මා හට අසන්නට ලැබුනේ මේ විදිහට යි. එසමයෙහි ආයුෂ්මත් මහා කච්චානයන් වහන්සේ මධුරා පුරයෙහි ගුන්දා වනයෙහි වැඩ සිටියේ. ඒ මධුරාපුරවැසි අවන්තිපුත්‍ර රජතුමා හට මෙය අසන්නට ලැබුනා. “භවත්නි, කච්චාන ශ්‍රමණයන් වහන්සේ මධුරාපුර ගුන්දා වනයෙහි වැඩසිටිනවා කියල යි. ඒ භවත් කච්චානයන් වහන්සේ පිළිබඳව මෙවැනි කල්‍යාණ වූ කීර්ති රාවයක් උස්ව නැගී තිබෙනවා. ‘භවත් කච්චානයන් වහන්සේ සත්පුරුෂ පණ්ඩිතයෙක්. ව්‍යක්ත කෙනෙක්. ප්‍රඥාවන්ත කෙනෙක්. බහුශ්‍රැත කෙනෙක්. විචිත්‍ර වූ ධර්මකථික කෙනෙක්. කල්‍යාණ ප්‍රතිභාන ඇති කෙනෙක්. වයෝවෘද්ධ කෙනෙක්. ඒ වගේ ම රහතන් වහන්සේ නමක්’ කියල. එබඳු ආකාර වූ රහතන් වහන්සේ නමක් දකින්නට ලැබීම කොතරම් හොඳ ද!”
ඉතින් මධුරාපුරවැසි අවන්තිපුත්‍ර රජතුමා සොඳුරු සොඳුරු වාහනයන් සකසා, සොඳුරු වාහනයක නැගී, සොඳුරු සොඳුරු වාහන වලින් මහත් රාජානුභාවයෙන් යුතුව ආයුෂ්මත් කච්චානයන් වහන්සේව දකිනු පිණිස මධුරාපුරයෙන් නික්ම ගියා. යානයෙන් යා හැකි තාක් ගොස් යානයෙන් බැස පා ගමනින් ම පිරිස් පිරිවරාගෙන ආයුෂ්මත් කච්චාන තෙරුන් කරා පැමිණුනා. පැමිණ ආයුෂ්මත් කච්චාන තෙරුන් සමඟ සතුටු වුනා. සතුටු විය යුතු පිළිසඳර කතාව නිමවා එකත්පස්ව වාඩිවුනා. එකත්පස්ව වාඩි වූ මධුරාපුරවැසි අවන්ති පුත්‍ර රජතුමා ආයුෂ්මත් කච්චාන තෙරුන්ට මෙය පැවසුවා.
“භවත් කච්චානයන් වහන්ස, බ්‍රාහ්මණයන් මෙහෙම කියනවා. ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි. සුදු වර්ණයෙන් යුක්ත වන්නේ බමුණන් විතරයි. අනිත් උදවිය කළු වර්ණයෙන් යුක්තයි. බ්‍රාහ්මණයන් විතරක් පිරිසිදුයි. අබ්‍රාහ්මණයන් එහෙම නෑ. බ්‍රාහ්මණයන් කියන්නේ මහා බ්‍රහ්ම රාජයා ගේ ළයෙහි වැඩුණු දරුවන්. මුඛයෙන් උපන් දරුවන්. බ්‍රහ්මයා ගෙන් ම උපන් දරුවන්. බ්‍රහ්ම නිර්මාණය යි. බ්‍රහ්ම දායාද යි’ කියල. ඉතින් මේ ගැන භවත් කච්චානයන් පවසන්නේ කුමක් ද?”
“පින්වත් මහාරාජ, ලෝකයෙහි මෙබඳු ඝෝෂාවක් නම් තියෙනවා තමයි. ඒ කියන්නෙ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි. සුදු වර්ණයෙන් යුක්ත වන්නේ බමුණන් විතරයි. අනිත් උදවිය කළු වර්ණයෙන් යුක්තයි. බ්‍රාහ්මණයන් විතරක් පිරිසිදුයි. අබ්‍රාහ්මණයන් එහෙම නෑ. බ්‍රාහ්මණයන් කියන්නේ මහා බ්‍රහ්ම රාජයා ගේ ළයෙහි වැඩුණු දරුවන්. මුඛයෙන් උපන් දරුවන්. බ්‍රහ්මයා ගෙන් ම උපන් දරුවන්. බ්‍රහ්ම නිර්මාණය යි. බ්‍රහ්ම දායාද යි’ කියල. නමුත් මහාරාජ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි ….(පෙ)…. බ්‍රහ්ම දායාද යි’ වශයෙන් මේ බස පිළිබඳව ලෝකයේ යම් ඝෝෂාවක් ඇද්ද, ඒ ගැන තේරුම් ගත යුත්තේ මේ ආකාරයෙනුයි.
