මා හට අසන්නට ලැබුනේ මේ විදිහට යි. ඒ දිනවල භාග්‍යවතුන් වහන්සේ වැඩසිටියේ රජගහ නුවර කලන්දක නිවාප නම් වූ වේළුවනයේ. එසමයෙහි ආයුෂ්මත් සාරිපුත්තයන් වහන්සේ මහත් භික්ෂුසංඝයා පිරිවරාගෙන දක්ඛිණාගිරි ජනපදයෙහි චාරිකාවෙහි වැඩියා. එකල්හි රජගහ නුවර වස් විසූ එක්තරා භික්ෂුවක් දක්ඛිණාගිරියට ගොස් ආයුෂ්මත් සාරිපුත්තයන් වහන්සේ වෙත පැමිණුනා. පැමිණ ආයුෂ්මත් සාරිපුත්තයන් වහන්සේ සමඟ සතුටු වුනා. සතුටු විය යුතු පිළිසඳර කතාව නිමවා එකත්පස්ව වාඩි වුනා. එකත්පස්ව වාඩි වූ ඒ භික්ෂුවගෙන් ආයුෂ්මත් සාරිපුත්තයන් වහන්සේ මෙය ඇසුවා.
“ප්‍රිය ආයුෂ්මතුනි, භාග්‍යවතුන් වහන්සේ නීරෝගව වැඩ සිටින සේක් ද? සවිබල ඇතිව වැඩසිටින සේක් ද?”
“ප්‍රිය ආයුෂ්මතුන් වහන්ස, භාග්‍යවතුන් වහන්සේ නීරෝගව වැඩ සිටින සේක. සවිබල ඇතිව වැඩසිටින සේක.”
“ප්‍රිය ආයුෂ්මතුනි, භික්ෂුසංඝයා වහන්සේ නීරෝගව වැඩ සිටින සේක් ද? සවිබල ඇතිව වැඩසිටින සේක් ද?”
“ප්‍රිය ආයුෂ්මතුන් වහන්ස, භික්ෂුසංඝයා වහන්සේ නීරෝගව වැඩ සිටින සේක. සවිබල ඇතිව වැඩසිටින සේක.”
“ප්‍රිය ආයුෂ්මතුනි, මෙහි තණ්ඩුලපාල ද්වාර නම් ප්‍රදේශයෙහි ධනඤ්ජානි නම් බ්‍රාහ්මණයෙක් ඉන්නවා. ප්‍රිය ආයුෂ්මතුනි, කිම? ඒ ධනඤ්ජානි නම් බ්‍රාහ්මණයා ත් නීරෝගයි ද? සවිබලයෙන් යුක්තයි ද?”
“ප්‍රිය ආයුෂ්මතුන් වහන්ස, ධනඤ්ජානි නම් බ්‍රාහ්මණයා ත් නීරෝගයි. සවිබලයෙන් යුක්තයි.”
“ප්‍රිය ආයුෂ්මතුනි, කිම? ධනඤ්ජානි බ්‍රාහ්මණයා අප්‍රමාදී බවින් යුක්තයි ද?”
“ප්‍රිය ආයුෂ්මතුන් වහන්ස, ධනඤ්ජානි බ්‍රාහ්මණයාට මොන අප්‍රමාදයක් ද? ප්‍රිය ආයුෂ්මතුන් වහන්ස, ධනඤ්ජානි බ්‍රාහ්මණයා රාජ්‍ය බලය පාවිච්චි කොට බ්‍රාහ්මණ ගෘහපතියන් ගේ ධනය පැහැර ගන්නවා. බ්‍රාහ්මණ ගෘහපතියන් ගේ බලය යොදා රජ්ජුරුවන් සතු දේවල් පැහැර ගන්නවා. ඔහුට ශ්‍රද්ධාවන්ත කුලයකින් ගෙන ආ ශ්‍රද්ධාවන්ත බිරිඳක් හිටියා. ඈ ත් කළුරිය කළා නෙව. ඉතින් ඒ ගමන දැන් ගෙනැවිත් සිටින්නේ ශ්‍රද්ධා රහිත පවුලකින් ශ්‍රද්ධා රහිත බිරිඳක්.”
