312. පින්වතී, ඔයා ඉස්සර ගත කළ ජීවිතවල දී මැරීගිය දරුවන් කමින් තමයි ජීවත් වුණේ. ඔයා ඒ කාලෙ රෑ දවල් දෙකේ ම ගොඩාක් තැවි තැවී තමයි හිටියෙ.
313. වාසෙට්ඨි බ්‍රාහ්මණිය, ඔයා ඒ සිය ගණනින් ඔක්කොම දරුවන් කාල, අද තැවෙන්නෙ නැති දැඩි සිතකින් ඉන්නෙ ඇයි?
314. බ්‍රාහ්මණය, අතීතෙ මං විතරක් නොවේ ඔයත් කාල තියෙනවා සිය ගණන් දරුවන්ව ත්, නෑදෑයන්ව ත්.
315. දැන් මං ඒ ඉපදෙන මැරෙන ලෝකයෙන් නිදහස් වෙලා නිවන අවබෝධ කරගෙන ඉන්නෙ. ඒ නිසා මං ශෝක කරන්නෙ නෑ. අඬන්නෙ නෑ. තැවි තැවී ඉන්නෙ නෑ.
316. වාසෙට්ඨි, හරි ම අද්භූත දෙයක් ඔයා ඔය කියන්නෙ. ඔයා කාගෙ ධර්මයක් අවබෝධ කරගෙන ද ඔය තරම් ස්ථාවරයක ඉඳන් කතා කරන්නෙ?
317. බ්‍රාහ්මණය, ඒ සම්මා සම්බුදුරජාණන් වහන්සේ, එතකොට වැඩසිටියේ මිථිලා නගරයේ. සියලු සත්වයන්ගේ දුක් දොම්නස් නැති කරන්ටයි උන්වහන්සේ දහම් දෙසන්නෙ.
318. බ්‍රාහ්මණය, ඒ අරහත් වූ සම්බුදු සමිඳුන්ගේ නිකෙලෙස් සද්ධර්මය මටත් අහන්ට ලැබුණා. ඒ සද්ධර්මය අවබෝධ කරගැනීමෙන් තමයි මගේ දරු දුක නැති වුණේ.
319. එහෙනම් මාත් යනවා මිථිලා නගරෙට. අනේ, ඒ භාග්‍යවතුන් වහන්සේ මාවත් සියලු දුකින් මුදවා ගන්නා සේක් නම් කොයිතරම් හොඳ ද? ඒ බ්‍රාහ්මණයත් හැම දුකින් නිදහස් වුණා. නිකෙලෙස් බුදු සමිඳුන්ව දැකගත්තා.
320. සියලු දුකින් එතෙර වුන බුදු සමිඳුන් එයාටත් සද්ධර්මය දේශනා කළා. දුකත්, දුකේ හටගැනීමත්, දුකේ ඉක්ම යාමත්, ඒ දුක් සංසිඳුවන මාර්ගය වූ ආර්ය අෂ්ටාංගික මාර්ගයත් කියල දුන්නා.
321. එයා සද්ධර්මය අවබෝධ කරගත්ත. මහණ වෙන්ට කැමැත්තක් ඇති වුණා. ඒ සුජාත බ්‍රාහ්මණයා තුන් රැයක් ඇතුළත ත්‍රිවිද්‍යාව ලබාගත්තා.
322. පින්වත් රියැදුර, මෙහෙ එන්න. දැන් ඔයා ගෙදර යන්න. මේ රථය බැමිණියට දෙන්න. මං සනීපෙන් ඉන්න බව කියන්න. දැන් ඒ සුජාත බ්‍රාහ්මණයා මහණ වෙලා ඉන්නෙ. තුන් රැයක් ඇතුළත එයා ත්‍රිවිද්‍යාව ලබාගත්තා කියල කියන්න.
323. එතකොට ඒ රියැදුරා රථයත්, කහවණු දාහකුත් අරගෙන ගිහින් බැමිණියට දුන්නා. බ්‍රාහ්මණයාගේ නීරෝගී කම ගැනත් කිව්ව. දැන් සුජාත බ්‍රාහ්මණයා තුන් රැයක් ඇතුළත ත්‍රිවිද්‍යාව ස්පර්ශ කළ බවත් කිව්වා.
324. පින්වත් රියැදුර, අපේ බ්‍රාහ්මණතුමා ත්‍රිවිද්‍යාව ලබාගත් බව දැනගන්ට ලැබුණ නිසා මේ අශ්ව රථයත්, කහවණු දාහත් පිං පඬුරක් හැටියට මං දැන් ඔයාට ම දෙනවා.
325. පින්වත් බ්‍රාහ්මණිය, මේ අශ්ව රථයත් කහවණු දාහත් ඔබතුමිය තියාගන්න. මාත් ඒ උත්තම ප්‍රඥා ඇති බුදු සමිඳුන් ළඟ මහණ වෙන්ට යනවා.