පින්වත් මහාරාජ, ඒ ගැන කුමක් ද සිතන්නේ? රාජවංශික කෙනෙකුට ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට ක්ෂත්‍රීය වංශිකයා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද? ඒ වගේ ම ඒ සමෘද්ධිමත් තැනැත්තාට බ්‍රාහ්මණයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ වංශිකයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට මෙහෙකාර කුලයේ උපන් කෙනා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද?”
“භවත් කච්චානයෙනි, රාජවංශික කෙනෙකුට ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට ක්ෂත්‍රීය වංශිකයා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි. ඒ වගේ ම ඒ සමෘද්ධිමත් තැනැත්තාට බ්‍රාහ්මණයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ වංශිකයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට මෙහෙකාර කුලයේ උපන් කෙනා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි”
“පින්වත් මහාරාජ, ඒ ගැන කුමක් ද සිතන්නේ? බ්‍රාහ්මණවංශික කෙනෙකුට ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට බ්‍රාහ්මණ වංශිකයා වුනත් පාන්දරින් නැගිට උපස්ථාන කිරීම, අන්තිමට නිදා ගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද? ඒ වගේ ම ඒ සමෘද්ධිමත් තැනැත්තාට ක්ෂත්‍රීයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ වංශිකයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට මෙහෙකාර කුලයේ උපන් කෙනා වුණත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද?”
“භවත් කච්චානයෙනි, බ්‍රාහ්මණවංශික කෙනෙකුට වුනත් ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට බ්‍රාහ්මණ වංශිකයා වුණත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි. ඒ වගේ ම ඒ සමෘද්ධිමත් තැනැත්තාට ක්ෂත්‍රීයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ වංශිකයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට මෙහෙකාර කුලයේ උපන් කෙනා වුණත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි.”
“පින්වත් මහාරාජ, ඒ ගැන කුමක් ද සිතන්නේ? වෙළඳ වංශයේ කෙනෙකුට වුනත් ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට වෛශ්‍ය වංශිකයා වුණත් පාන්දරින් නැගිට උපස්ථාන කිරීම, අන්තිමට නිදා ගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද? ඒ වගේ ම ඒ සමෘද්ධිමත් තැනැත්තාට ක්ෂත්‍රීයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට බ්‍රාහ්මණයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට මෙහෙකාර කුලයේ උපන් කෙනා වුනත් පාන්දරින් නැගිට උපස්ථාන කිරීම, අන්තිමට නිදා ගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද?”
“භවත් කච්චානයෙනි, වෙළඳ වංශයේ කෙනෙකුට වුනත් ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට වෛශ්‍ය වංශිකයා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි. ඒ වගේ ම ඒ සමෘද්ධිමත් තැනැත්තාට ක්ෂත්‍රීයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට බ්‍රාහ්මණයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට මෙහෙකාර කුලයේ උපන් කෙනා වුණත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි.”
“පින්වත් මහාරාජ, ඒ ගැන කුමක් ද සිතන්නේ? මෙහෙකාර කුලයේ කෙනෙකුට වුණත් ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට ශුද්‍ර වංශිකයා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද? ඒ වගේ ම ඒ සමෘද්ධිමත් තැනැත්තාට ක්ෂත්‍රීයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ බ්‍රාහ්මණයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ කුලයේ උපන් කෙනා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා නේද?”
