සැවැත් නුවර ජේතවනාරාමයේදී ………………..
ඒ දවස් වෙනකොට වේදේහි පුත්‍ර වූ අජාසත් මගධ රජු චතුරංගනී (ඇත්, අස්, රිය, පාබල) සේනාව සන්නද්ධ කරගෙන, පසේනදී කොසොල් රජ්ජුරුවන්ට එරෙහි වෙලා කාසි ගම කරා ඉදිරියට ආවා.
පසේනදී කොසොල් රජතුමාට මේ කාරණය අසන්න ලැබුනා. වේදේහි පුත්‍ර වූ අජාසත් මගධ රජතුමා, චතුරංගනී සේනාව සන්නද්ධ කරගෙන, තමන්ට විරුද්ධව යුද වදින්නට කාසි ගමට පැමිණියා කියලා. එතකොට පසේනදී කොසොල් රජ්ජුරුවොත් වේදේහි පුත්‍ර අජාසත් මගධ රජුට විරුද්ධව චතුරංගනී සේනාව සන්නද්ධ කරගෙන, කාසි ගමට පිටත් වුනා.
ඊට පස්සෙ වේදේහි පුත්‍ර අජාසත් මගධ රජුත්, පසේනදී කොසොල් රජුත් යුද්ධ කළා. ඒ යුද්දෙදි වේදේහි පුත්‍ර අජාසත් මගධ රජු, පසේනදී කොසොල් රජුව පරාජය කළා. පැරදුණු පසේනදී කොසොල් රජතුමා තමන්ගේ රාජධානිය වන සැවැත් නුවරට හැරිලා ආවා.
එදා බොහෝ භික්ෂූන් වහන්සේලා සිවුරු පොරෝගෙන, පාත්‍ර සිවුරු අරගෙන පැවැත් නුවරට පිණ්ඩපාතෙ වැඩියා. සැවැත් නුවර පිණ්ඩපාතෙ කරගෙන, දානෙ වළඳලා, භාග්‍යවතුන් වහන්සේව බැහැදකින්නට ගියා. ගිහින් භාග්‍යවතුන් වහන්සේට වන්දනා කළා. පැත්තකින් වාඩිවුනා. පැත්තකින් වාඩිවුන ඒ භික්ෂූන් වහන්සේලා භාග්‍යවතුන් වහන්සේට මෙහෙම කිව්වා.
“ස්වාමීනී, වේදේහි පුත්‍ර වූ අජාසත් මගධ රජු චතුරංගනී සේනාව සන්නද්ධ කරගෙන, පසේනදී කොසොල් රජ්ජුරුවන්ට විරුද්ධව යුද වදින්න කාසි ගමට පිටත් වෙලා. ඉතින් ස්වාමීනී, පසේනදී කොසොල් රජතුමාට මේ කාරණය ආරංචි වුනා. ‘වේදේහි පුත්‍ර වූ අජාසත් මගධ රජතුමා, චතුරංගනී සේනාව සන්නද්ධ කරගෙන, තමන්ට විරුද්ධව යුද වදින්නට කාසි පිටත් වුනා’ කියලා. ඉතින් ස්වාමීනී, පසේනදී කොසොල් රජ්ජුරුවොත් වේදේහි පුත්‍ර අජාසත් මගධ රජුට විරුද්ධව චතුරංගනී සේනාව සන්නද්ධ කරගෙන, කාසි ගමට පිටත් වුනා. ඉතින් ස්වාමීනී, වේදේහි පුත්‍ර අජාසත් මගධ රජුත්, පසේනදී කොසොල් රජුත් යුද්ධ කළා. ඒ යුද්දෙදි වේදේහි පුත්‍ර අජාසත් මගධ රජු, පසේනදී කොසොල් රජුව පරාජය කළා. පැරදුණු පසේනදී කොසොල් රජතුමා තමන්ගේ රාජධානිය වන සැවැත් නුවරටම ආපහු ආවා.”
“පින්වත් මහණෙනි, ඔය වේදේහි පුත්‍ර අජාසත් මගධ රජ්ජුරුවො පාප මිත්‍රයන් ඇති කෙනෙක්. පාපී යහළුවන් ඇති කෙනෙක්. පවිටු පුද්ගලයන්ගේ ආශ්‍රයට වැටුණු කෙනෙක්. පින්වත් මහණෙනි, නමුත් පසේනදී කොසොල් රජ්ජුරුවො කල්‍යාණ මිතුරන් ඇති කෙනෙක්. කල්‍යාණ යහළුවන් ඇති කෙනෙක්. යහපත් පුද්ගලයන්ගේ ඇසුරට වැටුණු කෙනෙක්. පින්වත් මහණෙනි, පරාජිත වූ පසේනදී කොසොල් රජතුමා අද මේ රාත්‍රියේ දුකින් තමයි නිදාගන්නෙ.
ජයගැනීම තුළින් බිහිවන්නේ තරහකාරයන් පිරිසකි. පැරදුන කෙනා දුක සේ තමයි නිදන්නෙ. නමුත් උපශාන්ත කෙනා ඔය ජය පරාජය දෙකම අත්හැරල සැපසේ වාසය කරනවා.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_3-2-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M