මා හට අසන්නට ලැබුනේ මේ විදිහට යි. එසමයෙහි භාග්‍යවතුන් වහන්සේ වැඩසිටියේ සැවැත් නුවර ජේතවනය නම් වූ අනේපිඬු සිටුතුමා ගේ ආරාමයේ. එදා ඒසුකාරී බ්‍රාහ්මණයා භාග්‍යවතුන් වහන්සේ වෙත පැමිණියා. පැමිණ භාග්‍යවතුන් වහන්සේ සමඟ සතුටු වුනා. සතුටුවිය යුතු පිළිසඳර කතා බහේ යෙදී එකත්පස්ව වාඩි වුනා. එකත්පස්ව වාඩි වුණු ඒසුකාරී බ්‍රාහ්මණයා භාග්‍යවතුන් වහන්සේට මෙය පැවසුවා.
“භවත් ගෞතමයන් වහන්ස, බ්‍රාහ්මණවරු සතර ආකාරයක ඇප උපස්ථානයක් පෙන්වා දෙනවා. බ්‍රාහ්මණයා හට කරන ඇප උපස්ථානයක් ගැන පෙන්වා දෙනවා. ක්ෂත්‍රියයා හට කරන ඇප උපස්ථානයක් ගැන පෙන්වා දෙනවා. වෛශ්‍යයා හට කරන ඇප උපස්ථානයක් ගැන පෙන්වා දෙනවා. ශුද්‍රයා හට කරන ඇප උපස්ථානයක් ගැන පෙන්වා දෙනවා.
භවත් ගෞතමයන් වහන්ස, ඔය කරුණ පිළිබඳව බ්‍රාහ්මණවරු බ්‍රාහ්මණයා හට මේ විදිහේ ඇප උපස්ථානයක් පණවනවා. ඒ කියන්නේ බ්‍රාහ්මණයෙක් හෝ බ්‍රාහ්මණයෙකුට ඇප උපස්ථාන කරන්නට ඕන. ක්ෂත්‍රියයෙක් හෝ බ්‍රාහ්මණයෙකුට ඇප උපස්ථාන කරන්නට ඕන. වෛශ්‍යයෙක් හෝ බ්‍රාහ්මණයෙකුට ඇප උපස්ථාන කරන්නට ඕන. ශුද්‍රයෙක් හෝ බ්‍රාහ්මණයෙකුට ඇප උපස්ථාන කරන්නට ඕන. භවත් ගෞතමයන් වහන්ස, බ්‍රාහ්මණවරු බ්‍රාහ්මණයාට මේ ඇප උපස්ථානය යි පණවන්නේ.
භවත් ගෞතමයන් වහන්ස, ඔය කරුණ පිළිබඳව බ්‍රාහ්මණවරු ක්ෂත්‍රියයා හට මේ විදිහේ ඇප උපස්ථානයක් පණවනවා. ඒ කියන්නේ ක්ෂත්‍රියයෙක් හෝ ක්ෂත්‍රියයෙකුට ඇප උපස්ථාන කරන්නට ඕන. වෛශ්‍යයෙක් හෝ ක්ෂත්‍රියයෙකුට ඇප උපස්ථාන කරන්නට ඕන. ශුද්‍රයෙක් හෝ ක්ෂත්‍රියයෙකුට ඇප උපස්ථාන කරන්නට ඕන. භවත් ගෞතමයන් වහන්ස, බ්‍රාහ්මණවරු ක්ෂත්‍රියයාට මේ ඇප උපස්ථානය යි පණවන්නේ.
භවත් ගෞතමයන් වහන්ස, ඔය කරුණ පිළිබඳව බ්‍රාහ්මණවරු වෛශ්‍යයා හට මේ විදිහේ ඇප උපස්ථානයක් පණවනවා. ඒ කියන්නේ වෛශ්‍යයෙක් හෝ වෛශ්‍යයෙකුට ඇප උපස්ථාන කරන්නට ඕන. ශුද්‍රයෙක් හෝ වෛශ්‍යයෙකුට ඇප උපස්ථාන කරන්නට ඕන. භවත් ගෞතමයන් වහන්ස, බ්‍රාහ්මණවරු වෛශ්‍යයාට මේ ඇප උපස්ථානය යි පණවන්නේ.
භවත් ගෞතමයන් වහන්ස, ඔය කරුණ පිළිබඳව බ්‍රාහ්මණවරු ශුද්‍රයා හට මේ විදිහේ ඇප උපස්ථානයක් පණවනවා. ඒ කියන්නේ ශුද්‍රයෙක් හෝ ශුද්‍රයෙකුට ඇප උපස්ථාන කරන්නට ඕන. ශුද්‍රයෙකුට වෙන කවුරු නම් ඇප උපස්ථාන කරන්නට ද? භවත් ගෞතමයන් වහන්ස, බ්‍රාහ්මණවරු ශුද්‍රයාට මේ ඇප උපස්ථානය යි පණවන්නේ.
භවත් ගෞතමයන් වහන්ස, බ්‍රාහ්මණයන් පණවා තිබෙන්නේ මෙන්න මේ ඇප උපස්ථාන හතරයි. මේ කාරණය පිළිබඳව භවත් ගෞතමයන් වහන්සේ කුමක් වදාරණ සේක් ද?”