“භවත් කච්චානයෙනි, මෙහෙකාර කුලයේ කෙනෙකුට වුනත් ධනයෙන් වේවා, ධාන්‍යයෙන් වේවා, රිදියෙන් වේවා, රනින් වේවා, යම් සමෘද්ධියක් තියෙනවා නම්, එතකොට ඒ සමෘද්ධිමත් තැනැත්තාට ශුද්‍ර වංශිකයා වුනත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි. ඒ වගේ ම ඒ සමෘද්ධිමත් තැනැත්තාට ක්ෂත්‍රීයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ බ්‍රාහ්මණයා වුනත් ….(පෙ)…. ඒ වගේ ම ඒ සමෘද්ධිමත් තැනැත්තාට වෙළඳ කුලයේ උපන් කෙනා වුණත් පාන්දරින් නැගිට උපස්ථාන කිරීම, අන්තිමට නිදාගැනීම, කුමක් කළ යුතු දැයි සොයා බලා කිරීම, ඔහු ගේ සිත් ගන්නා අයුරින් හැසිරීම, ඔහුට ප්‍රිය බස් පැවසීම කරනවා ම යි.”
“පින්වත් මහාරාජ, ඒ ගැන කුමක් ද සිතන්නේ? ඉදින් මෙසේ ඇති කල්හි ඔය සතර වර්ණය ම සම සම වෙනවා ද? නැද්ද? ඔබට මේ ගැන සිතෙන්නේ කොහොම ද?”
“භවත් කච්චානයෙනි, ඒකාන්තයෙන් ම ඔය විදිහට බලද්දී ඔය සතර වර්ණය ම සම සම වෙනවා ම යි. ඔය කරුණෙහිලා ඔවුන් ගේ කිසිම වෙනසක් දකින්නට නැහැ නෙව.”
“ඒ වගේ ම පින්වත් මහාරාජ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි ….(පෙ)…. බ්‍රහ්ම දායාද යි’ වශයෙන් මේ බස පිළිබඳව ලෝකයේ යම් ඝෝෂාවක් තිබුනත්, ඒ ගැන මේ ආකාරයෙන් තේරුම් ගන්නට පුළුවනි.
පින්වත් මහාරාජ, ඒ ගැන කුමක් ද සිතන්නේ? මෙහිලා යම් ක්ෂත්‍රිය වංශිකයෙක් සතුන් මරණවා නම්, සොරකම් කරනවා නම්, වැරදි කාම සේවනයේ යෙදෙනවා නම්, බොරු කියනවා නම්, කේලාම් කියනවා නම්, ඵරුෂ වචන කියනවා නම්, හිස් වචන කියනවා නම්, අනුන් සතු දෙයට ආශා කරමින් සිටිනවා නම්, ද්වේෂයෙන් සිටිනවා නම්, මිත්‍යා දෘෂ්ටියෙන් යුක්ත නම් කය බිඳී මරණින් මතු ඔහු අපාය නම් වූ දුගතිය නම් වූ විනිපාත නම් වූ නිරයෙහි උපදීවි ද? නැද්ද? මේ ගැන ඔබට සිතෙන්නේ කොහොම ද?”
“භවත් කාච්චානයන් වහන්ස, ක්ෂත්‍රිය වංශිකයෙක් වුනත් සතුන් මරණවා නම්, සොරකම් කරනවා නම්, වැරදි කාම සේවනයේ යෙදෙනවා නම්, බොරු කියනවා නම්, කේලාම් කියනවා නම්, ඵරුෂ වචන කියනවා නම්, හිස් වචන කියනවා නම්, අනුන් සතු දෙයට ආශා කරමින් සිටිනවා නම්, ද්වේෂයෙන් සිටිනවා නම්, මිත්‍යා දෘෂ්ටියෙන් යුක්ත නම් කය බිඳී මරණින් මතු ඔහු අපාය නම් වූ දුගතිය නම් වූ විනිපාත නම් වූ නිරයෙහි උපදිනවා කියල යි මට මේ ගැන හිතෙන්නෙ. ඒ වගේ ම මං ඔය කරුණ රහතන් වහන්සේලා ගෙන් අසා තියෙනවා.”
“සාදු! සාදු! පින්වත් මහාරාජ. පින්වත් මහාරාජ, ඔබට ඔය අයුරින් තේරුම් යාම ඉතාම හොඳයි. ඔය කරුණ රහතන් වහන්සේලා ගෙන් අසා තිබීම ත් ඉතා ම හොඳයි. පින්වත් මහාරාජ, මේ ගැන ඔබ කුමක් ද සිතන්නේ? මෙහිලා යම් බ්‍රාහ්මණයෙක් ….(පෙ)…. මෙහිලා යම් වෙළඳ වංශිකයෙක් ….(පෙ)…. මෙහිලා මෙහෙකාර කුලයේ උපන්නෙක් සතුන් මරණවා නම්, ….(පෙ)…. මිත්‍යා දෘෂ්ඨියෙන් යුතු නම්, කය බිඳී මරණින් මතු ඔහු අපාය නම් වූ දුගතිය නම් වූ විනිපාත නම් වූ නිරයෙහි උපදීවි ද? නැද්ද? මේ ගැන ඔබට සිතෙන්නේ කොහොම ද?”
