☰

ඛුද්දක නිකාය

ථේර ගාථා

6.1.8. මිගජාලත්ථේරගාථා

6.1.8. මිගජාල තෙරුන්ගේ ගාථා

417. සුදේසිතෝ චක්ඛුමතා බුද්ධේනාදිච්චබන්ධුනා
සබ්බසංයෝජනාතීතෝ සබ්බවට්ටවිනාසනෝ

417. සූර්ය වංශයෙහි උපන් දහම් ඇස් ඇති බුදු සමිඳුන් දේශනා කරන්නේ සියළු බන්ධන වලින් නිදහස් වන ධර්මයක්. සියළු ආකාරයේ කෙලෙස් නසන ධර්මයක්.

418. නිය්‍යානිකෝ උත්තරණෝ තණ්හාමූලවිසෝසනෝ
විසමූලං ආඝාතනං ඡෙත්වා පාපේති නිබ්බුතිං

418. මේ සද්ධර්ම මාර්ගය නිවනට පමුණුවනවා. සසරින් එතෙර කරවනවා. තණ්හාවේ මුල් වියලා දමනවා. පළිගැනීම් නැති කරනවා. නිවන කරා ගෙනියනවා.

419. අඤ්ඤාණමූලභේදාය කම්මයන්තවිඝාටනෝ
විඤ්ඤාණානං පරිග්ගහේ ඤාණවජිරනිපාතිනෝ

419. අවිද්‍යාවේ මුල් සිඳෙනවා. කර්මය නම් වූ ඇන්ජිම කඩනවා. ඥානය නම් වූ දියමන්ති ආයුධයෙන් විඤ්ඤාණයෙන් බැඳෙන තැනට පහර දෙනවා.

420. වේදනානං විඤ්ඤපනෝ උපාදානප්පමෝචනෝ
භවං අංගාරකාසුං ව ඤාණේන අනුපස්සකෝ

420. වින්දනයේ සැබෑ තත්වය පෙන්වා දෙනවා. බැඳීම්වලින් නිදහස් කරනවා. භවයේ ස්වභාවය ගිනි අඟුරු විලසින් පෙන්නා දෙනවා.

421. මහාරසෝ සුගම්භීරෝ ජරාමච්චුනිවාරණෝ
අරියෝ අට්ඨංගිකෝ මග්ගෝ දුක්ඛූපසමනෝ සිවෝ

421. ජරා මරණ වලකනවා. දුක සන්සිඳවනවා. සත්‍ය රසය වෑහෙන ඒ සුන්දර ධර්මය වනාහී ආර්ය අෂ්ටාංගික මාර්ගයයි.

422. කම්මං කම්මන්ති ඤත්වාන විපාකා ච විපාකතෝ
පටිච්චුප්පන්නධම්මානං යථා වා ලෝකදස්සනෝ
මහාඛේමංගමෝ සන්තෝ පරියෝසානභද්දකෝ‘ති.

422. කර්මය, කර්මය වශයෙන්ම අවබෝධ කර දෙනවා. විපාකය විපාක වශයෙන් අවබෝධ කරදෙනවා. පටිච්ච සමුප්පාදය තුළින් ජීවිතයේ ඇත්ත තත්වය පෙන්වා දෙනවා. ඉතා යහපත් කෙම් බිමකට රැගෙන යන මේ ශාන්ත ධර්මය අවසානය දක්වාම සුන්දරයි.

ඉත්ථං සුදං ආයස්මා මිගජාලෝ ථේරෝ ගාථායෝ අභාසිත්ථා‘ති.

මෙය වනාහී ආයුෂ්මත් මිගජාල නම් රහත් මුනිඳුන් වදාළ ගාථාවන්ය.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_6-1-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M