“පින්වත් බ්‍රාහ්මණය, බ්‍රාහ්මණයන් ගේ ඔය ඇප උපස්ථාන හතර සකල ලෝකයා ම එකවර අනුමත කොට පිළිගන්නවා ද?”
“භවත් ගෞතමයන් වහන්ස, එය නොවේ ම යි.”
“පින්වත් බ්‍රාහ්මණය, ඕක මේ වගේ දෙයක්. තමා සතු කිසිවක් නැති ඉතා අසරණ දුගී දුප්පත් මිනිසෙක් ඉන්නවා. ඉතින් අකමැතිව සිටිය දී ඔහුට බිලක් ගෙවන්නට නියම කරනවා. ඒ කියන්නේ ‘එම්බා පුරුෂය, නුඹ විසින් මේ මස් අනුභව කළ යුතුයි. මෙයට මේ මිල ද ගෙවිය යුතුයි’ කියා යි. පින්වත් බ්‍රාහ්මණය, ශ්‍රමණ බ්‍රාහ්මණයන් ගේ අනුමැතියකින් තොරව බ්‍රාහ්මණයන් පණවන ලද ඇප උපස්ථානයත් ඒ වගේ තමයි.
පින්වත් බ්‍රාහ්මණය, මං සෑම උපස්ථානයක් ම කළ යුතුයි කියා කියන්නෙ නැහැ. ඒ වගේ ම පින්වත් බ්‍රාහ්මණය, මං සෑම උපස්ථානයක් ම නො කළ යුතුයි කියා කියන්නෙත් නැහැ. බ්‍රාහ්මණය, යමෙකුට ඇප උපස්ථාන කරනවා නම්, ඒ ඇප උපස්ථාන කිරීම හේතුවෙන් තමන්ට අවැඩක් සිදුවෙනවා නම්, අහිතයක් සිදුවෙනවා නම්, එබඳු ඇප උපස්ථානයක් නො කළ යුතු කියලයි මා කියන්නේ. ඒ වගේ ම බ්‍රාහ්මණය, යමෙකුට ඇප උපස්ථාන කරනවා නම්, ඒ ඇප උපස්ථාන කිරීම හේතුවෙන් තමන්ට යහපතක් සිදුවෙනවා නම්, හිතයක් සිදුවෙනවා නම්, එබඳු ඇප උපස්ථානයක් කළ යුතු කියලයි මා කියන්නේ.
පින්වත් බ්‍රාහ්මණය, ක්ෂත්‍රියයෙකුගෙන් මෙහෙම ඇසුවොත්, ‘යම් කෙනෙකුට ඔබ ඇපඋපස්ථාන කරනවා නම්, ඒ ඇපඋපස්ථානය හේතුවෙන් ඔබට අවැඩක් සිදුවෙනවා නම්, අහිතයක් සිදුවෙනවා නම්, ඒ වගේ ම යම් කෙනෙකුට ඔබ ඇපඋපස්ථාන කරද්දී ඒ ඇපඋපස්ථානය හේතුවෙන් යහපතක් සිදුවෙනවා නම්, හිතයක් සිදුවෙනවා නම් ඔබ ඇපඋපස්ථාන කරන්නේ කාටද?’ එතකොට පින්වත් බ්‍රාහ්මණය, ඒ ක්ෂත්‍රියයා නිවැරදිව උත්තර දෙනවා නම් උත්තර දිය යුත්තේ මෙහෙමයි. ‘යම් කෙනෙකුට මං ඇපඋපස්ථාන කරද්දී ඒ ඇපඋපස්ථානය හේතුවෙන් මට අවැඩක් සිදුවෙනවා නම්, අහිතයක් සිදුවෙනවා නම්, මං ඔහුට ඇප උපස්ථාන කරන්නේ නෑ. නමුත් යම් කෙනෙකුට මං ඇපඋපස්ථාන කරද්දී ඒ ඇපඋපස්ථානය හේතුවෙන් මට යහපතක් සිදුවෙනවා නම්, හිතයක් සිදුවෙනවා නම් මං ඔහුට ඒ ඇපඋපස්ථානය කරනවා.’
පින්වත් බ්‍රාහ්මණය, බ්‍රාහ්මණයෙකුගෙන් මෙහෙම ඇසුවොත්, ….(පෙ)…. වෛශ්‍යයෙකුගෙන් මෙහෙම ඇසුවොත්, ….(පෙ)…. ශුද්‍රයෙකු ගෙන් මෙහෙම ඇසුවොත්, ‘යම් කෙනෙකුට ඔබ ඇපඋපස්ථාන කරනවා නම්, ඒ ඇපඋපස්ථානය හේතුවෙන් ඔබට අවැඩක් සිදුවෙනවා නම්, අහිතයක් සිදුවෙනවා නම්, ඒ වගේ ම යම් කෙනෙකුට ඔබ ඇපඋපස්ථාන කරද්දී ඒ ඇපඋපස්ථානය හේතුවෙන් යහපතක් සිදුවෙනවා නම්, හිතයක් සිදුවෙනවා නම් ඔබ ඇපඋපස්ථාන කරන්නේ කාටද?’ එතකොට පින්වත් බ්‍රාහ්මණය, ඒ ශුද්‍රයා නිවැරදිව උත්තර දෙනවා නම් උත්තර දිය යුත්තේ මෙහෙමයි. ‘යම් කෙනෙකුට මං ඇපඋපස්ථාන කරද්දී ඒ ඇපඋපස්ථානය හේතුවෙන් මට අවැඩක් සිදුවෙනවා නම්, අහිතයක් සිදුවෙනවා නම්, මං ඔහුට ඇප උපස්ථාන කරන්නේ නෑ. නමුත් යම් කෙනෙකුට මං ඇපඋපස්ථාන කරද්දී ඒ ඇපඋපස්ථානය හේතුවෙන් මට යහපතක් සිදුවෙනවා නම්, හිතයක් සිදුවෙනවා නම් මං ඔහුට ඒ ඇපඋපස්ථානය කරනවා’ කියලයි.