“භවත් කාච්චානයන් වහන්ස, මෙහෙකාර කුලයෙහි උපන්නෙක් වුනත් සතුන් මරණවා නම්, ….(පෙ)…. මිත්‍යා දෘෂ්ටියෙන් යුක්ත නම් කය බිඳී මරණින් මතු ඔහු අපාය නම් වූ දුගතිය නම් වූ විනිපාත නම් වූ නිරයෙහි උපදිනවා කියල යි මට මේ ගැන හිතෙන්නෙ. ඒ වගේ ම මං ඔය කරුණ රහතන් වහන්සේලා ගෙන් අසා තියෙනවා.”
“සාදු! සාදු! පින්වත් මහාරාජ. පින්වත් මහාරාජ, ඔබට ඔය අයුරින් තේරුම් යාම ඉතාම හොඳයි. ඔය කරුණ රහතන් වහන්සේලා ගෙන් අසා තිබීම ත් ඉතා ම හොඳයි. පින්වත් මහාරාජ, ඒ ගැන කුමක් ද සිතන්නේ? ඉදින් මෙසේ ඇති කල්හි ඔය සතර වර්ණය ම සම සම වෙනවා ද? නැද්ද? ඔබට මේ ගැන සිතෙන්නේ කොහොම ද?”
“භවත් කච්චානයෙනි, ඒකාන්තයෙන් ම ඔය විදිහට බලද්දී ඔය සතර වර්ණය ම සම සම වෙනවා ම යි. ඔය කරුණෙහිලා ඔවුන් ගේ කිසිම වෙනසක් දකින්නට නැහැ නෙව.”
“ඒ වගේ ම පින්වත් මහාරාජ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි ….(පෙ)…. බ්‍රහ්ම දායාද යි’ වශයෙන් මේ බස පිළිබඳව ලෝකයේ යම් ඝෝෂාවක් තිබුනත්, ඒ ගැන මේ ආකාරයෙනු ත් තේරුම් ගන්නට පුළුවනි.
පින්වත් මහාරාජ, ඒ ගැන කුමක් ද සිතන්නේ? මෙහිලා යම් ක්ෂත්‍රිය වංශිකයෙක් සතුන් මැරීමෙන් වැළකී සිටිනවා නම්, සොරකම් කිරීමෙන් වැළකී සිටිනවා නම්, වැරදි කාම සේවනයෙන් වැළකී සිටිනවා නම්, බොරු කීමෙන් වැළකී සිටිනවා නම්, කේලාම් කීමෙන් වැළකී සිටිනවා නම්, ඵරුෂ වචන කීමෙන් වැළකී සිටිනවා නම්, හිස් වචන කීමෙන් වැළකී සිටිනවා නම්, අනුන් සතු දෙයට ආශා කිරීමෙන් වැළකී සිටිනවා නම්, ද්වේෂයෙන් වැළකී සිටිනවා නම්, සම්‍යක් දෘෂ්ටියෙන් යුක්ත නම් කය බිඳී මරණින් මතු ඔහු සුගති සංඛ්‍යාත ස්වර්ග ලෝකයෙහි උපදීවි ද? නැද්ද? මේ ගැන ඔබට සිතෙන්නේ කොහොම ද?”
“භවත් කාච්චානයන් වහන්ස, ක්ෂත්‍රිය වංශිකයෙක් වුනත් සතුන් මැරීමෙන් වැළකී සිටිනවා නම්, සොරකම් කිරීමෙන් වැළකී සිටිනවා නම්, වැරදි කාම සේවනයෙන් වැළකී සිටිනවා නම්, බොරු කීමෙන් වැළකී සිටිනවා නම්, කේලාම් කීමෙන් වැළකී සිටිනවා නම්, ඵරුෂ වචන කීමෙන් වැළකී සිටිනවා නම්, හිස් වචන කීමෙන් වැළකී සිටිනවා නම්, අනුන් සතු දෙයට ආශා කිරීමෙන් වැළකී සිටිනවා නම්, ද්වේෂයෙන් වැළකී සිටිනවා නම්, සම්‍යක් දෘෂ්ටියෙන් යුක්ත නම් කය බිඳී මරණින් මතු ඔහු සුගති සංඛ්‍යාත ස්වර්ග ලෝකයෙහි උපදිනවා කියල යි මට මේ ගැන හිතෙන්නෙ. ඒ වගේ ම මං ඔය කරුණ රහතන් වහන්සේලා ගෙන් අසා තියෙනවා.”