326. (මව් බැමිණිය) දුවේ, සුන්දරී, ඔයාගෙ තාත්තා, මේ ඇත්තු, අශ්වයො, හරකබාන, මුතු මැණික්, ගේ දොර සම්පත් ඔක්කොම අත්හැරල මහණ වුණා. දැන් මේ ඔක්කොම සම්පත් ඔයා අනුභව කරන්න. අපේ පවුලේ දායාදය අයිති ඔයාට නෙ.
327. (අම්මේ) මගේ තාත්තා පුත්‍ර ශෝකයෙන් ගොඩාක් දුක් වින්දා. අන්තිමේ දී මේ ඇත්තු, අශ්වයෝ, හරකබාන, මුතු මැණික් මේ සුන්දර ගිහි සම්පත් ඔක්කොම අත්හැරල දාල මහණ වුණා. සහෝදර ශෝකෙන් දුක් විඳින මාත් මහණ වෙනවා.
328. දුවේ සුන්දරී, ඔයා ත් බලාපොරොත්තුව ඉන්නෙ උතුම් මහණ ජීවිතේ නම්, ඔයා ගේ ඒ නෙක්ඛම්ම සංකල්පය ඉෂ්ට වේවා! ගෙයක් ගානෙ ඇවිද ගෙන ගිහින් තමයි පිණ්ඩපාතෙ කරගන්ට තියෙන්නෙ. පාංශුකූල සිවුරු තමයි පොරව ගන්ට තියෙන්නෙ. මේවා ලබාගෙන නිකෙලෙස් ජීවිතයක් ඇති කර ගන්න.
329. ආර්යාවනි, එතකොට මං තවමත් සික්ඛමානාවක්. (උපසම්පදාව පුහුණු වන සාමණේරියක්) මං දිවැස් නුවණ පිරිසිදු කරගත්තා. ඉස්සර මං ගත කළ ජීවිතේ ගැන දැනගන්න පුබ්බේනිවාස ඤාණය ලබාගත්තා.
330. භික්ෂුණී සංඝයා ව ශෝභමාන කරන, කල්‍යාණ මිතුරිය වන ආර්යාවෙනි, මං ඔබතුමිය නිසයි ත්‍රිවිද්‍යාව ලබාගත්තේ. බුදු සසුන සම්පූර්ණ කරගත්තේ.
331. ආර්යාවෙනි, මටත් අවසර දෙන්ට, මං කැමතියි සැවැත් නුවරට යන්ට. ශ්‍රේෂ්ඨ වූ බුදු සමිඳාණන් ඉදිරියේ සිංහනාද කරන්ට මාත් කැමැතියි.
332. සුන්දරී, එහෙනම් ඔයා, ඒ රත්තරන් පාටින් බබලන ශාස්තෘන් වහන්සේ ව බැහැදකින්න. නොදැමුණු උදවිය දමනය කරන, කිසි ලෙසකිනුත් බිය නැති ඒ බුදු සමිඳුන්ව දැකගන්න.
333. සුන්දරී, ඔයත්, හැම දුකින් ම මිදුණු, කෙලෙස් රහිත වූ වීතරාගී වූ, කිසිම දෙයක් සමඟ එක් නොවූ සදහම් මග වඩා අවසන් කළ, කෙලෙස් රහිත බුදු සමිඳුන්ව දැක බලාගන්න.
334. මහා වීරයන් වහන්ස, මං බරණැසින් පිටත් වෙලා ඔබවහන්සේව බැහැ දකින්ට ආවේ. මං ඔබවහන්සේගේ ශ්‍රාවිකාවක් වූ සුන්දරී. මං ඔබවහන්සේගේ සිරි පා කමල් වන්දනා කරන්නම්.
335. බ්‍රාහ්මණ මුනිඳාණනි, ඔබවහන්සේ බුද්ධ වන සේක. ශාස්තෘ වන සේක. මම ත් ඔබ වහන්සේ ගේ හදවතින් ඉපදුණේ. ඒ නිවන් මගින් ඉපදුණේ. නිවන් මග සම්පූර්ණ කරගෙන, නිකෙලෙස් වූ දියණියක්.
336. සොඳුරු තැනැත්තී, ඔබගේ ඔය පැමිණීම ඉතා යහපත්. අයහපත් පැමිණීමක් නම් නොවේ. දමනයට පත්වෙච්ච ශ්‍රාවිකාවන් ඔය විදිහම තමයි. වීතරාගී ව කිසිවක් හා එක් වෙන්නෙ නැතිව, නිවන් මග සම්පූර්ණ කරගෙන, නිකෙලෙස් සිතින් ශාස්තෘන් වහන්සේ ගේ පා යුග වඳින්ට එනවා.
මේ වනාහී සුන්දරී නම් රහත් තෙරණිය වදාළ ගාථාවන් ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn6_20-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M