☰

ඛුද්දක නිකාය

ථේරී ගාථා

6.4. සුජාතා ථේරීගාථා

6.4. සුජාතා තෙරණියගේ ගාථා

145. අලංකතා සුවසනා මාලිනී චන්දනුක්ඛිතා,
සබ්බාභරණසඤ්ඡන්නා දාසීගණපුරක්ඛතා.

145. මං එදා ලස්සනට හැඳ පැළඳගෙන හිටියේ. මල් මාලාවන් ගෙන් සරසගෙන හිටියේ. සඳුන් කල්ක තවරාගෙන සියළු ආභරණවලින් සැරසිලා දාසියන් පිරිවරා ගෙන හිටියේ.

146. අන්නං පානඤ්ච ආදාය ඛජ්ජභොජ්ජමනප්පකං,
ගේහතෝ නික්ඛමිත්වාන උය්‍යානමභිහාරයිං.

146. ගොඩාක් කෑම බීම ජාතිත්, කැවිලි පෙවිලි වර්ගත් අරගෙන මං උයන් කෙලියට ගියේ.

147. තත්ථ රමිත්වා කීළිත්වා ආගච්ඡන්තී සකං ඝරං,
විහාරං දට්ඨුං පාවිසිං සාකේතේ අඤ්ජනං වනං.

147. උයනට ගිහින් කාල බීල ප්‍රීති වෙලා, ආපහු ගෙදර එනකොට සාකේත නුවර අඤ්ජන වනේ විහාරය බලන්ටත් ගියා.

148. දිස්වාන ලෝකපජ්ජෝතං වන්දිත්වාන උපාවිසිං,
සෝ මේ ධම්මමදේසේසි අනුකම්පාය චක්ඛුමා.

148. එතන බුදු සමිඳාණන් වැඩහිටියේ තුන් ලෝකෙම එළිය කරන පහනක් වගේ. මං උන්වහන්සේ ළඟට ගිහින් වන්දනා කළා. සදහම් ඇස් ඇති මුනිඳුන් මං කෙරෙහි අනුකම්පාවෙන් මට දහම් දෙසුවා.

149. සුත්වා ච ඛෝ මහේසිස්ස සච්චං අප්පටිවිජ්ඣහං,
තත්ථේව විරජං ධම්මං ඵුස්සයිං අමතං පදං.

149. උන්වහන්සේ මහා ඉසිවරයෙක්. ඒ බුදු සමිඳුන්ගේ ධර්මය අහල මං චතුරාර්ය සත්‍යය අවබෝධ කරගත්තා. මට ඒ ආසනයේ දී ම ඒ විරාගී ධර්මය වන අමා නිවන සාක්ෂාත් කරන්ට ලැබුණා.

150. තතෝ විඤ්ඤාත සද්ධම්මා පබ්බජිං අනගාරියං
තිස්සෝ විජ්ජා අනුප්පත්තා අමෝඝං බුද්ධසාසනං.

150. මේ විදිහට සද්ධර්මය දැනගෙනමයි මං බුද්ධ ශාසනේ මහණ වුණේ. මාත් ත්‍රිවිද්‍යාව ලබාගත්තා. බුදු සසුන කියන්නෙ හිස් දෙයක් නම් නොවේ.

ඉත්ථං සුදං සුජාතා ථේරී ගාථායෝ අභාසීති.

මේ වනාහී සුජාතා නම් රහත් තෙරණිය වදාළ ගාථාවන් ය.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn6_6-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M