“සාදු! සාදු! පින්වත් මහාරාජ. පින්වත් මහාරාජ, ඔබට ඔය අයුරින් තේරුම් යාම ඉතාම හොඳයි. ඔය කරුණ රහතන් වහන්සේලා ගෙන් අසා තිබීම ත් ඉතා ම හොඳයි. පින්වත් මහාරාජ, මේ ගැන ඔබ කුමක් ද සිතන්නේ? මෙහිලා යම් බ්‍රාහ්මණයෙක් ….(පෙ)…. මෙහිලා යම් වෙළඳ වංශිකයෙක් ….(පෙ)…. මෙහිලා මෙහෙකාර කුලයේ උපන්නෙක් සතුන් මැරීමෙන් වැළකිලා ඉන්නවා නම්, ….(පෙ)…. සම්‍යක් දෘෂ්ඨියෙන් යුතු නම්, කය බිඳී මරණින් මතු ඔහු සුගති සංඛ්‍යාත ස්වර්ග ලෝකයෙහි උපදීවි ද? නැද්ද? මේ ගැන ඔබට සිතෙන්නේ කොහොම ද?”
“භවත් කාච්චානයන් වහන්ස, මෙහෙකාර කුලයෙහි උපන්නෙක් වුණත් සතුන් මැරීමෙන් වැළකිලා ඉන්නවා නම්, ….(පෙ)…. සම්‍යක් දෘෂ්ඨියෙන් යුතු නම්, කය බිඳී මරණින් මතු ඔහු සුගති සංඛ්‍යාත ස්වර්ග ලෝකයෙහි උපදිනවා කියල යි මට මේ ගැන හිතෙන්නෙ. ඒ වගේ ම මං ඔය කරුණ රහතන් වහන්සේලා ගෙන් අසා තියෙනවා.”
“සාදු! සාදු! පින්වත් මහාරාජ. පින්වත් මහාරාජ, ඔබට ඔය අයුරින් තේරුම් යාම ඉතාම හොඳයි. ඔය කරුණ රහතන් වහන්සේලා ගෙන් අසා තිබීම ත් ඉතා ම හොඳයි. පින්වත් මහාරාජ, ඒ ගැන කුමක් ද සිතන්නේ? ඉදින් මෙසේ ඇති කල්හි ඔය සතර වර්ණය ම සම සම වෙනවා ද? නැද්ද? ඔබට මේ ගැන සිතෙන්නේ කොහොම ද?”
“භවත් කච්චානයෙනි, ඒකාන්තයෙන් ම ඔය විදිහට බලද්දී ඔය සතර වර්ණය ම සම සම වෙනවා ම යි. ඔය කරුණෙහිලා ඔවුන් ගේ කිසිම වෙනසක් දකින්නට නැහැ නෙව.”
“ඒ වගේ ම පින්වත් මහාරාජ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි ….(පෙ)…. බ්‍රහ්ම දායාද යි’ වශයෙන් මේ බස පිළිබඳව ලෝකයේ යම් ඝෝෂාවක් තිබුනත්, ඒ ගැන මේ ආකාරයෙනු ත් තේරුම් ගන්නට පුළුවනි.
“පින්වත් මහාරාජ, ඒ ගැන ඔබ කුමක්ද සිතන්නේ? මෙහිලා ක්ෂත්‍රීය වංශිකයෙක් ගෙවල් බිඳිනවා නම්, ගම් පහරනවා නම්, එක ගෙයක් හෝ මංකොල්ලකනවා නම්, මං පහරනවා නම්, පිටස්තර ස්ත්‍රීන් කරා යනවා නම්, ඒ පුරුෂයන් ඔහුව අල්ලා ගෙන රජ්ජුරුවන්ට ඉදිරිපත් කරනවා නම්, ‘දේවයන් වහන්ස, මේ සොරා නුඹවහන්සේට අපරාධකාරයෙක්. මොහුට යමක් කරනු කැමති නම් ඒ දඬුවම දුන මැනව’ කියල. එතකොට ඒ සොරාට ඔබ කුමක් ද කරන්නෙ?”
