☰

ඛුද්දක නිකාය

පේතවත්ථු

1.11. නාග පේත වත්ථු

1.11. නාග ප්‍රේත වස්තුව

73. පුරතෝව සේතේන පලේති හත්ථිනා
මජ්ඣේ පන අස්සතරීරථේන
පච්ඡා ච කඤ්ඤා සිවිකාය නිය්‍යති
ඕභාසයන්ති දස සබ්බසෝ දිසා.

73. එක දිව්‍ය පුත්‍රයෙක් සුදු ඇත් වාහනයකින් ඉස්සර වෙලා යනවා. තව දිව්‍ය පුත්‍රයෙක් වෙළඹුන් යෙදූ රථයකින් මැදට වෙලා යනවා. පසු පස්සෙන් දිව්‍ය කන්‍යාවක් මණ්ඩපයකින් යනවා. එතකොට දස දිසාවම බබලනවා.

74. තුම්හේ පන මුග්ගරහත්ථපාණිනෝ
රුදම්මුඛා භින්නපභින්නගත්තා
මනුස්සභූතා කිමකත්ථ පාපං
යේනඤ්ඤ මඤ්ඤස්ස පිවාථ ලෝහිත‘න්ති.

74. ඒ වුණාට ඔබලා නම් අත්වලින් දඬුමුගුරු අරගෙන, හඬ හඬා හොඳටම කැඩුණු බිඳුණු අතපය ඇතිව යනවා. ඊළඟට එකිනෙකාගෙ ලේ බිබී ඉන්නවා. මිනිස් ලෝකෙ ඉන්න කාලෙ ඔබලා කරපු පාපය මොකක්ද?

75. පුරතෝව යෝ ගච්ඡති කුඤ්ජරේන
සේතේන නාගේන චතුක්කමේන
අම්හාක පුත්තෝ අහු ජෙට්ඨකෝ සෝ
දානානි දත්වාන සුඛී පමෝදති.

75. පාද හතරකින් යුතු සුදු හස්තිරාජයෙක් ඉන්න වාහනයෙන් යන එක්කෙනෙක් ඉන්නවා. එයා අපේ ලොකු පුතා. දන් දුන්නා නෙව. දැන් ඉතින් සැප විඳිමින් සතුටු වෙනවා.

76. යෝ සෝ මජ්ඣේ අස්සතරී රථේන
චතුබ්භි යුත්තේන සුවග්ගිතේන
අම්හාක පුත්තෝ අහු මජ්ඣිමෝ සෝ
අමච්ඡරී දානපතී විරෝචති.

76. අර වෙළඹුන් හතර දෙනෙක් බැඳපු අශ්වරථයෙහි මැදට වෙලා ගමන් කරන කෙනෙක් ඉන්නවනේ. එයා අපේ මධ්‍යම පුතා. මසුරු කෙනෙක් නෙවෙයිනෙ. දානපතියෙක් වෙලයි එයා බබලන්නෙ.

77. යා සා ච පච්ඡා සිවිකාය නිය්‍යති
නාරී සපඤ්ඤා මිගමන්දලෝචනා
අම්හාක ධීතා අහු සා කනිට්ඨා
භාගඩ්ඪභාගේන සුඛී පමෝදති.

77. අර රන්සිවි ගෙයකින් ගෙන යන දෙවඟනක් ඉන්නවනේ. ඇය හරි නුණැත්ති. මුවැත්තියක වගේ අඩවන් නෙත් තියෙනවා. ඈ අපේ බාල දෝණි. තමාට ලැබිච්ච කොටසින් භාගයක්ම දන් දුන්නා. දැන් ඉතින් සැප සේ සතුටු වෙනවා.

78. ඒතේ ච දානානි අදංසු පුබ්බේ
පසන්නචිත්තා සමණබ්‍රාහ්මණානං
මයම්පනං මච්ඡරිනෝ අහුම්හා
පරිභාසාකා සමණබ්‍රාහ්මණානං
ඒතේ පදත්වා පරිචාරයන්ති
මයඤ්ච සුස්සාම නළෝව ඛිත්තෝ‘ති.