“ප්‍රිය ආයුෂ්මත, ප්‍රමාදී වූ ධනඤ්ජානි බ්‍රාහ්මණයා පිළිබඳව අප යමක් ඇසුවා ද, සැබැවින් ම අපට අසන්නට ලැබුනේ නපුරු දෙයක් නෙව. ප්‍රිය ආයුෂ්මත, සැබැවින් ම අපට අසන්නට ලැබුනේ නපුරු දෙයක් නෙව. අපට කිසියම් දිනක ධනඤ්ජානි බ්‍රාහ්මණයා සමඟ ඇසුරක් ලැබුනෝතින් හොඳයි. එවිට ඔහු සමඟ කිසියම් කතාසල්ලාපයක් කළොතින් හොඳයි.”
ඉතින් ආයුෂ්මත් සාරිපුත්තයන් වහන්සේ දක්ඛිණාගිරි ජනපදයෙහි කැමති තාක් වැඩවාසය කොට රජගහ නුවර බලා චාරිකාවෙහි නික්මුනා. අනුපිළිවෙලින් චාරිකාවෙහි වඩිමින් රජගහ නුවරට වැඩම කළා. එහි ආයුෂ්මත් සාරිපුත්තයන් වහන්සේ රජගහ නුවර කලන්දක නිවාප නම් වේළුවනයේ වැඩසිටියා. එදා පෙරවරුවෙහි ආයුෂ්මත් සාරිපුත්තයන් වහන්සේ සිවුරු හැඳ පොරවා ගෙන පාත්‍රය ද ගෙන රජගහ නුවර පිඬු සිඟා වැඩම කළා.
එසමයෙහි ධනඤ්ජානි බ්‍රාහ්මණයා නගරයෙන් පිටත ගව පට්ටියක කිරි දොවමින් සිටියා. එවිට ආයුෂ්මත් සාරිපුත්තයන් වහන්සේ රජගහ නුවර පිඬු පිණිස හැසිර දන් වළඳා ධනඤ්ජානි බ්‍රාහ්මණයා වෙත පැමිණියා. එකල්හි ධනඤ්ජානි බ්‍රාහ්මණයා දුරින් ම වඩිනා ආයුෂ්මත් සාරිපුත්තයන් වහන්සේව දුටුවා. දැක ආයුෂ්මත් සාරිපුත්තයන් වහන්සේ වෙත පැමිණියා. පැමිණ ආයුෂ්මත් සාරිපුත්තයන් වහන්සේට මෙය පැවසුවා. “භවත් සාරිපුත්තයන් වහන්ස, මේ රස්නෙ පිට තියෙන කිරි පානය කළ මැනැව. එතකොට දන් වළඳන්නට කල් තියෙනවා නෙව.”
“පින්වත් බ්‍රාහ්මණය කම් නැත. අද මගේ දන් වැළඳීම අවසන් වුනා. මං අසවල් තැන රුක් සෙවනේ දවල් කාලයෙහි සිටිනවා. ඔබ එතනට එන්න.”
“එසේය භවත” කියා ධනඤ්ජානි බ්‍රාහ්මණයා ආයුෂ්මත් සාරිපුත්තයන් වහන්සේට පිළිතුරු දුන්නා. ඉතින් ධනඤ්ජානි බ්‍රාහ්මණයා උදේ ආහාරය අනුභව කොට ආයුෂ්මත් සාරිපුත්තයන් වහන්සේ වෙත පැමිණියා. පැමිණ ආයුෂ්මත් සාරිපුත්තයන් වහන්සේ සමඟ සතුටු වුනා. සතුටු විය යුතු පිළිසඳර කතාව කොට එකත්පස්ව වාඩි වුනා. එකත්පස්ව වාඩි වුන ධනඤ්ජානි බ්‍රාහ්මණයාගෙන් ආයුෂ්මත් සාරිපුත්තයන් වහන්සේ මෙය ඇසුවා.
“කිම? පින්වත් ධනඤ්ජානි, අප්‍රමාදී නේද?”
