මා හට අසන්නට ලැබුනේ මේ විදිහටයි. එසමයෙහි භාග්‍යවතුන් වහන්සේ වැඩසිටියේ රජගහනුවර කලන්දකනිවාප නම් වූ වේළුවනයේ. එදා ආයුෂ්මත් සාරිපුත්තයන් වහන්සේ සවස් වරුවෙහි භාවනාවෙන් නැගිට භාග්‍යවතුන් වහන්සේ වෙත පැමිණියා. පැමිණ භාග්‍යවතුන් වහන්සේට ආදරයෙන් වන්දනා කොට එකත්පස්ව සිටගත්තා. එකත්පස්ව සිටි ආයුෂ්මත් සාරිපුත්තයන් වහන්සේට භාග්‍යවතුන් වහන්සේ මෙය වදාළා.
“පින්වත් සාරිපුත්ත, ඔබේ ඉඳුරන් හරිම පැහැපත්. පිරිසිදුයි. සමේ වර්ණය බබලනවා. පින්වත් සාරිපුත්ත, ඔබ මේ කාලයේ බහුල වශයෙන් වාසය කළේ කවර භාවනාවකින්ද?”
“ස්වාමීනී, මේ කාලයේ මං ශූන්‍යතා භාවනාවෙන් තමයි බහුලව වාසය කරන්නේ.”
“සාදු! සාදු! සාරිපුත්ත. එහෙම නම් ඔබ මේ කාලයෙහි මහා පුරුෂ විහරණයකින් නෙව බහුලව වාසය කරන්නේ. පින්වත් සාරිපුත්ත, යම් ශූන්‍යතා සමාපත්තියක් ඇද්ද, ඕක මහා පුරුෂ විහරණයක්. එම නිසා පින්වත් සාරිපුත්ත, භික්ෂුව, ඉදින් ශූන්‍යතා සමාපත්ති විහරණයෙන් මේ කාලයේ බහුලව වාසය කරනවා කියා කැමති වෙනවා නම්, පින්වත් සාරිපුත්ත, ඒ භික්ෂුව විසින් නුවණින් මෙනෙහි කළ යුත්තේ මෙහෙමයි.
‘මං යම් මාර්ගයකින් ගමට පිණ්ඩපාතේ වැඩියාද, යම් ප්‍රදේශයක පිඬු පිණිස හැසිරුණාද, යම් මාර්ගයකින් පිණ්ඩපාතය කරගෙන ආපසු පැමිණුනාද, ඒ කාලය තුළ ඇසෙන් දැකපු රූපයන් පිළිබඳව මා තුළ කැමැත්තක් හෝ රාගයක් හෝ ද්වේෂයක් හෝ මෝහයක් හෝ සිතෙහි ගැටීමක් හෝ ඇතිවුනාවත්ද?’ කියලා.
ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මේ විදිහට දැනගන්නවා නම්, ‘මං යම් මාර්ගයකින් ගමට පිණ්ඩපාතේ වැඩියාද, යම් ප්‍රදේශයක පිඬු පිණිස හැසිරුනාද, යම් මාර්ගයකින් පිණ්ඩපාතය කරගෙන ආපසු පැමිණුනාද, ඒ කාලය තුළ ඇසෙන් දැකපු රූපයන් පිළිබඳව මා තුළ කැමැත්තක් හෝ රාගයක් හෝ ද්වේෂයක් හෝ මෝහයක් හෝ සිතෙහි ගැටීමක් හෝ ඇතිවෙලා තියෙනවා’ කියලා එතකොට පින්වත් සාරිපුත්ත, ඒ භික්ෂුව විසින් ඒ පාපී අකුසල ධර්මයන්ගේ ප්‍රහාණය පිණිස වීරිය කළ යුතුයි.
ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මේ විදිහට දැනගන්නවා නම්, ‘මං යම් මාර්ගයකින් ගමට පිණ්ඩපාතේ වැඩියාද, යම් ප්‍රදේශයක පිඬු පිණිස හැසිරුනාද, යම් මාර්ගයකින් පිණ්ඩපාතය කරගෙන ආපසු පැමිණුනාද, ඒ කාලය තුළ ඇසෙන් දැකපු රූපයන් පිළිබඳව මා තුළ කැමැත්තක් හෝ රාගයක් හෝ ද්වේෂයක් හෝ මෝහයක් හෝ සිතෙහි ගැටීමක් හෝ ඇතිවෙලා නැහැ’ කියලා. එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
ඉදින් පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහට නුවණින් විමසා බැලිය යුතුයි ‘මං යම් මාර්ගයකින් ගමට පිණ්ඩපාතේ වැඩියාද, යම් ප්‍රදේශයක පිඬු පිණිස හැසිරුනාද, යම් මාර්ගයකින් පිණ්ඩපාතය කරගෙන ආපසු පැමිණුනාද, ඒ කාලය තුළ කනින් ඇසූ ශබ්දයන් ….(පෙ)…. නාසයට දැනුන ගඳ සුවඳ ….(පෙ)…. දිවට දැනුන රස ….(පෙ)…. කයට දැනුනු පහස ….(පෙ)…. මනසට සිතුනු අරමුණු පිළිබඳව මා තුළ කැමැත්තක් හෝ රාගයක් හෝ ද්වේෂයක් හෝ මෝහයක් හෝ සිතෙහි ගැටීමක් හෝ ඇතිවුනාවත්ද?’ කියලා.
ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මේ විදිහට දැනගන්නවා නම්, ‘මං යම් මාර්ගයකින් ගමට පිණ්ඩපාතේ වැඩියාද, යම් ප්‍රදේශයක පිඬු පිණිස හැසිරුනාද, යම් මාර්ගයකින් පිණ්ඩපාතය කරගෙන ආපසු පැමිණුනාද, ඒ කාලය තුළ මනසින් දැනගත් අරමුණු පිළිබඳව මා තුළ කැමැත්තක් හෝ රාගයක් හෝ ද්වේෂයක් හෝ මෝහයක් හෝ සිතෙහි ගැටීමක් හෝ ඇතිවෙලා තියෙනවා’ කියලා එතකොට පින්වත් සාරිපුත්ත, ඒ භික්ෂුව විසින් ඒ පාපී අකුසල ධර්මයන්ගේ ප්‍රහාණය පිණිස වීරිය කළ යුතුයි.
ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මේ විදිහට දැනගන්නවා නම්, ‘මං යම් මාර්ගයකින් ගමට පිණ්ඩපාතේ වැඩියාද, යම් ප්‍රදේශයක පිඬු පිණිස හැසිරුනාද, යම් මාර්ගයකින් පිණ්ඩපාතය කරගෙන ආපසු පැමිණුනාද, ඒ කාලය තුළ මනසින් දැනගත් අරමුණු පිළිබඳව මා තුළ කැමැත්තක් හෝ රාගයක් හෝ ද්වේෂයක් හෝ මෝහයක් හෝ සිතෙහි ගැටීමක් හෝ ඇතිවෙලා නැහැ’ කියලා. එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘පංච කාම ගුණයන් මා තුළ ප්‍රහාණය වෙලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා තුළ පංච කාම ගුණ ප්‍රහීණ වෙලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් පංච කාම ගුණයන්ගේ ප්‍රහාණය පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා තුළ පංච කාම ගුණ ප්‍රහීන වෙලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘පංච නීවරණ මා තුළ ප්‍රහාණය වෙලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා තුළ පංච නීවරණ ප්‍රහීණ වෙලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් පංච නීවරණයන්ගේ ප්‍රහාණය පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා තුළ පංච නීවරණ ප්‍රහීන වෙලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘පංච උපාදානස්කන්ධයන් මා විසින් පිරිසිඳ අවබෝධ කරලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් පංච උපාදානස්කන්ධයන් පිරිසිඳ අවබෝධ කරලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් පංච උපාදානස්කන්ධයන් පිරිසිඳ අවබෝධය පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් පංච උපාදානස්කන්ධයන් පිරිසිඳ අවබෝධ කරලයි තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් සතර සතිට්ඨානයන් වඩලද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් සතර සතිපට්ඨානයන් වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් සතර සතිපට්ඨානයන් වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් සතර සතිපට්ඨානයන් වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් සතර සම්‍යක් ප්‍රධාන වීරිය වඩලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් සතර සම්‍යක් ප්‍රධාන වීරිය වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් සතර සම්‍යක් ප්‍රධාන වීරිය වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් සතර සම්‍යක් ප්‍රධාන වීරිය වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් සතර ඉර්ධිපාද වඩලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් සතර ඉර්ධිපාද වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් සතර ඉර්ධිපාද වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් සතර ඉර්ධිපාද වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් පංච ඉන්ද්‍රිය ධර්මයන් වඩලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් පංච ඉන්ද්‍රිය ධර්මයන් වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් පංච ඉන්ද්‍රිය ධර්මයන් වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් පංච ඉන්ද්‍රිය ධර්මයන් වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් පංච