සැවැත් නුවර ජේතවනාරාමයේදී …………………….
එකත්පසක සිටි සේරී දිව්‍යපුත්‍රයා භාග්‍යවතුන් වහන්සේට ගාථාවකින් පැවසුවා.
“දෙවියොත්, මනුෂ්‍යයොත් කියන දෙපිරිසම ආහාරය ම යි පතන්නෙ. යමෙක් ඒ ආහාර සතුටින් පිළිගන්නෙ නැත්නම්, එයා කොයි විදිහේ කෙනෙක්ද?”
(භාග්‍යවතුන් වහන්සේ) :
“යම් කෙනෙක් ශ්‍රද්ධාවෙන්, පහන් සිතින් ආහාරපාන දන් දුන්නොත් මෙලොව පරලොව දෙකේම ඒ පුද්ගලයාට ආහාරපාන ලැබෙනවා.
ඒ නිසා මසුරුමළ යටපත් කරගෙන, මසුරුකම දුරු කරගෙන, දන් දෙන්න ඕන. මේ සත්වයන්ට පරලොව පිහිට පිණිස පවතින්නෙ පින විතරයි.”
“ස්වාමීනී, ආශ්චර්යයයි! ස්වාමීනී පුදුම සහගතයි! භාග්‍යවතුන් වහන්සේ වදාළෙ කොයිතරම් සත්‍ය වූ දෙයක්ද?”
“යම් කෙනෙක් ශ්‍රද්ධාවෙන්, පහන් සිතින් ආහාරපාන දන් දුන්නොත්, මෙලොව පරලොව, දෙකේම ඒ පුද්ගලයාට ආහාරපාන ලැබෙනවා.
ඒ නිසා මසුරුමල යටපත් කරගෙන, මසුරුකම දුරු කරගෙන දන් දෙන්න ඕන. මේ සත්වයන්ට පරලොව පිහිට පිණිස පවතින්නෙ පින විතරයි” කියලා.
ස්වාමීනී, මේක ඉස්සර වෙච්ච දෙයක්. සේරී කියල රජෙක් හිටියා. එයා දන් දෙන කෙනෙක්. දානපති කෙනෙක්. දන් දීම වර්ණනා කරන කෙනෙක්. ඉතින් ස්වාමීනී, ඒ මගේ නුවර දොරටු හතරෙම ශ්‍රමණබ්‍රාහ්මණයින්ටත්, දුගී මගී යාචකාදීන්ටත් දන් දුන්නා. ස්වාමීනී, එතකොට අන්තඃපුරවාසීන් මං ළඟට ඇවිදින් මෙහෙම කිව්වා. ‘දේවයන් වහන්සේ විතරමයි දන් දෙන්නෙ. අපි දන් දෙන්නෙ නෑ නෙව. ඒ නිසා අපිත් දේවයන් වහන්සේ නිසා දන් දෙනවා නම් පින් කරගන්නවා නම් කොයිතරම් දෙයක්ද’ කියලා.
ස්වාමීනි, මට එතකොට මෙහෙම හිතුනා. ‘මම දන් දෙන කෙනෙක්. දානපති කෙනෙක්. දන් දීම ගැන වර්ණනා කරන කෙනෙක්. ඉතින් අනිත් උදවියත් දන් දෙන්න ඕන කියල කියනවා නම්, මං ඒ ගැන මොනවා කියන්නද?’ ඉතින් ස්වාමීනි, මං පළවෙනි දොරටුව අන්තඃපුරයට භාර දුන්නා. ඊට පස්සෙ අන්තඃපුරයේ උදවිය තමයි දන් දුන්නෙ. මගේ දානෙ වැළකුනා.
එතකොට ස්වාමීනී, මට උදව් කරන රාජකීය පිරිස මං ළඟට ආවා. ඇවිල්ලා මට මෙහෙම කිව්වා. ‘දේවයන් වහන්සේගේ දානය නම් දෙනවා. අන්තඃපුරවාසීනුත් දන් දෙනවා. අපිට තමයි දන් ටිකක් දෙන්න නැත්තෙ. අපිත් දේවයන් වහන්සේ නිසා දන් දෙනවා නම්, පින් කරනවා නම්, කොයිතරම් දෙයක්ද?’ කියලා.
ඉතින් ස්වාමීනී, මට මෙහෙම හිතුනා. ‘මං දන් දෙන කෙනෙක්. දානපති කෙනෙක්. දන් දීම ගැන වර්ණනා කරන කෙනෙක්. අනිත් උදවියත් දන් දෙන්න ඕන කියනවා නම්, මං ඒ ගැන මොනවා කියන්නද?’ ඉතින් ස්වාමීනි, මං දෙවෙනි දොරටුව මට උදව් කරන රාජකීය පිරිස වෙනුවෙන් වෙන් කළා. ඊට පස්සෙ ඒ පැත්තෙ දන් දෙන්නෙ ඒ රාජකීය පිරිස තමයි. මගේ දානෙ වැළකුනා.