“භවත් සාරිපුත්තයන් වහන්ස, අප්‍රමාදයක් අපට කොයින්ද? අපට මව්පියන් පෝෂණය කරන්නට තියෙනවා නෙව. අඹුදරුවනුත් පෝෂණය කරන්නට තියෙනවා නෙව. දැසි දස් කම්කරුවනුත් පෝෂණය කරන්නට තියෙනවා නෙව. යහළු මිතුරන් ගේ යහළු මිතුරන් සඳහා කළ යුතු වැඩ තියෙනවා නෙව. ලේ ඤාතීන් උදෙසා කළ යුතු වැඩ තියෙනවා නෙව. අමුත්තන් එනකොට ඒ අමුත්තන් වෙනුවෙන් කළ යුතු වැඩ තියෙනවා නෙව. ඤාතීන් මිය ගිය විට ඒ මියගිය ඤාතීන් වෙනුවෙනුත් කළ යුතු වැඩ තියෙනවා නෙව. දෙවියන් වෙනුවෙනුත් කළ යුතු වැඩ තියෙනවා නෙව. රජ්ජුරුවන් වෙනුවෙනුත් කළ යුතු රාජකාරි තියෙනවා නෙව. මේ ශරීරයත් පිනවන්නට තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් මව්පියන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ මව්පියන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ මව්පියන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් අඹුදරුවන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ අඹුදරුවන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ අඹුදරුවන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් දාසකම්කරු පුරුෂයන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ දාසකම්කරු පුරුෂයන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ දාසකම්කරු පුරුෂයන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් යහළුමිත්‍රයන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ යහළුමිත්‍රයන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ යහළුමිත්‍රයන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් සහලේ ඤාතීන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ සහලේ ඤාතීන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ සහලේ ඤාතීන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් ආගන්තුකයින් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ ආගන්තුකයින් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ ආගන්තුකයින් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් මියපරලොව ගිය ඤාතීන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ මියපරලොව ගිය ඤාතීන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ මියපරලොව ගිය ඤාතීන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් දෙවියන් නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ දෙවියන් නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ දෙවියන් ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් රජතුමා නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ රජතුමා නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම ඔහු ගේ රජතුමා ‘අනේ, මොහු අප නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? මෙහි කවුරුන් හෝ කෙනෙක් ශරීරය පිනවීමේ, වැඩීමේ අවශ්‍යතාව නිසා අධර්මචාරී වෙනවා, විෂමචාරී වෙනවා. එතකොට ඒ අධර්මචාරී වීම හේතුවෙන්, විෂමචාරී වීම හේතුවෙන් නිරයපාලයන් ඔහුව නිරයට ඇදගෙන යනවා. ඉතින් ඔහු ‘අනේ මං අධර්මචාරී වුනේ, විෂමචාරී වුනේ ශරීරය පිනවීමේ, වැඩීමේ අවශ්‍යතාව නිසයි. අනේ ඒ නිසා නිරයපාලයෙනි, මාව නිරයට ගෙනයන්නට එපා!’ කියල කීවොත් එය ඔහුට ලබන්නට පුළුවන් ද? ඒ වගේ ම අනිත් උදවිය ‘අනේ, මොහු ඔහු ගේ ශරීරය පිනවීමේ, වැඩීමේ අවශ්‍යතාව නිසයි අධර්මචාරී වුනේ. විෂමචාරී වුනේ. ඒ නිසා නිරයපාලයෙනි, මොහුව නිරයට ගෙනියන්නට එපා!’ කියා ලබන්නට පුළුවන් ද?”
“භවත් සාරිපුත්තයන් වහන්ස, එය නො වේ ම යි. නමුත් නිරයපාලයෝ ඔහුව හඬා වැළපෙද්දී ම නිරයට ඇද දමාවි.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් මව්පියන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් මව්පියන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් මව්පියන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් මව්පියන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් මව්පෝෂණය කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් අඹුදරුවන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් අඹුදරුවන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් අඹුදරුවන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් අඹුදරුවන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් අඹුදරුවන් පෝෂණය කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් දැසිදස්කම්කරුවන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් දැසිදස්කම්කරුවන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් දැසිදස්කම්කරුවන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් දැසිදස්කම්කරුවන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් දැසිදස්කම්කරුවන් පෝෂණය කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් යහළු මිත්‍රයන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් යහළු මිත්‍රයන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් යහළු මිත්‍රයන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් යහළුමිත්‍රයන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් යහළු මිත්‍රයන් පෝෂණය කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් සහලේ ඤාතීන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් සහලේ ඤාතීන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් සහලේ ඤාතීන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් සහලේ ඤාතීන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් සහලේ ඤාතීන් පෝෂණය කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් ආගන්තුකයින් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් ආගන්තුකයින් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් ආගන්තුකයින් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් ආගන්තුකයින් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් ආගන්තුකයින් පෝෂණය කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් මියගිය ඤාතීන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් මියගිය ඤාතීන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් මියගිය ඤාතීන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් මියගිය ඤාතීන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් මියගිය ඤාතීන්ට සළකන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් දෙවියන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් දෙවියන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් දෙවියන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් දෙවියන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් දෙවියන්ට සළකන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් රජුන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් රජුන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් රජුන් හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් රජුන් හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් රජුන්ට සළකන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
“පින්වත් ධනඤ්ජානි, ඒ ගැන කුමක්ද සිතන්නේ? යමෙක් කය වැඩීම, පිණවීම හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, ඒ වගේ ම තවත් කෙනෙක් කය වැඩීම, පිණවීම හේතු කොට ගෙන හෝ ධර්මචාරී වෙනවා නම්, සමචාරී වෙනවා නම් මේ දෙකෙන් වඩාත් ශ්‍රේෂ්ඨ වන්නේ කුමක්ද?”