78. ඔය දරුවො ටික ඉස්සර දන් දුන්නා. සිත පහදවාගෙන ශ්‍රමණ බ්‍රාහ්මණයන්ටයි දන් දුන්නෙ. ඒකට අපි, මසුරුකමින් හිටියා. ශ්‍රමණ බ්‍රාහ්මණයන්ට නින්දා අපහාස කළා. දරුවො ටික දිව්‍ය සැපෙන් සතුටු වෙනවා. ඒකට අපි. කපල අව්වෙ දාපු බට ගස් වගේ වේලි වේලි ඉන්නවා.

79. කිං තුම්හාකං භෝජනං කිං සයනං
කථංසු යාපේථ සුපාපධම්මිනෝ
පහූතභෝගේසු අනප්පකේසු
සුඛං විරාධාය දුඛජ්ජ පත්තා‘ති.

79. ඔබලාගේ කෑම බීම් මොනවාද? මොනවායේද නිදාගන්නෙ? මහා පවිටුන් වන ඔබලා ජීවත් වෙන්නෙ කොහොමද? හොඳට දේපල වස්තුව තියෙන කාලෙ ලැබිච්ච සැප වරදවා අරගෙන අද ඉතින් දුක් විඳිනවා.

80. අඤ්ඤමඤ්ඤං වධිත්වාන පිවාම පුබ්බලෝහිතං
බහුං පීත්වා න ධාතා හෝම නච්ඡාදිම්හසේ මයං

80. අපි කරන්නෙ එකිනෙකාට වදහිංසා කරගෙන ගලන ලේ සැරව බොන එකයි. අපිට කොච්චර බිව්වත් ඇතිවෙන්නෙ නෑ. අපට එකිනෙකා රුස්සන්නෙ නෑ.

81. ඉච්චේව මච්චා පරිදේවයන්ති
අදායකා පෙච්ච යමස්ස ඨායිනෝ
යේ තේ විදිත්වා අධිගම්ම භෝගේ
න භුඤ්ජරේ නාපි කරොන්ති පුඤ්ඤං

81. දන් පැන් නොදෙන මිනිස්සු මරණින් මත්තෙ පෙරේත ලෝකෙට යනවා. ගිහින් වැළපි වැළපි ඉන්නවා. සමහර මිනිස්සු භෝග සම්පත් ලබාදෙන විට තමන් අනුභව කරන්නෙත් නෑ. පින් කරගන්නෙත් නෑ.

82. තේ ඛුප්පිපාසූපගතා පරත්ථ
පේතා චිරං ඣායරේ ඩය්හමානා
කම්මානි කත්වාන දුඛුද්‍රයානි
අනුභොන්ති දුක්ඛං කටුකප්ඵලානි

82. ඒ පෙරේතයන් අධික බඩගින්නකින්, පිපාසයකින් පීඩා විඳිනවා. බොහෝ කලක් දුකෙන් තැවි තැවී පිච්චෙනවා. ඔය දුක ඇති වෙන පාපකර්ම කරලයි කටුක ඵල ඇති දුක් අනුභව කරන්නෙ.

83. ඉත්තරං හි ධනං ධඤ්ඤං ඉත්තරං ඉධ ජීවිතං
ඉත්තරං ඉත්තරතෝ ඤත්වා දීපං කයිරාථ පණ්ඩිතෝ

83. ධනධාන්‍ය කියන දේවල් මොහොතකින් ඉවරයි. මේ ජීවිතය වුනත් මොහොතකින් ඉවරයි. මොහොතකින් ඉවර වෙලා යන දෙය පවතින්නේ මොහොතක් බව තේරුම් ගත්තු නුවණැති උදවිය තමන්ව දුකට යට නොවන දුපතක් කර ගන්නවා.

84. යේ තේ ඒවං පජානන්ති නරා ධම්මස්ස කෝවිදා
තේ දානේ නප්පමජ්ජන්ති සුත්වා අරහතං වචෝ‘ති.

84. ධර්මය තේරුම් ගන්ට දක්ෂ මිනිස්සු ඉන්නවා. එයාල ඔය කාරණය ඔය විදිහටම දන්නවා. රහතන් වහන්සේලාගේ ධර්මය අහලා දන් දෙන්න ප්‍රමාද වෙන්නෙ නෑ.

සාදු! සාදු!! සාදු!!!

නාගපේතවත්ථු ඒකාදසමං.

එකොළොස්වෙන නාග ප්‍රේත වස්තුවයි.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn4_1-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M