවො ඉන්නෙත් අප්‍රමාදීව, අප්‍රමාදය ඇසුරු කරගෙනයි. ඉතින් අපිත් අප්‍රමාදීව අප්‍රමාදය ඇසුරු කරගෙන ඉමු’ කියලා.
පින්වත් මහාරාජ, අප්‍රමාදී වෙලා, අප්‍රමාදී බවම ඇසුරු කරගෙන ඉන්න කොට ඔබේ කුඩා නගරවල, ජනපදවල වැසියන්ටත් මෙහෙම හිතේවි. ‘දැන් රජ්ජුරුවො ඉන්නෙත් අප්‍රමාදීව, අප්‍රමාදය ඇසුරු කරගෙනයි. ඉතින් අපිත් අප්‍රමාදීව අප්‍රමාදය ඇසුරු කරගෙන ඉමු’ කියලා.
පින්වත් මහාරාජ, අප්‍රමාදී වෙලා, අප්‍රමාදී බවම ඇසුරු කරගෙන ඉන්න කොට ඔබ විසින් තමාවත් හොඳින් රැකගත්තා, ආරක්ෂා කරගත්තා වෙනවා. අන්තඃපුරයත් හොඳින් රැකගත්තා, ආරක්ෂා කරගත්තා වෙනවා. ධාන්‍ය ගබඩා, අටු කොටු ආදියත් හොඳින් රැකගත්තා, ආරක්ෂා කරගත්තා වෙනවා.
උදාර වූ නොයෙක් භෝග සම්පත් කැමති කෙනා අප්‍රමාදී වෙන්න ඕන. පුණ්‍ය ක්‍රියාවල අප්‍රමාදී වීම නුවණැත්තන් විසින් ප්‍රශංසා කරනවා.
අප්‍රමාදී වූ නුවණැත්තා මෙලොව යම් යහපතක් ඇත්නම් එයත්, පරලොව යම් යහපතක් ඇත්නම් එයත් කියන, දොලොවේම යහපත ලබාගන්නවා නම් තමන්ගේ යහපත ඇති කරගන්නා ඒ වීරියවන්ත කෙනාටයි නුවණැත්තා කියන්නෙ.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_3-2-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M