පින්වත් බ්‍රාහ්මණය, උසස් කුලයක ඉපදුනා ය කියලා එය ශ්‍රේෂ්ඨත්වයක් හැටියට මං කියන්නෙ නෑ. පින්වත් බ්‍රාහ්මණය, උසස් කුලයක ඉපදුනා ය කියලා එය ලාමක දෙයක් බවත් මං කියන්නෙ නෑ.
පින්වත් බ්‍රාහ්මණය, ලස්සන රූපයක් තිබුනා ය කියලා එය ශ්‍රේෂ්ඨත්වයක් හැටියට මං කියන්නෙ නෑ. පින්වත් බ්‍රාහ්මණය, ලස්සන රූපයක් තිබුනා ය කියලා එය ලාමක දෙයක් බවත් මං කියන්නෙ නෑ.
පින්වත් බ්‍රාහ්මණය, ඉතා හොඳින් ධන සම්පත් තිබුනා ය කියලා එය ශ්‍රේෂ්ඨත්වයක් හැටියට මං කියන්නෙ නෑ. පින්වත් බ්‍රාහ්මණය, ඉතා හොඳින් ධන සම්පත් තිබුනා ය කියලා එය ලාමක දෙයක් බවත් මං කියන්නෙ නෑ.
මෙහිලා පින්වත් බ්‍රාහ්මණය, ඉතා උසස් කුලයකට අයිති කෙනෙක් වුනත් සතුන් මරණවා නම්, සොරකම් කරනවා නම්, වැරදි කාම සේවනයෙහි යෙදෙනවා නම්, බොරු කියනවා නම්, කේළාම් කියනවා නම්, ඵරුෂ වචන කියනවා නම්, හිස් වචන කියනවා නම්, අනුන්ගේ දෙයට ආශා කරනවා නම්, ද්වේශ සිතින් ඉන්නවා නම්, මිත්‍යා දෘෂ්ඨික නම් ඒ කාරණා නිසා ඔහු ගේ උසස් කුලයක් ඇති බව ශ්‍රේෂ්ඨ දෙයක් කියා මා කියන්නේ නෑ.
මෙහිලා පින්වත් බ්‍රාහ්මණය, ඉතා උසස් කුලයකට අයිති කෙනෙක් වුනත් සතුන් මැරීමෙන් වැළකී සිටිනවා නම්, සොරකම් කිරීමෙන් වැළකී සිටිනවා නම්, වැරදි කාම සේවනයෙහි යෙදීමෙන් වැළකී සිටිනවා නම්, බොරු කීමෙන් වැළකී සිටිනවා නම්, කේළාම් කීමෙන් වැළකී සිටිනවා නම්, ඵරුෂ වචන කීමෙන් වැළකී සිටිනවා නම්, හිස් වචන කීමෙන් වැළකී සිටිනවා නම්, අනුන්ගේ දෙයට ආශා නො කරනවා නම්, ද්වේශ සිතින් නො ඉන්නවා නම්, සම්‍යක් දෘෂ්ඨික නම් ඒ කාරණා නිසා ඔහු ගේ උසස් කුලයක් ඇති බව ලාමක දෙයක් කියා මා කියන්නේ නෑ.
මෙහිලා පින්වත් බ්‍රාහ්මණය, ඉතා ලස්සන රූපයක් ඇති කෙනෙක් වුනත් ….(පෙ)…. මහා ධන සම්පත් ඇති කෙනෙක් වුනත් සතුන් මරණවා නම්, සොරකම් කරනවා නම්, වැරදි කාම සේවනයෙහි යෙදෙනවා නම්, බොරු කියනවා නම්, කේළාම් කියනවා නම්, ඵරුෂ වචන කියනවා නම්, හිස් වචන කියනවා නම්, අනුන්ගේ දෙයට ආශා කරනවා නම්, ද්වේශ සිතින් ඉන්නවා නම්, මිත්‍යා දෘෂ්ඨික නම් ඒ කාරණා නිසා ඔහු ගේ මහා ධන සම්පත් ඇති බව ශ්‍රේෂ්ඨ දෙයක් කියා මා කියන්නේ නෑ.