“භවත් කච්චානයන් වහන්ස, එක්කො මරණීය දණ්ඩනයට පමුණුවනවා. එක්කො ධනය රාජසන්තක කරනවා. එහෙම නැත්නම් රටින් පිට කරනවා. ඒ ඒ කරුණු යෙදෙන හැටියට සිදුකරනවා. මක් නිසාද යත්; භවත් කච්චානයන් වහන්ස, ඔහුට කලින් ‘ක්ෂත්‍රිය වංශිකයා’ යැයි නමක් තිබුනට ඒ නම අතුරුදහන් වෙනවා. දැන් ‘සොරා’ කියන නම යි යෙදිල තියෙන්නෙ.”
“පින්වත් මහාරාජ, මේ ගැන කුමක්ද සිතන්නෙ? මෙහිලා බ්‍රාහ්මණයෙක් ….(පෙ)…. මෙහිලා වෙළඳ වංශිකයෙක් ….(පෙ)…. මෙහිලා මෙහෙකරු කුලයේ කෙනෙක් ගෙවල් බිඳිනවා නම්, ගම් පහරනවා නම්, එක ගෙයක් හෝ මංකොල්ලකනවා නම්, මං පහරනවා නම්, පිටස්තර ස්ත්‍රීන් කරා යනවා නම්, ඒ පුරුෂයන් ඔහුව අල්ලා ගෙන රජ්ජුරුවන්ට ඉදිරිපත් කරනවා නම්, ‘දේවයන් වහන්ස, මේ සොරා නුඹවහන්සේට අපරාධකාරයෙක්. මොහුට යමක් කරනු කැමති නම් ඒ දඬුවම දුන මැනව’ කියල. එතකොට ඒ සොරාට ඔබ කුමක් ද කරන්නෙ?”
“භවත් කච්චානයන් වහන්ස, එක්කො මරණීය දණ්ඩනයට පමුණුවනවා. එක්කො ධනය රාජසන්තක කරනවා. එහෙම නැත්නම් රටින් පිට කරනවා. ඒ ඒ කරුණු යෙදෙන හැටියට සිදුකරනවා. මක් නිසාද යත්; භවත් කච්චානයන් වහන්ස, ඔහුට කලින් ‘ශුද්‍රයා’ යැයි නමක් තිබුනට ඒ නම අතුරුදහන් වෙනවා. දැන් ‘සොරා’ කියන නම යි යෙදිල තියෙන්නෙ.”
“පින්වත් මහාරාජ, ඒ ගැන කුමක් ද සිතන්නේ? ඉදින් මෙසේ ඇති කල්හි ඔය සතර වර්ණය ම සම සම වෙනවා ද? නැද්ද? ඔබට මේ ගැන සිතෙන්නේ කොහොම ද?”
“භවත් කච්චානයෙනි, ඒකාන්තයෙන් ම ඔය විදිහට බලද්දී ඔය සතර වර්ණය ම සම සම වෙනවා ම යි. ඔය කරුණෙහිලා ඔවුන් ගේ කිසිම වෙනසක් දකින්නට නැහැ නෙව.”
“ඒ වගේ ම පින්වත් මහාරාජ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි ….(පෙ)…. බ්‍රහ්ම දායාද යි’ වශයෙන් මේ බස පිළිබඳව ලෝකයේ යම් ඝෝෂාවක් තිබුනත්, ඒ ගැන මේ ආකාරයෙනු ත් තේරුම් ගන්නට පුළුවනි.
පින්වත් මහාරාජ, මේ ගැන කුමක් ද සිතන්නේ? මෙහිලා ක්ෂත්‍රීය වංශිකයෙක් කෙස් රැවුල් බහා කසාවත් පොරවා ගිහි ගෙයින් නික්ම අනගාරික පැවිදි ජීවිතයකට පත්වෙනවා නම්, සතුන් මැරීමෙන් වෙන්ව, සොරකමින් වෙන්ව, බොරු කීමෙන් වෙන්ව, උදේ වරුවේ විතරක් වළඳමින්, බ්‍රහ්මචාරීව, සීලවන්තව, කල්‍යාණ ධර්මයන් ඇතිව සිටිනවා නම් ඔබ ඔහුට කුමක් ද කරන්නේ?”
