892. එයා අම්මා තාත්තා අත්හැරියා නම්, සහෝදර සහෝදරියන් අත්හැරියා නම් නෑදෑයන් අත්හැරියා නම්, පංච කාම ගුණත් අත්හැරියා නම් අන්න එයා භාවනා කළ යුත්තේ අනුරුද්ධ වගේ.
893. ඒ කාලෙ මං වටේ තිබුණෙ නැටුම් ගැයුම්. මං නැගිට්ටෙ සංගීතයේ හඬින්. මාරයාගෙ තොණ්ඩුව වන කාමයට අහුවෙලා හිටියේ. නමුත් ඒකෙන් කිසිම පිරිසිදු බවක් ලැබුණෙ නෑ.
894. ඒ කාමයන් අතහැරලා බුදු සසුනට කැමැති වෙලා, මේ සෑම කෙලෙස් සැඩ පහරක් ම තරණය කරලා, භාවනා කරනවා නම්, අනුරුද්ධ වගේ කරන්ට කියන්නෙ.
895. රූප, ශබ්ද, ගන්ධ, රස, පහස කියන මේවාට සිත ඇදිල යනවා. ඒ කෙරෙහි ඇල්ම අත්හැරලා භාවනා කරනවා නම් කළ යුත්තේ අනුරුද්ධ වගේ.
896. පිණ්ඩපාතෙන් පස්සෙ මුනිවරයා ඉන්නෙ තනියම. එයාට තෘෂ්ණාව නම් වූ දෙවෙනියෙක් නෑ. කෙලෙස් නැති අනුරුද්ධ සොයාගෙන යන්නෙ පාංශුකූල වස්ත්‍රයක්.
897. එයාට හොඳට සිහි කල්පනාව තියෙනවා. ඒ නිකෙලෙස් අනුරුද්ධ මුනිවරයාට පාංශුකූල වස්ත්‍රයක් හම්බ වුණා. ඒක හොඳට සේදුවා. පඬු පෙව්වා. ඒක තමයි පොරව ගත්තෙ.
898. ආසාවල් ගොඩක් තියාගෙන, ලැබිච්ච දෙයකින් සතුටු වෙන්න බැරිව, පිරිසක් සමඟ එකතු වෙලා, උඩඟු සිතින් කල් ගෙවන්ට පටන් ගත්තොත්, ඒවා ඔක්කොම එයාට පාපී කෙලෙස් බවට පත්වෙනවා.
899. නමුත්, හොඳට සිහිය පිහිටුවාගෙන ආසාවන් අඩුකරගෙන ලද දෙයින් සතුටු වෙලා, එකඟ සිතින්, පටන් ගත්තු වීරියෙන් යුතුවම වාසය කළොත්,
900. ඒවා ඔක්කොම එයාට බෝධි පාක්ෂික ධර්ම බවට පත් වෙනවා. මහ ඉසිවර මුනිඳුන් එයා ගැන පැවසුවේ කෙලෙස් නැති කෙනෙක් කියලා.
901. ලෝකයට අති උතුම් ශාස්තෘන් වහන්සේ මගේ සිතුවිලි දැනගත්තා. ඉර්ධි බලයෙන් මනෝමය ශරීරයක් මවාගෙන මං ළඟට වැඩියා.
902. මං හිතපු දේවල් ගැන ශාස්තෘන් වහන්සේ මට ලස්සනට විස්තර කරලා දුන්නා. අමා නිවනට ඇලී සිටින බුදු සමිඳුන් අමා නිවන ගැනමයි වදාළේ.
903. උන්වහන්සේගේ ධර්මය දැනගෙනමයි මං ශාසනයට කැමති වුණේ. මාත් ත්‍රිවිද්‍යාව ලබාගත්තා. බුද්ධ ශාසනය සම්පූර්ණ කරගත්තා.
904. මං නොනිඳා භාවනා කිරීම පටන් අරගෙන දැන් අවුරුදු 55ක් වෙනවා. නිදිමත සම්පූර්ණයෙන්ම නැතිකරලා දැන් අවුරුදු 25ක් වෙනවා.
905. නිවනෙහි සිත පිහිටුවා ගෙන සිටිය, අකම්පිත සිත් ඇති බුදු සමිඳුන්ගේ ආශ්වාස ප්‍රශ්වාස නැතිවෙලා ගියා. දහම් ඇස් ඇති මුනිඳුන් තණ්හාවෙන් තොරව ශාන්ත වූ නිවනම අරමුණු කරගෙන පිරිනිවන් පෑවා.
906. උන්වහන්සේට තිබුණේ කිසිම කැලඹීමක් නැති හිතක්. ඒ සිතින් හැම වේදනාවක්ම ඉවසාගෙන හිටියා. තණ්හාවෙන් නිදහස් වෙලා තිබුණා. ඒ විමුක්ති චිත්තය පහනක් නිවිල යනවා වගේ නිවිල ගියා.