මෙහිලා පින්වත් බ්‍රාහ්මණය, මහා ධන සම්පත් ඇති කෙනෙක් වුනත් සතුන් මැරීමෙන් වැළකී සිටිනවා නම්, සොරකම් කිරීමෙන් වැළකී සිටිනවා නම්, වැරදි කාම සේවනයෙහි යෙදීමෙන් වැළකී සිටිනවා නම්, බොරු කීමෙන් වැළකී සිටිනවා නම්, කේළාම් කීමෙන් වැළකී සිටිනවා නම්, ඵරුෂ වචන කීමෙන් වැළකී සිටිනවා නම්, හිස් වචන කීමෙන් වැළකී සිටිනවා නම්, අනුන්ගේ දෙයට ආශා නො කරනවා නම්, ද්වේශ සිතින් නො ඉන්නවා නම්, සම්‍යක් දෘෂ්ඨික නම් ඒ කාරණා නිසා ඔහු ගේ මහා ධන සම්පත් ඇති බව ලාමක දෙයක් කියා මා කියන්නේ නෑ.
එනිසා පින්වත් බ්‍රාහ්මණය, සියළු ඇපඋපස්ථාන කළ යුතු යැයි මා කියන්නේ නෑ. සියළු ඇපඋපස්ථාන නො කළ යුතු යැයි මා කියන්නෙත් නෑ. පින්වත් බ්‍රාහ්මණය, යම් කෙනෙකුට ඇප උපස්ථාන කරද්දී ඒ හේතුවෙන් තමන් තුළ ශ්‍රද්ධාව වැඩෙනවා නම්, සීලය වැඩෙනවා නම්, ශ්‍රැතය වැඩෙනවා නම්, ත්‍යාගය වැඩෙනවා නම්, ප්‍රඥාව වැඩෙනවා නම්, ඔහුට ඇප උපස්ථාන කළ යුතුයි කියා යි මා කියන්නේ. පින්වත් බ්‍රාහ්මණය, යම් කෙනෙකුට ඇප උපස්ථාන කරද්දී ඒ හේතුවෙන් තමන් තුළ ශ්‍රද්ධාව වැඩෙන්නේ නැතිනම්, සීලය වැඩෙන්නේ නැතිනම්, ශ්‍රැතය වැඩෙන්නේ නැතිනම්, ත්‍යාගය වැඩෙන්නේ නැතිනම් නම්, ප්‍රඥාව වැඩෙන්නේ නැතිනම්, ඔහුට ඇප උපස්ථාන නො කළ යුතුයි කියා යි මා කියන්නේ.”
මෙසේ වදාළ විට ඒසුකාරී බ්‍රාහ්මණයා භාග්‍යවතුන් වහන්සේට මෙය පැවසුවා. “භවත් ගෞතමයන් වහන්ස, බ්‍රාහ්මණවරු සතර ආකාරයක ධනයක් පෙන්වා දෙනවා. බ්‍රාහ්මණයා හට තමන්ගේ ය කියා තිබිය යුතු ධනයක් ගැන පෙන්වා දෙනවා. ක්ෂත්‍රියයා හට තමන්ගේ ය කියා තිබිය යුතු ධනයක් ගැන පෙන්වා දෙනවා. වෛශ්‍යයා හට තමන්ගේ ය කියා තිබිය යුතු ධනයක් ගැන පෙන්වා දෙනවා. ශුද්‍රයා හට තමන්ගේ ය කියා තිබිය යුතු ධනයක් ගැන පෙන්වා දෙනවා.
භවත් ගෞතමයන් වහන්ස, ඒ පිළිබඳව බ්‍රාහ්මණවරු බ්‍රාහ්මණයාහට තමන්ගේ ය කියා තිබිය යුතු ධනයක් ගැන පෙන්වා දෙන්නේ මෙය යි. එනම්; පිණ්ඩපාතයෙන් ජීවත් වීමයි. බ්‍රාහ්මණයා ඒ පිණ්ඩපාතයෙන් ජීවත් වීම ඉක්මවා ගියොත් ඔහු තමන් ගේ වංශයේ උදවිය නො කළ දේ කළා වෙනවා. ආරක්ෂාවට සිටින පුද්ගලයා ම සොරකමක් කළා වෙනවා. භවත් ගෞතමයන් වහන්ස, බ්‍රාහ්මණයෝ බ්‍රාහ්මණයා හට ස්වකීය ධනය හැටියට පෙන්වා දෙන්නේ මෙයයි.
භවත් ගෞතමයන් වහන්ස, ඒ පිළිබඳව බ්‍රාහ්මණවරු ක්ෂත්‍රියයා හට තමන්ගේ ය කියා තිබිය යුතු ධනයක් ගැන පෙන්වා දෙන්නේ මෙය යි. එනම්; දුනු හියවුරයි. ක්ෂත්‍රියයා ඒ දුනු හියවුර ඉක්මවා ගියොත් ඔහු තමන් ගේ වංශයේ උදවිය නො කළ දේ කළා වෙනවා. ආරක්ෂාවට සිටින පුද්ගලයා ම සොරකමක් කළා වෙනවා. භවත් ගෞතමයන් වහන්ස, බ්‍රාහ්මණයෝ ක්ෂත්‍රියයා හට ස්වකීය ධනය හැටියට පෙන්වා දෙන්නේ මෙයයි.
භවත් ගෞතමයන් වහන්ස, ඒ පිළිබඳව බ්‍රාහ්මණවරු වෛශ්‍යයා හට තමන්ගේ ය කියා තිබිය යුතු ධනයක් ගැන පෙන්වා දෙන්නේ මෙය යි. එනම්; කෘෂිකර්මය හා ගවපාලනයයි. වෛශ්‍යයා ඒ කෘෂිකර්මය හා ගවපාලනය ඉක්මවා ගියොත් ඔහු තමන් ගේ වංශයේ උදවිය නො කළ දේ කළා වෙනවා. ආරක්ෂාවට සිටින පුද්ගලයා ම සොරකමක් කළා වෙනවා. භවත් ගෞතමයන් වහන්ස, බ්‍රාහ්මණයෝ වෛශ්‍යයා හට ස්වකීය ධනය හැටියට පෙන්වා දෙන්නේ මෙයයි.