“භවත් කච්චානයන් වහන්ස, එතකොට අපි ඔහුට වැඳුම් පිදුම් කරනවා. දැක හුනස්නෙන් හෝ නැගිටිනවා. ආසනයකින් හෝ පවරනවා. ඒ වගේ ම චීවර, පිණ්ඩපාත, සේනාසන, ගිලන්පස බෙහෙත් පිරිකරින් හෝ උපස්ථාන කරනවා. ධර්මික ආරක්ෂාවරණය සපයනවා. මක්නිසා ද යත්; භවත් කච්චානයෙනි, කලින් ඔහුට ‘ක්ෂත්‍රීය වංශිකයා’ කියා යම් නමක් තිබුනා ද, එය නැතිවුනා. ‘ශ්‍රමණයන් වහන්සේ’ යන නම ලැබුනා.”
“පින්වත් මහාරාජ, මේ ගැන කුමක්ද සිතන්නෙ? මෙහිලා බ්‍රාහ්මණයෙක් ….(පෙ)…. මෙහිලා වෙළඳ වංශිකයෙක් ….(පෙ)…. මෙහිලා මෙහෙකරු කුලයේ කෙනෙක් කෙස් රැවුල් බහා කසාවත් පොරවා ගිහි ගෙයින් නික්ම අනගාරික පැවිදි ජීවිතයකට පත්වෙනවා නම්, සතුන් මැරීමෙන් වෙන්ව, සොරකමින් වෙන්ව, බොරු කීමෙන් වෙන්ව, උදේ වරුවේ විතරක් වළඳමින්, බ්‍රහ්මචාරීව, සීලවන්තව, කල්‍යාණ ධර්මයන් ඇතිව සිටිනවා නම් ඔබ ඔහුට කුමක් ද කරන්නේ?”
“භවත් කච්චානයන් වහන්ස, එතකොට අපි ඔහුට වැඳුම් පිදුම් කරනවා. දැක හුනස්නෙන් හෝ නැගිටිනවා. ආසනයකින් හෝ පවරනවා. ඒ වගේ ම චීවර, පිණ්ඩපාත, සේනාසන, ගිලන්පස බෙහෙත් පිරිකරින් හෝ උපස්ථාන කරනවා. ධර්මික ආරක්ෂාවරණය සපයනවා. මක්නිසා ද යත්; භවත් කච්චානයෙනි, කලින් ඔහුට ‘ශුද්‍රයා’ කියා යම් නමක් තිබුනා ද, එය නැතිවුනා. ‘ශ්‍රමණයන් වහන්සේ’ යන නම ලැබුනා.”
“පින්වත් මහාරාජ, ඒ ගැන කුමක් ද සිතන්නේ? ඉදින් මෙසේ ඇති කල්හි ඔය සතර වර්ණය ම සම සම වෙනවා ද? නැද්ද? ඔබට මේ ගැන සිතෙන්නේ කොහොම ද?”
“භවත් කච්චානයෙනි, ඒකාන්තයෙන් ම ඔය විදිහට බලද්දී ඔය සතර වර්ණය ම සම සම වෙනවා ම යි. ඔය කරුණෙහිලා ඔවුන් ගේ කිසිම වෙනසක් දකින්නට නැහැ නෙව.”
“ඒ වගේ ම පින්වත් මහාරාජ, ‘ශ්‍රේෂ්ඨ වර්ණයෙන් යුක්ත වන්නේ බමුණන් විතරයි. අනිත් උදවිය හීන වර්ණයෙන් යුක්තයි. සුදු වර්ණයෙන් යුක්ත වන්නේ බමුණන් විතරයි. අනිත් උදවිය කළු වර්ණයෙන් යුක්තයි. බ්‍රාහ්මණයන් විතරක් පිරිසිදුයි. අබ්‍රාහ්මණයන් එහෙම නෑ. බ්‍රාහ්මණයන් කියන්නේ මහා බ්‍රහ්ම රාජයා ගේ ළයෙහි වැඩුණු දරුවන්. මුඛයෙන් උපන් දරුවන්. බ්‍රහ්මයා ගෙන් ම උපන් දරුවන්. බ්‍රහ්ම නිර්මාණය යි. බ්‍රහ්ම දායාද යි’ වශයෙන් මේ බස පිළිබඳව ලෝකයේ යම් ඝෝෂාවක් තිබෙනවා තමයි. නමුත් ඒ ගැන තේරුම් ගත යුත්තේ ඔන්න ඔය ආකාරයෙනු යි.”