907. දැන් ඉතුරුවෙලා තිබෙන්නෙ උන්වහන්සේගේ අවසන් ජීවිතයේ ඇස්, කන්, නාසාදී ඉඳුරන් පස විතරයි. සම්බුදු රජාණන් වහන්සේ නමක් පිරිනිවන් පෑවට පස්සේ වෙන කිසි දෙයක් ඉතුරු වෙන්නෙ නෑ.
908. ඒයි තණ්හා දැල, දැන් ඉතින් මට වුණත් ආයෙ ආයෙමත් දිව්‍ය ලෝකයකවත් වාසයක් නෑ. ඉපදෙන සංසාරය ගෙවිල ගියා. ආයෙමත් පුනර්භවයක් නෑ.
909. එයාට පුළුවන් බ්‍රහ්ම ලෝකය සහිත ලෝක දාහක් ගැන එක මොහොතකින් දැනගන්නට. එයාට ඉර්ධි බලයක් තියෙනවා. චුතූපපාත ඤාණයක් තියෙනවා. දෙවිවරුනුත් සුදුසු කලට ඒ භික්ෂුව බලන්න පැමිණෙනවා.
910. ඉස්සර ජීවිතයක මෙයා ඉතාම දුප්පත් වෙලා හිටියෙ. ඉඳුල් ආහාර අරගෙන යනවා. එයාගෙ නම ‘අන්නභාර’. හරිම දුක සේ හිටියේ. ඒ කාලෙ වැඩහිටියා ‘උපරිට්ඨ’ කියන පසේ බුදුවරයන් වහන්සේ. උන්වහන්සේව කවුරුත් දන්නවා. මෙයා උන්වහන්සේට දානයක් පූජා කළා.
911. මේ ජීවිතයේදී මං ශාක්‍යකුලයේ ඉපදුණේ. අනුරුද්ධ කියන කීවාම කවුරුත් දන්නවා. නැටුම් ගැයුම් පිරිල තිබුණා. සංගීත හඬට නින්දෙන් නැගිට්ටා.
912. එක දවසක්, කිසිම විදිහකින් බියක් නැති ශාස්තෘ වූ බුදු සමිඳුන් දැකගත්තා. උන්වහන්සේ ගැන මගේ හිත ගොඩක් පැහැදුණා. ඊට පස්සේ ගිහි ජීවිතය අතහැරලා මං මහණ වුණා.
913. සංසාරෙ මං කලින් ගත කරපු ජීවිත ගැන දැන ගන්න පුබ්බේනිවාස ඤාණය ලබාගත්තා. මං සිය වතාවක් තව්තිසා දෙව්ලොව ඉපදිලා තියෙනවා.
914. මම සත් වතාවක් රජ වෙලා තියෙනවා. සාගරය සීමා කරගෙන, මේ පොළොව ජය අරගෙන, දඹදිවට අග රජු වෙලා දඬු මුගුරු නැතිව ධාර්මිකව පාලනය කරලා තියෙනවා.
915. මිනිස් ලෝකයෙන් චුත වෙලා දිව්‍ය ලෝකයේ සත් වතාවක් ඉපදුණා. ඊට පස්සේ මිනිස් ලෝකයේ සත් වතාවක් ඉපදුණා. මං දෙව්ලොව ඉන්න කොටත් පුබ්බේනිවාස ඤාණය තිබ්බා.
916. සතරවන ධ්‍යානය හරිම ශාන්තයි. හොඳට සිත එකඟ වෙනවා. සංසිඳීම ඇතිවෙනවා. එතකොට තමයි මං දිවැස් නුවණ පිරිසිඳු කරගත්තේ.
917. සතරවන ධ්‍යානයේ ඉඳල තමයි මං මේ සත්වයන්ගේ කර්මානුරූපව චුත වීම ඉපදීම සිදුවුණ ආකාරය දැනගත්තේ.
918. ශාස්තෘන් වහන්සේව ගෞරවයෙන් ඇසුරු කළා. බුදු සසුන සම්පූර්ණ කරගත්තා. කෙලෙස් බර පැත්තකින් තිබ්බා. භව රැහැන කපල දැම්මා.
919. මං ඉන්නේ ‘වජ්ජි’ රටේ ‘බේලුව’ කියන ගමේ. දැන් මගේ ආයුෂත් ඉවර වෙලා තියෙන්නෙ. මේ උණ පඳුරක් සෙවණේ මා නිකෙලෙස් සිතින් පිරිනිවන් පානවා.
මෙය වනාහී ආයුෂ්මත් අනුරුද්ධ නම් රහත් මුනිඳුන් වදාළ ගාථාවන්ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_20-1-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M