භවත් ගෞතමයන් වහන්ස, ඒ පිළිබඳව බ්‍රාහ්මණවරු ශුද්‍රයා හට තමන්ගේ ය කියා තිබිය යුතු ධනයක් ගැන පෙන්වා දෙන්නේ මෙය යි. එනම්; දෑකැත්ත හා බඩු උසුලන කද යි. ශුද්‍රයා ඒ දෑකැත්ත හා බඩු උසුලන කද ඉක්මවා ගියොත් ඔහු තමන් ගේ වංශයේ උදවිය නො කළ දේ කළා වෙනවා. ආරක්ෂාවට සිටින පුද්ගලයා ම සොරකමක් කළා වෙනවා. භවත් ගෞතමයන් වහන්ස, බ්‍රාහ්මණයෝ ශුද්‍රයා හට ස්වකීය ධනය හැටියට පෙන්වා දෙන්නේ මෙයයි. භවත් ගෞතමයන් වහන්ස, බ්‍රාහ්මණවරු මේ සතර ආකාරයක ධනයන් ගැන පෙන්වා දෙනවා. භවත් ගෞතමයන් වහන්සේ මේ කාරණය පිළිබඳව කුමක් වදාරණ සේක් ද?
“පින්වත් බ්‍රාහ්මණය, බ්‍රාහ්මණයන් ගේ ඔය ධන හතර සකල ලෝකයා ම එකවර අනුමත කොට පිළිගන්නවා ද?”
“භවත් ගෞතමයන් වහන්ස, එය නොවේ ම යි.”
“පින්වත් බ්‍රාහ්මණය, ඕක මේ වගේ දෙයක්. තමා සතු කිසිවක් නැති ඉතා අසරණ දුගී දුප්පත් මිනිසෙක් ඉන්නවා. ඉතින් අකමැතිව සිටිය දී ඔහුට බිලක් ගෙවන්නට නියම කරනවා. ඒ කියන්නේ ‘එම්බා පුරුෂය, නුඹ විසින් මේ මස් අනුභව කළ යුතුයි. මෙයට මේ මිල ද ගෙවිය යුතුයි’ කියා යි. පින්වත් බ්‍රාහ්මණය, ශ්‍රමණ බ්‍රාහ්මණයන් ගේ අනුමැතියකින් තොරව බ්‍රාහ්මණයන් පණවන ලද ධනය ත් ඒ වගේ තමයි.
පින්වත් බ්‍රාහ්මණය, මනුෂ්‍යයා හට තමන් ගේ ම ධනයක් හැටියට මා පණවන්නේ ආර්ය වූ ලොව්තුරා දහම යි. මව්පියන් ගේ පැරණි පරම්පරාව සිහිකරද්දී යම් යම් කුල පරම්පරාවක උපදීද, ඒ ඒ කුල පරම්පරාවේ නමින් ම ඔහුව හඳුන්වනවා. ඒ කියන්නේ කෙනෙක් ක්ෂත්‍රිය කුලයේ ඉපදුනොත් ඔහුට කියන්නේ ක්ෂත්‍රියයා කියලයි. කෙනෙක් බ්‍රාහ්මණ කුලයේ ඉපදුනොත් ඔහුට කියන්නේ බ්‍රාහ්මණයා කියලයි. කෙනෙක් වෛශ්‍ය කුලයේ ඉපදුනොත් ඔහුට කියන්නේ වෛශ්‍යයා කියලයි. කෙනෙක් ශුද්‍ර කුලයේ ඉපදුනොත් ඔහුට කියන්නේ ශුද්‍රයා කියලයි.
පින්වත් බ්‍රාහ්මණය, ඒක මේ වගේ දෙයක්. යම් යම් දෙයක් උපකාරයෙන් ගින්නක් ඇවිලේ ද, එතකොට ඒ ගින්න ඒ උපකාරක ධර්මයේ නාමයෙන් හඳුන්වනවා. දර නිසා ගින්නක් ඇවිලේ නම්, එයට දර ගින්න කියා කියනවා. පතුරු නිසා ගින්නක් ඇවිලේ නම්, එයට පතුරු ගින්න කියා කියනවා. තණ නිසා ගින්නක් ඇවිලේ නම්, එයට තණ ගින්න කියා කියනවා. ගොම නිසා ගින්නක් ඇවිලේ නම්, එයට ගොම ගින්න කියා කියනවා.