“භවත් සාරිපුත්තයන් වහන්ස, යමෙක් කය වැඩීම, පිණවීම හේතු කොට ගෙන හෝ අධර්මචාරී වෙනවා නම්, විෂමචාරී වෙනවා නම්, එය ශ්‍රේෂ්ඨ දෙයක් නම් නො වෙයි. නමුත් තවත් කෙනෙක් කය වැඩීම, පිණවීම හේතු කොට ගෙන හෝ ධර්මචාරී වෙනවා නම්, සමචාරී වෙනවා නම්, ඒක නම් ශ්‍රේෂ්ඨ දෙයක්. භවත් සාරිපුත්තයන් වහන්ස, අධර්මචරියා, විෂමචරියාවට වඩා ධම්මචරියාව, සමචරියාව ශ්‍රේෂ්ඨ දෙයක් නෙව.”
“පින්වත් ධනඤ්ජානි, යම් රැකීරක්ෂාවකින් කය වැඩීම, පිණවීම කරන්නට පුළුවන් නම්, ඒ වගේ ම පව් ත් නො කර සිටින්නට පුළුවන් නම්, ඒ වගේ ම පුණ්‍ය ප්‍රතිපදාවකට ත් පැමිණෙන්නට පුළුවන් නම්, එබඳු විවිධාකාර යහපත් දෙයින් යුක්ත ධාර්මික රැකීරක්ෂාවන් තියෙනවා නෙව.”
ඉතින් ධනඤ්ජානි බ්‍රාහ්මණයා ආයුෂ්මත් සාරිපුත්තයන් වහන්සේ ගේ භාෂිතය සතුටින් පිළිගත්තා. අනුමෝදන් වුනා. හුනස්නෙන් නැගිට පිටත්ව ගියා.
පසුකලෙක ධනඤ්ජානි බ්‍රාහ්මණයා අසනීප වුනා. ඉතාමත් අසාධ්‍ය වුනා. දුකට පත් වුනා. එවිට ධනඤ්ජානි බ්‍රාහ්මණයා එක්තරා පුරුෂයෙකු ඇමතුවා. “එම්බා පුරුෂය, ඔබ එන්න. භාග්‍යවතුන් වහන්සේ වෙත යන්න. ගිහින් මගේ වචනයෙන් භාග්‍යවතුන් වහන්සේ ගේ ශ්‍රී පාද පද්මය නළල බිම තබා වඳින්න. ‘ස්වාමීනී, ධනඤ්ජානි බ්‍රාහ්මණයා අසනීපයෙන් අසාධ්‍ය තත්වයෙන් දුක්ඛිතව ඉන්නවා. ඔහු භාග්‍යවතුන් වහන්සේ ගේ ශ්‍රී පාද පද්මය නළල බිම තබා වඳිනවා’ කියල. ඊට පස්සේ ආයුෂ්මත් සාරිපුත්තයන් වහන්සේ ළඟට යන්න. ගිහින් මගේ වචනයෙන් ආයුෂ්මත් සාරිපුත්තයන් වහන්සේ ගේ උතුම් පාදයන් නළල බිම තබා වඳින්න. ‘ස්වාමීනී, ධනඤ්ජානි බ්‍රාහ්මණයා අසනීපයෙන් අසාධ්‍ය තත්වයෙන් දුක්ඛිතව ඉන්නවා. ඔහු ආයුෂ්මත් සාරිපුත්තයන් වහන්සේ ගේ උතුම් පාදයන් නළල බිම තබා වඳිනවා’ කියල. මෙසේත් කියන්න. ‘ස්වාමීනී, ආයුෂ්මත් සාරිපුත්තයන් වහන්සේ ධනඤ්ජානි බ්‍රාහ්මණයා ගේ නිවසට අනුකම්පාව උපදවා වැඩම කරන සේක් නම් යහපති!’ කියල.”
