සැවැත් නුවර ජේතවනාරාමයේදී …………………….
පැරණි තවුසෙක් වූ ඒ තායන දිව්‍යපුත්‍රයා එදා රැය පහන් වන වෙලාවේ, මුළු මහත් ජේතවනයම බබුලුවාගෙන, භාග්‍යවතුන් වහන්සේ ළඟට ආවා. ඇවිදින් භාග්‍යවතුන් වහන්සේට වන්දනා කළා. පැත්තකින් හිටගත්තා. පැත්තකින් හිටගත්තු තායන දිව්‍යපුත්‍රයා භාග්‍යවතුන් වහන්සේ ළඟ මේ ගාථාවන් පැවසුවා.
“පින්වත් බ්‍රාහ්මණය, තෘෂ්ණා සැඩ පහර වීරියෙන්ම යි සිඳින්න ඕන. මේ කාමයන් දුරුකරන්න ඕන. කාමයන් ප්‍රහාණය නොකොට මුනිවරයා චිත්ත ඒකාග්‍රතාවය ලබන්නෙ නෑ.
ඉතින් කරනවා නම් වීරියෙන්මයි කරන්න තියෙන්නෙ. දැඩි වීරියක්, බලවත් වීරියක් ගන්න ඕන. පැවිදි ජීවිතේ බුරුලට ගත්තොත්, බොහෝ විට සිද්ධ වෙන්නෙ කෙලෙස් වැගිරෙන එක.
වැරදි දේ නොකරන එකම තමයි උතුම්. වැරදි දේ කිරීමෙන් අන්තිමේ දී පසුතැවෙන්න වෙනවා. යමක් කළාට පස්සෙ පසුතැවෙන්නෙ නැත්නම්, අන්න ඒ හොඳ දේවල් තමයි කිරීම උතුම් වන්නෙ.
කුසතණ ගහ වැරදි විදිහට ඇල්ලුවොත් ඒක අල්ලපු අතම තමයි කැපිල යන්නෙ. පැවිදි ජීවිතේ වැරදි විදිහට ගත කළොත්, නිරයට ඇදගෙන යනවා.
යම්කිසි ලිහිල් වැඩපිළිවෙලක් ඇද්ද, කිලුටු වෙච්ච ගුණදහමක් ඇද්ද, සැක ඇතිවෙන බ්‍රහ්මචාරී බවක් ඇද්ද, ඒවා මහත්ඵල වෙන්නෙ නෑ.”
තායන දිව්‍යපුත්‍රයා ඔය කරුණ පැවසුවා. භාග්‍යවතුන් වහන්සේට වන්දනා කළා. ප්රදක්ෂිණා කළා. එතනම නොපෙනී ගියා.
භාග්‍යවතුන් වහන්සේ ඒ රාත්‍රිය ඉක්ම ගියාට පස්සෙ භික්‍ෂුන් වහන්සේලා ඇමතුවා. “පින්වත් මහණෙනි, පැරණි තාපසයෙක්ව සිටිය තායන නම් දිව්‍ය පුත්‍රයා මේ රාත්‍රිය ඉක්ම යද්දි, මුළු මහත් ජේතවනයම බබුලුවාගෙන ලස්සන පැහැයකින් මං ළඟට ආවා. ඇවිදින් මට වන්දනා කරලා පැත්තකින් හිටගත්තා. පින්වත් මහණෙනි, පැත්තකින් හිටගත්ත තායන දිව්‍යපුත්‍රයා මා ඉදිරියේ මේ ගාථාවන් පැවසුවා.
“පින්වත් බ්‍රාහ්මණය, තෘෂ්ණා සැඩ පහර වීරියෙන්මයි සිඳින්න ඕන. මේ කාමයන් දුරුකරන්න ඕන. කාමයන් ප්‍රහාණය නොකොට මුනිවරයා චිත්ත ඒකාග්‍රතාවය ලබන්නෙ නෑ.
ඉතින් කරනවා නම් වීරියෙන්මයි කරන්න තියෙන්නෙ. දැඩි වීරියක්, බලවත් වීරියක් ගන්න ඕන. පැවිදි ජීවිතේ බුරුලට ගත්තොත්, බොහෝ විට සිද්ධ වෙන්නෙ කෙලෙස් වැගිරෙන එක.
වැරදි දේ නොකරන එකම තමයි උතුම්. වැරදි දේ කිරීමෙන් අන්තිමේදී පසුතැවෙන්න වෙනවා. යමක් කළාට පස්සෙ පසුතැවෙන්නෙ නැත්නම්, අන්න ඒ හොඳ දේවල් තමයි කිරීම උතුම් වන්නෙ.
කුසතණ ගහ වැරදි විදිහට ඇල්ලුවොත් ඒක අල්ලපු අතම තමයි කැපිල යන්නෙ. පැවිදි ජීවිතේ වැරදි විදිහට ගත කළොත්, නිරයට ඇදගෙන යනවා.
යම්කිසි ලිහිල් වැඩපිළිවෙලක් ඇද්ද, කිලුටු වෙච්ච ගුණදහමක් ඇද්ද, සැක ඇතිවෙන බ්‍රහ්මචාරී බවක් ඇද්ද, ඒවා මහත්ඵල වෙන්නෙ නෑ.”
තායන දිව්‍යපුත්‍රයා ඔය කරුණ පැවසුවා. ඊළඟට මට වන්දනා කළා. ප්රදක්ෂිණා කළා. එතනම නොපෙනී ගියා. පින්වත් මහණෙනි, තායන ගාථා ඉගෙනගන්න. තායන ගාථා කට පාඩම් කරගන්න. පින්වත් මහණෙනි, තායන ගාථා මතක තබාගන්න. පින්වත් මහණෙනි, තායන ගාථා හරිම අර්ථවත්. පින්වත් මහණෙනි, තායන ගාථා නිවන් මඟට මුල් වෙනවා.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_2-1-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M