පින්වත් බ්‍රාහ්මණය, එපරිද්දෙන් ම මං මනුෂ්‍යයා හට තමන් ගේ ම ධනයක් හැටියට මා පණවන්නේ ආර්ය වූ ලොව්තුරා දහම යි. මව්පියන් ගේ පැරණි පරම්පරාව සිහිකරද්දී යම් යම් කුල පරම්පරාවක උපදීද, ඒ ඒ කුල පරම්පරාවේ නමින් ම ඔහුව හඳුන්වනවා. ඒ කියන්නේ කෙනෙක් ක්ෂත්‍රිය කුලයේ ඉපදුනොත් ඔහුට කියන්නේ ක්ෂත්‍රියයා කියලයි. කෙනෙක් බ්‍රාහ්මණ කුලයේ ඉපදුනොත් ඔහුට කියන්නේ බ්‍රාහ්මණයා කියලයි. කෙනෙක් වෛශ්‍ය කුලයේ ඉපදුනොත් ඔහුට කියන්නේ වෛශ්‍යයා කියලයි. කෙනෙක් ශුද්‍ර කුලයේ ඉපදුනොත් ඔහුට කියන්නේ ශුද්‍රයා කියලයි.
පින්වත් බ්‍රාහ්මණය, ක්ෂත්‍රීය කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ඔහු තථාගතයන් වහන්සේ විසින් වදාරණ ලද ධර්ම විනයට පැමිණ සතුන් මැරීමෙන් වළකිනවා නම්, සොරකමින් වළකිනවා නම්, අබ්‍රහ්මචරියාවෙන් වළකිනවා නම්, බොරු කීමෙන් වළකිනවා නම්, කේළමින් වළකිනවා නම්, ඵරුෂ වචනයෙන් වළකිනවා නම්, හිස් වචනයෙන් වළකිනවා නම්, අනුන් ගේ දෙයට ආශා නො කරයි නම්, ද්වේශ නො කරයි නම්, සම්‍යක් දෘෂ්ඨියෙන් යුක්ත වෙයි නම් අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා.
පින්වත් බ්‍රාහ්මණය, බ්‍රාහ්මණ කුලයෙන් වේවා ….(පෙ)…. වෛශ්‍ය කුලයෙන් වේවා ….(පෙ)…. ශුද්‍ර කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ඔහු තථාගතයන් වහන්සේ විසින් වදාරණ ලද ධර්ම විනයට පැමිණ සතුන් මැරීමෙන් වළකිනවා නම්, සොරකමින් වළකිනවා නම්, අබ්‍රහ්මචරියාවෙන් වළකිනවා නම්, බොරු කීමෙන් වළකිනවා නම්, කේළමින් වළකිනවා නම්, ඵරුෂ වචනයෙන් වළකිනවා නම්, හිස් වචනයෙන් වළකිනවා නම්, අනුන් ගේ දෙයට ආශා නො කරයි නම්, ද්වේශ නො කරයි නම්, සම්‍යක් දෘෂ්ඨියෙන් යුක්ත වෙයි නම් අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා.
පින්වත් බ්‍රාහ්මණය, ඒ ගැන කුමක් ද සිතන්නේ? මෙම ප්‍රදේශය පුරාවට වෛර රහිත වූ, පීඩා රහිත වූ, මෛත්‍රී චිත්තය වඩන්නට පුළුවන් වන්නේ බ්‍රාහ්මණයෙකුට පමණක් ද? ඇයි ක්ෂත්‍රියයෙකුට බැරිද? ඇයි වෛශ්‍යයෙකුට බැරිද? ඇයි ශුද්‍රයෙකුට බැරිද?”
“භවත් ගෞතමයන් වහන්ස, එය එසේ නොවේ. භවත් ගෞතමයන් වහන්ස, බ්‍රාහ්මණයෙකුට වුනත් මෙම ප්‍රදේශය පුරාවට වෛර රහිත වූ, පීඩා රහිත වූ, මෛත්‍රී චිත්තය වඩන්නට පුළුවනි. ක්ෂත්‍රියයෙකුට වුනත් ….(පෙ)…. වෛශ්‍යයෙකුට වුනත් ….(පෙ)…. ශුද්‍රයෙකුට වුනත් මෙම ප්‍රදේශය පුරාවට වෛර රහිත වූ, පීඩා රහිත වූ, මෛත්‍රී චිත්තය වඩන්නට පුළුවනි.”
“පින්වත් බ්‍රාහ්මණය, ඒ වගේ ම තමයි, ක්ෂත්‍රීය කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ….(පෙ)…. අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා. බ්‍රාහ්මණ කුලයෙන් වේවා ….(පෙ)…. වෛශ්‍ය කුලයෙන් වේවා ….(පෙ)…. ශුද්‍ර කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ඔහු තථාගතයන් වහන්සේ විසින් වදාරණ ලද ධර්ම විනයට පැමිණ සතුන් මැරීමෙන් වළකිනවා නම්, සොරකමින් වළකිනවා නම්, අබ්‍රහ්මචරියාවෙන් වළකිනවා නම්, බොරු කීමෙන් වළකිනවා නම්, කේළමින් වළකිනවා නම්, ඵරුෂ වචනයෙන් වළකිනවා නම්, හිස් වචනයෙන් වළකිනවා නම්, අනුන් ගේ දෙයට ආශා නො කරයි නම්, ද්වේශ නො කරයි නම්, සම්‍යක් දෘෂ්ඨියෙන් යුක්ත වෙයි නම් අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා.
පින්වත් බ්‍රාහ්මණය, ඒ ගැන ඔබ කුමක්ද සිතන්නේ? පිට අතුල්ලන ලණුව ගෙන නාන්නට නදියට ගොස් ඇඟපත ඇතිල්ලුවොත් කුණු දූවිලි සෝදන්නට පුළුවන් වන්නේ බ්‍රාහ්මණයෙකුට විතරක් ද? ඇයි ක්ෂත්‍රියයෙකුට බැරිද? ඇයි වෛශ්‍යයෙකුට බැරිද? ඇයි ශුද්‍රයෙකුට බැරිද?”