“එසේය ස්වාමීනී” ඒ පුරුෂයා ධනඤ්ජානි බ්‍රාහ්මණයාට පිළිතුරු දී භාග්‍යවතුන් වහන්සේ වෙත පැමිණියා. පැමිණ භාග්‍යවතුන් වහන්සේට ආදරෙන් වන්දනා කොට එකත්පස්ව වාඩිවුනා. එකත්පස්ව හිඳගත් ඒ පුරුෂයා භාග්‍යවතුන් වහන්සේට මෙය පැවසුවා. ‘ස්වාමීනී, ධනඤ්ජානි බ්‍රාහ්මණයා අසනීපයෙන් අසාධ්‍ය තත්වයෙන් දුක්ඛිතව ඉන්නවා. ඔහු භාග්‍යවතුන් වහන්සේ ගේ ශ්‍රී පාද පද්මය නළල බිම තබා වඳිනවා’ කියල.
ඊට පස්සේ ඒ පුරුෂයා ආයුෂ්මත් සාරිපුත්තයන් වහන්සේ ළඟට ගියා. ගිහින් ආයුෂ්මත් සාරිපුත්තයන් වහන්සේට ආදරෙන් වන්දනා කොට එකත්පස්ව වාඩිවුනා. එකත්පස්ව හිඳගත් ඒ පුරුෂයා ආයුෂ්මත් සාරිපුත්තයන් වහන්සේට මෙය පැවසුවා. ‘ස්වාමීනී, ධනඤ්ජානි බ්‍රාහ්මණයා අසනීපයෙන් අසාධ්‍ය තත්වයෙන් දුක්ඛිතව ඉන්නවා. ඔහු ආයුෂ්මත් සාරිපුත්තයන් වහන්සේ ගේ උතුම් පාදයන් නළල බිම තබා වඳිනවා’ කියල. මෙසේත් කියන්න කිව්වා. ‘ස්වාමීනී, ආයුෂ්මත් සාරිපුත්තයන් වහන්සේ ධනඤ්ජානි බ්‍රාහ්මණයා ගේ නිවසට අනුකම්පාව උපදවා වැඩම කරන සේක් නම් යහපති!’ කියල.” ඉතින් ආයුෂ්මත් සාරිපුත්තයන් වහන්සේ නිශ්ශබ්දව ඉවසා වදාළා.
ඉන්පසු ආයුෂ්මත් සාරිපුත්තයන් වහන්සේ සිවුරු හැඳ පොරවා ගෙන පාත්‍රය ද ගෙන ධනඤ්ජානි බ්‍රාහ්මණයා ගේ නිවස වෙත වැඩම කළා. වැඩම කොට පණවන ලද අසුනෙහි වැඩසිටියා. එසේ වැඩසිටි ආයුෂ්මත් සාරිපුත්තයන් වහන්සේ ධනඤ්ජානි බ්‍රාහ්මණයාගෙන් මෙය ඇසුවා. “පින්වත් ධනඤ්ජානි, කිම? ඉවසන්නට පුළුවන් නේද? කිම? යැපෙන්නට පුළුවන් නේද? කිම? දුක් වේදනා අඩුවෙනවා නේද? වැඩිවෙන්නේ නැහැ නේද? දුක්වේදනා වැඩිවීමක් නොව අඩුවීමක් නේද තේරෙන්නෙ?”
“අනේ භවත් සාරිපුත්තයන් වහන්ස, මට ඉවසන්නට අමාරුයි. යැපෙන්නටත් අමාරුයි. මට දුක් වේදනාවන් ම යි වැඩිවෙන්නේ. අඩුවීමක් නම් නෑ. වැඩිවීමක් ම යි තේරෙන්නේ. අඩුවීමක් නො වෙයි. භවත් සාරිපුත්තයන් වහන්ස, බලවත් පුරුෂයෙක් තියුණු ආයුධයකින් හිස් මුදුනට දැඩිව පහර දෙනවා වගෙයි. භවත් සාරිපුත්තයන් වහන්ස, අන්න ඒ වගේ මේ වාත වේදනාවන් මහා බලවත් විදිහට හිස් මුදුනට පහර දෙනවා. අනේ භවත් සාරිපුත්තයන් වහන්ස, මට ඉවසන්නට අමාරුයි. යැපෙන්නටත් අමාරුයි. මට දුක් වේදනාවන් ම යි වැඩිවෙන්නේ. අඩුවීමක් නම් නෑ. වැඩිවීමක් ම යි තේරෙන්නේ. අඩුවීමක් නො වෙයි.
