☰

ඛුද්දක නිකාය

ථේර ගාථා

7.1.3. භද්දත්ථේරගාථා

7.1.3. භද්ද තෙරුන්ගේ ගාථා

473. ඒකපුත්තෝ අහං ආසිං පියෝ මාතු පියෝ පිතු
බහූහි වතචරියාහි ලද්ධෝ ආයාචනාහි ච

473. මං තමයි පවුලෙ එකම දරුවා. අම්මා තාත්තා මට පුදුම ආදරයක් තිබුණා. නොයෙක් වත්පිළිවෙත් කරලා බාර හාර වෙලයි මං ඉපදුණේ.

474. තේ ච මං අනුකම්පාය අත්ථකාමා හිතේසිනෝ
උභෝ පිතා ච මාතා ච බුද්ධස්ස උපනාමයුං

474. ඇත්තෙන්ම අම්ම තාත්ත දෙන්න මට හරිම ආදරෙයි. මගේ යහපත ගැනමයි කල්පනා කළේ. අන්තිමේදී ඒ ගොල්ල මාවත් වඩාගෙන බුදු සමිඳාණන් ළඟට අරගෙන ගියා.

475. කිච්ඡා ලද්ධෝ අයං පුත්තෝ සුඛුමාලෝ සුඛෙිධිතෝ
ඉමං දදාම තේ නාථ ජිනස්ස පරිචාරකං

475. ස්වාමීනී, මේ දරු සිඟිත්තා ලබාගත්තෙ ඉතා දුක් විඳලා. මේ දරුවා හරි සියුමැලියි. සැප දීලයි හැදුවේ. ඉතින් අපි ලොවට යහපත සදන ‘නාථ ජින’ වූ ඔබවහන්සේගේ ශිෂ්‍යයෙක් හැටියට තබාගන්නට මේ දරු සිඟිත්තා දැන් පූජා කරනවා.

476. සත්ථා ච මං පටිග්ගය්හ ආනන්දං ඒතදබ්‍රවි
පබ්බාජේහි ඉමං ඛිප්පං හෙස්සත්‍යාජානියෝ අයං

476. ශාස්තෘන් වහන්සේ මාව පිළිගත්තා. ආනන්ද තෙරුන්ට මෙසේ වදාළා. ‘ආනන්දයෙනි, ඉක්මනට මේ දරු සිඟිත්තාව පැවිදි කරන්න. මේ දරුවා අද්විතීය පුරුෂයෙක් වනු ඇත’

477. පබ්බාජෙත්වාන මං සත්ථා විහාරං පාවිසී ජිනෝ
අනෝග්ගතස්මිං සුරියස්මිං තතෝ චිත්තං විමුච්චි මේ

477. ශාස්තෘන් වහන්සේ මාව මහණ කරල වෙහෙරට වැඩියා. දවල් කාලෙ ගෙවෙන්ට ඉස්සර වෙලා සුළු වෙලාවකින් මගේ හිත සියලු කෙලෙසුන් ගෙන් නිදහස් වුණා.

478. තතෝ සත්ථා නිරංකත්වා පටිසල්ලානවුට්ඨිතෝ
ඒහි භද්දා’ති මං ආහ සා මේ ආසූපසම්පදා

478. එදා හවස් වරුවේ භාවනාවෙන් නැගී සිටි ශාස්තෘන් වහන්සේ ‘පින්වත් භද්‍ර, මෙහාට එන්න’ කියල මට වදාළා. ඒක තමයි මගේ උපසම්පදාව.

479. ජාතියා සත්තවස්සේන ලද්ධා මේ උපසම්පදා
තිස්සෝ විජ්ජා අනුප්පත්තා අහෝ ධම්මසුධම්මතා’ති.

479. මං උපසම්පදාව ලබන කොට වයස අවුරුදු හතයි. මාත් ත්‍රිවිද්‍යාව ලබාගත්තා. අහෝ! මේ සද්ධර්මය ආශ්චර්ය යි.

ඉත්ථං සුදං ආයස්මා භද්දෝ ථේරෝ ගාථායෝ අභාසිත්ථා’ති.

මෙය වනාහී ආයුෂ්මත් භද්ද නම් රහත් මුනිඳුන් වදාළ ගාථාවන්ය.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_7-1-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M