“භවත් ගෞතමයන් වහන්ස, එය එසේ නොවේ. භවත් ගෞතමයන් වහන්ස, බ්‍රාහ්මණයෙකුට වුණත් පිට අතුල්ලන ලණුව ගෙන නාන්නට නදියට ගොස් ඇඟ පත අතුල්ලන විට දුහුවිලි කුණු සෝදා හරින්නට පුළුවනි. ක්ෂත්‍රියයෙකුට වුනත් ….(පෙ)…. වෛශ්‍යයෙකුට වුනත් ….(පෙ)…. ශුද්‍රයෙකුට වුනත් පිට අතුල්ලන ලණුව ගෙන නාන්නට නදියට ගොස් ඇඟ පත අතුල්ලන විට දුහුවිලි කුණු සෝදා හරින්නට පුළුවනි.”
“පින්වත් බ්‍රාහ්මණය, ඒ වගේ ම තමයි, ක්ෂත්‍රීය කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ….(පෙ)…. අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා. බ්‍රාහ්මණ කුලයෙන් වේවා ….(පෙ)…. වෛශ්‍ය කුලයෙන් වේවා ….(පෙ)…. ශුද්‍ර කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ඔහු තථාගතයන් වහන්සේ විසින් වදාරණ ලද ධර්ම විනයට පැමිණ සතුන් මැරීමෙන් වළකිනවා නම්, සොරකමින් වළකිනවා නම්, අබ්‍රහ්මචරියාවෙන් වළකිනවා නම්, බොරු කීමෙන් වළකිනවා නම්, කේළමින් වළකිනවා නම්, ඵරුෂ වචනයෙන් වළකිනවා නම්, හිස් වචනයෙන් වළකිනවා නම්, අනුන් ගේ දෙයට ආශා නො කරයි නම්, ද්වේශ නො කරයි නම්, සම්‍යක් දෘෂ්ඨියෙන් යුක්ත වෙයි නම් අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා.
පින්වත් බ්‍රාහ්මණය, ඒ ගැන ඔබ කුමක්ද සිතන්නේ? මෙහිලා ඔටුණු පළන් රජ කෙනෙක් නා නා කුලයන්ට අයත් පුරුෂයන් අතුරෙන් සියයක් පුරුෂයන් රැස්කරනවා. ‘භවත්නි, මෙහි එත්වා. යමෙක් ක්ෂත්‍රීය කුලයේ උපන්නා ද, යමෙක් බ්‍රාහ්මණ කුලයේ උපන්නා ද, යමෙක් වෙනත් රජ කුලයක උපන්නා ද, ඔවුන් සල් ගසක වේවා, සලල ගසක වේවා, සඳුන් ගසක වේවා, පදුම ගසක වේවා, ලීයෙන් කළ උත්තරාරණිය නම් වූ ගිනිගානා දණ්ඩ ගෙන ගිනි දල්වත්වා! තේජස පහළ කරත්වා! භවත්නි, දෙවනුව මෙහි එත්වා. යමෙක් චණ්ඩාල කුලයෙන් හෝ, නේසාද කුලයෙන් හෝ, වේණ කුලයෙන් හෝ, රථකාර කුලයෙන් හෝ, පුක්කුස කුලයෙන් හෝ උපන් කෙනෙක් ඇද්ද, ඔවුන් පැමිණෙත්වා! ඔවුන් ද සතුන් පැන් බොන දෙණියෙන් ලත් ලීයෙන් කළ, ඌරන් බුදින දෙණියෙන් ලත් ලීයෙන් කළ, රෙදි අපුල්ලන්නන් සෝදන දෙණියෙන් ලත් ලීයෙන් කළ, එහෙමත් නැත්නම් ඒලණ්ඩ නම් නීච වර්ගයේ ලීයෙන් කළ උත්තරාරණිය ගෙන ගිනි දල්වත්වා! තේජස පහළ කරත්වා!’
එතකොට පින්වත් බ්‍රාහ්මණය, ඒ ගැන කුමක් ද සිතන්නේ? ක්ෂත්‍රීය කුලයෙන් හෝ බමුණු කුලයෙන් හෝ වෙනත් රජ පවුලකින් හෝ උපන් කෙනා විසින් සල්ලීයෙන් කළ හෝ සලල ලීයෙන් කළ හෝ, සඳුන් ලීයෙන් කළ හෝ පදුම ලීයෙන් කළ හෝ උත්තරාරණයක් ගෙන දල්වන යම් ගින්නක් ඇද්ද, පහළ කළ යම් තේජසක් ඇද්ද, මෙම ගින්නෙහි විතර ද දැල්ල තියෙන්නේ? මෙම ගින්නෙහි විතර ද එළිය තියෙන්නේ? මෙම ගින්න විතර ද ප්‍රභාෂ්වර වන්නේ? ගින්නකින් යමක් කළ යුතුද, එය කළ හැක්කේ එම ගින්නෙන් විතරද?
