☰

ඛුද්දක නිකාය

ථේරී ගාථා

6.6. මහා ප්‍රජාපතී ථේරීගාථා

6.6. මහා ප්‍රජාපතී ගෝතමී තෙරණියගේ ගාථා

157. බුද්ධවීර නමෝත්‍යත්ථු සබ්බසත්තානමුත්තම,
යෝ මං දුක්ඛා පමෝචේසි අඤ්ඤඤ්ච බහුකං ජනං.

157. සියලු සත්වයන්ට වඩා උතුම් වූ බුද්ධ වීරයන් වහන්ස. ඔබවහන්සේට මාගේ නමස්කාරය වේවා! මාවත් මේ අනෙක් බොහෝ ජනතාවත් සංසාරෙන් එතෙර කොට වදාළේ ඔබ වහන්සේමයි.

158. සබ්බදුක්ඛං පරිඤ්ඤාතං හේතුතණ්හා විසෝසිතා,
භාවිතෝ අට්ඨංගිකෝ මග්ගෝ නිරෝධෝ ඵුසිතෝ මයා.

158. මං මේ දුක පිරිසිඳ දැකගත්තා. දුක හදන හේතුව වන තණ්හාව නැති කරල දැම්මා. ආර්ය අෂ්ටාංගික මාර්ගය සම්පූර්ණ කරගත්තා. දුක් නැතිවීම වන නිවනත් සාක්ෂාත් කළා.

159. මාතා පුත්තෝ පිතා භාතා අය්‍යකා ච පුරේ අහුං,
යථාභුච්චං අජානන්තී සංසරීහං අනිබ්බිසං.

159. ජීවිතේ යථාර්ථය නොදැක, පිහිටක් නැතිව සංසාරෙ ඇවිද ගෙන යද්දි, මං අම්මා වුණා. තව වාරෙක මං පුතා වුණා. තව වාරෙක මං තාත්තා වුණා. තව වාරෙක මං සහෝදරයා වුණා. තවත් වාරෙක මං ආච්චි වුණා.

160. දිට්ඨෝ හි මේ සෝ භගවා අන්තිමෝ’යං සමුස්සයෝ,
වික්ඛීණෝ ජාතිසංසාරෝ නත්ථි දානි පුනබ්භවෝ.

160. මං ධර්මය තුළින් භාග්‍යවතුන් වහන්සේව දැකගත්තා. මං මේ දරාගෙන ඉන්නෙ අන්තිම සිරුරයි. ඉපදෙන සංසාරෙ ගෙවිල ගියා. ආයෙත් නම් මට පුනර්භවයක් නෑ.

161. ආරද්ධවිරියේ පහිතත්තේ නිච්චං දළ්හපරක්කමේ,
සමග්ගේ සාවකේ පස්සේ ඒසා බුද්ධාන වන්දනා.

161. පටන් ගත්ත වීරියෙන්ම සිටින, දිවි දෙවෙනි කොට ධර්මයේ හැසිරුන, නිතර ම දැඩි වීර්ය පරාක්‍රමයෙන් යුක්ත, සමගි සම්පන්න ශ්‍රාවක සංඝයාව දැකගන්න. බුද්ධ වන්දනාව කියන්නෙ ඒක.

162. බහුන්නං වත අත්ථාය මායා ජනයි ගෝතමං,
ව්‍යාධිමරණතුන්නානං දුක්ඛක්ඛන්ධං ව්‍යපානුදීති.

162. මහාමායා බිසොවුන් වහන්සේ ගෞතම බුදු සමිඳුන්ව මේ ලෝකෙට බිහි කෙරුවේ බොහෝ දෙනාගේ යහපත පිණිස මයි. ඒ නිසාමයි රෝග-මරණවලින් පෙළෙන මේ සත්වයන්ගේ දුක් දුරු වෙලා ගියේ.

ඉත්ථං සුදං මහාපජාපතීගෝතමී ථේරී ගාථායෝ අභාසීති.

මේ වනාහී මහ ප්‍රජාපතී ගෝතමී නම් රහත් තෙරණිය වදාළ ගාථාවන් ය.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn6_6-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M