භවත් සාරිපුත්තයන් වහන්ස, බලවත් පුරුෂයෙක් දැඩි වූ වරපටකින් හිස වෙලා ගැටගසා තදකරනවා වගෙයි. භවත් සාරිපුත්තයන් වහන්ස, අන්න ඒ වගේ මේ හිසේ කැක්කුම මහා බලවත් ව පවතිනවා. අනේ භවත් සාරිපුත්තයන් වහන්ස, මට ඉවසන්නට අමාරුයි. යැපෙන්නටත් අමාරුයි. මට දුක් වේදනාවන් ම යි වැඩිවෙන්නේ. අඩුවීමක් නම් නෑ. වැඩිවීමක් ම යි තේරෙන්නේ. අඩුවීමක් නො වෙයි.
භවත් සාරිපුත්තයන් වහන්ස, දක්ෂ ගවඝාතකයෙක් හරි, ගවඝාතකයෙකු ගේ ගෝලයෙක් හරි තියුණු ගෙරි කපන කැත්ත ගෙන ගවයා ගේ කුස පෙති ගසා කපනවා වගෙයි, භවත් සාරිපුත්තයන් වහන්ස, අන්න ඒ වගේ මේ වාත වේදනාවන් ඉතා බලවත් විදිහට කුස කැක්කුම් කරනවා. අනේ භවත් සාරිපුත්තයන් වහන්ස, මට ඉවසන්නට අමාරුයි. යැපෙන්නටත් අමාරුයි. මට දුක් වේදනාවන් ම යි වැඩිවෙන්නේ. අඩුවීමක් නම් නෑ. වැඩිවීමක් ම යි තේරෙන්නේ. අඩුවීමක් නො වෙයි.
භවත් සාරිපුත්තයන් වහන්ස, බලවත් පුරුෂයන් දෙන්නෙක් දුර්වල පුරුෂයෙකු ගේ අත් වලින් ඇද ගෙන ගිහින් ගිණි අඟුරු වළක දාලා රත්කරනවා වගෙයි, දැඩි ලෙස රත්කරනවා වගෙයි, භවත් සාරිපුත්තයන් වහන්ස, අන්න ඒ වගේ මේ කයෙහි මහා බලවත් දාහයක් තියෙනවා නෙව. අනේ භවත් සාරිපුත්තයන් වහන්ස, මට ඉවසන්නට අමාරුයි. යැපෙන්නටත් අමාරුයි. මට දුක් වේදනාවන් ම යි වැඩිවෙන්නේ. අඩුවීමක් නම් නෑ. වැඩිවීමක් ම යි තේරෙන්නේ. අඩුවීමක් නො වෙයි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? නිරය ද, තිරිසන් යෝනිය ද?”
“භවත් සාරිපුත්තයන් වහන්ස, නිරයට වඩා තිරිසන් යෝනිය ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? තිරිසන් යෝනිය ද, ප්‍රේත ලෝකයේ උපත ද?”
“භවත් සාරිපුත්තයන් වහන්ස, තිරිසන් යෝනියට වඩා ප්‍රේත ලෝකයේ උපත ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? ප්‍රේත ලෝකයේ උපත ද, මනුෂ්‍ය ලෝකය ද?”
“භවත් සාරිපුත්තයන් වහන්ස, ප්‍රේත ලෝකයේ උපතට වඩා මිනිස් ලොව උපත ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? මනුෂ්‍ය ලෝකය ද, චාතුම්මහාරාජික දෙව්ලොව ද?”
“භවත් සාරිපුත්තයන් වහන්ස, මිනිස් ලොව උපතට වඩා චාතුම්මහාරාජික දෙව්ලොව ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? චාතුම්මහාරාජික දෙව්ලොව ද, තව්තිසා දෙව්ලොව ද?”
“භවත් සාරිපුත්තයන් වහන්ස, චාතුම්මහාරාජික දෙව්ලොවට වඩා තව්තිසා දෙව්ලොව ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? තව්තිසා දෙව්ලොව ද, යාම දෙව්ලොව ද?”