මෙසේ පැවසූ විට මධුරාපුරාධිපති අවන්තිපුත්‍ර රජු ආයුෂ්මත් මහාකච්චානයන් වහන්සේට මෙය පැවසුවා. “භවත් කච්චානයන් වහන්ස, හරි ම සුන්දර යි! භවත් කච්චානයන් වහන්ස, හරි ම සුන්දර යි! යටිකුරු වෙච්ච දෙයක් උඩට හැරෙව්වා වගෙයි. සැඟවෙච්ච දෙයක් විවෘත කළා වගෙයි. මං මුළා වූ කෙනෙකුට මාර්ගය පෙන්වුවා වගෙයි. අඳුරේ සිටින උදවියට රූප දකින්ට තෙල් පහන් දැල්වවූවා වගෙයි. ඔන්න ඔය විදිහට යි භවත් කච්චානයන් වහන්සේ විසින් නොයෙක් ආකාරයෙන් ශ්‍රී සද්ධර්මය වදාළේ. ඉතින් මං භවත් කච්චානයන් වහන්සේව සරණ යනවා. ශ්‍රී සද්ධර්මය ත් සරණ යනවා. ශ්‍රාවක සඟරුවන ත් සරණ යනවා. භවත් කච්චානයන් වහන්සේ අද පටන් දිවි ඇති තුරාවට තෙරුවන් සරණ ගිය උපාසකයෙකු වශයෙන් මාව පිළිගන්නා සේක්වා!”
“පින්වත් මහාරාජ, ඔබ මාව සරණ යන්නට එපා! මම යම් කෙනෙකුන් වහන්සේව සරණ ගියා නම්, ඒ භාග්‍යවතුන් වහන්සේව ම ඔබ ත් සරණ යන්න.”
“භවත් කච්චානයන් වහන්ස, දැන් ඒ භාග්‍යවත් වූ අරහත් වූ සම්මාසම්බුදු රජාණන් වහන්සේ වැඩසිටින්නේ කොහේද?”
“පින්වත් මහාරාජ, දැන් ඒ භාග්‍යවත් වූ අරහත් වූ සම්මාසම්බුදු රජාණන් වහන්සේ පිරිනිවන් පා වදාළ සේක.”
“භවත් කච්චානයන් වහන්ස, ඉදින් අපි දස යොදුනක් දුරින් ඒ භාග්‍යවතුන් වහන්සේ වැඩසිටිනවා කියල අසනවා නම්, ඒ භාග්‍යවත් වූ අරහත් වූ සම්මාසම්බුදු රජාණන් වහන්සේ දකින්නට දස යොදුනක් ගෙවාගෙන හෝ යනවා. ඉදින් අපි විසි යොදුනක් දුරින් වේවා, තිස් යොදුනක් දුරින් වේවා, සතළිස් යොදුනක් දුරින් වේවා, පනස් යොදුනක් දුරින් වේවා ඒ භාග්‍යවතුන් වහන්සේ වැඩසිටිනවා කියල අසනවා නම්, ඒ භාග්‍යවත් වූ අරහත් වූ සම්මාසම්බුදු රජාණන් වහන්සේ දකින්නට ඒ පනස් යොදුන ම ගෙවාගෙන හෝ යනවා. භවත් කච්චානයන් වහන්ස, යම් කලෙක ඒ භාග්‍යවතුන් වහන්සේ පිරිනිවන් පා වදාළ සේක් ද, ඒ පිරිනිවන් පා වදාළ භාග්‍යවතුන් වහන්සේව අපි සරණ යනවා. ශ්‍රී සද්ධර්මය ත් සරණ යනවා. ශ්‍රාවක සඟරුවන ත් සරණ යනවා. භවත් කච්චානයන් වහන්සේ අද පටන් දිවි ඇති තුරාවට තෙරුවන් සරණ ගිය උපාසකයෙකු වශයෙන් මාව පිළිගන්නා සේක්වා!”
සාදු! සාදු!! සාදු!!!
මධුරා පුරයේ දී වදාළ දෙසුම නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/mn2_2-4-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M