ඒ වගේ ම චණ්ඩාල කුලයෙන් හෝ නේසාද කුලයෙන් හෝ වේණ කුලයෙන් හෝ රථකාර කුලයෙන් හෝ පුක්කුස කුලයෙන් හෝ උපන් අය විසින් සතුන් පැන් බොන දෙණියට අයත් ලීයෙන් කළ හෝ ඌරන් බුදින තැන ලීයෙන් කළ හෝ රජකයන් රෙදි සෝදන තැන ලීයෙන් කළ හෝ ඒලණ්ඩ ලීයෙන් කළ හෝ උත්තරාරණිය ගෙන දල්වන යම් ගින්නක් ඇද්ද, පහළ කරන යම් තේජසක් ඇද්ද, එම ගින්නෙහි දැල්ලක් නැද්ද? එම ගින්නෙහි එළියක් නැද්ද? එම ගින්න ප්‍රභාෂ්වර නැද්ද? ගින්නකින් යමක් කළ යුතුද, එය ඒ ගින්නෙන් කරන්නට බැරිද?”
“භවත් ගෞතමයන් වහන්ස, එය එසේ නොවේ. භවත් ගෞතමයන් වහන්ස, ක්ෂත්‍රීය කුලයෙන් හෝ බමුණු කුලයෙන් හෝ වෙනත් රජ පවුලකින් හෝ උපන් කෙනා විසින් සල්ලීයෙන් කළ හෝ සලල ලීයෙන් කළ හෝ, සඳුන් ලීයෙන් කළ හෝ පදුම ලීයෙන් කළ හෝ උත්තරාරණයක් ගෙන දල්වන යම් ගින්නක් ඇද්ද, පහළ කළ යම් තේජසක් ඇද්ද, මෙම ගින්නෙහි ත් දැල්ල තියෙනවා. මෙම ගින්නෙහිත් එළිය තියෙනවා. මෙම ගින්න ත් ප්‍රභාෂ්වර යි. ගින්නකින් යමක් කළ යුතුද, එය මෙම ගින්නෙනුත් කරන්නට පුළුවන්.
ඒ වගේ ම භවත් ගෞතමයන් වහන්ස, චණ්ඩාල කුලයෙන් හෝ නේසාද කුලයෙන් හෝ වේණ කුලයෙන් හෝ රථකාර කුලයෙන් හෝ පුක්කුස කුලයෙන් හෝ උපන් අය විසින් සතුන් පැන් බොන දෙණියට අයත් ලීයෙන් කළ හෝ ඌරන් බුදින තැන ලීයෙන් කළ හෝ රජකයන් රෙදි සෝදන තැන ලීයෙන් කළ හෝ ඒලණ්ඩ ලීයෙන් කළ හෝ උත්තරාරණිය ගෙන දල්වන යම් ගින්නක් ඇද්ද, පහළ කරන යම් තේජසක් ඇද්ද, එම ගින්නෙහි ත් දැල්ලක් තියෙනවා. එම ගින්නෙහි ත් එළියක් තියෙනවා. එම ගින්න ත් ප්‍රභාෂ්වර යි. ගින්නකින් යමක් කළ යුතුද, එය ඒ ගින්නෙනුත් කරන්නට පුළුවන්.”
“පින්වත් බ්‍රාහ්මණය, ඒ වගේ ම තමයි, ක්ෂත්‍රීය කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ….(පෙ)…. අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා. බ්‍රාහ්මණ කුලයෙන් වේවා ….(පෙ)…. වෛශ්‍ය කුලයෙන් වේවා ….(පෙ)…. ශුද්‍ර කුලයෙන් වේවා ගිහි ගෙයින් නික්ම අනගාරික සසුනෙහි පැවිදි වෙනවා නම්, ඔහු තථාගතයන් වහන්සේ විසින් වදාරණ ලද ධර්ම විනයට පැමිණ සතුන් මැරීමෙන් වළකිනවා නම්, සොරකමින් වළකිනවා නම්, අබ්‍රහ්මචරියාවෙන් වළකිනවා නම්, බොරු කීමෙන් වළකිනවා නම්, කේළමින් වළකිනවා නම්, ඵරුෂ වචනයෙන් වළකිනවා නම්, හිස් වචනයෙන් වළකිනවා නම්, අනුන් ගේ දෙයට ආශා නො කරයි නම්, ද්වේශ නො කරයි නම්, සම්‍යක් දෘෂ්ඨියෙන් යුක්ත වෙයි නම් අවබෝධය ඇතිකරවන කුසල ධර්මයන් ඔහු තුළ උපදවා ගන්නට පුළුවන් වෙනවා.”
මෙසේ වදාළ විට ඒසුකාරී බ්‍රාහ්මණයා භාග්‍යවතුන් වහන්සේට මෙය පැවසුවා. භවත් ගෞතමයන් වහන්ස, ඉතාමත් සුන්දරයි! භවත් ගෞතමයන් වහන්ස, ඉතාමත් සුන්දරයි! ….(පෙ)…. භවත් ගෞතමයන් වහන්සේ අද පටන් දිවි හිමියෙන් තෙරුවන් සරණ ගිය උපාසකයෙකු වශයෙන් මාව පිළිගන්නා සේක්වා!”
සාදු! සාදු!! සාදු!!!
ඒසුකාරී බ්‍රාහ්මණයාට වදාළ දෙසුම නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/mn2_2-5-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M