සැවැත් නුවර ජේතවනාරාමයේදී …………………….
ඒ දවස්වල පසේනදී කොසොල් රජ්ජුරුවන්ගේ මහා යාගයක් පටන් අරන් තිබුනා. ඒ යාගෙට ලොකු ගොන්නු පන්සීයක්, නාම්බො පන්සීයක්, නෑම්බියො පන්සීයක්, එළුවො පන්සීයක්, බැටළුවො පන්සීයක් කණුවල ගැට ගහලා තිබුනා, යාගයට ගන්න කියල.
ඔහුගේ දාසයො හරි, දූතයො හරි, කම්කරුවො හරි හිටියා නම්, ඒ උදවියත් දඬුවම්වලට භයේ තැති අරගෙන, කඳුළු පිරුණ මුහුණින්, අඬ අඬා එතන වැඩ කළා.
එදා බොහෝ භික්‍ෂුන් වහන්සේලා උදේ වරුවේ සිවුරු පොරෝගෙන, පාත්‍ර සිවුරු අරගෙන, සැවැත් නුවරට පිණ්ඩපාතෙ වැඩියා. සැවැත් නුවර පිණ්ඩපාතෙ කරගෙන හවස් වරුවෙ භාග්‍යවතුන් වහන්සේව බැහැදකින්න ගියා. ගිහින් භාග්‍යවතුන් වහන්සේට වන්දනා කළා. පැත්තකින් වාඩිවුනා. පැත්තකින් වාඩිවුන ඒ භික්‍ෂුන් වහන්සේලා භාග්‍යවතුන් වහන්සේට මෙහෙම කිව්වා.
“ස්වාමීනි, මේ දවස්වල පසේනදී කොසොල් රජ්ජුරුවන්ගේ මහා යාගයක් පටන් අරන්. ලොකු ගොන්නු පන්සීයක්, නාම්බො පන්සීයක්, නෑම්බියො පන්සීයක්, එළුවො පන්සීයක්, බැටළුවො පන්සීයක් කණුවල ගැට ගහලා ඉන්නවා යාගයට ගන්න කියලා. ඒ වගේම ස්වාමීනි, ඔහුගේ දාසයො, දූතයො, කම්කරුවො හැටියට ඉන්න අය පවා දඬුවම්වලට තැති අරගෙන භයෙන් තැති අරගෙන, කඳුළු පිරුණු මුහුණින් තමයි අඬ අඬා ඒවා කරන්නෙ.”
එතකොට භාග්‍යවතුන් වහන්සේ ඒ කරුණ දැනගෙන ඒ වෙලාවෙ මේ ගාථාවන් වදාළා.
“අස්සමේධ, පුරිසමේධ, සම්මාපාස, වාජපෙය්ය, නිරග්ගල කියල මහා විශාලෙට කරන මහා යාග තියෙනවා. ඔය යාගවලින් කිසි ප්‍රයෝජනයක් නෑ.
එළුබැටළුවො මරන, ගවයන් මරන, ඔය යාගවලට යහපත් මාර්ගයේ ගමන් කරන බුද්ධාදී ඉසිවරයන් වහන්සේලා වඩින්නෙ නෑ.
ඔය මහ ලොකුවට නැතුවට, ගෙයක් පාසා හැම තිස්සෙම පුංචියට යාග කෙරෙනවා. ඒ යාගවල එළු බැටළුවො මරන්නෙත් නෑ. ගවයන් මරන්නෙත් නෑ.
ඒ යාගවලට යහපත් මාර්ගයේ ගමන් කරන බුද්ධාදී ඉසිවරයන් වහන්සේල වඩිනවා. නුවණැති උදවිය කළ යුත්තෙ අන්න ඒ වගේ යාග තමයි. ඒ යාගවල ගොඩාක් ප්‍රතිඵල තියෙනවා.
එබඳු යාග කරන උදවිය දියුණු වෙනවා. පිරිහෙන්නෙ නෑ. ඒ යාගය ලොකු දෙයක්. දෙවියන් පවා පහදිනවා.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_3-1-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M