එතකොට ස්වාමීනී, පාබල හමුදාව මං ළඟට ඇවිදින් මෙහෙම කිව්වා. ‘දේවයන් වහන්සේත් දන් දෙනවා. අන්තඃපුරවාසීනුත් දන් දෙනවා. රාජකීය පිරිසේ දානයත් දෙනවා. අපට තමයි දන් ටිකක් දීගන්න නැත්තෙ. අපිත් දේවයන් වහන්සේ නිසා දන් දෙනවා නම්, පින් කරගන්නවා නම්, කොයිතරම් දෙයක්ද’ කියලා.
ඉතින් ස්වාමීනී, මට මෙහෙම හිතුනා. ‘මම දන් දෙන කෙනෙක්. දානපති කෙනෙක්. දන් දීම ගැන වර්ණනා කරන කෙනෙක්. අනිත් උදවියත් දන් දෙන්න ඕන කියනවා නම්, මං ඒ ගැන මොනවා කියන්නද?’ ඉතින් ස්වාමීනි, මං පාබල හමුදාවට තුන් වෙනි දොරටුව වෙන් කළා. එතන තමයි හමුදාව දන් දෙන්නෙ. මගේ දානෙ වැළකුනා.
එතකොට ස්වාමීනී, බ්‍රාහ්මණ ගෘහපතිවරු මං ළඟට ඇවිදින් මෙහෙම කිව්වා. ‘දේවයන් වහන්සේගේ දානයත් දෙනවා. අන්තඃපුරවාසීන්ගේ දානයත් දෙනවා. රාජකීය පිරිසගේ දානයත් දෙනවා. රාජකීය හමුදාවේ දානයත් දෙනවා. අපට තමයි දානෙ ටිකක් දෙන්න නැත්තෙ. අපිත් දේවයන් වහන්සේ නිසා දන් දෙනවා නම්, පිං කරගන්නවා නම්, කොයිතරම් දෙයක්ද’ කියලා.
එතකොට ස්වාමීනී, මට මෙහෙම හිතුනා. ‘මම දන් දෙන කෙනෙක්. දානපති කෙනෙක්. දන් දීම ගැන වර්ණනා කරන කෙනෙක්. අනෙත් උදවියත් දන් දෙන්න ඕන කියල කියනවා නම්, මට ඒ ගැන මොනවා කියන්නද?’ ඉතින් ස්වාමීනි, මං හතරවෙනි දොරටුව බ්‍රාහ්මණ ගෘහපතිවරුන්ට වෙන් කළා. දැන් බ්‍රාහ්මණ ගෘහපතිවරු තමයි ඒ දොරටුවෙ දන් දෙන්නෙ. මගේ දානෙ වැළකුනා.
එතකොට ස්වාමීනි, රාජ පුරුෂයෝ මං ළඟට ඇවිදින් මෙහෙම කිව්වා. ‘දැන් දේවයන් වහන්සේගේ දානයක් කොහේවත් දෙන්නෙ නෑ’ කියලා. එතකොට ස්වාමීනී, මං ඔවුන්ට මෙහෙම කිව්වා. ‘මිත්‍රවරුනි, එහෙම නම් පිට පළාත්වල යම් ආදායමක් තියෙනවා නම්, ඒකෙන් බාගයක් අන්තඃපුරයට දෙන්න ඕන. ඉතුරු බාගෙ ශ්‍රමණ බ්‍රාහ්මණයින්ට, දුගී මගී යාචකයන්ට දානයට දෙන්න ඕන’ කියලා.
ඉතින් ස්වාමීනී, ඔය විදිහට මං බොහෝ කාලයක් මුළුල්ලේ පින්දහම් කළා. මං ඔය විදිහට බොහෝ කාලයක් මුළුල්ලේ කුසල්දහම් කළා. ඒ පුණ්‍ය විපාකය මෙච්චරයි කියල හරි, මෙච්චර විපාක තියෙනවා කියල හරි, මෙපමණ කලක් ස්වර්ගයේ ඉන්න ඕන කියල හරි, කෙළවරක් ගැන මං දන්නෙ නෑ.
ස්වාමීනී, ආශ්චර්යයයි! ස්වාමීනී පුදුම සහගතයි! ස්වාමීනී, භාග්‍යවතුන් වහන්සේ විසින් වදාළේ සම්පූර්ණ ඇත්තක්මයි.
‘යම් කෙනෙක් ශ්‍රද්ධාවෙන්, පහන් සිතින් ආහාරපාන දන් දුන්නොත්, මෙලොව පරලොව දෙකේම ඒ පුද්ගලයට ආහාරපාන ලැබෙනවා. ඒ නිසා මසුරුමල යටපත් කරගෙන, මසුරුකම දුරු කරගෙන, දන් දෙන්න ඕන. මේ සත්වයන්ට පරලොව පිහිට පිණිස පවතින්නෙ පින විතරයි’ කියලා.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_2-3-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M