බල ධර්මයන් වඩලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් පංච බල ධර්මයන් වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් පංච බල ධර්මයන් වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් පංච බල ධර්මයන් වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් සප්ත බොජ්ඣංග ධර්මයන් වඩලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් සප්ත බොජ්ඣංග ධර්මයන් වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් සප්ත බොජ්ඣංග ධර්මයන් වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් සප්ත බොජ්ඣංග ධර්මයන් වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් ආර්ය අෂ්ටාංගික මාර්ගය වඩලා ද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් ආර්ය අෂ්ටාංගික මාර්ගය වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් ආර්ය අෂ්ටාංගික මාර්ගය වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් ආර්ය අෂ්ටාංගික මාර්ගය වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් සමථ විදර්ශනා ධර්මයන් වඩලද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් සමථ විදර්ශනා ධර්මයන් වඩලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් සමථ විදර්ශනා ධර්මයන් වැඩීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විසින් සමථ විදර්ශනා ධර්මයන් වඩලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, නැවත අනෙකක් කියමි. භික්ෂුව විසින් මේ විදිහටත් නුවණින් විමසිය යුතුයි. ‘මා විසින් විද්‍යාවත් විමුක්තියත් සාක්ෂාත් කරලාද තියෙන්නේ?’ කියලා. ඉදින් පින්වත් සාරිපුත්ත, නුවණින් ප්‍රත්‍යවෙක්ෂා කරද්දී භික්ෂුව මෙහෙම දැනගන්නවා නම්, ‘මා විසින් විද්‍යාවත් විමුක්තියත් සාක්ෂාත් කරලා නෑ’ කියලා, එතකොට පින්වත් සාරිපුත්ත, ඒ භික්ෂුව විසින් විද්‍යාවත් විමුක්තියත් සාක්ෂාත් කිරීම පිණිස වීරිය කළ යුතුයි.’ ඉදින් පින්වත් සාරිපුත්ත, භික්ෂුව නුවණින් ප්‍රත්‍යවෙක්ෂා කරද්දී මෙහෙම දැනගන්නවා නම්, ‘මා විද්‍යාවත් විමුක්තියත් සාක්ෂාත් කරලා තියෙන්නේ කියලා’ එතකොට පින්වත් සාරිපුත්ත, ඒ භික්ෂුව විසින් ඒ ප්‍රීති ප්‍රමුදිත බවෙන් යුක්තව, රෑ දවල් දෙකෙහි කුසල ධර්මයන් තුළ හික්මෙමින් වාසය කළ යුතුයි.
පින්වත් සාරිපුත්ත, අතීතයෙහි සිටි යම්කිසි ශ්‍රමණයන් වේවා, බ්‍රාහ්මණයන් වේවා පිණ්ඩපාතය පිරිසිදු බවට පත්කළා නම් ඒ සියල්ලෝම ඔය අයුරින් නුවණින් ප්‍රත්‍යවෙක්ෂා කර කර තමයි පිණ්ඩපාතය පිරිසිදු බවට පත් කළේ. පින්වත් සාරිපුත්ත, අනාගතයෙහි පහළ වන යම්කිසි ශ්‍රමණයන් වේවා, බ්‍රාහ්මණයන් වේවා පිණ්ඩපාතය පිරිසිදු බවට පත්කරනවා නම් ඒ සියල්ලෝම ඔය අයුරින් නුවණින් ප්‍රත්‍යවෙක්ෂා කර කර තමයි පිණ්ඩපාතය පිරිසිදු බවට පත් කරන්නේ. පින්වත් සාරිපුත්ත, වර්තමානයෙහි සිටින යම්කිසි ශ්‍රමණයන් වේවා, බ්‍රාහ්මණයන් වේවා පිණ්ඩපාතය පිරිසිදු බවට පත්කරනවා නම් ඒ සියල්ලෝම ඔය අයුරින් නුවණින් ප්‍රත්‍යවෙක්ෂා කර කර තමයි පිණ්ඩපාතය පිරිසිදු බවට පත් කරන්නේ.
එහෙයින් පින්වත් සාරිපුත්ත, ඔබ විසින් හික්මිය යුත්තේ මේ විදිහටයි. ‘නුවණින් ප්‍රත්‍යවෙක්ෂා කර කර අපිත් පිණ්ඩපාතය පිරිසිදු කරන්නට ඕන’ කියලා. පින්වත් සාරිපුත්ත, ඔබ හික්මිය යුත්තේ ඔය ආකාරයටයි.
භාග්‍යවතුන් වහන්සේ මේ උතුම් දේශනය වදාළා. ඒ දේශනය ගැන ආයුෂ්මත් සාරිපුත්තයන් වහන්සේ ගොඩක් සතුටු වුනා. භාග්‍යවතුන් වහන්සේ වදාළ මේ දේශනය සතුටින් පිළිගත්තා.
සාදු! සාදු!! සාදු!!!
පිණ්ඩපාතය පිරිසිදු බවට පත් කිරීම ගැන වදාළ දෙසුම නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/mn3_3-5-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M