“භවත් සාරිපුත්තයන් වහන්ස, තව්තිසා දෙව්ලොවට වඩා යාම දෙව්ලොව ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? යාම දෙව්ලොව ද, තුසිත දෙව්ලොව ද?”
“භවත් සාරිපුත්තයන් වහන්ස, යාම දෙව්ලොවට වඩා තුසිත දෙව්ලොව ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? තුසිත දෙව්ලොව ද, නිම්මාණරතී දෙව්ලොව ද?”
“භවත් සාරිපුත්තයන් වහන්ස, තුසිත දෙව්ලොවට වඩා නිම්මාණරතී දෙව්ලොව ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? නිම්මාණරතී දෙව්ලොව ද, පරනිම්මිත වසවත්තී දෙව්ලොව ද?”
“භවත් සාරිපුත්තයන් වහන්ස, නිම්මාණරතී දෙව්ලොවට වඩා පරනිම්මිත වසවත්තී දෙව්ලොව ශ්‍රේෂ්ඨ යි.”
“පින්වත් ධනඤ්ජානි, ඒ ගැන කුමක් ද සිතන්නේ? මොකක් ද ශ්‍රේෂ්ඨ? පරනිම්මිත වසවත්තී දෙව්ලොව ද, බඹ ලොව ද?”
“භවත් සාරිපුත්තයන් වහන්ස, පරනිම්මිත වසවත්තී දෙව් ලොවට වඩා බඹ ලොව ශ්‍රේෂ්ඨ යි.”
එතකොට ආයුෂ්මත් සාරිපුත්තයන් වහන්සේට මෙය සිතුනා. ‘මේ බ්‍රාහ්මණවරු කියන්නේ බඹ ලොව උපදින්නට ආසා පිරිසක් නෙව. ඒ නිසා ධනඤ්ජානි බ්‍රාහ්මණයාට බ්‍රහ්ම ලෝකයෙහි ඉපදීම පිණිස මාර්ගය කියන්නට ඕන.’ “පින්වත් ධනඤ්ජානි, ඔබට බ්‍රහ්ම ලෝකයෙහි ඉපදීම පිණිස මාර්ගය කියා දෙන්නම්. එය හොඳින් අසන්න. නුවණින් මෙනෙහි කරන්න. මා කියා දෙන්නම්.” “එසේය භවත” කියා ධනඤ්ජානි බ්‍රාහ්මණයා ආයුෂ්මත් සාරිපුත්තයන් වහන්සේට පිළිතුරු දුන්නා. ආයුෂ්මත් සාරිපුත්තයන් වහන්සේ මෙය වදාළා.
“පින්වත් ධනඤ්ජානි, බඹලොව උපදින්නට ඇති මාර්ගය කුමක්ද? පින්වත් ධනඤ්ජානි, මෙහිලා භික්ෂුව මෛත්‍රී සහගත සිතින් එක් දිශාවක් පතුරුවා වාසය කරනවා. ඒ වගේ ම දෙවෙනි දිශාවටත්, තුන්වෙනි දිශාවටත්, සතරවෙනි දිශාවටත් පතුරවා වාසය කරනවා. ඒ වගේ ම උඩ, යට, හරස් අතට ආදී සෑම තැනක් කෙරෙහි ම සියළු උදවිය කෙරෙහි ම වෛර රහිත වූ, දුක් පීඩා රහිත වූ, විපුල වූ, මහද්ගත වූ, අප්‍රමාණ වූ මෛත්‍රී සිතින් පතුරුවා වාසය කරනවා. පින්වත් ධනඤ්ජානි, බ්‍රහ්ම ලෝකයෙහි උපදින්නට ඇති මාර්ගය මෙය යි.
පින්වත් ධනඤ්ජානි, නැවත අනිකක් කියමි. මෙහිලා භික්ෂුව කරුණා සහගත සිතින් ….(පෙ)…. මුදිතා සහගත සිතින් ….(පෙ)…. උපේක්ෂා සහගත සිතින් එක් දිශාවක් පතුරුවා වාසය කරනවා. ඒ වගේ ම දෙවෙනි දිශාවටත්, තුන්වෙනි දිශාවටත්, සතරවෙනි දිශාවටත් පතුරවා වාසය කරනවා. ඒ වගේ ම උඩ, යට, හරස් අතට ආදී සෑම තැනක් කෙරෙහි ම සියළු උදවිය කෙරෙහි ම වෛර රහිත වූ, දුක් පීඩා රහිත වූ, විපුල වූ, මහද්ගත වූ, අප්‍රමාණ වූ උපේක්ෂා සිතින් පතුරුවා වාසය කරනවා. පින්වත් ධනඤ්ජානි, බ්‍රහ්ම ලෝකයෙහි උපදින්නට ඇති මාර්ගය මෙය යි.”
