☰

ඛුද්දක නිකාය

ථේරී ගාථා

6.3. ඛේමා ථේරීගාථා

6.3. ඛේමා තෙරණියගේ ගාථා

139. දහරා ත්වං රූපවතී අහම්පි දහරෝ යුවා,
පඤ්චංගිකේන තුරියේන ඒහි ඛේමේ රමාමසේ.

139. ප්‍රිය ඛේමා, ඔයා තවමත් තරුණයි. ලස්සනයි. මාත් යොවුන් තරුණයෙක්. එන්න, අපි මියුරු සංගීත රසය ලබමින් කාම සැපයේ ඇලී වාසය කරමු.

140. ඉමිනා පූතිකායේන ආතුරේන පභංගුනා,
අට්ටියාමි හරායාමි කාමතණ්හා සමූහතා.

140. (ඒයි මාරය) නිතර රෝග හටගන්න, වහා බිඳිල යන, මේ කුණු ශරීරය ගැන මං පිළිකුලෙන් ඉන්නෙ. ලැජ්ජාවෙන් ඉන්නෙ. කාම තණ්හාවේ මුල් පවා නැති කරලයි මං ඉන්නෙ.

141. සත්තිසූලූපමා කාමා ඛන්ධාසං අධිකුට්ටනා,
යං ත්වං කාමරතිං බ්‍රෑසි අරති දානි සා මම.

141. කාමයන් කියන්නෙ විස පොවපු ආයුධ වගේ දෙයක්. පංච උපාදානස්කන්ධ කියන්නෙ මස් වැදලි වගේ දෙයක්. ඔබ ඔය කාමරතිය කියන දේ මට දැන් අරතියක්.

142. සබ්බත්ථ විහතා නන්දි තමොක්ඛන්ධෝ පදාලිතෝ,
ඒවං ජානාහි පාපිම නිහතෝ ත්වමසි අන්තක.

142. හැම දෙයක් ගැන ම ඇති තණ්හාව නැති කරල දැම්මා. ‘අවිද්‍යාව’ නම් අන්ධකාර කෙලෙස් කඳ බිඳල දැම්මා. මාරය, අන්න ඒ විදිහටයි මේ ගැන දැනගන්ට ඕන. මාරය, මේ කරුණෙන් නැසුණේ ඔබයි.

143. නක්ඛත්තානි නමස්සන්තා අග්ගිං පරිචරං වනේ,
යථාභුච්චං අජානන්තා බාලා සුද්ධිං අමඤ්ඤථ.

143. මෝඩ ජනතාව නැකත්වලට වැඳ වැඳ, වනාන්තරේ ගිනි දෙවියන් ව පුදාගෙන සත්‍ය තත්වය නොදැක පිරිසිදු බව සොයමින් ඉන්නවා.

144. අහඤ්ච ඛෝ නමස්සන්තී සම්බුද්ධං පුරිසුත්තමං,
පමුත්තා සබ්බදුක්ඛේහි සත්ථුසාසනකාරිකාති.

144. නමුත් මං වන්දනා කරන්නෙ පුරුෂෝත්තම බුදු සමිඳාණන්ටයි. මං ශාස්තෘ ශාසනය අනුගමනය කරන, සියලු දුකින් නිදහස් වුණ කෙනෙක්.

ඉත්ථං සුදං ඛේමා ථේරී ගාථායෝ අභාසීති.

මේ වනාහී ඛේමා නම් රහත් තෙරණිය වදාළ ගාථාවන් ය.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn6_6-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M