“භවත් සාරිපුත්තයන් වහන්ස, අනේ එහෙම නම්, මගේ වචනයෙන් භාග්‍යවතුන් වහන්සේ ගේ ශ්‍රී පාද පද්මය වන්දනා කොට වදාළ මැනැව. ‘ස්වාමීනී, ධනඤ්ජානි බ්‍රාහ්මණයා අසනීපව, අසාධ්‍යව, දුක්ඛිතව ඉන්නවා. ඔහු භාග්‍යවතුන් වහන්සේ ගේ සිරිපා කමල් නළල බිම තබා වන්දනා කරනවා’ කියල.”
ඉතින් ධනඤ්ජානි බ්‍රාහ්මණයා හට තවදුරටත් සිත දියුණු කරගන්නට අවස්ථාව තිබිය දී ආයුෂ්මත් සාරිපුත්තයන් වහන්සේ ඔහුව හීන වූ බ්‍රහ්ම ලෝකයෙහි පිහිටුවා හුනස්නෙන් නැගිට වැඩම කළා.
ඉක්බිති ආයුෂ්මත් සාරිපුත්තයන් වහන්සේ වැඩම කොට ස්වල්ප වෙලාවකින් ධනඤ්ජානි බ්‍රාහ්මණයා අභාවප්‍රාප්ත වුනා. බඹලොව ඉපදුනා.
ඒ මොහොතේ භාග්‍යවතුන් වහන්සේ භික්ෂූන් අමතා වදාළා. “පින්වත් මහණෙනි, මේ සාරිපුත්තයන් ධනඤ්ජානි බ්‍රාහ්මණයාට තවදුරටත් සිත දියුණු කරගන්නට අවස්ථාව තිබෙද්දී ම ඔහුව හීන වූ බ්‍රහ්ම ලෝකයෙහි පිහිටුවා අසුනින් නැගිට පිටත්වුනා නෙව.”
ඉක්බිති ආයුෂ්මත් සාරිපුත්තයන් වහන්සේ භාග්‍යවතුන් වහන්සේ වෙත වැඩම කළා. වැඩම කොට භාග්‍යවතුන් වහන්සේට ආදරයෙන් වන්දනා කොට එකත්පස්ව වාඩිවුනා. එකත්පස්ව හුන් ආයුෂ්මත් සාරිපුත්තයන් වහන්සේ භාග්‍යවතුන් වහන්සේට මෙය පැවසුවා.
“ස්වාමීනී, ධනඤ්ජානි බ්‍රාහ්මණයා අසනීපව, අසාධ්‍යව, දුක්ඛිතව ඉන්නවා. ඔහු භාග්‍යවතුන් වහන්සේ ගේ සිරිපා කමල් නළල බිම තබා වන්දනා කරනවා”
“කිම? පින්වත් සාරිපුත්ත, ධනඤ්ජානි බ්‍රාහ්මණයාට තවදුරටත් සිත දියුණු කරගන්නට අවස්ථාව තිබෙද්දී ම ඔහුව හීන වූ බ්‍රහ්ම ලෝකයෙහි පිහිටුවා ඔබ අසුනින් නැගිට පිටත්වුනා නෙව ද?”
“ස්වාමීනී, මට මෙහෙමයි සිතුනේ. මේ බ්‍රාහ්මණවරුන් කියන්නේ බ්‍රහ්ම ලෝකයෙහි උපදින්නට ආසා ඇති උදවිය නෙව. ඉතින් ධනඤ්ජානි බ්‍රාහ්මණයාට බ්‍රහ්මලෝකයෙහි උපදින්නට මාර්ගය කියන එක තමයි හොඳ කියල.”
“පින්වත් සාරිපුත්ත, ධනඤ්ජානි බ්‍රාහ්මණයා කළුරිය කළා. බ්‍රහ්ම ලෝකයෙහි ඉපදුනා.”
සාදු! සාදු!! සාදු!!!
ධනඤ්ජානි බ්‍රාහ්මණයාට වදාළ දෙසුම නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/mn2_2-5-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M